2. Ов мэхтэй хүн гэж юу болох, тэдний илрэл юу вэ?

Холбогдох Бурханы үг:

Хүмүүс завхарсан сатанлаг зан чанараараа амьдрахдаа юу ч хийж байсан дүр эсгэж, өөрсдийгөө үзэмжтэй болгож, далд арга заль гаргахад хүрнэ; тэд бүх зүйл дээр ов мэх ашиглаж, ов мэх гаргаж, овсгоо самбаатай байх нь дорд зүйл огт биш гэж итгэнэ. Худалдан авалт хийх зэрэг энгийн зүйл дээр хүртэл ов мэх өвөрлөдөг хүмүүс бий. Жишээ нь, тэр хүн маш загварлаг хос гутал авахдаа “Ах эгч нар энэ гутлыг өмсөж байгааг минь харчихвал намайг мөнгөө үр ашигтай зүйлд зарцуулахгүй байна гэж хэлэх нь гарцаагүй учраас би энэ гутлыг тэдний өмнө өмсөхгүй. Би хүлээж байгаад цуглаан хийгээгүй үед өмсөнө, энэ гутал моодноос гарч, ямар ч үнэ цэнгүй харагдах хүртэл нь хүлээж байгаад өмсөнө” гэж боддог. Энэ тал дээр чи хэрхэн авирлахаас үл хамааран, яаж ч харсан бай, ийм тооцоотой сэтгэлгээтэй байх чинь ов мэх гаргаж байгаа хэрэг бус уу? Чи аль хэдийнээ ов мэхээр амьдарч, аль хэдийнээ ийм маягаар үйлдэхэд бэлэн байна. Тэгэхээр чи яагаад ов мэх гаргадаг юм бэ? Чи сэдэл, зорилгодоо захирагдаж байна уу? Эдгээр зорилго чинь зөв үү? Тэдгээрийн мөн чанар нь юу вэ? Чамайг сатанлаг зан чанар чинь захирч байна, тийм үү? Чи зорилгодоо хүрэхийн тулд тодорхой арга хэрэглэж, ов мэх гаргадаг, тийм биз дээ? Чи хүмүүсийн өмнө нэг янзаар, ардуур нь бас өөр янзаар үйлддэг. Чи зальжин зан гаргаж, хоёр талд тоглож байна—ийм зан авир нь ов мэх гаргаж байгаа хэрэг. Та нар үүнийг юу гэх вэ: Ов мэхтэй хүмүүс тэнэг, тийм үү? Зарим хүнээс өөрийгөө задлан шинжил гэж шаардмагц яагаад сэтгэл нь шаналаад унадаг вэ? Учир нь тэдний өчүүхэн башир заль нь тэнэг, болхи, олиггүй харагддаг—тэдгээр нь бусдад харуулахад хэтэрхий ичгүүртэй, өөдгүй хүмүүсийн сэжигтэй үйл хэрэг юм. Ов мэхтэй хүмүүсийн үйл хэргийг бүгдэд харуулахаар ил гаргаж хэзээ ч болохгүй. Яагаад тэр вэ? Яагаад гэвэл тэд өөрсдийгөө яг ил болгох гэж байхдаа гэнэтхэн: “Ингэж байдаг би яасан тэнэг юм бэ? Би яаж ийм зэвүүцмээр байж чадав аа?” гэж ухаардаг. Тэд бүр өөрсдөдөө ч зэвүүцдэг. Гэвч тэд үүнийгээ өөрийн эрхгүй хийдэг—тэд үргэлж тэгж авирлахыг хүсдэг; учир нь тэд төрөлхийн ов мэхтэй бөгөөд ямар ч юм хийсэн, ов мэхтэй уг чанар нь аяндаа илэрдэг—маш өчүүхэн жижиг асуудал дээр ч ов мэхтэй уг чанараа илчилдэг. Тэд ямар ч зүйл дээр биеэ барьж чаддаггүй; энэ бол тэдний эмзэг цэг юм… Ов мэхтэй хүмүүс өөрийн эрхгүй ов мэхтэй байдлаа илчилдэг, түүгээр ч барахгүй тэд хэзээ ч, хаана ч хамаагүй тэгдэг. Энэ бол тэдний сурах хэрэгтэй, бусдаар заалгах шаардлагатай зүйл биш; маш энгийн бөгөөд худал хуурмаг, шударга бус байдал шаардлагагүй асуудал дээр тэд шударга бус замыг л сонгож, хүмүүсийг хуурахын тулд худал хэлнэ.

Эцсийн өдрүүдийн Христийн ярианы тэмдэглэл номын “Үнэнч хүн байх хамгийн үндсэн хэрэгжүүлэлт”-ээс эш татав

Ов мэхтэй хүмүүсийн үндсэн шинж бол тэд нөхөрлөл хийж байхдаа хэнд ч хэзээ ч сэтгэлээ нээдэггүй; өөрсдийгөө маш гүн гүнзгий нуудаг. Түүнчлэн, тэдний хэлж байгаа зүйл үнэн худлын алин болохыг хэн ч олж мэдэж чаддаггүй. Цаашлаад тэд дүр үзүүлж, цэц булаалдахдаа тун гаргууд; сайн, ариун журамт, цайлган, бусдад хайрлагдаж, хүндлэгддэг хүний дүр эсгэдэг. Тэдэнтэй харилцаж байхдаа чи дотроо юу бодож байгааг нь хэзээ ч мэдэхгүй; аливаа зүйлийн талаарх үзэл бодол, хандлага нь үнэндээ ямар болохыг тэд хэнд ч хэлдэггүй бөгөөд хамгийн ойр дотнын хүмүүс нь ч мэддэггүй. Тэд зүрх сэтгэлээ нээдэггүй; ямар ч нууцаа задалдаггүй. Түүгээр ч барахгүй, бас хүн чанартай, маш сүнслэг, үнэнийг эрэлхийлдэг мэт дүр эсгэдэг. Хэн ч тэднийг тийм биш гэж боддоггүй.

Антихристүүдийг илчлэх нь номын “Тэд Бурханы оршин тогтнолд итгэдэггүй, Христийн мөн чанарыг үгүйсгэдэг (I)”-аас эш татав

Хэрвээ чи ов мэхтэй бол бүх хүн, бүх хэрэг явдалд сэрэмжилж, сэжиглэж хандах бөгөөд тиймээс Надад итгэх итгэл чинь хардлагын суурин дээр үндэслэнэ. Ийм итгэлийг Би хэзээ ч хүлээн зөвшөөрч чадахгүй. Жинхэнэ итгэлгүй болохоор чамд жинхэнэ хайр бүр ч байдаггүй. Хэрвээ чи Бурханд эргэлзэж, Түүний талаар хүссэнээрээ боддог бол гарцаагүй хамгийн зальтай хүн юм. Бурхан хүнтэй адил байж чадах эсэхийг чи эргэцүүлэн боддог: уучилшгүй нүгэлтэй, жудаггүй, шударга бус, эрүүл ухаангүй, шударга ёсны мэдрэмж дутмаг, муу арга заль хэрэглэдэг, урвамтгай, зальхай, ёрын муу, харанхуйд дуртай гэх мэт. Хүмүүс ийм бодолтой байдгийн шалтгаан нь тэдэнд Бурханы талаарх өчүүхэн төдий ч мэдлэг байдаггүйгээс болдог бус уу? Тийм итгэл нь нүглээс өөрцгүй! Түүнчлэн, Миний таалалд нийцдэг хүмүүс бол яг нарийндаа бялдууч, зусарчид бөгөөд ийм чадвар дутмаг хүмүүсийг Бурханы гэрт ч хүлээн авахгүй, тэд тэнд хөлөө олoхгүй гэж итгэдэг хүмүүс ч бий. Энэ олон жилийн турш эзэмшсэн мэдлэг чинь энэ үү? Та нарын олж авсан зүйл энэ үү? Миний талаарх та нарын мэдлэг зөвхөн ийм буруу ойлголтоор зогсдоггүй; Бурханы Сүнсийг доромжилж, Тэнгэрийг гутаадаг чинь үүнээс ч дор. Ийм учраас, та нарынх шиг ийм итгэл та нарыг Надаас улам холдуулж, Намайг илүү их эсэргүүцэхэд хүргэнэ гэж Би хэлдэг.

Үг нь махбодоор илэрсэн номын “Газар дээрх Бурханыг хэрхэн мэдэх вэ”-ээс эш татав

Юу бодож байгаагаа илчилж, бусадтай хэлэлцдэггүй хүн байж болно. Тэрээр бүхнийг хийхдээ бусадтай хэзээ ч зөвлөлддөггүй, харин ч зожгирч, цаг үргэлж бусдаас болгоомжилсон юм шиг байж, өөрсдийгөө аль болох зай завсаргүй далдалдаг. Энэ зальжин хүн бус уу? Жишээлбэл, түүнд мэргэн гэж санагдсан санаа байлаа гэхэд тэр “Одоохондоо би дотроо хадгалж байя. Хэрвээ би үүнийг хуваалцчихвал та нар ашиглаад миний амжилтыг надаас урьтан зарлаж магад. Би азная” гэж боддог. Эсвэл бүрэн ойлгохгүй зүйл байвал “Би одоо бодсоноо хэлэхгүй. Хэрвээ би хэлээд, хэн нэгэн илүү дээгүүр үнэлэгдэх зүйл хэлбэл би тэнэг юм шиг харагдах бус уу? Хүн болгон намайг нэвт харж, эндэх сул талыг минь харна. Би юу ч хэлж болохгүй” гэж бодно. Тиймээс харах өнцөг юм уу, эргэцүүллээс үл хамааран, цаад шалтгаас үл хамааран хүн бүр өөрсдийг нь нэвт шувт харна гэж эмээдэг. Тэд өөрийн үүрэг, хүмүүс, юмс, үйл явдалд үргэлж ийм харах өнцөг, хандлагаар ханддаг. Энэ ямар зан чанар вэ? Шударга бус, ов мэхтэй, ёрын муу зан чанар. Өнгөн дээрээ тэд бусдад бүгдийг хэлсэн юм шиг, өөрсдийгөө чадна гэдэгт итгэж байгаагаа хэлсэн юм шиг харагддаг боловч цаанаа бол зарим нэг зүйлийг хэлэхгүй үлдээдэг. Нэр хүнд, ашиг сонирхлыг нь хөндөх зүйлийг тэд хэзээ ч, хэнд ч эцэг эхдээ ч хүртэл хэлдэггүй. Тэд хэзээ ч ийм зүйлийг хэлдэггүй. Ингэх нь төвөгтэй!

Эцсийн өдрүүдийн Христийн ярианы тэмдэглэл номын “Үнэнийг хэрэгжүүлснээр л хэвийн хүн чанарыг эзэмшиж чадна”-аас эш татав

Зарим хүн хэнд ч үнэнийг хэлдэггүй. Заримдаа тэд хэлж байгаа зүйлийнхээ үнэн, худлыг өөрсдөө ч мэддэггүй—өөрсдөө будилдаг. Тэд бусадтай ярихдаа үргэлж бодож, ямар нэгэн зүйл хэлэхийн үр дагавар нь ямар байх талаар үргэлж тунгаан бодож байдаг. Тэд юм хэлэхээсээ өмнө, үүнийг ингэж хэлбэл яах вэ, тэгж хэлбэл яах вэ, яавал бусдыг хуурч, хэрэг явдлын үнэнийг ойлгуулахгүй байх вэ хэмээн үнэлж дүгнэн, таамагладаг. Энэ ямар зан чанар вэ? Энэ бол ов мэхтэй байдал. Хүн ов мэхтэй зан чанараа өөрчлөхөд амархан уу? Зан чанарын юуг ч өөрчлөхөд амархан биш. Зарим хүн өөрийнхөө талаар ямар нэг зүйл илчилчхээд ингэж боддог: “Би тэдэнд жинхэнэ бодлоо мэдүүлчихлээ. Энэ муу шүү. Үүнийг эргүүлэх арга олж—тэдэнд үнэнийг мэдүүлэхгүйн тулд үүнийг өөрөөр хэлэх ёстой.” Тэд ингэж бодож, төлөвлөдөг бөгөөд үйлдэх гэж байхдаа ов мэх хэмээх нэг төрлийн зан чанарыг илчилдэг. Тэд ямар нэг чөтгөрлөг зүйл хийх гэж байгаа. Тэд ямар нэг зүйл хийхээсээ ч өмнө ов мэхтэй байдлаа илчилсэн байдаг. Энэ бол зан чанарын нэг төрөл юм. Ямар нэг юм хэлсэн, хийсэн эсэх чинь хамаагүй—энэ зан чанар үргэлж дотор чинь байж, чамайг захирч, заль гаргаж, хуурч мэхлэн, хүмүүсээр тоглож, үнэнийг нууж, өөрийгөө аятайхан харагдуулахад чамайг хүргэдэг. Энэ бол ов мэхтэй байдал юм. Ов мэхтэй хүмүүс ямар тодорхой зүйлсийг хийдэг вэ? Жишээ нь, хоёр хүн хоорондоо яриад нэг нь: “Сүүлийн үед би зарим нэг нөхцөл байдлыг тууллаа, Бурханд итгэсэн энэ жилүүд үнэхээр хий дэмий байсан юм шиг санагдаж байна. Би бүтэлгүй хүн юм! Ядуурч хоосорсон, хөөрхийлөлтэй еэ! Би нэлээд хугацаанд сайн гүйцэтгэл гаргасангүй. Би цаашид өөрийгөө эргүүлж олж авахаар эрмэлзэх болно” хэмээн хэллээ гэж бодъё. Ингэж хэлэх нь ямар үр нөлөөтэй байх вэ? Нөгөө нь үүнийг сонсоод: “Энэ хүн гэмшжээ—бүрэн дүүрэн гэмшиж. Жинхэнээсээ. Би үүнд эргэлзэж болохгүй. Тэр сайн тал руугаа өөрчлөгдөж. Бүр өөрийгөө бүтэлгүйтсэн хүн, сүүлийн үед тулгарсан асуудлуудыг нь бүгдийг нь Бурхан зохион байгуулсан гэж хэлсэн. Тэр захирагдаж чаддаг юм байна” гэж бодно. Сонсож байгаа хүндээ ингэж нөлөөлснөөрөө ярьж байгаа хүн зорилгодоо хүрсэн үү? (Тийм ээ.) Тэгэхээр тэдний жинхэнэ байдал яг хэлсэн шиг нь байдаг уу? Тийм байх албагүй. Тэдний хэлсэн зүйл тийм нөлөө үзүүлсэн боловч хийсэн зүйл нь хэлсэн шиг нь байгаагүй. Ингэж хэлж байгаа санаа нь тэдний хэлж байгаа байдал, хүрэхийг хүссэн үр дүн юм. Ярихдаа тэд үргэлж ямар нэгэн зүйлд хүрэхийг хичээж, үргэлж ямар нэг сэдэл агуулж, зорилгодоо хүрэхийн тулд тодорхой нэг арга барил, үг үргэлж ашигладаг. Энэ нь ямар зан чанар вэ? Энэ бол ов мэхтэй байдал бөгөөд үнэхээр хорон муу юм! Үнэндээ тэд муу муухай, үгүйрч хоосорсон, хөөрхийлөлтэй байгаагаа огтхон ч мэддэггүй. Тэд өөрсдийгөө ойлгож, гэмшсэн гэж чамд санагдуулахын тулд чамд таалагдаж, өөрсдийнхөө талаар сайхан сэтгэгдэл төрүүлэх зарим нэг сүнслэг үг хэл л ашигладаг. Ингэж нөлөөлөх нь ов мэхтэй байдал биш гэж үү?

Эцсийн өдрүүдийн Христийн ярианы тэмдэглэл номын “Зан чанараа өөрчлөхийн тулд завхарсан зан чанарын зургаан талыг ойлгох ёстой”-оос эш татав

Ов мэхтэй хүмүүс үнэнийг хэрэгжүүлэх үедээ ов мэх гаргадаг уу? Үнэнийг хэрэгжүүлэх нь тэднээс төлөөс төлж, ашиг сонирхлоосоо татгалзаж, бусдад өөрийгөө ил болгохыг шаарддаг. Гэвч тэд ямар нэг зүйлийг хэлдэггүй; тэд ярихдаа хагасыг нь л ил болгож, үлдсэнийг нь хадгалж үлддэг. Бусад хүн тэднийг ямар утгаар хэлснийг нь үргэлж таамаглаж, ямар санаатай байгааг нь ухаж ойлгохын тулд үргэлж тааж олох ёстой болдог. Тэд аргалах боломж өөрсдөдөө үргэлж гаргаж, бултаж зайлах боломжийг өөрсдөдөө олгодог. Бусад хүн ов мэхтэй гэдгийг нь хармагцаа тэдэнтэй харьцах хүсэлгүй болж, тэдэнтэй харьцахдаа үргэлж болгоомжилж, юу ч хэлсэн итгэхгүй, хэлсэн үг нь үнэн худал эсэхэд, хэр зэрэг үнэний хувьтай бол гэж эргэлздэг. Тиймээс ч, хүмүүс зүрх сэтгэлдээ тэдэнд итгэхээ больж, хүмүүсийн сэтгэлд тэдний эзлэх жин маш бага болох юм уу огт жин дардаггүй. Хүмүүсийн сэтгэлд эзлэх чиний байр суурь, жин ийм билээ. Тэгэхээр өмнө нь байхад Бурхан чамайг яаж харах вэ? Хүнтэй харьцуулахад Бурхан хүмүүсийг илүү үнэн зөв, илүү гярхай, илүү бодитой хардаг.

Эцсийн өдрүүдийн Христийн ярианы тэмдэглэл номын “Үнэнч хүн байх хамгийн үндсэн хэрэгжүүлэлт”-ээс эш татав

Чи үргэлж өөрийн махан бие, хэтийн ирээдүйг бодож байдаг, махан биеийн зовлон зүдүүрийг нимгэлж, хүчин чармайлт бага гаргаж, багыг зориулж, бага төлөөс төлөхийг үргэлж хүсдэгийн дээр аргалах боломж өөртөө үргэлж гаргадаг—энэ бол чиний ов мэхтэй хандлага. Чи Бурханы төлөө зарлагадахдаа бас хоёр дахин бодож: “Айн! Бурханд өөрийгөө зориулах аа? Би бас сайхан амьдрах хэрэгтэй шүү дээ; Бурханы ажил дуусахгүй бол би яах вэ? Тэгэхээр би байгаа бүхнээ өгөхгүй. Бурханы үг хэзээ биелэхийг бид мэдэхгүй учраас би болгоомжтой байж, хоёр дахин бодох ёстой. Ар гэрийн амьдралаа зохицуулж, хэтийн ирээдүйгээ зохицуулж, шийдмэгцээ би өөрийгөө Бурханд зориулах болно” гэж хэлдэг. Ийнхүү цааргалах нь мөн л хууран мэхэлж, хуурмаг үйлдэл хийж буй хэрэг бөгөөд энэ нь үнэнч шударга хандлага биш юм. Ах эгч нартай харилцах үедээ зарим хүн, тэд зүрх сэтгэл доторх бэрхшээлийг нь олж мэдээд, өөрсдийнх нь талаар ямар нэг юм хэлэх юм уу дорд үзэх байх гэж айдаг. Ярих үедээ тэд үнэхээр зүтгэлтэй, Бурханыг үнэхээр хүсдэг, үнэнийг хэрэгжүүлэх үнэхээр дуртай гэсэн сэтгэгдэл төрүүлэхийг үргэлж хичээдэг боловч үнэн хэрэгтээ, зүрх сэтгэл дотроо туйлын сул дорой, идэвхгүй байдаг. Тэд бусдад өөрсдийгөө мэдэгдэхгүйн тулд хүчтэй дүр эсгэдэг. Энэ ч бас ов мэх юм. Дүгнэн хэлбэл, чи юу хийхээс үл хамааран—амьдрал дээр ч бай, Бурханд үйлчилж, үүргээ биелүүлж байсан ч бай, хүмүүст хуурамч дүр үзүүлж, үүнийгээ ашиглан өөрийнхөө талаар өндөр сэтгэгдэл төрүүлэх гэсэндээ, эсвэл дорд үзэгдэхгүй гэсэндээ тэднийг төөрөгдүүлбэл ов мэхтэй байгаа хэрэг юм.

Эцсийн өдрүүдийн Христийн ярианы тэмдэглэл номын “Үнэнч хүн байх хамгийн үндсэн хэрэгжүүлэлт”-ээс эш татав

Үүнийг та нар юу гэх вэ: Ов мэхтэй хүмүүстэй хамт амьдрах залхмаар, тийм үү? (Тийм ээ.) Тэдний хувьд залхмаар уу? Тэдний хувьд ч бас залхмаар байдаг, учир нь ов мэхтэй байна гэдэг үнэнч шударга байхаас өөр. Үнэнч шударга хүн энгийн байдаг—сэтгэлгээ нь тийм ч адармаатай биш. Харин ов мэхтэй хүний тухайд, тэр үргэлж тойруугаар ярьж, юу ч ярьсан хэзээ ч илэн далангүй байдаггүй. Тэдний хувьд ч бас залхмаар байдаг; үргэлж заль мэх гаргаж, худал хэлснээ далдлах нь ядаргаатай байдаг. Тэд байнга тархиа гашилгаж, бодол ээдүүлэн, болгоомжгүйгээсээ болоод үг унагахаас эмээж байдаг. Зарим хүн заль гаргаад хэр хол явдаг болохыг чи мэдэх үү? Тэд хүн болгонтой өрсөлддөг. Тэд сэтгэлээр унаж, шөнө унтаж чадахгүй болох хүртлээ чармайдаг. Үүнээс тэд ямархуу хэмжээний ов мэхтэйг харж болно. Үнэнч шударга хүний амьдралаар амьдрах залхмаар биш: Үнэнч шударга хүн санасан бодсоноо хэлж, юу бодож байгаагаа илчилдэг, бодсоныхоо дагуу үйлдэж, бүх зүйл дээр Бурханы хүслийг эрж хайж, Бурханы хүслийн дагуу үйлддэг. Гагцхүү тэдний мэдэхгүй газар байж болно, тиймээс ирээдүйд тэд илүү ухаалаг байх ёстой, өсөж дэвжихээ зогсоож хэзээ ч болохгүй. Харин ов мэхтэй хүмүүс тийм биш. Тэд Сатаны гүн ухаан, өөрсдийн ов мэхтэй уг чанар, мөн чанарт түшиглэж амьдардаг. Бусад хүн өөрсдийнх нь талаар ямар нэг зүйл мэдэх вий гэсэндээ тэд хийж байгаа бүх зүйлдээ болгоомжтой байх ёстой байдаг; тэд эрт орой хэзээ нэгэн цагт өөрсдийгөө илчлэх вий гэж эмээсэндээ хийж байгаа юм болгондоо өөрсдийн арга барил, ов мэхтэй, шударга бус залийг ашиглан үнэн нүүр царайгаа далдалдаг—өөрсдийгөө илчилчихвэл асуудлыг залруулах гэж оролдох ёстой болдог. Өөрсдийгөө илчлэхгүй байхаар оролдоход амаргүй байх үе байдаг бөгөөд байдал сайнгүй байх үед сэтгэл нь ихэд зовниж, бусад хүн өөрсдийг нь нэвт шувт харах вий гэхээс тэд айдаг. Тэгээд бусад хүн тэднийг нэвт шувт харах үед тэд бусдын өмнө нүүргүй болсон мэт, дараа нь нөхцөл байдлыг залруулахын тулд ямар нэг зүйл хэлэх ёстой мэт тэдэнд санагддаг. Ийнхүү наашаа цаашаа явах нь тэдэнд ядаргаатай байх бус уу? Тэд тархиа байнга гашилгадаг; тархиа гашилгадаггүй байсан бол тэр бүх үг хаанаас гарч ирдэг байх вэ? Хэрвээ үг, үйлдэл чинь үнэнч шударга, далд санаагүй бол чи юу ч хийсэн, хийсэн л бол хийсэн, үнэн төрхөө харуулна гэж санаа зовох шаардлагагүй. Чамд яаж ядаргаатай байх болох юм бэ? Харин ов мэхтэй хүмүүсийн хэлж, хийж байгаа зүйлийн ард далд сэдэл үргэлж байдаг бөгөөд тэр нь ил болмогц түүнийгээ залруулах арга бодож олох гэж яарч, тэгээд чамайг хуурч, тэр бол шал өөр асуудал гэж бодуулахын тулд өөр царай төрх гаргана. Энэ нь тэдний хувьд тун ядаргаатай байдаг. Тэдэнтэй харилцах явцдаа тэдний ийм маягаар үйлдэх нь ямар тэнэг болохыг, тэд энэ бүх зүйлийг хэлэх ямар ч шаардлагагүй болохыг чи ойлгоно. Үнэндээ тэдний тайлбарлах шаардлагагүй зарим нэг зүйл байдаг, тэдгээрийн талаар чи юу ч бодохгүй байх байсан боловч тэр хүмүүс хүч гарган тэдгээрийг тайлбарлаж, нөхцөл байдлыг аврахаар залхтал чинь ярьдаг. Юм болгоныг тайлбарлах шаардлагагүй байсан бол тийм ч ядаргаатай байхгүй байсан гэж тэдэнд өөрсдөд нь ч бас санагддаг. Өөрийгөө чамаар хүлээн зөвшөөрүүлж, итгүүлэхийн тулд чамайг өөрийг нь буруу ойлгохоос хэрхэн сэргийлэхээ, үг, үйлдлийнх нь цаана муу санаа байхгүй гэдгээ чамд хэрхэн итгүүлэхээ бодож олох гэж тэд байнга толгойгоо ажиллуулж байдаг. Иймээс тэд эргэцүүлж бодсоор байдаг. Тэд шөнө унтаж чадахгүй байх үедээ энэ талаар боддог; өдөр нь юм идэж чадахгүй бол энэ талаар боддог; эсвэл бусадтай өөр асуудлын талаар хэлэлцэж байхдаа бас л үүнийг эрж хайх тал дээр ажилласаар байдаг. Тэд өөрсдийгөө тийм хүн биш, сайн хүн юм шиг бодогдуулж, тийм утгаар хэлээгүй гэж чамд санагдуулахын тулд үргэлж дүр эсгэдэг. Ов мэхтэй хүмүүс ийм байдаг.

Эцсийн өдрүүдийн Христийн ярианы тэмдэглэл номын “Үнэнч хүн байх хамгийн үндсэн хэрэгжүүлэлт”-ээс эш татав

Уг чанарын асуудал нь сул доройтох хоромд л гардаг зүйлс биш, харин амьдралын туршид тууштай байдаг. Хүний хийдэг юм бүхэн тэр хүний үнэрийг шингээдэг, уг чанарынх нь элементийг шингээдэг. Тэдгээр элемент заримдаа ил харагдахгүй байсан ч гэсэн хүний дотор байж байдаг. Жишээлбэл, ов мэхтэй хүн нэг удаа үнэнчээр ярихад үгэн дотор нь үг байж л байх бөгөөд ов мэх нь холилдсон байдаг. Ов мэхтэй хүн өөрийнхөө хамаатнуудыг, бүр хүүхдүүдээ ч гэсэн оролцуулаад хэнийг ч зальдана. Чи түүнтэй хэчнээн илэн далангүй байх нь хамаагүй тэр чамаар тоглоом шоглоом хийнэ. Энэ бол түүний уг чанарын жинхэнэ дүр төрх—тэр ийм уг чанартай. Үүнийг өөрчлөхөд хэцүү бөгөөд тэр цаг үргэлжид тийм байдаг. Үнэнч хүмүүс заримдаа зальжин, ов мэхтэй зүйл хэлж болох боловч тийм хүн ихэнхдээ харьцангуй үнэнч байдаг; тэрээр аливааг шулуун шударгаар хийдэг бөгөөд бусадтай харилцах үедээ тэднийг ашигладаггүй. Бусадтай ярих үедээ тэднийг туршихын тулд аливааг санаатайгаар хэлдэггүй; зүрх сэтгэлээ нээж, бусадтай ярилцаж чаддаг бөгөөд нэлээд шударга хүн гэдгийг нь хүн бүхэн хэлдэг. Түүнд ов мэхтэй байдлаар ярих үе мөн л байдаг; гэхдээ тэрээр ов мэхтэй хүн биш учраас тэр нь ердөө завхарсан зан чанарын илэрхийлэл бөгөөд түүний уг чанарыг төлөөлдөггүй.

Эцсийн өдрүүдийн Христийн ярианы тэмдэглэл номын “Хүний уг чанарыг хэрхэн мэдэх вэ”-ээс эш татав

Антихрист ангиллын хүмүүсийн хувьд, угийн хоёр нүүртэй байдал нь тэдний хүн чанарт илэрдэг гол шинжүүдийн нэг юм. Тэдний үг яриа, хэлдэг зүйл, түүнийгээ хэлэх байдал, илэрхийлэх арга маяг, ярианых нь утга санаа, цаад сэдлээс энэ хүмүүс бол хэвийн хүн чанаргүй бөгөөд хэвийн хүн чанараас Бурханы шаарддаг үнэнч занг эзэмшдэггүй гэдэг нь харагддаг. Үүнээс гадна, энэ хүмүүсийн хүн чанарт байдаг угийн хоёр нүүртэй байдал нь жирийн хүмүүсийн худал үг, хууран мэхлэлтээс хавьгүй илүү ноцтой юм. Энэ нь жирийн нэг завхарсан зан чанар биш, эсвэл хэвийн бус хүн чанарын ердийн л нэг илрэл биш; тэд ихэнх хүнийг бодвол худал хэлэхдээ илүү бэлхэн бөгөөд илүү дадамгай байдаг. Ихэнх хүн худал хэлэх үедээ худал үг зохиож, үүнийгээ анхааралтай бодох хэрэгтэй байдаг; харин энэ төрлийн хүн юу ч зохиох шаардлагагүй, эсвэл бодох ч хэрэггүй: Тэд ам нээгээд л худлаа хэлдэг бөгөөд нэг л мэдэхэд чи хууртсан байна. Удаан ойлгоцтой хүмүүс тэдний худал үг, хууран мэхлэлтийг хоёр гурван өдөр зарцуулж байж ойлгохоор байдаг; тэгээд л тэр хүн юу гэснийг нь ухаардаг. Ухвар мөчид, оюуны чадамж багатай хүмүүс хэдэн жилийн дараа ч ойлгоогүй хэвээр байж магад; тэр хүний хэлсэн үг ямар утгатай байсныг насан туршдаа огт мэдэхгүй өнгөрч ч магадгүй. Антихрист худал хэлж хэвшсэн байдаг: Тэдний хүн чанарын онцлог юу вэ? Энэ нь хэвийн хүн чанарын нэг хэсэг биш гэдэг нь тодорхой. Нарийн яривал, чөтгөрийн уг чанар юм. Тэдний угийн хоёр нүүртэй байдал, худал үг, хууран мэхлэлт: Эдгээр нь сургуульд сурсан зүйлээ хийх арга зам мөн үү? Тэдгээр нь хэтийдсэн мэдлэгийн үр дүн мөн үү? Эцэг эхийн сургаал, нөлөөллөөс болсон уу? (Үгүй.) Эдгээр зүйл бол тэдний төрөлх уг чанар юм. Тэд эдгээр зүйлтэй төрсөн; хэн ч тэднийг хүчлээгүй, хэн ч тэдэнд ийм зүйл заагаагүй. Зүгээр л байж байгаа нь тэр—тэд угаасаа хоёр нүүртэй. Үүнээс гадна, тэд худал үгээсээ хэзээ ч ичиж, санаа зовдоггүй, мөн үүндээ хэзээ ч шаналж, тавгүйтдэггүй. Тэд худал хуурмагтаа санаа зовдоггүйгээр үл барам өөрсдийгөө маш сэргэлэн, асар ухаантай гэж үргэлж боддог; худал үг, өөр арга заль хэрэглэн бусдыг аргалж, хууран мэхэлж чаддаг болохоор азтай, бахтай санагдаж, нууцхан баярладаг. Антихристүүд бол бусдыг овжин ашиглаж, хууран мэхлэхийн тулд байнга худал ярьдаг төрлийн хүмүүс юм. Яаж үнэнч шударга хүн болох тухай бусдын номлол, нөхөрлөлийг сонсож дуусаад тэдний санаа зовдог уу? Өөрсдийгөө зэмлэдэг үү? (Үгүй.) Тэд өөрсдийгөө буруутгадаггүй, санаа зовдоггүй гэдгийг яаж мэдэж болох вэ? Өөрсдийгөө хэзээ ч задлан шинжилдэггүй баримтаар нь. Тэд хэзээ ч сэтгэлээ уудалж, худал хуурмагаа илчилдэггүй, үнэнч шударга биш гэдгээ хэзээ ч хүлээн зөвшөөрдөггүй. Үүнээс гадна, тэд хэрэгтэй гэж үзсэн үедээ худал хэлж, хүмүүсийг хуурсаар л байдаг. Тэр нь тэдний уг чанар бөгөөд үүнийг өөрчлөх ямар ч аргагүй. Энэ уг чанар нь хэвийн хүн чанарын илэрхийлэл биш; үнэн хэрэгтээ энэ нь чөтгөрийн уг чанар билээ.

Антихристүүдийг илчлэх нь номын “Антихристүүдийн хүн чанарын онцлог, тэдний зан чанарын мөн чанарыг нэгтгэн дүгнэх нь (I)”-аас эш татав

Өмнөх: 1. Үнэнч хүн гэж юу болох, яагаад Бурхан хүмүүсээс үнэнч байхыг шаарддаг тухай

Дараах: 3. Ов мэхтэй хүмүүс яагаад аврал хүртэж чаддаггүй тухай

Одоо үед гай гамшиг ойр ойрхон тохиолдож, Эзэн эргэн ирэх тухай зөгнөлүүд үндсэндээ биелсэн. Бид Эзэнийг хэрхэн угтан авч болох вэ?

Холбогдох контент

Тохиргоо

  • Текст
  • Загвар

Цулгуй өнгө

Загвар

Үсгийн хэв

Үсгийн хэмжээ

Мөр хоорондын зай

Мөр хоорондын зай

Хуудасны өргөн

Гарчиг

Хайх

  • Энэ текстийг хайх
  • Энэ номоос хайх