Үг нь махбодоор илэрсэн

Агуулга

Хэрхэн хэвийн байдалдаа орох вэ

Бурханы үгийг хүмүүс хэдийчинээ их хүлээж авна, тэд төдийчинээ их гэгээрдэг бөгөөд зөв шударга байдлын төлөө өлсөж, цангаснаар Бурханы тухай мэдлэгийг төдийчинээ их эрэлхийлдэг. Бурханы үгийг хүлээн авдаг хүмүүс л илүү гүн гүнзгий, баялаг туршлагыг олж авч чадах бөгөөд амь нь улам бүр дэвжин дэлгэрдэг. Амийг эрэлхийлдэг хэн бүхэн үүнд өөрсдийн ажил мэт хандах ёстой бөгөөд тэд Бурхангүйгээр амьдарч чадахгүй, Бурхангүй бол ямар ч амжилт олохгүй, Бурхангүйгээр бүгд хоосон гэсэн мэдрэмжтэй байх учиртай. Тэд Ариун Сүнс байхгүй юуг ч хийхгүй, хэрвээ тэдний үйлдэл үр жимсээ өгөхгүй бол аливаа зүйлийг цааш хийхийг хүсэхгүй гэсэн шийдвэртэй байх ёстой. Тэд өөрсдийгөө өөгшүүлэхийн тулд үйлдэх ёсгүй. Амийн туршлага нь Бурханы гэгээрэл, удирдамжаар дамжуулан ирдэг бөгөөд тэдгээр нь мөн та нарын бодит хичээл чармайлтын үр дүн юм. Та нар өөрсдийн амийн туршлагадаа шалтаг тоочихгүй байх шаардлагыг өөртөө тавих хэрэгтэй.

Заримдаа чиний нөхцөл байдал хэвийн бус болж, чи Бурханы байгааг алдаж, залбирах үедээ Түүнийг мэдэрдэггүй; тийм үед айж эмээх нь хэвийн зүйл юм. Ийм цаг үед даруйхан эрж хай, эс тэгвэл Бурхан чамаас улам холдож, чи Ариун Сүнсгүйгээр нэг, хоёр өдөр, бүр цаашлаад нэг сар, хоёр сар байх бөгөөд түүнээс ч илүүтэйгээр чи Түүний ажилгүй байх болно. Ийм нөхцөл байдалтай тулгарах үедээ чи тодорхой хэмжээнд хөшүүн болдог; чи дахин нэгэнтээ Сатанд олзлогдох бөгөөд мөнгийг хайрлан хүсэн мөрөөдөх, ах эгч нараа хууран мэхлэх, кино дүрс бичлэг үзэх, маажан тоглох, бүр ямар ч сахилгажуулалтанд захирагдахгүйгээр тамхи татан, архи уух гэх мэт юуг ч хийх чадвартай болдог. Зүрх сэтгэл чинь Бурханаас холдож, чи хараат бус болохоор нууцхан хичээж, өөрийнхөө дураар Бурхан ажлыг шүүмжилж эхлэдэг. Зарим тохиолдолд энэ нь маш ноцтой бөгөөд хүмүүс ичиж санаа зовох зүйлгүйгээр эсрэг хүйснийхээ хүнтэй нүгэл үйлддэг. Ийм хүмүүс Ариун Сүнсэнд хаягддаг бөгөөд үнэндээ тэд удаан хугацаанд Ариун Сүнсний ажилгүй байсан байдаг. Тэд улам бүр завхарч, өөрсдийн хорон муу гараа улам хол сунгасаар эцэст нь тэд энэ замын оршин тогтнолыг үгүйсгэдэг—тэд өөрсдийн нүглээсээ болоод Сатаны хоригдол болдгийг чи тэднээс харж болно. Хэрвээ чамд Ариун Сүнс байгаа хэдий ч Түүний ажил байхгүй байгааг олж илрүүлбэл чи аль хэдийн тун аюултай байдалд байна. Ариун Сүнсний байгааг мэдэрч чадахгүй байх үедээ чи үхлийн ирмэг дээр байдаг. Хэрвээ чи гэмшиж чадахгүй хэвээр байвал бүрмөсөн Сатаных болох бөгөөд таягдуулах хүмүүсийн нэг байх болно. Иймээс чи ердөө Ариун Сүнс хажууд чинь байгаа (нүгэл үйлдэхгүй, садар самуунд автахгүй эсвэл Бурханыг илт эсэргүүцэхгүй байх) боловч чамд Ариун Сүнсний ажил дутагдаж байгаа (залбирах үедээ чиний сэтгэл хөдлөхгүй, Бурханы үгийг идэж уух үедээ ямар ч тодорхой гэгээрэл, гэрэлтүүлэлтийг олж авахгүй байж, Бурханы үгийг идэж уухаас залхуурч, амийн өсөлт үргэлж дутагдаж, удаан хугацаанд ямар ч онцгой гэрэлтүүлэлтгүй байх) байдалд байна гэдгээ ухаарах үедээ илүү их анхаарал болгоомжой байх ёстой. Чи цаашид энэ байдлаараа байж эсвэл зөрүүдлэсэн хэвээр байж болохгүй. Ариун Сүнсний оролцоо хэдийд ч алга болж болох учир эдгээр нөхцөл байдал нь түгшүүртэй цаг үе юм. Хэрвээ чи ийм байдалд орвол байдлыг аль болох хурдхан засаж залруулах ёстой. Эхлээд чи Бурханд гэмшиж залбиран, Бурханы өршөөлийг гуйж, үнэн сэтгэлээсээ залбирах ёстой; үүнээс илүүтэйгээр чи Бурханы үгийг илүү их ууж идэхдээ зүрх сэтгэлээ тайвшруулах ёстой бөгөөд энэ суурин дээрээ чи илүү их залбирах ёстой. Магтуу дуу дуулах, залбирах, Бурханы үгийг идэж уух болон үүргээ биелүүлэхдээ хичээл чармайлтаа илүү их бэхжүүл. Чамайг хамгийн сул дорой байх үед зүрх сэтгэл чинь Сатанд хамгийн амархан эзлэгддэг; хэрвээ тэгвэл чиний зүрх сэтгэл Бурханы өмнөөс булаагдаж, Сатан руу буцан очих болно; түүний дараа чамд Ариун Сүнсний оролцоо байхгүй болох бөгөөд чиний хувьд Ариун Сүнсний ажлыг буцаан олж авах нь туйлын хэцүү байх болно. Чамд Түүний оролцоо байгаа үед л Ариун Сүнсний ажлыг эрж хайж, чамайг улам гэгээрүүлж, орхин одохгүй байхыг Бурханаас гуйсан нь дээр. Чи залбирч, магтуу дуу дуулж, үүргээ биелүүлж, Бурханы үгийг идэж уух ёстой бөгөөд ингэснээр Сатан ажлаа хийх боломжгүй болох юм. Ингэвэл чи Ариун Сүнсний ажлыг олж авах болно. Хэрвээ чи ийм байдлаар сэргэхгүй харин зүгээр л хүлээх юм бол Ариун Сүнсний оролцоог алдах үед Ариун Сүнс чамайг хөдөлгөж, гэрэлтүүлж, гэгээрүүлэхгүй л бол үүнийг буцаан олж авахад хэцүү байх болно; харин ч чиний энэ байдал ганц, хоёр өдөр, эсвэл бүр хагас жилийн дотор ч хэвийн байдалдаа эргэн орохгүй. Энэ нь хүмүүс алгуурлаж, дадлага туршлагаа зүй зохистойгоор үргэлжлүүлж чаддаггүйгээс болдог; тиймээс тэднийг Ариун Сүнс орхидог. Хэвийн байдалдаа эргэн орсон ч гэсэн чи доош хүчтэй унасан мэт амийн туршлагаараа маш их хоцорсон учраас Бурханы одоогийн ажлын талаар тун тодорхой байж чадахгүй. Энэ аминд хүрэх аюултай зүйл мөн үү? Гэхдээ Би ийм хүмүүст: “одоо гэмшихэд тийм ч их оройтоогүй байна, харин ганцхан болзол бий, чи залхууралгүй, шаргуу хөдөлмөрлөх ёстой” гэж хэлдэг. Хэрвээ бусад хүмүүс өдөрт таван удаа залбирч байвал чи арван удаа залбирах ёстой; хэрвээ бусад хүмүүс өдөрт хоёр цаг Бурханы үгийг идэж ууж байвал чи дөрвөөс зургаан цагийг зарцуулах ёстой; хэрвээ хүмүүс магтуу дууг хоёр цаг сонсож байвал чи дор хаяж хагас өдрийг зарцуулах ёстой. Бурханы өмнө өөрийгөө олон удаа тайвшруулж, Бурханы хайрын тухай бод; сэтгэл чинь хөдөлж, зүрх сэтгэл чинь Түүн рүү эргэж, чи Түүнээс холдож зүрхлэхээ болих хүртэл чинь үр жимс гарахгүй. Эдгээр дадлуудаар дамжуулан чи өмнө нь байсан хэвийн байдалдаа эргэн орох болно.

Зарим хүмүүс урам зоригтойгоор эрж хайдаг боловч зөв замд орж чаддаггүй. Учир нь тэд хэтэрхий хайхрамжгүйгээс гадна сүнслэг зүйлсэд огтхон ч анхаарал хандуулдаггүй. Тэд Бурханы үгийг хэрхэн мэдрэхийг огтхон ч мэддэггүй, мөн тэд Ариун Сүнсний оролцоо эсвэл Ариун Сүнсний ажил юу болохыг мэддэггүй. Ийм хүмүүс урам зоригтой боловч төөрч будилдаг; тэд амийг эрэлхийлдэггүй. Учир нь тэд Сүнсийг өчүүхэн төдий ч мэддэггүй эсвэл Ариун Сүнсний ажлын хөдөлгөөнийг мэддэггүй бөгөөд тэд өөрсдийн сүнслэг байдлыг сайн мэддэггүй. Энэ нь төөрч будилсан итгэл биш гэж үү? Ийм хүмүүс эцэст нь хүртэл эрж хайсан ч юу ч олж авч чаддаггүй. Хүний Бурханд итгэх итгэл болон амийн өсөлттэй байхын гол цөм нь, чиний туршлагаар дамжуулан Бурхан ямар ажил гүйцэтгэдгийг ойлгож, Бурхан хэр хайр татам болохыг харж, Түүний хүслийг ойлгоход оршдог болохоор чи Бурханы бүх зохицуулалтанд захирагдаж, Түүний үгийг өөрийн амь болгохын тулд өөртөө шингээж, Бурханыг сэтгэл хангалуун байлгаж чадах юм. Хэрвээ чи зөвхөн ийм төөрөлдсөн итгэлтэй бол чи сүнслэг хэрэг явдалд эсвэл амийн зан чанар дахь өөрчлөлттэй холбоотой хэрэг явдалд анхаарал хандуулдаггүй бөгөөд үнэний төлөө хичээл чармайлт гаргадаггүй, тэгвэл чи Түүний хүслийг ухаарч чадна гэж үү? Хэрвээ чи Бурханы шаардлагыг ойлгохгүй бол туршлагатай байж чадахгүй бөгөөд хэрэгжүүлэх замыг олохгүй. Бурханы үгийг мэдрэхийн гол хэсэг нь Бурханы үгийн чамд үзүүлэх нөлөөг цохон тэмдэглэж, түүгээр дамжуулан Бурханыг мэдэх явдал юм. Хэрвээ чи Бурханы үгийг зөвхөн уншдаг боловч хэрхэн мэдрэхээ мэддэггүй бол чамд сүнслэг ойлголт байхгүй байгааг энэ нь харуулахгүй гэж үү? Ихэнх хүмүүс одоо Бурханы үгийг мэдэрч чаддаггүй болохоор тэд Түүний ажлыг мэддэггүй; энэ нь хэрэгжүүлэлт дэх дутагдал биш гэж үү? Хэрвээ энэ хэвээрээ яваад байвал хэзээ амийн баялаг туршлага болон өсөлтөнд хүрэх юм бэ? Энэ нь хоосон яриа байхгүй гэж үү? Та нарын дунд сургаалд анхаарал хандуулдаг олон хүмүүс байгаа; та нар сүнслэг зүйлсийн талаар ямар ч ойлголтгүй боловч Бурхан та нарыг ямар нэгэн агуу зүйлийн төлөө ашиглан, ивээж ерөөхийг хүсдэг. Энэ нь огтхон ч бодитой биш! Тиймээс та нар энэ дутагдлаа залруулах ёстой, ингэснээр та нар сүнслэг амийн зөв замд орж, жинхэнэ туршлагатай болж, Бурханы үгийн бодит байдалд үнэхээр орж чадах юм.