1. Жинхэнэ гэмшил гэж юу болох, үүний илрэлүүд нь юу вэ?

Холбогдох Бурханы үг:

Нэгэн цагт хүн бүр Бурханыг эсэргүүцсэн ба нэгэн цагт хүн бүр Бурханы эсрэг тэрсэлсэн. Гэвч хэрвээ чи бие махбодтой болсон Бурханыг дуртайяа дуулгавартай дагаж, энэ үеэс эхлэн үнэнч байдлаараа Бурханы зүрх сэтгэлийг хангалуун байлгаж, хэрэгжүүлэх учиртай үнэнийг хэрэгжүүлж, биелүүлэх учиртай үүргээ биелүүлж, мөрдөх учиртай дэг журмыг мөрддөг бол чи Бурханыг сэтгэл хангалуун байлгахын тулд тэрслүү байдлаа хаяхыг хүсдэг, Бурханаар төгс болгуулж чадах хүн юм. Чи алдаагаа харахаас татгалзаж, гэмших санаагүй байвал, мөн Бурхантай хамтран ажиллаж, Бурханыг сэтгэл хангалуун байлгах өчүүхэн ч болов санаа зорилгогүйгээр тэрслүү үйлдлээ хэвээр үргэлжлүүлж байвал чам шиг ийм зөрүүд, тэнэг хүн гарцаагүй шийтгүүлэх ба Бурханаар төгс болгуулах нэгэн байж хэзээ ч чадахгүй. Тийм болохоор чи өнөөдөр Бурханы дайсан, маргааш ч бас Бурханы дайсан байх бөгөөд цаашид ч Бурханы дайсан хэвээр үлдэх болно; чи үүрд Бурханыг эсэргүүцэгч, Бурханы дайсан байх болно. Тэгвэл Бурхан чамайг яаж хэлтрүүлж чадах юм бэ? Бурханыг эсэргүүцэх нь хүний уг чанар боловч уг чанараа өөрчлөх нь дааж давшгүй байдгаас болоод хүн Бурханыг эсэргүүцэх “нууцыг” зориуд эрж хайх ёсгүй. Хэрвээ тийм бол хэтэрхий оройтохоосоо өмнө явсан чинь дээр, ирээдүйд гэсгээлт чинь илүү хатуу ширүүн болох вий, мөн зэрлэг догшин уг чанар чинь гарч ирж, махан бие чинь эцэстээ Бурханаар устгуулахдаа тултал дийлдэшгүй болох вий. Чи ерөөл хүртэхийн тулд Бурханд итгэдэг; гэвч эцэст нь золгүй явдал л чамд тохиолдох юм бол ичгүүртэй байх бус уу? Өөр төлөвлөгөө зохиосон нь хамаагүй дээр гэж Би та нарыг шавдуулж байна. Өөр юу ч хийсэн бай, Бурханд итгэхээс дээр байх болно: Мэдээж ганцхан энэ зам л байдаг байж таарахгүй. Та нар үнэнийг эрж хайгаагүй бол үргэлжлүүлэн амьдрах байсан биз дээ? Яах гэж ийм маягаар Бурхантай зөрөлдөх ёстой гэж?

Үг нь махбодоор илэрсэн номын “Бурханыг мэддэггүй бүх хүн бол Бурханыг эсэргүүцдэг хүмүүс юм”-аас эш татав

Хүн болгон их бага хэмжээнд гэм буруу үйлдсэн байдаг. Чи ямар нэг зүйлийг гэм буруу гэж мэдэхгүй байх үедээ үүнд ухаан сэхээгүй байдлаар хандаж, аль эсвэл өөрийн санаа бодол, хэрэгжүүлэлт, ойлгох арга замтай зууралдсаар байж магад. Гэхдээ ах эгч нарын нөхөрлөл юм уу Бурханы илчлэлээр дамжуулан нэг л өдөр чи энэ бол гэм буруу, Бурханд халдаж буй хэрэг гэдгийг олж мэддэг. Тэр үед чи ямар хандлагатай байх вэ? Бас л хүлээзнэж, учирлаж, маргаж, өөрийн санааг баримталж, хийж байгаа зүйл чинь үнэнтэй нийцдэг гэж итгэсээр байх гэж үү? Энэ нь чиний Бурханд хандах хандлагатай хамаатай. Давид өөрийн гэм бурууд ямар хандлагаар хандаж байсан бэ? Гэмшил—тэр гэм бурууг үйлдэхээ больсон. Тэгээд тэр яасан бэ? Өөрийг нь шийтгээч гэж Бурханаас гуйн залбирсан: “Хэрвээ би дахин ийм алдаа гаргавал Бурхан намайг шийтгэж, үхэлд хүргэх болтугай!” гэсэн. Давидын шийдвэр ийм байсан бөгөөд энэ нь жинхэнэ гэмшил байсан юм. Ердийн хүмүүс үүнд хүрч чаддаг уу? Ердийн хүмүүс маргах гэж оролдохгүй, хариуцлагаа үг дуугүй хүлээн зөвшөөрөх юм бол сайн хэрэг, гэхдээ тэд зүрх сэтгэлдээ, “Үүнийг дахин хэн ч сөхөхгүй гэж найдъя. Би элэг доог болно шүү дээ” гэж боддог. Энэ жинхэнэ гэмшил мөн үү? Үнэхээр гэмшихийн тулд чи урьдын ёрын муугаа хаяж, орхиж, дахин тийм зүйл хийхгүй байх ёстой. За, тэгэхээр яах ёстой вэ? Зүгээр л ёрын мууг хаяж, тийм зүйл хийхгүй, тэр талаар бодохгүй байхад л болох уу? Бурханд чи яаж ханддаг вэ? Бурхан одоо чамайг илчилж байгаад ямар хандлага баримтлах вэ? (Бид Бурханы шийтгэлийг хүлээн авна.) Бурханы шийтгэл, шүүлт, гэсгээлтийг хүлээн авах нь үүний нэг хэсэг. Нөгөө хэсэг нь Бурханы шийтгэлийг хүлээн авах зуураа Бурханы шинжихийг зөвшөөрөх явдал юм. Аль аль хэсгийг хүлээн авах үед чиний шийдвэр ямар байх вэ? Ирээдүйд тиймэрхүү нөхцөл, тийм асуудалтай тулгарах үедээ чи яах вэ? Жинхэнэ гэмшилгүйгээр хүн ёрын мууг хаяж чадахгүй бөгөөд хаана ч, хэзээ ч бахь байдагтаа эргэн орж, өнөөх л муу зүйлээ хийж, нөгөө л гэм бурууг үйлдэж, нэг алдаагаа ахин дахин гаргаж магад. Энэ нь үнэнд болон Бурханд хандах хүний хандлагыг илчилдэг.

Бурханы нөхөрлөлөөс эш татав

Эхэндээ хүмүүс үнэнийг хэрэгжүүлэхдээ дурамжхан байдаг. Үүргээ үнэнчээр биелүүлэхийг жишээ болгон аваад үз. Өөрийн үүргийг биелүүлж, Бурханд үнэнч байх талаар чамд зарим нэг ойлголт байдаг бөгөөд чи бас холбогдох үнэнийг ойлгодог боловч хэзээ өөрийгөө Бурханд бүрэн зориулж чадах юм бэ? Хэзээ чи өөрийнхөө үүргийг үг хэл, үйл хэргээрээ биелүүлэх юм бэ? Үүнд үйл явц шаардагдана. Энэ явцад чи олон бэрхшээл туулж болох юм. Зарим хүн чамтай харьцаж, бусад нь чамайг шүүмжилж магадгүй. Хүн бүхний харц чам дээр тогтох ба тэр үед л чи буруутайгаа ухаарч, үнэндээ тааруухан ажилласан нэгэн мөн гэдгээ, үүргээ биелүүлэхэд үнэнч зан дутмаг байх нь хүлээн зөвшөөрөх аргагүй гэдгийг, мөн хааш яаш, хайхрамжгүй байх ёсгүй гэдгээ ухаарч эхэлнэ. Ариун Сүнс чамайг дотроос чинь гэгээрүүлж, алдаа гаргах үед чинь зэмлэнэ. Энэ явцад чи өөрийнхөө талаар зарим зүйлийг ойлгож, хэтэрхий их хольцтой гэдгээ, үүргээ биелүүлэхдээ хэтэрхий олон хувийн сэдэл өвөрлөдөг, дэндүү олон давруу хүсэлтэй байдаг гэдгээ мэднэ. Эдгээр зүйлийн мөн чанарыг ойлгомогцоо чи Бурханы өмнө ирж залбиран, үнэхээр гэмшиж чадна; ийм маягаар чи тэрхүү бохироос цэвэрлэгдэж чадна. Хэрэв чи өөрийн бодит асуудлуудыг шийдэхийн тулд ийм маягаар байнга үнэнийг эрж хайвал итгэлийн зөв замд аажмаар хөл тавина. Хүний завхарсан зан чанар ариусах тусам амь зан чанар нь төдий чинээ өөрчлөгдөнө.

Эцсийн өдрүүдийн Христийн ярианы тэмдэглэл номын “Зан чанараа өөрчлөх талаар мэдэх ёстой зүйл”-ээс эш татав

Зан чанарын өөрчлөлт нь янз бүрийн зан чанараас үүдсэн янз бүрийн байдлыг танихаас эхэлдэг. Хэрэв хүн үүнийг таньж эхлээгүй, бодит байдлын энэ талд ороогүй бол зан чанар нь өөрчлөгдөх боломжгүй. Тэгэхээр, зан чанарын өөрчлөлт боломжгүй юм бол хүмүүсийн олонх нь үүргээ гүйцэтгэх явцдаа ямар дүрд тоглодог юм бэ? Тэд хүчин чармайлт гаргаж, даалгавар гүйцэтгээд завгүй байдаг. Тэд үүргээ гүйцэтгэж байгаа боловч ихэнх нь махран хөдөлмөрлөж байгаа. Заримдаа тэд сайхан зантай байхаараа илүү их хүчин чармайлт гаргаж, харин тийм ч сайхан зантай биш байвал бага хүчин чармайлт гаргадаг. Ингэснийхээ дараа тэд үүнийгээ эргэцүүлэн бодоод бага зэрэг харамсах сэтгэл төрдөг учраас арай илүү их эрч хүч зарцуулан, гэмшсэн юм шиг санагддаг. Үнэндээ энэ бол жинхэнэ өөрчлөлт биш; энэ бол жинхэнэ гэмшил биш. Жинхэнэ гэмшил зан авираас чинь эхэлдэг. Хэрвээ зан авирт чинь өөрчлөлт гарч, чи өөрийгөө хаяж чаддаг болоод, юмыг тэгж хийхээ больж, үйлдэл чинь зарчимтай нийцдэг болсон харагдаж, үг, үйлдлээ бага багаар зарчимтай болгож дөнгөвөл энэ нь зан чанарын өөрчлөлтийн эхлэл юм.

Эцсийн өдрүүдийн Христийн ярианы тэмдэглэл номын “Өөрийгөө мэдсэнээр л үнэнийг эрэлхийлж чадна”-аас эш татав

Зарим хүн өөрийгөө мэдэхдээ зүгээр л оромдож байдаг: “Хүн болгон өөрийгөө ов мэхтэй гэж хэлж байгаа болохоор би ч бас тэгнэ ээ—хэрэв тэгэхгүй бол эвгүй байх болно.” Тэд бардамнаж байгаа мэт хөгжилтэйгөөр үүнийгээ хэлдэг. Энэ бол оромдож буй хэрэг. Тэгэхээр оромдсон болж олж авсан мэдлэгт өртэй байх сэтгэл байх уу? Байхгүй. Тэд ов мэхтэй байдал, завхарсан зан чанараа яаж ч таньсан бай, энэ бол жинхэнээсээ таньж байгаа хэрэг биш. Би яагаад үүнийг жинхэнээсээ таньж байгаа хэрэг биш гэж хэлдэг вэ? Тэднийх бол зүрх сэтгэлийнх нь гүнээс гардаг, өөрсдийгөө жинхэнээсээ илчилж, үзэн ядах явдал биш юм. Ямар нэгэн муу зүйл хийх үедээ тэдэнд үзэн ядах, өртэй байх мэдрэмж төрдөггүй; Бурханыг мэхлэхээр оролдох, Бурханыг доромжлох, Бурханыг эсэргүүцэх үедээ өртэй байх мэдрэмжийг мэдэрдэггүй, бусад хүнийг мэхлэхдээ ч бас тэгдэггүй. Хэрэв тэд өртэй байдлыг мэдэрдэггүй бол харуусаж чадна гэж үү? Харуусдаггүй хүмүүс гэмшиж чадна гэж үү? Гэмшдэггүй хүмүүс эргэж хараад үнэнийг хэрэгжүүлэхийн тулд махан биеийн ашиг сонирхлоос татгалзаж чадна гэж үү? Тэд чадахгүй—энэ бол зүрх сэтгэлийн асуудал билээ. Зарим хүн дотроо өөрсдийгөө үнэхээр мэдэж, гэмшдэг. Тэд амаараа хэлдэггүй ч гэсэн, ичиж, худал хэлснээ мэдэрдэг бөгөөд ов мэхтэй, муу муухай гэдгээ, мөн ёс жудагтай хүн биш, тэр чигтээ хуурамч, зальжин, ах эгч нар болон Бурханыг мэхэлж байгаагаа зүрх сэтгэлдээ мэддэг гэдгээ бусад хүнд хэлж зүрхэлдэггүй. Зүрх сэтгэлдээ тэд өөрсдийгөө үзэн ядаж, дараа нь гэмшдэг. Хэдийгээр хүн болгон ижилхэн уг чанар-мөн чанартай боловч өөрсдийн жигшүүртэй байдлыг олж мэдмэгц тэдэнд шившигтэй санагдаж, Бурханы илчилсэн бүхнийг зөв хэмээн хүлээн зөвшөөрч, шүүлт, гэсгээлтийг хүлээн авч эхэлдэг. Тэд зүрх сэтгэлийнхээ угаас жинхэнээсээ харамсдаг. Энэ бол жинхэнээсээ ухамсарлаж, мэдэж байгаа хэрэг. Харин, жинхэнээсээ ухамсарладаггүй хүмүүс онигоо ярьж байгаа юм шиг, эсвэл бүүвэйн дуу дуулж байгаа юм шиг тодорхой ёс журмыг давтаж чаддаг; эдгээр нь ердөө л тогтсон хэллэгүүд юм. Тэдний хууран мэхлэлт хүмүүсийн нүдэнд нулимс хуруулдаг атал тэдний хувьд энэ нь юу ч биш. Ийм хүмүүс олон байдаг уу? Ийм хүмүүс бол хамгийн хуурамч юм.

Эцсийн өдрүүдийн Христийн ярианы тэмдэглэл номын “Өөрийгөө мэдсэнээр л үнэнийг эрэлхийлж чадна”-аас эш татав

Антихристийн замыг дагадаг хүмүүст гэмших найдвар, боломж байсаар байгаа бөгөөд антихристийн зан чанараа хаяж чаддаг мөртөө антихристүүд үнэнийг хүлээн авч чаддаггүй, иймээс тэдэнд нээлттэй, үнэнч шударга бай, юу хэлэхээ битгий бодож, эргэцүүлээд бай, харин шууд хэл гэж хэчнээн хэлсэн ч, хамгийн муу муухай нь ил болно, ингэж болохгүй, энэ бол ердөө л тэнэглэл гэж тэдэнд санагддаг. Тэд хэчнээн хичээсэн ч үүнийг хэрэгжүүлж чаддаггүй. Тэр бол антихрист мөн. Ялгаа нь тэр. Үнэнийг хэрхэн ярихаас үл хамааран, антихристүүд мэтийн хүмүүс үнэний дагуу үйлдээгүй гэдгээ, антихристийн зан чанартай гэдгээ зүгээр л хүлээн зөвшөөрдөг. Гэхдээ тэд хүлээн зөвшөөрлөө гээд ямар ч ашиггүй, үүнийг хүлээн авлаа гээд ямар ч хэрэггүй. Тэд үнэнийг хэрэгжүүлдэггүй, тийм ч учраас өөрчлөгдөх чадваргүй бөгөөд Бурхан тэднийг аврахгүй. Гэсэн ч эдгээр үгийг сонсох үедээ антихристийн зан чанартай тэр хүмүүсийн зарим нь зүрх сэтгэлдээ санадаг бөгөөд эдгээр үг зүрх сэтгэлийг нь сүлбэдэг. “Тэгэхээр, антихристийн зан чанар гэж тэр байх нь ээ! Антихристийн замаар явах гэдэг нь тэр байх нь—энэ үнэхээр ноцтой юм! Би тийм байдалтай, тэгж авирладаг. Тийм мөн чанартай—тийм хүн юм!” Тэгээд тэд хэрхэн өөрчлөгдөж, антихристийн зан чанараасаа хэрхэн ангижирч, цаашид хэрхэн үүнтэй холбоо хамааралгүй болж болох, антихристийн замаар хэрхэн явахгүй байх талаар тунгаан боддог. Тэд ажил дээрээ, амьдралдаа, хувийн оролтдоо, хүмүүс, үйл явдал, юмст хандах хандлагадаа, өөрсдөд нь Бурханы даалгасан зүйлтэй харьцахдаа үйлдэл нь антихристийнх мөн эсэхийг эргэцүүлэн бодож, антихристийн зан чанар өөрөөс нь илчлэгдэхийг үзэн ядаж, илчлэгдсэнийх нь дараа гэмших болно. Тэдний үзэн ядалт, гэмшил амийн оролтод нь ямар ашиг тустай байх вэ? Тэд нэг, хоёрхон жилийн дотор ажил дээрээ, хувийн оролтдоо ч мөн адил антихристийн зан чанараа аажмаар хаяж, үүний эсрэг хүч гарган тэмцэх болно. Заримдаа тэд өөрийн эрхгүй байр суурийн төлөө юм хийж, ярихыг хүссэн хэвээр байна. Тэд яримагцаа өөрсдийгөө үзэн ядах боловч дараагийн удаа тийм хэрэг явдал гарахад дахиад л тэгнэ, тэгээд дараа нь дахиад л гэмшиж, энэ нь байнга давтагдана. Ийнхүү давтагдаж байгаа нь юуг баталж байна вэ? Энэ нь тэд орж байгааг баталж байна. Хэрэв ийнхүү давтагдахгүй бол оролт ч тэр, ухарч буцах явдал ч байхгүй, тэгвэл амь байхгүй. Давтагдаж байгаа нь хүнд байгаа амь чухал гэдгийг, тэдэнд амь болон суурь байгааг нотолж байна. Зарим хүнд мэдрэмж ч, шаналал, таашаал ч байдаггүй бөгөөд энэ талаар тэдэнтэй нөхөрлөхөд тэд антихристийн зан чанартай, антихристийн замаар явсан гэдгээ хүлээн зөвшөөрдөг. Тэдний хэлдэг зүйл нэлээд аятайхан боловч оролтын тухайд бол, тэдэнд тэмцэл байдаггүй. Антихристийн зан чанарынхаа эсрэг тэмцсэн үү? гэж тэднээс асуугаарай. Тэд байр сууриа хадгалахаар ярихдаа дотроо өөрийгөө зэмлэдэг үү? Дараа нь харамсдаг уу? Үүнийгээ ухаараад тэд дараагийн удаа ярихдаа хазаарлах гэж оролддог уу? Ийм байдлууд тэдэнд байдаг уу? Ярихаас цаашгүй хүмүүс: “Би мэдэхгүй л дээ—надад тэдгээр нь бүгд байгаа” гэж хэлнэ. Өөрсдөд нь бүгд байгаа гэдэгтэй тэд санал нийлдэг боловч үүнийг хүлээн зөвшөөрсний дараа нарийвчилсан оролт юм уу тодорхой нөхцөл байдалтай нь холбоотой юу ч байдаггүй. Үнэхээр орсон хүмүүсийн сэтгэл нь тавгүйрхэнэ. “Би антихристийн зан чанартай гэдгээ мэднэ. Би яагаад үүнийг хаяж чаддаггүй юм бэ? Ингэх үнэхээр хэцүү юм; өөрчлөгдөх амаргүй юм!” Тэдний амаргүй гэж хэлж байгаа нь юуг нотолж байна вэ? Дотроо тэд орж, тэмцэж, байдал нь байнгын өөрчлөлтийг туулж байна гэдгийг нотолж байна. Ингэснээр юмс бага багаар сайжирч, эцэст нь тэд ялах болно. Энэ амар биш! Үхэж байгаа хүнийг аврахтай адил—чи чадах бүхнээ хийнэ. Хэрвээ хүн амьдрах чадвартай хэвээр бол биед нь амьтай байгаагийн шинж байнга байсаар байдаг, харин бүрэн үхчихсэн хүн чамайг юу ч хийсэн, хариу үйлдэл үзүүлэхгүй, бүр үхчихсэн, ухаангүй байна.

Антихристүүдийг илчлэх нь номын “Тэд бусдыг үнэнд эсвэл Бурханд биш, харин өөрсдөдөө дуулгавартай байлгадаг (II)”-аас эш татав

Зарим хүн урьд нь антихристийн тодорхой зан чанар харуулсан: Дэггүй, дур зоргоороо байж, үргэлж өөрийнхөөрөө зүтгэдэг байсан. Гэхдээ засалт, харьцалт, ах эгч нарын хийсэн нөхөрлөлөөр, мөн шилжиж, халагдаж, томоохон бэрхшээл туулж, хэсэг хугацаанд сөрөг байснаа дараа нь “Ямар ч байсан би үүргээ зохих ёсоор биелүүлэхийг чухалчлах ёстой. Би антихристийн замаар алхаж байгаа боловч антихрист гэж ангилагдчихаагүй тул итгэлдээ сайн байх ёстой, чин үнэнчээр эрэлхийлэх ёстой. Үнэнийг эрэлхийлэх замд ямар ч буруу юм байхгүй” гэж бодон бага багаар засраад гэмшдэг. Эдгээр нь тэдэнд буй сайн илрэл бөгөөд үүргээ биелүүлж байхдаа тэд үнэн-зарчмыг эрж хайж, бусадтай харилцаж байхдаа ч үнэн-зарчмыг эрж хайдаг. Тэд бүх талаар илүү дээр чиглэлд явж байдаг. Тэгвэл тэд өөрчлөгдсөн бус уу? Энэ нь антихристийн замаар алхаж байснаа үнэнийг хэрэгжүүлж, эрэлхийлэх зам руу орж байгаа явдал юм. Тэдэнд найдлага, боломж байгаа бөгөөд тэд засарч чаддаг. Тийм хүмүүсийг ганц удаа антихристийн зарим илрэл харуулж, антихристийн замаар алхсан гээд антихристүүд гэж ангилж болох уу? Үгүй. Антихристүүд гэмшдэггүй, ямар ч ичгүүргүй байдаг төдийгүй ширүүн, ёрын муу зан чанартай, үнэнийг жигшдэг. Үнэнийг туйлгүй жигшдэг нь юуг тодорхойлдог вэ? Тэдний хэзээ ч гэмшиж чадахгүйг тодорхойлдог. Тэд үнэнийг тэгтлээ жигшдэг бол үнэнийг хэрэгжүүлж, гэмшиж чадах уу? Тэгэх боломжгүй. Гэмшиж чаддаг хүмүүст байдаг лавтай нэг зүйл гэвэл, тэд алдаа гаргасан ч Бурханы шүүлт, гэсгээлтийг хүлээн зөвшөөрч, Бурханы хэлсэн үнэнийг зөвшөөрч чаддаг, хамтран ажиллахын тулд чадах чинээгээрээ хичээж, мөн Бурханы үгийг хувийнхаа зарчим, амьдралынхаа бодит байдал болгож чаддаг явдал юм. Тэд үнэнийг хүлээн зөвшөөрч, сэтгэлийнхээ угт үүнийг жигшдэггүй. Ялгаа нь энэ бус уу?

Антихристүүдийг илчлэх нь номын “Тэд бусдыг үнэнд эсвэл Бурханд биш, харин өөрсдөдөө дуулгавартай байлгадаг (I)”-аас эш татав

Ниневегийн хаан энэ мэдээг сонсоод сэнтийнээсээ босож, өмсгөлөө тайлан, таар нөмрөөд, үнсэн дээр суусан. Тэгээд тэр, хотод байгаа хэн ч юу ч амсаж болохгүй, үхэр хонь, өөр бусад ямар ч амьтан идээшилж, ус ууж болохгүй хэмээн тунхагласан. Хүн болон мал амьтад адилхан таар нөмрөх учиртай, хүмүүс чин сэтгэлээсээ Бурханаас гуйх ёстой байсан. Бас хүн бүр муу замаасаа татгалзаж, хүчирхийлэл хийдгээ болих ёстой гэж хаан тунхагласан. Эдгээр үйлдлээс үзвэл, Ниневегийн хаан үнэн сэтгэлээсээ гэмшиж байсан юм. Сэнтийнээсээ босож, хааны өмсгөлөө тайлж, таар нөмрөн, үнсэн дээр суусан гээд түүний хийсэн эдгээр үйлдэл нь Ниневегийн хаан хааны байр сууриа орхиж, энгийн ардын хамтаар таар өмссөн гэдгийг хүмүүст хэлж өгдөг. Өөрөөр хэлбэл, Ехова Бурханы тунхаглалыг сонссоныхоо дараа Ниневегийн хаан өөрийн муу замыг, хүчирхийлэл хийхээ үргэлжлүүлэхээр хаан суудлаа эзэгнээгүй; харин ч өөрийн барьж байсан эрх мэдлийг орхиж, Ехова Бурханы өмнө гэмшсэн. Энэ үед Ниневегийн хаан, хааны хувиар гэмшээгүй; xарин Бурханы энгийн албатын хувиар гэмшиж, нүглээ улайхын тулд Бурханы өмнө очсон. Түүнчлэн Ехова Бурханы өмнө өөр шиг нь нүглээ улайж, гэмшихийг бүхий л хотынхонд бас хэлсэн; дээр нь нэмээд, үүнийг хийх тодорхой төлөвлөгөө түүнд байсныг Сударт ийнхүү өгүүлжээ: “Хүн, адгуус амьтан, мал сүрэг юу ч амсаж болохгүй: тэд юм идэж, ус ууж болохгүй … хүн Бурханд хандан чадлаараа гуй, хүн бүр ёрын муу замаасаа эргэж, гар дахь хүчирхийллээ хая.” Хотын захирагч болохын хувьд Ниневегийн хаан эрхэм дээд байр суурь болоод эрх дархтай бөгөөд хүссэн бүхнээ хийж чадах байсан. Ехова Бурханы тунхаглалтай нүүр тулах үедээ тэр хэрэг явдлыг үл тоож, эсвэл зүгээр л ганцаараа гэмшиж, нүглээ улайж болох байсан; хотын хүмүүсийн гэмших эсэхийн тухайд бол тэрээр үүнийг огт тоохгүй орхиж болох байсан юм. Гэхдээ Ниневегийн хаан огтхон ч ингээгүй. Тэр сэнтийнээсээ босож, үнс, таар өмсөж, Ехова Бурханы өмнө гэмшиж, нүглээ улайгаад зогсохгүй, бас уг хотод байгаа бүх хүн, малд мөн адил ингэхийг тушаасан. Тэр ч бүү хэл тэрээр “Бурханд хандан чадлаараа гуйхыг” хүмүүст тушаасан. Энэхүү хэд хэдэн үйлдлээрээ Ниневегийн хаан, удирдагч хүний хийх ёстой зүйлийг үнэхээр биелүүлсэн. Түүний үйлдлүүд нь хүн төрөлхтний түүхэн дэх ямар ч хааны хувьд хийхэд хэцүү зүйл байсан ба үнэндээ өөр ямар ч хаан ийм зүйл хийж чадаагүй. Эдгээр үйлдлийг хүн төрөлхтний түүхэнд урьд өмнө болж байгаагүй зүйл гэж хэлж болох бөгөөд хүн төрөлхтөн үүнийг дуурсаж, даган дуурайваас зохистой. Хүн үүссэн цагаас хойш бүхий л хаад Бурханыг сөрж, эсэргүүцэхэд албатуудаа хөтөлж байсан. Өөрсдийн хорон муугийнхаа төлөө аврал эрэн Бурханаас гуйж, Ехова Бурханы өршөөлийг хүлээн авч, заналхийлж буй шийтгэлээс зайлсхийхэд хэн ч, хэзээ ч албатуудаа хөтөлж байгаагүй. Ниневегийн хаан харин албатуудаа Бурхан руу хандуулж, дор бүрнээ хорон муу замыг орхиж, хүчирхийлэл хийхээ болиход хүргэж чадсан. Түүнчлэн тэр хаан ширээгээ орхиж чадсан бөгөөд хариуд нь Ехова Бурхан сэтгэл нь өөрчлөгдөж, харамсаж, уур хилэнгээ татаж, хотын хүмүүст амьд үлдэх боломж олгож, тэднийг сүйрлээс хамгаалжээ. Энэхүү хааны үйлдлийг хүн төрөлхтний түүхэн дэх ховор гайхамшиг, тэр ч бүү хэл завхарсан хүн төрөлхтөн Бурханы өмнө гэмшиж, нүглээ улайж байгаагийн үлгэр дуурайл гэж л нэрлэж болно.

Үг нь махбодоор илэрсэн номын “Цор ганц Бурхан Өөрөө II”-оос эш татав

Энэхүү “ёрын муу зам” нь цөөн хэдэн муу үйлийг хэлдэггүй, харин хүмүүсийн зан авир урган гардаг ёрын муу эх сурвалжийг хэлдэг. “Ёрын муу замаасаа эргэх” гэдэг нь тухайн хүмүүс дахин хэзээ ч тийм үйлдэл гаргахгүй гэсэн үг юм. Өөрөөр хэлбэл, тэд ахин хэзээ ч ийм ёрын муу авир гаргахгүй ; тэдний үйлдлийн арга барил, эх үүсвэр, зорилго, санаа зорилго, зарчим бүгд өөрчлөгдсөн; зүрх сэтгэлдээ таашаал, аз жаргал авчрахын тулд тэд дахин хэзээ ч тэдгээр арга барил, зарчмыг ашиглахгүй. “Гар дахь хүчирхийллээ хаях” гэдгийн “хаях” гэдэг нь болих, орхих, өнгөрснөөсөө бүрэн салах, хэзээ ч эргэж буцахгүй байх гэсэн утгатай. Ниневегийн хүмүүс хүчирхийлэл хийхээ болих үед энэ нь тэдний жинхэнэ гэмшлийг баталж, бас илэрхийлсэн. Бурхан хүмүүсийн гадаад байдлыг харж, мөн зүрх сэтгэлийг нь ажигладаг. Ниневе хотынхон чин сэтгэлээсээ гэмшихийг нь гарцаагүй ажиглаж, мөн ёрын муу замаа орхиж, хүчирхийлэл хийхээ больсныг нь хараад Бурхан зүрх сэтгэлээ өөрчилсөн. Өөрөөр хэлбэл, энэ хүмүүсийн авир, зан байдал, аливааг хийх янз бүрийн арга, түүнчлэн үнэн сэтгэлээсээ нүглээ улайж, гэмшсэн учраас Бурханы сэтгэл өөрчлөгдөж, санаагаа өөрчилж, шийдвэрээ буцаан, тэднийг шийтгэж сүйрүүлэхээ больсон. Тиймээс Ниневегийн хүмүүсийн төгсгөл өөрчлөгдсөн. Тэд амиа золин аварсны зэрэгцээ Бурханы өршөөл, хүлээцтэй байдлыг хүртсэн, энэ мөчид Бурхан бас уур хилэнгээ татсан билээ.

Үг нь махбодоор илэрсэн номын “Цор ганц Бурхан Өөрөө II”-оос эш татав

Петр юунд хамгийн их харамсаж байсан бэ? Петрийг “Та бол амьд Бурханы Хүү” гэж хэлсний дараахан Есүс Петрээс өөр нэг асуулт асуусан (гэхдээ үүнийг Библид ийм маягаар тэмдэглээгүй байдаг). Есүс: “Петр ээ! Чи Намайг ер нь хайрлаж байсан уу?” гэж түүнээс асуусан юм. Түүний хэлж байгааг Петр ойлгоод: “Эзэн минь! Би нэгэнтээ тэнгэр дэх Эцэгийг хайрлаж байсан боловч Таныг хэзээ ч хайрлаж байгаагүй гэдгээ хүлээн зөвшөөрч байна” гэжээ. Тэгэхэд Есүс: “Хэрвээ хүмүүс тэнгэр дэх Эцэгийг хайрладаггүй бол газар дээрх Хүүг хайрлаж яахан чадах билээ? Хэрвээ хүмүүс Эцэг Бурханы илгээсэн Хүүг хайрладаггүй бол яаж тэнгэр дэх Эцэгийг хайрлаж чадах билээ? Хэрвээ хүмүүс газар дээрх Хүүг үнэхээр хайрладаг бол тэнгэр дэх Эцэгийг ч үнэхээр хайрладаг” гэв. Петр энэ үгийг сонсоод, дутагдлаа ухаарчээ. Тэрээр “Би тэнгэр дэх Эцэгийг нэгэнтээ хайрласан боловч Таныг хэзээ ч хайрлаагүй” хэмээх үгээсээ болж нулимс урсгах хэмжээнд үргэлж харуусдаг байлаа. Есүсийг дахин амилж, дээш өргөгдсөний дараа тэрээр энэ үгэндээ бүр ч их харуусаж, гашууджээ. Урьдын ажил болон одоогийн биеийн хэмжээгээ эргээд бодохоороо тэр үргэлж Есүсийн өмнө очин залбирч, Бурханы хүслийг хангалуун байлгаагүй, мөн Бурханы стандартад нийцэхгүй байгаадаа үргэлж харамсан, өртэй санагддаг байлаа. Эдгээр асуудал нь түүний хамгийн том ачаа болсон билээ. Тэрээр: “Нэг л өдөр би Танд өөрт байгаа бүхнийг болон өөрийгөө бүхэлд нь зориулна, би Танд хамгийн үнэ цэнтэй болгоныг өгнө” гэсэн. Тэрээр: “Бурхан минь! Надад нэг л итгэл, нэг л хайр бий. Амь минь ямар ч үнэ цэнгүй, бас бие минь ч үнэ цэнгүй. Надад нэг л итгэл, нэг л хайр бий. Оюун ухаанд минь Танд итгэх итгэл, зүрх сэтгэлд минь Таныг хайрлах хайр байдаг; Танд миний өгч чадах зүйл өөр юу ч биш, энэ хоёр л байна” гэжээ. Петр Есүсийн үгээр асар их зоригжсон, учир нь цовдлогдохоосоо өмнө Есүс түүнд: “Би энэ дэлхийнх биш, чи ч бас энэ дэлхийнх биш” гэсэн. Дараа нь Петрийг асар их өвдөх үед Есүс түүнд: “Петр ээ, чи мартчихав уу? Би дэлхийнх биш, Өөрийнхөө ажлын төлөө л Би арай эрт явж одсон. Чи ч бас дэлхийнх биш, чи үнэхээр мартчихаа юу? Би чамд хоёр удаа хэлсэн, санахгүй байна уу?” хэмээн сануулсан юм. Үүнийг сонсоод Петр: “Би мартаагүй!” гэв. Тэгэхэд Есүс ингэж хэлсэн: “Чи нэгэнтээ тэнгэрт Надтай хамт аз жаргалтай байж, хэсэг хугацааг Миний хажууд өнгөрүүлсэн. Чи Намайг санаж, Би чамайг санадаг. Хэдийгээр Миний нүдээр бол бүтээлүүдийг дурдахын ч хэрэггүй боловч гэм зэмгүй агаад хайр татам нэгнийг Би яаж хайрлахгүй байж чадах юм бэ? Чи Миний амлалтыг мартчихаа юу? Чи газар дээрх Миний даалгаврыг хүлээн зөвшөөрөх ёстой; Миний даалгасан үүргийг биелүүлэх ёстой. Нэг л өдөр Би чамайг заавал хажуудаа аваачна.” Үүнийг сонсоод Петр улам их зоригжиж, бүр ч их урам зориг авсан болохоор загалмай дээр байхдаа тэр: “Бурхан минь! Би Таныг хангалттай хайрлаж чадахгүй! Та надаас үхэхийг гуйсан ч гэсэн би Таныг бас л хангалттай хайрлаж чадахгүй! Та сүнсийг минь хааш нь ч илгээсэн, Өөрийнхөө урьдын амлалтыг биелүүлэх ч бай, үгүй ч бай, дараа нь Та юу ч хийсэн бай, би Таныг хайрлаж, Танд итгэдэг” гэж хэлж чадсан юм. Тэрээр өөрийн итгэл, жинхэнэ хайрыг баримталж байлаа.

Үг нь махбодоор илэрсэн номын “Петр Есүсийг хэрхэн мэдэж авсан тухай”-аас эш татав

Өмнөх: 3. Хүн яагаад өөрийгөө мэдэхгүйгээр зан чанарын өөрчлөлт болон авралд хүрч чадахгүй тухай

Дараах: 2. Жинхэнэ гэмшилд хэрхэн хүрч болох тухай

Одоо үед гай гамшиг ойр ойрхон тохиолдож, Эзэн эргэн ирэх тухай зөгнөлүүд үндсэндээ биелсэн. Бид Эзэнийг хэрхэн угтан авч болох вэ?

Холбогдох контент

Тохиргоо

  • Текст
  • Загвар

Цулгуй өнгө

Загвар

Үсгийн хэв

Үсгийн хэмжээ

Мөр хоорондын зай

Мөр хоорондын зай

Хуудасны өргөн

Гарчиг

Хайх

  • Энэ текстийг хайх
  • Энэ номоос хайх