II. Ёс жудаг ба зан чанар-мөн чанарын ялгаа

Өнгөрсөн удаа бид антихристүүдийн ёс жудгийг нэгтгэн дүгнэсэн. Энэ нь юунаас бүрддэгийг та нар хэлж чадах уу? (Нэгдүгээрт худал хэлдэг зуршилтай, хоёрдугаарт дотуур тамиртай, харгис хэрцгий, гуравдугаарт нэр төрийн мэдрэмжгүй, ичгүүр сонжуургүй, дөрөвдүгээрт аминч, олиггүй, тавдугаарт хүчтэйд зусардаж, сул доройг дарлах, зургаадугаарт материаллаг зүйлд энгийн хүмүүсээс илүү шунахайрах явдал юм.) Нийт зургаан зүйл бий. Энэ зургаан зүйлээс харахад антихристүүдийн ёс жудагт хүн чанар, мөс чанар, эрүүл ухаан байдаггүй. Тэдний ёс жудаг дорд бөгөөд ёс жудаг нь жигшмээр байдаг. Чи хүний зан чанарыг юу болохыг, эсвэл сайн, муу эсэхийг нь мэдэхгүй, ойлгож чадахгүй байлаа гэж бодъё, гэхдээ ёс жудгийг нь мэдэж авснаар, жишээ нь, худал хэлдэг зуршилтай, нэр төрийн мэдрэмжгүй, эсвэл дотуур тамиртай, харгис хэрцгий зэрэг жигшмээр ёс жудагтай болохыг нь олж мэднэ. Тэгвэл чи тэднийг мөс чанаргүй, сайхан сэтгэлгүй, эсвэл эрхэмсэг ёс жудаггүй, харин ч муу, туйлын тааруу, муу хүн чанартай хүн гэж урьдчилан тодорхойлж болно. Хэрвээ ийм хүмүүст байр суурь байхгүй бол тэднийг ёрын муу хүмүүс гэж түр тодорхойлж болно; ёс жудагт нь үндэслэн тэднийг антихристүүд гэж бүрэн, нарийн тодорхойлж болох уу? Хэрвээ бид тэдний хүн чанарын эдгээр илрэлийг л авч үзвэл ийм хүмүүсийг наян хувийн магадлалтайгаар антихристүүд гэж тодорхойлж болно. Тэдэнд зөвхөн антихристийн зан чанар байдаг төдийгүй, хүн чанар нь зүгээр ч нэг ёрын муу, муу, тааруухан байгаад зогсохгүй тул бид тэднийг урьдчилсан байдлаар антихристүүд гэж тодорхойлж болно. Яагаад гэвэл антихрист гэж тодорхойлогдсон хэнд ч сайн хүн чанар, үнэнч шударга байдал, сайхан сэтгэл, эгэл байдал, чигч зан, бусдад хандах чин сэтгэл, эсвэл нэр төрийн мэдрэмж байдаггүй; ёс жудгийн эдгээр талтай хэн ч антихрист биш юм. Антихристүүдийн хүн чанар юун түрүүнд маш тааруу байдаг. Тэдэнд мөс чанар, эрүүл ухаан байдаггүй бөгөөд хүн чанартай, эрхэмсэг ёс жудагтай хүмүүст байдаг ёс жудаг тэдэнд гарцаагүй байдаггүй. Тиймээс, антихристүүдийн ёс жудгаар дүгнэвэл, хэрвээ тэдэнд байр суурь байхгүй бөгөөд тэд зүгээр л энгийн дагагч эсвэл үүргээ гүйцэтгэж буй бүлгийн жирийн гишүүн байсан ч ёс жудаг нь маш тааруу, мөн антихристийн ёс жудгийн эдгээр шинж чанартай байвал бид энэ хүмүүсийг антихристүүд гэж урьдчилан тодорхойлж болно. Нэвт харж болохгүй байгаа хүмүүсийг яах ёстой вэ? Тэднийг дэвшүүлж, тэдэнд байр суурь өгч болохгүй. Зарим хүн: “Хэрвээ бид тэдэнд байр суурь өгвөл энэ нь тэднийг антихрист мөн эсэхийг тогтоохгүй гэж үү?” хэмээн хэлж магадгүй. Энэ үг зөв үү? (Үгүй, зөв биш.) Хэрвээ бид ийм хүмүүст байр суурь өгвөл тэд антихристүүдийн хийдэг зүйлийг хийж, антихристийн хийж чадах юуг ч хамаагүй хийнэ. Нэгдүгээрт, тэд бие даасан хаанчлал байгуулна, үүнээс гадна хүмүүсийг хянана. Ийм төрлийн хүн Бурханы гэрт ашиг тустай зүйл хийх үү? (Үгүй, хийхгүй.) Ийм хүмүүс байр суурь олж авмагцаа бие даасан хаанчлал байгуулж, дур зоргоороо авирлаж, саад, үймээн учруулж, бүлэглэл үүсгэж, ёрын муу хүмүүсийн бүх үйлийг хэрэгжүүлж чадна. Энэ нь усан үзмийн талбайд үнэг оруулж, Бурханы сонгосон хүмүүсийг ёрын муу хүмүүсийн гарт өгч, диаволууд болон Сатануудад тушааж байгаатай адил юм. Эрх мэдэл авмагцаа энэ хүмүүс эргэлзээгүй антихристүүд гэдэг нь гарцаагүй болно. Хэрвээ хүн зөвхөн ёс жудагт нь үндэслэн тухайн хүнийг антихрист мөн эсэхийг тодорхойлбол, бодит үнэнийг мэддэггүй, антихристүүдийн зан чанар-мөн чанарыг ойлгодоггүй эсвэл ялган таньж чаддаггүй олон хүний хувьд энэ нь арай хэтэрсэн мэт санагдаж магадгүй. Тэд: “Яагаад зөвхөн үүнд үндэслэн хэн нэгнийг бүрмөсөн үгүйсгэж, яллана гэж? Тэднийг ямар нэгэн зүйл хийхээс нь өмнө антихрист гэж нэрлэх нь шударга бус санагдаж байна” гэж бодож магадгүй. Гэвч антихристүүдийн зан чанар-мөн чанараас дүгнэхэд тэдэнд сайн хүн чанар гарцаагүй байдаггүй. Нэгдүгээрт, тэд үнэнийг эрэлхийлэгчид яав ч биш; хоёрдугаарт, тэд үнэнийг яах аргагүй хайрладаггүй; түүнчлэн, тэд Бурханы үгийг дуулгавартай дагаж, Бурханаас эмээж, муугаас зайлдаг төрлийн хүмүүс яавч биш. Ийм чанар байхгүй хүмүүсийн хувьд ёс жудаг нь эрхэмсэг үү, дорд уу, сайн уу, муу юу гэдэг нь нэлээд тодорхой байдаг.

Сүүлийн цуглаанаар бид антихристүүдийн ёс жудгаар дамжин илэрдэг янз бүрийн зан авир, ярих болон асуудал шийдвэрлэх арга барил гэх мэт зүйлсийн талаар нөхөрлөсөн. Хэрвээ бид тухайн хүний ёс жудагт үндэслэн антихрист мөн эсэхийг нь бүрэн тодорхойлж чадахгүй бол антихристүүдийн зан чанар-мөн чанарын талаар цааш нөхөрлөх шаардлагатай. Нэг талаас антихристүүдийн ёс жудгийг, нөгөө талаас тэдний зан чанар-мөн чанарыг шинжилж, ялган таньснаар, энэ хоёрыг хослуулан тухайн хүн ердөө л антихристийн зан чанартай юу, эсвэл үнэхээр антихрист мөн үү гэдгийг бид тодорхойлж чадна. Өнөөдөр антихристүүдэд ямар зан чанар-мөн чанар байдгийг нэгтгэн дүгнэцгээе. Энэ бол тухайн хүнийг антихрист мөн эсэхийг илүү сайн тодорхойлж, ялган таньж, тогтоох боломжийг бидэнд олгодог илүү чухал онцлог чанар юм.

Зан чанарын тухайд, бид өмнө нь үүний талаар тодорхой нэгтгэн дүгнэсэн—хүмүүсийн завхарсан зан чанар юу вэ? (Гөжүүд байдал, биеэ тоосон зан, ов мэхтэй байдал, үнэнд зэвүүцэх зэвүүцэл, харгис байдал, хорон муу байдал.) Ерөнхийдөө энэ зургаа бөгөөд аминч, олиггүй гэх мэт зан чанарын бусад тайлбар нь энэ зургаагийн аль нэгтэй нь ямар нэгэн байдлаар холбоотой эсвэл төстэй байдаг. Надад хэлээч, хүний ёс жудаг болон зан чанар-мөн чанарын хооронд ялгаа бий юу? Ялгаа нь юу вэ? Ёс жудгийг голчлон мөс чанар, эрүүл ухаанаар хэмждэг. Энэ нь тухайн хүнд ёс жудаг байгаа эсэх, ёс жудаг нь эрхэмсэг эсэх, нэр төртэй эсэх, хүний ёс суртахуунтай эсэх, ёс суртахууны түвшин нь ямар байх, биеэ авч явахдаа улаан шугам, зарчимтай эсэх, хүн чанар нь сайн эсвэл муу эсэх, мөн тэд эгэл, үнэнч шударга эсэхийг хамардаг—эдгээр тал нь хүний ёс жудагт хамаардаг. Үндсэндээ ёс жудаг нь хүмүүсийн өдөр тутмын амьдралдаа харуулдаг сайн муу, эерэг болон сөрөг зүйлс, зөв буруугийн талаарх сонголт, хандлагаас бүрддэг—эдгээр нь ёс жудагт хамаардаг. Ёс жудаг нь үндсэндээ үнэнтэй холбогддоггүй; үүнийг зөвхөн мөс чанарын стандарт болон сайн, муу хүн чанараар хэмждэг бөгөөд үнэний түвшинд үнэндээ хүрдэггүй. Хэрвээ зан чанар үүнд хамаатай бол үүнийг хүний мөн чанараар хэмжих ёстой. Тэд сайныг илүүд үздэг үү, мууг уу, мөн шударга ёс, хорон муу байдал, түүнчлэн эерэг болон сөрөг зүйлсийн тухайд тэд юу харуулдаг, тэдний сонголт болон харуулдаг зан чанар нь яг юу болох, тэдний хариу үйлдэл ямар байж болох—эдгээр зүйлийг үнэнээр хэмжих ёстой. Хэрвээ хүний ёс жудаг харьцангуй сайхан сэтгэлтэй байж, тэдэнд мөс чанар, эрүүл ухаан байвал завхарсан зан чанаргүй гэж хэлж болох уу? (Үгүй, болохгүй.) Хэрвээ хүн маш сайхан сэтгэлтэй бол тэдэнд биеэ тоосон зан байдаг уу? (Тийм, байдаг.) Хэрвээ хүн маш үнэнч шударга бол тэдэнд гөжүүд зан чанар байдаг уу? (Тийм, байдаг.) Хүний ёс жудаг хэчнээн сайн байлаа ч, хүний ёс жудаг нь хэчнээн эрхэмсэг байлаа ч, үүний аль нь ч тэдэнд завхарсан зан чанар байхгүй гэсэн үг биш юм. Хэрвээ хүн мөс чанар, эрүүл ухаантай бол энэ нь тэд хэзээ ч Бурханыг эсэргүүцдэггүй, эсвэл Бурханд тэрсэлдэггүй гэсэн үг үү? (Үгүй, тийм биш.) Тэгвэл энэ тэрслүү байдал хэрхэн бий болдог вэ? Яагаад гэвэл хүмүүст завхарсан зан чанар байдаг бөгөөд тэдний зан чанар-мөн чанарт гөжүүд байдал, биеэ тоосон зан, хорон муу байдал гэх мэт зүйлс байдаг. Тиймээс, хүний ёс жудаг хэчнээн сайн байлаа ч энэ нь тэдэнд үнэн байгаа, завхарсан зан чанаргүй, эсвэл үнэнийг эрэлхийлэхгүйгээр Бурханыг эсэргүүцэх, Түүнээс урвах, Түүнд тэрслэхээс зайлсхийж, Бурханыг дуулгавартай дагаж чадна гэсэн үг биш юм. Хэрвээ тэд сайн ёс жудагтай, харьцангуй эгэл, үнэнч шударга, чигч, сайхан сэтгэлтэй, нэр төрийн мэдрэмжтэй байвал энэ нь тэд үнэнийг хүлээн авч, үнэнийг хайрлаж, Бурханы хийдэг зүйлийг дуулгавартай дагаж чадна гэсэн л үг, учир нь тэд үнэнийг хүлээн авч чадах ёс жудагтай байдаг.

Сайн эсвэл муу ёс жудаг нь мөс чанар, ёс суртахуун, ёс жудаг зэрэг үндсэн шалгуураар хэмждэг. Харин хүний зан чанар-мөн чанарыг өмнө дурдсан зургаан завхарсан зан чанарыг ашиглан хэмжих ёстой. Хэрвээ хүн ёс суртахууны өндөр стандарттай, ёс жудаг, мөс чанар, эрүүл ухаан, сайхан сэтгэлтэй байвал түүний ёс жудаг харьцангуй сайн гэж л хэлж болно. Гэвч энэ нь тухайн хүн үнэнийг ойлгодог, үнэнийг эзэмшдэг, эсвэл үнэн-зарчмын дагуу асуудлыг шийдвэрлэж чадна гэсэн үг биш юм. Энэ нь юуг баталдаг вэ? Тэд сайн ёс жудагтай, харьцангуй эрхэмсэг ёс жудагтай, биеэ авч явах, үйлдэл хийх ёс суртахууны стандарт нь арай өндөр байсан ч энэ нь тэдэнд завхарсан зан чанар байхгүй, тэдэнд үнэн байдаг, эсвэл тэдний зан чанар Бурханы шаардлагад бүрэн нийцдэг гэсэн үг биш юм. Хэрвээ хүний завхарсан зан чанарт ямар ч өөрчлөлт гарахгүй, үнэнийг ойлгохгүй байвал ёс жудаг нь хэчнээн сайн байлаа ч жинхэнэ сайн хүн биш. Хүн зан чанарын харьцангуй өөрчлөлтийг туулдаг, өөрөөр хэлбэл, тэд үйлдэл хийхдээ үнэнийг эрж хайж, асуудлыг шийдвэрлэхдээ үнэн-зарчмыг идэвхтэй дагаж, үнэн болон Бурханыг дуулгавартай дагадаг гэж бодъё; хэдийгээр тэдний завхарсан зан чанар заримдаа гарч ирж, биеэ тоосон зан, ов мэхтэй байдал, ноцтой тохиолдолд харгис зан чанар харуулдаг ч ерөнхийдөө тэдний үйлдлийн эх сурвалж, чиглэл, зорилго нь үнэн-зарчимтай нийцдэг бөгөөд үйлдэл хийхдээ тэд эрэл хайгуул, дуулгавартай байдалтай байдаг. Тэгвэл тэдний ёс жудаг зан чанартаа ямар ч өөрчлөлт гаргаагүй хүмүүсийнхээс илүү эрхэмсэг гэж хэлж болох уу? (Болно.) Хэрвээ хүний ёс жудаг зөвхөн төрөлхийн сайн, бусдын нүдэнд хүн чанар нь сайн боловч үнэнийг огт ойлгодоггүй, Бурханы талаарх үзэл, төсөөллөөр дүүрэн, Бурханы үгийг хэрхэн туулахаа мэддэггүй, Бурханы хийдэг бүхнийг дуулгавартай дагах нь бүү хэл Бурханы зохион байгуулалт, зохицуулалтыг хэрхэн хүлээн авахаа мэддэггүй бол энэ хүн жинхэнэ сайн хүн мөн үү? Нарийн яривал, жинхэнэ сайн хүн биш, харин ёс жудаг нь нэлээд сайн гэж үнэн зөвөөр хэлж болно. Нэлээд сайн ёс жудагтай байна гэдэг нь ямар утгатай вэ? Энэ нь харьцангуй хүний ёс жудагтай байж, үйлдэл болон бусадтай харилцах харилцаандаа харьцангуй шударга, голч байж, бусдыг ашигладаггүй, харьцангуй үнэнч шударга байж, бусдыг шархлуулж, хорлодоггүй, мөс чанартай үйлдэж, тодорхой ёс суртахууны стандарттай байхыг хэлэх бөгөөд зөвхөн хууль зөрчих, ёс зүйтэй харилцааг зөрчихөөс зайлсхийх төдий биш—энэ бол энэ хоёр стандартаас арай илүү өндөр зүйл юм. Хүмүүс ийм хүнтэй харилцахдаа тэр хүнийг харьцангуй чигч гэж мэдэрдэг бөгөөд хамт байхдаа тэднээс сэрэмжлэх шаардлагагүй байдаг, учир нь тэр хүн бусдыг хорлож, шархлуулдаггүй бөгөөд тэдэнтэй харилцах үед хүмүүсийн сэтгэл амар байдаг—эдгээр чанартай байх нь нэлээд сайн хүний шинж тэмдэг юм. Гэвч үнэнийг ойлгодог, үнэнийг хэрэгжүүлж, дуулгавартай дагаж чаддаг хүмүүстэй харьцуулахад ийм хүн чанар нь ямар ч эрхэмсэг зүйл биш юм. Өөрөөр хэлбэл, хүний хүн чанар нь хэчнээн сайн байлаа ч энэ нь үнэнийг ойлгох, эсвэл үнэнийг хэрэгжүүлэхийг орлож чадахгүй бөгөөд зан чанарын өөрчлөлтийг яавч орлож чадахгүй.

Ёс жудаг нь хүний мөс чанар, ёс суртахуун болон ёс жудагтай байдлыг хэлдэг. Хүний ёс жудгийг хэмжихийн тулд мөс чанар, ёс суртахуун, ёс жудгийг нь үнэлэх шаардлагатай. Гэвч зан чанар гэдэг нь юуг хэлдэг вэ, үүнийг хэрхэн хэмждэг вэ? Үүнийг үнэнээр, Бурханы үгээр хэмждэг. Хүний ёс жудаг бүх талаараа маш сайн, хүн бүр түүнийг сайн хүн гэж боддог, завхарсан хүн төрөлхтний нүдээр бол төгс төгөлдөр, бүрэн дүүрэн бөгөөд ямар ч өө сэв, дутагдалгүй мэт харагддаг гэж бодъё; гэвч үнэнээр хэмжих үед түүний сайн гэгддэг тэр өчүүхэн зүйл нь дурдахын ч аргагүй байдаг. Зан чанарыг нь шинжлэх үед биеэ тоосон зан, гөжүүд байдал, ов мэхтэй байдал, хорон муу байдал, тэр ч бүү хэл үнэнд зэвүүцэх зэвүүцэл, бүр цаашлаад харгис зан чанарын илрэл ч олдож магадгүй. Энэ нь баримт биш гэж үү? (Тийм ээ, баримт.) Хүний зан чанар-мөн чанарыг хэрхэн хэмждэг вэ? Үүнийг үнэнээр, үнэн болон Бурханд хандах тухайн хүний хандлагыг үнэлэх замаар хэмждэг. Ийм маягаар тэр хүний завхарсан зан чанар бүрэн, нарийн илчлэгддэг. Хэдийгээр хүмүүс тэднийг мөс чанартай, ёс жудагтай, ёс суртахууны өндөр стандарттай гэж харж, бусдын дунд гэгээнтэн эсвэл төгс хүн хэмээн өргөмжиллөгдөг ч үнэн болон Бурханы өмнө ирэх үед завхарсан зан чанар нь ил гарч, ямар ч сайн талгүй болж, хүн төрөлхтний бусад хэсэгтэй адилхан завхарсан зан чанартай болох нь харагддаг. Бурхан үнэнийг илэрхийлж, хүмүүст илэрч, ажиллах үед тэд бусад хүний адилаар гөжүүд байдал, биеэ тоосон зан, ов мэхтэй байдал, үнэнд зэвүүцэх зэвүүцэл, хорон муу байдал, харгис байдал зэрэг завхарсан зан чанар нэг бүрийг харуулдаг. Ийм хүмүүс төгс биш гэж үү? Тэд гэгээнтнүүд биш гэж үү? Тэд сайн хүмүүс биш гэж үү? Тэд зөвхөн бусад хүний нүдэнд л сайн байдаг; учир нь хүмүүст үнэн байдаггүй бөгөөд адилхан завхарсан зан чанартай байдаг тул бие биеэ хэмждэг стандарт нь үнэн дээр биш, зөвхөн мөс чанар, ёс жудаг, ёс суртахуун дээр л үндэслэдэг. Үнэнээр хэмжихгүй байх үед хүний ёс жудаг хэрхэн харагддаг вэ? Тэд жинхэнэ сайн хүн үү? Мэдээж үгүй, учир нь бусад хүнээр сайн гэж үнэлүүлж, шүүгдсэн хүнд завхарсан зан чанаруудын аль нь ч байдаггүй. Тэгвэл хүмүүсийн завхарсан зан чанар хэрхэн хөгжиж, ил болдог вэ? Бурхан үнэнийг илэрхийлэхгүй, эсвэл хүн төрөлхтөнд илрэхгүй байх үед хүмүүсийн завхарсан зан чанар оршин байдаггүй мэт санагддаг. Гэвч Бурхан үнэнийг илэрхийлж, хүмүүст илрэх үед бусдын нүдэнд гэгээнтэн эсвэл төгс хүн гэгддэг хүмүүсийн завхарсан зан чанар бүрэн ил болдог. Энэ өнцгөөс харвал хүмүүсийн завхарсан зан чанар нь тэдний ёс жудагтай зэрэгцэн оршдог. Бурханыг илрэх үед л хүмүүст завхарсан зан чанар бий болдог юм биш; харин Бурхан үнэнийг илэрхийлж, хүн төрөлхтний дунд илэрч, ажиллах үед тэдний завхарсан зан чанар, муу муухай байдал ил болдог. Энэ үед хүмүүс сайн ёс жудгийн ард завхарсан зан чанар бас байдгийг ухаарч, олж мэддэг. Бусдын нүдэнд сайн хүмүүс, төгс хүмүүс, эсвэл гэгээнтнүүд гэгддэг хүмүүс бусдын л адилаар завхарсан зан чанартай байдаг бөгөөд бусад хүнээс дутахгүй—ийм хүмүүсийн завхарсан зан чанар нь бусад хүнийхээс бүр ч илүү нуугдмал байдаг бөгөөд төөрөлдүүлэх илүү их чадвартай байдаг. Тэгвэл завхарсан зан чанар гэж яг юу вэ, зан чанар-мөн чанар гэж юу вэ? Хүний завхарсан зан чанар бол тэр хүний мөн чанар юм; хүний ёс жудаг нь ердөө биеэ зөв авч явах зарим нэг өнгөц дүрмийг төлөөлдөг бөгөөд энэ нь хүний хүн чанар-мөн чанарыг тусгадаггүй. Бид хүний хүн чанар-мөн чанарын талаар ярих үедээ тэдний зан чанарыг хэлж байдаг. Бид хүний ёс жудгийн талаар ярилцах үедээ тэдэнд сайн санаа зорилго байгаа эсэх, сайхан сэтгэлтэй эсэх, ёс жудаг нь ямархуу болох, ёс суртахууны стандарттай эсэх зэрэг илэрхий талуудыг хэлж байдаг. Та нар одоо ёс жудаг гэж юу болох, зан чанар-мөн чанар гэж юу болохыг ойлгов уу? Энэ асуудлыг зөвхөн зүрх сэтгэлдээ далд байдлаар л ухамсарлаж чадна; үүнийг ганц үг эсвэл хэллэгээр тодорхойлох боломжгүй. Энэ бол маш төвөгтэй асуудал юм. Хэрвээ үүнийг хэт явцуу байдлаар тодорхойлж, тайлбарлавал стандартчлагдсан мэт санагдаж болох ч үнэндээ тодорхой бус байдаг. Би үүнд тодорхойлолт өгөхгүй, би үүнийг ийм байдлаар тайлбарласан бөгөөд хэрвээ та нар үүнийг зүрх сэтгэлдээ далд байдлаар ухамсарлавал ойлгох болно.

Хүний нийт зургаан завхарсан зан чанар байдаг: гөжүүд байдал, биеэ тоосон зан, ов мэхтэй байдал, үнэнд зэвүүцэх зэвүүцэл, харгис байдал, хорон муу байдал. Энэ зургаагийн аль нь харьцангуй ноцтой вэ, аль нь илүү энгийн эсвэл түгээмэл, түвшний хувьд арай хөнгөн, нөхцөл байдлын хувьд арай хүнд бус вэ? (Гөжүүд байдал, биеэ тоосон зан, ов мэхтэй байдал нь арай хөнгөн.) Зөв байна. Та нар хүний завхарсан зан чанарын янз бүрийн илрэлийн талаар тодорхой хэмжээний үзэл бодол, ойлголттой юм шиг байна. Хэдийгээр энэ гурав нь бас Сатаны завхруулсан хүн төрөлхтөнд байдаг завхарсан зан чанарт хамаардаг бөгөөд мөн чанарын хувьд бас Бурханд жигшигддэг, үнэнд нийцдэггүй, Бурханыг эсэргүүцдэг ч түвшний хувьд харьцангуй хөнгөн, өнгөц байдаг, өөрөөр хэлбэл, тэдгээр нь арай илүү түгээмэл байдаг; завхарсан хүн төрөлхтний гишүүн бүрд янз бүрийн хэмжээгээр байдаг. Энэ гурваас гадна, үнэнд зэвүүцэх зэвүүцэл, харгис байдал, хорон муу байдал нь түвшний хувьд харьцангуй хамаагүй илүү ноцтой байдаг. Хэрвээ эхний гурвыг нь энгийн завхарсан зан чанар гэж үзвэл сүүлийн гурав нь онцгой завхарсан зан чанар бөгөөд түвшний хувьд илүү ноцтой юм. Тэдгээр нь илүү ноцтой байна гэдэг нь юу гэсэн үг вэ? Энэ нь нөхцөл байдал, мөн чанар болон хүмүүс Бурханыг эсэргүүцэж, Түүнд тэрсэлж, Түүнийг сөрөн зогсох хэмжээний хувьд энэ гурав нь илүү ноцтой гэсэн үг юм. Энэ гурав нь үнэнийг шууд үгүйсгэж, Бурханыг үгүйсгэж, Бурханы эсрэг бархирч, Бурхан руу дайрч, Бурханыг сорьж, Бурханыг шүүх гэх мэтээр хүмүүсийн харуулдаг илүү ноцтой зан чанар юм. Хүний энэ гурван завхарсан зан чанар эхний гурваас юугаараа ялгаатай вэ? Эхний гурав нь илүү түгээмэл бөгөөд бүх завхарсан хүн төрөлхтөнд байдаг завхарсан зан чанарын шинж тэмдэг юм, өөрөөр хэлбэл, нас, хүйс, төрсөн газар, арьсны өнгө, үндэс угсаанаас үл хамааран хүн бүрд энэ гурван зан чанар байдаг. Сүүлийн гурав нь хүн бүрийн мөн чанараас хамааран янз бүрийн хэмжээгээр, их бага ямар нэг хэмжээгээр байдаг боловч завхарсан хүн төрөлхтний дунд зөвхөн антихристүүдэд л хорон муу байдал, үнэнд зэвүүцэх зэвүүцэл, харгис байдал гэх энэ гурван зан чанар хамгийн ноцтой хэмжээгээр байдаг. Антихристүүдээс гадна, жирийн завхарсан хүмүүс хорон муу байдал, үнэнд зэвүүцэх зэвүүцэл, харгис зан чанарыг тодорхой хэмжээнд л, эсвэл тодорхой орчин, онцгой нөхцөл байдалд л харуулдаг. Хэдийгээр тэдэнд эдгээр зан чанар байдаг ч тэд антихристүүд биш. Тэдний мөн чанар нь хорон муу эсвэл харгис биш бөгөөд үнэнд мэдээж зэвүүцдэггүй. Энэ нь тэдний ёс жудагтай холбоотой. Ийм хүмүүс харьцангуй сайхан сэтгэлтэй, ёс жудагтай, чигч, нэр төрийн мэдрэмжтэй гэх мэт байдаг—ёс жудаг нь харьцангуй сайн байдаг. Тиймээс тэд сүүлийн гурван ноцтой завхарсан зан чанарыг хааяа нэг, эсвэл зөвхөн тодорхой орчин, нөхцөл байдалд л харуулдаг. Гэвч эдгээр зан чанар нь тэдний мөн чанарт ноёрхдоггүй. Жишээлбэл, жирийн завхарсан зан чанартай хүмүүс үүргээ гүйцэтгэхдээ хааш яаш хандаж, Бурханы сахилгажуулалттай тулгарах үедээ үүнд буулт хийхээс татгалзаж, “Бусад хүн ч бас хааш яаш байдаг шүү дээ; яагаад тэднийг сахилгажуулдаггүй юм бэ? Яагаад би ийм сахилгажуулалт, цээрлүүлэлт хүртэж байгаа юм бэ?” гэж бодож магадгүй. Буулт хийхээс татгалзах нь ямар зан чанар вэ? Энэ нь илэрхий харгис зан чанар юм. Тэд Бурханы шударга бус байдал, тал тохой татсан хандлагад гомдоллодог бөгөөд үүнд Бурханыг эсэргүүцэж, Түүний эсрэг бархирах чанар бага зэрэг байдаг—энэ бол харгис зан чанар юм. Ийм хүмүүсийн харгис зан чанар эдгээр нөхцөл байдалд илэрдэг боловч ялгаа нь гэвэл, энэ хүмүүст сайхан сэтгэл, мөс чанарын ухамсар, ёс жудаг, харьцангуй чигч байдал байдаг. Бурханы эсрэг гомдоллож, харгис зан чанар харуулах үед нь тэдний мөс чанар үйлчилдэг. Мөс чанар нь үйлчлэх үедээ харгис зан чанартай нь зөрчилдөж, оюун санаанд нь зарим нэгэн бодол бий болж эхэлдэг: “Би ингэж бодох ёсгүй. Бурхан намайг их ерөөсөн бөгөөд Тэр надад нигүүлсэл үзүүлсэн. Би ингэж бодох нь мөс чанаргүй хэрэг биш гэж үү? Энэ нь Бурханыг эсэргүүцэж, Түүний зүрхийг шархлуулж байгаа хэрэг биш гэж үү?” Энэ бол тэдний мөс чанар ажиллаж байгаа хэрэг биш гэж үү? Энэ үед тэдний сайн ёс жудаг үйлчилдэг. Мөс чанар нь ажиллаж эхэлмэгц уур хилэн, гомдол, буулт хийхээс татгалзах байдал нь замхарч, бага багаар хойш тавигдаж, арилдаг. Энэ нь тэдний мөс чанарын үр нөлөө биш гэж үү? (Тийм.) Тэгвэл тэд харгис зан чанар харуулж байна уу? (Тийм.) Тэд харгис зан чанар харуулдаг боловч ийм хүмүүст мөс чанар, хүн чанар байдаг тул мөс чанар нь харгис зан чанарыг нь хазаарлаж, тэднийг ухаалаг болгож чаддаг. Тэд ухаалаг болж, тайвшрах үедээ эргэцүүлж, өөрсдөө ч бас Бурханыг эсэргүүцэх чадвартай гэдгээ ухаарна. Энэ үед тэд өөрсдөө ч мэдэлгүйгээр өртэй мэт мэдрэмж, гэмшилд автдаг: “Би сая хэтэрхий адгуу байж, Бурханыг эсэргүүцэж, Түүнд тэрсэллээ. Намайг сахилгажуулж байгаа нь Бурханы хайр биш гэж үү? Энэ нь Түүний таалал биш гэж үү? Би яагаад ийм эрүүл ухаангүй авирлав аа? Би Бурханыг уурлуулаагүй гэж үү? Би ингэсээр байж болохгүй; би Бурханд залбирч, гэмшиж, хийж буй муу зүйлээ орхиж, тэрслүү байдлаа эцэслэх хэрэгтэй. Би хааш яаш авирлаж байснаа хүлээн зөвшөөрсөн учраас хааш яаш байхаа больж, аливааг нухацтай хийж, үйлдлээрээ дамжуулан үнэнч байдлаа хэрхэн өргөх, мөн үүргээ гүйцэтгэх зарчим юу болохыг эрж хайх ёстой.” Энэ нь тэдний сайн ёс жудгийн үр нөлөө биш гэж үү? Мэдээж, энэ хүмүүст бас харгис зан чанар байдаг боловч мөс чанарынх нь үр нөлөөгөөр, мөн ухаалаг байдлаа ашиглан аливааг дэнсэлснээр үнэнийг хайрладаг сайн ёс жудаг нь эцэстээ ялдаг. Энэ хүмүүсийн завхарсан зан чанарт харгис байдал байдаг, тэгвэл тэдэнд харгис мөн чанар байдаг гэж хэлж болох уу? Тэдний мөн чанар харгис гэж хэлж болох уу? Үгүй. Баримтад түшиглэн хэлбэл, хэдийгээр харуулдаг завхарсан зан чанарт нь харгис байдал багтдаг ч тэдэнд мөс чанар, ухаалаг байдал, үнэнийг хайрлах харьцангуй хайр байдаг тул тэдний харгис байдал нь ердөө нэг төрлийн завхарсан зан чанар бөгөөд мөн чанар нь биш юм. Яагаад энэ нь тэдний мөн чанар биш вэ? Яагаад гэвэл тэдний энэ завхарсан зан чанар өөрчлөгдөж чадна. Хэдийгээр тэд ийм төрлийн завхарсан зан чанар харуулж, урт эсвэл богино хугацаанд Бурханыг эсэргүүцэж, Түүнд тэрсэлж чадах ч тэдний ёс жудаг дахь мөс чанар, ёс жудаг, эрүүл ухаан гэх мэт зүйлсийн үр нөлөө нь харгис зан чанарыг нь тэдний зан авир эсвэл үнэнд хандах хандлагад ноёрхохоос сэргийлдэг. Эцсийн үр дүн нь юу вэ? Тэд нүглээ улайж, гэмшиж, үнэн-зарчмын дагуу үйлдэж, үнэнд дуулгавартай байж, Бурханы зохион байгуулалтыг ямар ч гомдолгүйгээр хүлээн авч чаддаг. Харгис зан чанар харуулдаг ч эцсийн үр дүн нь тэд Бурханд тэрсэлдэггүй, эсвэл Бурханы дээд эрхийг сөрдөггүй—тэд дуулгавартай дагадаг. Энэ бол жирийн завхарсан хүний илрэл юм. Ийм хүмүүст ердөө завхарсан зан чанар л байдаг; тэдэнд антихристүүдийн зан чанар-мөн чанар байдаггүй. Энэ бол үнэн зөв юм.

Жишээ нь, хорон муу зан чанарыг авч үзье: Бурханы өмнө харуулдаг хүмүүсийн хамгийн хорон муу зан чанар юу вэ? Энэ бол Бурханыг сорих явдал юм. Зарим хүн Бурханд итгэдэг болсныхоо дараа буруу замаар орж, зарим нэг мууг хийж, олон гэм буруу үйлдсэн учраас өөрсдөд нь сайн хүрэх газар байхгүй байх, төгсгөл нь баталгаагүй байж магадгүй гэж санаа зовдог. Тэд өөрсдийгөө там руу явна гэж санаа зовдог бөгөөд төгсгөл, хүрэх газрынхаа талаар үргэлж айдаст автдаг. Тэд байнга түгшиж, үргэлж: “Миний ирээдүйн төгсгөл, хүрэх газар сайн байх уу, муу байх уу? Би там руу явах уу, эсвэл тэнгэр лүү явах уу? Би бурхны ард уу, эсвэл үйлчлэл үзүүлэгч үү? Би мөхөх үү, эсвэл аврагдах уу? Бурхны ямар үг энэ талаар ярьдгийг би олох хэрэгтэй” гэж эргэцүүлдэг. Бурханы үг бүгд үнэн бөгөөд тэр бүхэн нь хүмүүсийн завхарсан зан чанарыг ил болгодгийг тэд хардаг ба эрж хайж буй хариултаа олдоггүй тул өөр хаанаас сураглахаа үргэлж тунгаан боддог. Хожим нь тэд дэвшиж, чухал үүрэгт тавигдах боломж олдох үедээ Дээрхийг тандахыг хүсэж: “Миний талаарх дээрхийн санаа бодол юу вэ? Хэрвээ санаа бодол нь нааштай байвал энэ нь миний өнгөрсөнд хийсэн мууг болон үйлдсэн гэм бурууг бурхан санаагүйг батална. Энэ нь бурхан намайг аварсаар байх болно, надад найдвар байгааг батална” гэж боддог. Тэгээд тэд санаагаа даган шууд ингэж хэлдэг: “Манай тэнд ах эгч нарын ихэнх нь ажил хэрэгтээ тийм ч чадварлаг биш, бас бурханд итгээд удаагүй байгаа. Би бурханд хамгийн удаан итгэсэн. Би бүдэрч, бүтэлгүйтэж байсан, би тодорхой туршлагатай бөгөөд зарим нэг сургамж авсан. Хэрвээ боломж олдвол би хүнд ачаа үүрч, бурхны санаа зорилгыг бодолцон үзэхэд бэлэн байна.” Дээрх өөрсдийг нь дэвшүүлэх ямар нэгэн санаа зорилготой байгаа эсэх, эсвэл Дээрх өөрсдийг нь хаясан эсэхийг харахын тулд тэд эдгээр үгийг сорилт болгон ашигладаг. Үнэн хэрэгтээ тэд энэ хариуцлага юм уу ачааг үүрэхийг жинхэнээсээ хүсдэггүй; эдгээр үгийг хэлэх зорилго нь ердөө л байдлыг тандаж, өөрсдөд нь аврагдах найдвар байсаар байгаа эсэхийг харах явдал юм. Энэ бол сорих явдал юм. Сорих энэхүү арга барилын ар дахь зан чанар юу вэ? Энэ бол хорон муу зан чанар юм. Энэ арга барилыг хэр удаан харуулах, тэд үүнийг хэрхэн хийх, эсвэл хэр их хэрэгжүүлэхээс үл хамааран, ямартай ч тэдний харуулдаг зан чанар гарцаагүй хорон муу байдаг, учир нь үүнийг хийх хугацаанд тэдэнд олон бодол, тээнэгэлзэл, санаа зовнил байдаг. Тэд энэхүү хорон муу зан чанарыг харуулах үедээ өөрсдийгөө хүн чанартай, үнэнийг хэрэгжүүлж чаддаг хүмүүс гэдгийг харуулах, мөн тэдэнд хорон муу мөн чанар биш, харин зөвхөн энэ завхарсан зан чанар л байдаг гэдгийг батлах юу хийдэг вэ? Ийм зүйл хийж, хэлснийхээ дараа мөс чанар, эрүүл ухаан, ёс жудаг, нэр төртэй хүмүүс зүрх сэтгэлдээ тавгүйтэж, шаналдаг. Тэд тарчилж: “Би Бурханд маш олон жил итгэсэн байж яаж Бурханыг сорьж чадав аа? Би яаж өөрийнхөө хүрэх газарт санаа зовсоор байж, Бурханаас үг унагаж, Бурханаар баттай хариу өгүүлэхийн тулд ийм арга ашиглаж чадаж байна аа? Энэ хэтэрхий олиггүй юм!” гэж боддог. Тэд зүрх сэтгэлдээ тайван бус байдаг ч үйл хийгдэж, үг хэлэгдсэн тул—тэдгээрийг буцаах аргагүй. Тэгээд тэд: “Хэдийгээр надад бага зэрэг сайн санаа, шударга ёсны мэдрэмж байж болох ч би ийм олиггүй зүйл хийж чадах л юм байна; эд чинь олиггүй хүний үйлдэл шүү дээ! Энэ нь Бурханыг сорих гэсэн оролдлого биш гэж үү? Энэ нь Бурханыг сүрдүүлж байгаа хэрэг биш гэж үү? Энэ үнэхээр олиггүй, ичгүүр сонжуургүй юм байна!” хэмээн ойлгодог. Ийм нөхцөл байдалд ямар үйлдэл хийх нь зүй зохистой вэ? Бурханы өмнө ирж залбиран, нүглээ улайх уу, эсвэл өөрийн арга барилтай зөрүүдлэн зууралдсаар байх уу? (Залбирч, нүглээ улайх.) Тэгвэл санаа төрсөн мөчөөс эхлээд үйлдэл хийх хүртэл, цаашлаад залбирч, нүглээ улайх хүртэлх бүх үйл явцын хувьд аль үе шат нь завхарсан зан чанарын хэвийн илрэл, аль үе шат нь мөс чанар үйлчилж байгаа хэрэг, аль үе шат нь үнэнийг хэрэгжүүлж байгаа хэрэг вэ? Санаа төрөхөөс эхлээд үйлдэл хийх хүртэлх үе шат нь хорон муу зан чанарт захирагддаг. Тэгвэл өөрийгөө шинжлэх үе шат нь тэдний мөс чанарын үр нөлөөнд захирагддаг биш гэж үү? Тэд хийсэн зүйлээ буруу байсныг мэдэрч, өөрсдийгөө шинжилж эхэлдэг—энэ нь тэдний мөс чанарын үр нөлөөнд захирагддаг. Үүний дараа залбирал, нүглээ улайх үе шат бөгөөд энэ нь ч бас тэдний ёс жудаг, мөс чанар, зан араншны үр нөлөөнд захирагддаг; тэд харамсаж, гэмшиж, Бурханд өртэй мэт мэдэрч чаддаг ба мөн өөрсдийн хүн чанар, завхарсан зан чанарыг эргэцүүлж, ойлгож, үнэнийг хэрэгжүүлж чадах цэгт хүрч чаддаг. Үүнд гурван үе шат байгаа биш гэж үү? Завхарсан зан чанар харуулахаас эхлээд мөс чанарынх нь үр нөлөө хүртэл, тэгээд хийж буй муу зүйлээ орхиж, гэмшиж, өөрсдийн махан биеийн хүсэл, бодлоо орхиж, завхарсан зан чанараасаа урваж, үнэнийг хэрэгжүүлэх чадвар хүртэлх—энэ гурван үе шат бол хүн чанартай, завхарсан зан чанартай жирийн хүмүүсийн хүрэх ёстой зүйл юм. Мөс чанарынхаа ухамсар болон харьцангуй сайн хүн чанарынхаа ачаар энэ хүмүүс үнэнийг хэрэгжүүлж чаддаг. Үнэнийг хэрэгжүүлж чадаж байна гэдэг нь ийм хүмүүст аврагдах найдвар бий гэдгийг илтгэдэг. Өөрөөр хэлбэл, сайн хүн чанартай хүмүүсийн хувьд аврагдах магадлал харьцангуй өндөр байдаг.

Антихристүүдийг антихристийн зан чанартай хүмүүсээс юу ялгадаг вэ? Эхний үе шатанд антихристүүдийн харуулдаг зүйл нь гаднаа аливаа завхарсан хүний харуулдаг зүйлүүдтэй үндсэндээ адилхан байдаг боловч дараагийн хоёр үе шат нь өөр байдаг. Жишээлбэл, хүн засуулж байхдаа харгис завхарсан зан чанар харуулах үед дараагийн алхамд нь мөс чанар нь үйлчлэх шаардлагатай болдог. Гэвч антихристүүдэд мөс чанар байдаггүй, тиймээс тэд юу гэж бодох вэ? Тэдэнд ямар илрэл байх вэ? Тэд Бурханыг шударга бус байна гэж гомдоллож, Бурхан өөрсдөөс нь өө сэв хайж, алхам тутамд нь хүндрэл, бэрхшээл учруулахыг оролдож байна гэж шалтаглана. Үүний дараа тэд огт гэмшихгүй гөжүүдэлж, хамгийн илэрхий алдаа эсвэл завхарсан зан чанараа ч хүлээн зөвшөөрөхөөс татгалзаж, өөрсдийн алдааг хэзээ ч хүлээн зөвшөөрөхгүй бөгөөд бүр улам даварч, үйл ажиллагаагаа нууцаар үргэлжлүүлэхийн тулд бүх аргыг сүвэгчилнэ. Антихристүүдийн харуулдаг завхарсан зан чанараас дүгнэхэд тэдний зан араншин ямар байдаг вэ? Тэдэнд мөс чанар байдаггүй, тэд өөрсдийгөө шинжлэхээ мэддэггүй бөгөөд харгис байдал, хорлонтой байдал, дайралт, өшөө авалт харуулдаг. Тэд баримтыг нуун дарагдуулахын тулд худал үг зохиож, хариуцлагыг бусдад тохдог; тэд бусдыг урхидах далд явуулга сэдэж, бодит баримтыг ах эгч нараас нуудаг; мөн тэд өөрсдийгөө улайран өмгөөлж, зөвтгөл санал болгож, маргаанаа хаа сайгүй тараадаг. Энэ бол тэдний харгис зан чанарын үргэлжлэл юм. Тэдэнд мөс чанарын ухамсар байдаггүй, өөрсдийгөө шинжилж, эргэцүүлж, ойлгож чаддаггүйгээс гадна, тэд улам даварч, харгис зан чанараа үргэлжлүүлэн харуулж, Бурханы гэрийн эсрэг бархирч, ах эгч нарын эсрэг бархирч, тэднийг эсэргүүцэж, бүр ноцтой нь Бурханыг эсэргүүцдэг. Хэсэг хугацааны дараа нөхцөл байдал намжих үед тэд гэмшиж, нүглээ улайх уу? Хэдийгээр хэрэг явдал хэдийнээ өнгөрч, бодит баримт илчлэгдэж, хариуцлага нь тэднийх гэдгийг нийтээрээ мэдэж байгаа бөгөөд тэд энэ хариуцлагыг үүрэх ёстой ч—тэд үүнийг хүлээн зөвшөөрч чадах уу? Тэд харамсаж, эсвэл өртэй мэт мэдэрч чадах уу? (Үгүй.) Тэд эсэргүүцсээр байдаг бөгөөд: “Ямартай ч, би хэзээ ч буруутай байгаагүй, гэхдээ буруутай байсан ч миний санаа зорилго сайн байсан; би буруутай байсан ч намайг ганцаархан буруутгаж болохгүй. Та нар яагаад бусдыг буруутгахгүй—яагаад намайг онилоод байгаа юм бэ? Би хаана алдаа гаргасан юм бэ? Би санаатайгаар ямар ч буруу зүйл хийгээгүй. Та нар бүгд алдаа гаргасан байж яагаад өөрсдөдөө хариуцлага тооцохгүй байгаа юм бэ? Түүнээс гадна, хэн амьдралыг ямар нэгэн алдаа гаргахгүйгээр туулж чадах юм бэ?” гэж боддог. Тэд гэмшдэг үү? Тэд өртэй мэт мэдэрдэг үү? Тэд өртэй мэт мэдэрдэггүй бөгөөд гэмшдэггүй. Зарим нь бүр: “Би тийм их төлөөс төлсөн байхад—та нарын хэн нь ч яагаад анзаараагүй юм бэ? Яагаад хэн ч намайг магтаагүй юм бэ? Яагаад надад шагнал өгөөгүй юм бэ? Ямар нэг зүйл тохиолдох үед та нар үргэлж намайг буруутгаж, надаас өө сэв хайдаг. Та нар зүгээр л миний эсрэг дөрөөлөх зүйл хайж байгаа юм биш үү?” гэж хэлдэг. Энэ бол тэдний сэтгэлгээ, байдал юм. Энэ нь харгис зан чанар гэдэг нь тодорхой—тэд огт гэмшдэггүй, өмнө нь баримт дэлгэх үед хүлээн зөвшөөрөхөөс татгалзаж, тууштай эсэргүүцдэг. Тэд хэнийг ч чангаар хараахгүй байж болох ч дотроо тоо томшгүй олон удаа хараасан байж магадгүй—удирдагчдыг сохор хэмээн харааж, ах эгч нарыг сайн хүмүүс биш, байр суурьтай байхад нь бялдуучилж байсан хэрнээ одоо байр сууриа алдмагц нь анхаарал хандуулахгүй, өөрсөдтэй нь нөхөрлөхгүй, эсвэл бүр өөрсөд рүү нь инээмсэглэхгүй байна хэмээн хараадаг. Тэд бүр зүрх сэтгэлдээ Бурханыг харааж, зөвт биш хэмээн Бурханыг шүүдэг. Эхнээсээ дуустал тэдний харуулдаг зан чанар харгис байдаг бөгөөд мөс чанарын өчүүхэн төдий ч үр нөлөөгүй, харамсах эсвэл гэмших ямар ч шинжгүй байдаг. Тэд эргэж буцах, үнэн-зарчмыг эрэлхийлэх, нүглээ улайж, гэмшихээр Бурханы өмнө ирэх, эсвэл Бурханы зохион байгуулалт, зохицуулалтад дуулгавартай дагах ямар ч санаа зорилгогүй нь тодорхой. Оронд нь тэд тууштай маргаж, эсэргүүцэж, гомдоллодог. Антихристүүд болон гэмшиж чаддаг хүмүүс хоёулаа адилхан завхарсан зан чанар харуулдаг боловч эдгээр харуулж буй зүйлийн уг чанарт ялгаа байдаггүй гэж үү? Энэ бүлгүүдийн аль нь антихристийн зан чанартай, аль нь антихристийн мөн чанартай вэ? (Гэмшдэггүй хүмүүс нь антихристийн мөн чанартай байдаг.) Гэмшиж чаддаг хүмүүс хэн бэ? Тэд бол антихристийн зан чанартай завхарсан хүмүүс, гэхдээ тэд антихристүүд биш. Антихристийн мөн чанартай хүмүүс нь антихристүүд, харин антихристийн зан чанартай хүмүүс нь жирийн завхарсан хүмүүс юм. Энэ хоёрын дунд аль бүлэг нь ёрын муу хүмүүсээс бүрддэг вэ? (Антихристийн мөн чанартай хүмүүс.) Та нар үүнийг ялган таньж чадна, тийм үү? Энэ нь ямар нэг буруу зүйл хийж, засуулах, чөлөөлөгдөх эсвэл сахилгажуулагдах гэх мэт нөхцөл байдалтай тулгарах үедээ аль бүлэг нь мөс чанар нь өөрсдийг нь буруутгаж буй шинж тэмдэг огт харуулахгүй, эргэж буцах эсвэл эргэцүүлэхгүйгээр маргасаар байж, шударга бусаар шүүж, маргаанаа тарааж байгаагаас хамаарна. Хэрвээ тэднийг барих хэн ч байхгүй бол тэд үйл ажиллагаагаа зогсоох уу? Үгүй. Тэдний зүрх сэтгэл сөрөг байдал, эсэргүүцлээр дүүрч, тэд: “Хүмүүс надад шударга бус хандаж, бурхан надад нигүүлсэл үзүүлэхгүй, эсвэл миний өмнөөс үйлдэхгүй байгаа тул би ирээдүйд үүргээ гүйцэтгэхдээ зүгээр л хэлбэрдэнэ. Би үүргээ сайн гүйцэтгэсэн ч шагнал авахгүй, хэн ч намайг магтахгүй, би засуулсаар л байх болно, тиймээс би зүгээр л хааш яаш байдлаар хийнэ. Асуудлыг зарчмын дагуу шийдвэрлэх, эсвэл ажил дээрээ бусадтай хэлэлцэж, хамтран ажиллах, эсвэл үнэнийг эрж хайхыг надаас шаардана гэж бодсоны ч хэрэггүй! Би үл тоомсорлосон хэвээр, ихэмсэг ч биш, даруу ч биш байна. Хэрвээ та нар надаар ямар нэг зүйл хийлгэхийг хүсвэл би хийнэ; хэрвээ надаар ямар нэг зүйл хийлгэхийг хүсэхгүй бол би зүгээр л орхиод явна. Та нар хүссэнээрээ л авирла; би өөрийнхөөрөө л байна. Надаас хэтэрхий их зүйл бүү шаард; хэрвээ шаардлага чинь өндөр байвал би тэдгээрийг үл тооно.” Энэ нь харгис зан чанарын үргэлжлэл биш гэж үү? Ийм хүмүүс гэмшиж чадах уу? (Үгүй, чадахгүй.) Энэ бол антихристийн мөн чанартай хүмүүсийн илрэл юм. Антихрист хорон муу зан чанар харуулах үед ч мөн адил, тэд мөс чанаргүй учраас хэзээ ч эргэцүүлдэггүй. Тэдэнд ямар нэгэн зүйл тохиолдох үед тэд ямар ч завхарсан зан чанар харуулсан, эсвэл ямар ч санаа зорилго, хүсэл, амбицтай байсан тэднийг мөс чанар нь хэзээ ч барьдаггүй. Тиймээс, цаг нь таарч, өөрсдөд нь ашигтай байх үед тэд хүссэнээрээ хийдэг. Үйлдлийнх нь үр дүн ямар байхаас үл хамааран тэд эргэж буцдаггүй бөгөөд өөрсдийн үзэл бодолтой зууралдсан хэвээр байж, амбиц, хүсэл, санаа зорилгоо, түүнчлэн үргэлж аливааг хийж ирсэн арга хэрэгсэл, арга барилаа өчүүхэн ч өөрийгөө буруутгахгүйгээр хадгалж үлддэг. Яагаад тэд өөрсдийгөө буруутгадаггүй вэ? Яагаад гэвэл ийм хүмүүст мөс чанар байдаггүй, тэдэнд нэр төрийн мэдрэмж байдаггүй бөгөөд тэд ямар ч ичгүүргүй байдаг; тэдний бүхий л хүн чанарт завхарсан зан чанарыг нь барьж чадах юу ч байдаггүй бөгөөд харуулж буй завхарсан зан чанар нь зөв эсвэл буруу эсэхийг үнэлэхэд ашиглаж болох юу ч тэдэнд байдаггүй. Тиймээс, энэ хүмүүс хорон муу зан чанар харуулах үед бусад хүн үүнийг хэрхэн харах, эсвэл үйл явц болон үр дүн нь ямар байхаас үл хамааран, эхнээсээ дуустал тэд өөрсдийгөө буруутгахгүй, гуниглахгүй, харамсахгүй, өртэй мэт мэдрэхгүй бөгөөд зүрх сэтгэлдээ тэд яав ч эргэж буцдаггүй. Эд бол антихристүүд юм. Энэ хоёр жишээнээс дүгнэхэд антихристүүдийн хамгийн илэрхий онцлог чанар юу вэ? (Тэдэнд мөс чанар, эрүүл ухааны байдаггүй нь.) Мөс чанар, эрүүл ухаан ийн байдаггүй нь ямар төрлийн илрэлд хүргэдэг вэ? Тэдний харуулдаг зан чанарын үр дүн юу вэ? (Тэд эргэцүүлж, эсвэл гэмшиж чаддаггүй.) Эргэцүүлж, эсвэл гэмшиж чаддаггүй хүмүүс үнэнийг хэрэгжүүлж чадах уу? Хэзээ ч үгүй!

Зөвхөн антихристийн зан чанартай хүнийг мөн чанартаа антихрист гэж тодорхойлох болохгүй. Антихристүүдийн уг чанар-мөн чанартай хүмүүс л жинхэнэ антихристүүд юм. Энэ хоёрын хүн чанарт ялгаа байдаг нь тодорхой бөгөөд өөр өөр төрлийн хүн чанарын удирдлага дор тэдгээр хүмүүсийн үнэнд ханддаг хандлага ч мөн адилгүй байдаг—мөн хүмүүсийн үнэнд ханддаг хандлага адилгүй байх үед тэдний сонгодог зам өөр байдаг; хүмүүсийн сонгодог зам өөр байх үед тэдний үйлдлийн үр дүнд бий болох зарчим болон үр дагаварт ч бас ялгаа бий. Зөвхөн антихристийн зан чанартай хүнд үйлчилдэг мөс чанар байдаг бөгөөд эрүүл ухаан, нэр төрийн мэдрэмжтэй байж, харьцангуй яривал үнэнийг хайрладаг учраас тэд завхарсан зан чанараа харуулах үед зүрх сэтгэлд нь үүнийг нь зэмлэх зэмлэл байдаг. Ийм үед тэд өөрсдийгөө эргэцүүлж, өөрсдийгөө танин мэдэж чаддаг бөгөөд завхарсан зан чанар болон завхрал харуулснаа хүлээн зөвшөөрч чаддаг нь тэдэнд махан бие болон завхарсан зан чанараасаа урваж, үнэнийг хэрэгжүүлж, Бурханыг дуулгавартай дагахад хүрэх боломжийг олгодог. Гэвч антихристийн хувьд байдал ийм биш. Тэдэнд үйлчилдэг мөс чанар, эсвэл мөс чанарт ухамсар байдаггүй, нэр төрийн мэдрэмж бүр ч байдаггүй тул завхарсан зан чанараа харуулах үедээ тэд өөрсдийнх нь харуулж буй зүйл зөв эсвэл буруу эсэх, эсвэл харуулж буй зүйл нь завхарсан зан чанар уу, хэвийн хүн чанар уу, эсвэл энэ нь үнэнд нийцэж байгаа эсэхийг Бурханы үгийн дагуу хэмждэггүй. Тэд эдгээр зүйлийн талаар хэзээ ч эргэцүүлдэггүй. Тэгвэл тэд хэрхэн авирладаг вэ? Тэд өөрсдийн харуулдаг завхарсан зан чанар болон сонгосон замыг зөв гэж үргэлж зүтгэдэг. Тэд хийсэн бүхнээ зөв, хэлсэн бүхнээ зөв гэж боддог; тэд өөрсдийн үзэл бодолтойгоо зөрүүдлэн зууралддаг. Тиймээс, тэд хэчнээн том буруу зүйл хийсэн ч, хэчнээн ноцтой завхарсан зан чанар харуулсан ч хэрэг явдлын ноцтой байдлыг хүлээн зөвшөөрөхгүй бөгөөд харуулсан завхарсан зан чанараа яав ч ойлгохгүй. Мэдээж хэрэг, тэд Бурханд болон үнэнд дуулгавартай дагах замыг сонгохын тулд хүслээ хойш тавьж, амбиц эсвэл завхарсан зан чанараасаа урвахгүй. Энэ хоёр өөр үр дүнгээс харахад, хэрвээ антихристийн зан чанартай хүн зүрх сэтгэлдээ үнэнийг хайрладаг бол тэдэнд үүний талаарх ойлголтод хүрч, үүнийг хэрэгжүүлж, авралд хүрэх боломж байдаг бол антихристийн мөн чанартай төрлийн хүн үнэнийг ойлгож, эсвэл хэрэгжүүлж чадахгүй, мөн авралд ч хүрч чадахгүй. Тэр хоёрын ялгаа бол энэ юм.

III. Антихристүүдийн зан чанар-мөн чанар

Өнөөдрийн нөхөрлөлийн гол анхаарах зүйл нь антихристүүдийн зан чанар-мөн чанар яг юу болохыг түлхүү нэгтгэн дүгнэх явдал хэвээр байна. Бидний саяхан хэлэлцсэн хүмүүсийн зургаан завхарсан зан чанараас аль гурвыг нь ашиглах нь антихристийн зан чанар-мөн чанартай хүмүүсийг тодорхойлоход илүү оновчтой байдаг вэ? (Үнэнд зэвүүцэх зэвүүцэл, харгис байдал, хорон муу байдал.) Бид хүрээгээ энэ гурав болгон хумьсан тул эхний гурав нь энэ нөхөрлөлийн хэсэг байхгүй. Тэгвэл антихристийн зан чанар-мөн чанартай хүмүүст гөжүүд байдал, биеэ тоосон зан, ов мэхтэй байдал гэх завхарсан зан чанарууд байдаггүй юу? (Үгүй.) Тэгвэл яагаад антихристүүдийн зан чанар-мөн чанарыг тодорхойлохын тулд эхний гурвыг ашигладаггүй вэ? (Яагаад гэвэл жирийн завхарсан хүмүүст ч бас эхний гурав нь байдаг бөгөөд эдгээр нь хүний мөн чанарыг төлөөлдөггүй.) Энэ бол маш оновчтой дүгнэлт юм. Зан чанар-мөн чанарын сэдвийн тухайд, эхний гурван завхарсан зан чанар нь түвшний хувьд харьцангуй хөнгөн байдаг бол антихристүүдийн зан чанар-мөн чанарыг үнэхээр нэгтгэн дүгнэж чадахууд нь сүүлийн гурав буюу үнэнд зэвүүцэх зэвүүцэл, харгис байдал, хорон муу байдал юм. Энэ гурван завхарсан зан чанар нь антихристүүдийн зан чанар-мөн чанарыг илүү оновчтой тодорхойлж чадна. Хэдийгээр эхний гурвыг антихристүүдийн мөн чанарыг тодорхойлоход ашигладаггүй ч тэр гурван завхарсан зан чанар нэг бүр нь антихристэд байдаг бөгөөд жирийн хүмүүсийнхээс илүү ноцтой байдаг. Үнэнд зэвүүцэх зэвүүцэл, харгис байдал, хорон муу байдлыг бүгдийг нь тэдний гөжүүд байдлыг нэгтгэн дүгнэж, тодорхойлох, гөжүүд байдлынх нь түвшнийг дүрслэхэд ашиглаж болно. Мөн сүүлийн гурван зан чанарыг тэдний биеэ тоосон зан, ов мэхтэй байдлыг нэгтгэн дүгнэж, тодорхойлоход адилхан ашиглаж болно. Антихристүүдийн зан чанар-мөн чанарын гол онцлог чанар нь үнэнд зэвүүцэх зэвүүцэл, харгис байдал, хорон муу байдал гэдэг нь илэрхий байна.

А. Хорон муу байдал

Энэ гурван завхарсан зан чанар болох үнэнд зэвүүцэх зэвүүцэл, харгис байдал, хорон муу байдлаас хорон муу байдал нь антихристийн зан чанар-мөн чанар дахь зан чанарын хамгийн цогц дүгнэлт бөгөөд антихристийн зан чанар-мөн чанарт хамгийн түгээмэл байдаг зүйл юм. Яагаад антихристийн зан чанар-мөн чанарыг дүрслэхэд хорон муу байдлыг ашигладаг вэ? Хэрвээ антихристүүдийг нэлээд хорон муу гэдэг бол тэдний бодлоос харахад тэднийг хорон муу мөн чанартай хүмүүс гэдгийг батлах юуг тэд өдөр бүр бодож, хэлж, хийдэг вэ? Энэ нь тунгаан бодох ёстой асуулт биш гэж үү? (Тийм.) Тэгвэл энэ хүмүүст хорон муу мөн чанар үнэхээр оршин байдаг эсэхийг шүүхийн тулд бид тэдний юу боддог, хэл яриа болон зан байдал, мөн тэд биеэ хэрхэн авч явж, ертөнцтэй хэрхэн харьцдагаас шинжилгээ, ажиглалтаа эхлэх ёстой. Эхлээд антихристүүд өдөр бүр юуны талаар боддогийг харцгаая. Зарим хүн зүрх сэтгэлдээ: “Энэ бүлэг хүмүүсийн дунд би хамгийн чадвартайд тооцогддоггүй, хамгийн мундаг билиг авьяастай ч биш, тэгвэл би яаж илүү их нэр хүнд олж авч, хүн бүрийн хүндлэлийг хүлээж, өвөг дээдэстээ алдар нэр авчирч, толгой дээрээ гэрлэн титэмтэй болох вэ? Би яаж бусдыг ятгаж, үгийг минь сонсдог, намайг хүндэлдэг болгох вэ? Байр суурьтай байх нь сайн хэрэг бололтой. Зарим хүн үнэхээр нэр хүндтэй бөгөөд бусад хүнд асуудал тулгарах үед тэдэн рүү очдог—яагаад хэн ч над руу ирдэггүй юм бэ? Яагаад хэн ч намайг анзаардаггүй юм бэ? Надад ухаан, санаа, юмыг хийх арга зүй байна, мөн би асуудалд эрүүл сэтгэлгээ ашиглах чадвартай—яагаад хэн ч надад анхаарал хандуулахгүй, эсвэл намайг өндрөөр үнэлэхгүй байгаа юм бэ? Би хэзээ бусдаас ялгарах вэ? Хэзээ хүн бүр надаас тусламж гуйж ирж, намайг дэмжих вэ?” гэж боддог. Энэ хүмүүс юуны талаар бодож байна вэ? Тэд эерэг зүйлийн талаар бодож байна уу, эсвэл сөрөг зүйлийн талаар уу? (Сөрөг зүйлийн талаар.) Зарим хүн бусад хүн хоорондоо сайн харилцаатай байгааг хараад: “Тэдний харилцаа яагаад ийм сайн байдаг билээ? Би хагалан бутаргаж, харилцааг нь муутгах арга олох хэрэгтэй; ингэвэл би тусгаарлагдахгүй, ханьтай болно” гэж боддог. Энэ хүмүүс юу хийж байна вэ? Ямар ч арга ашигласан бай, энэ бүхэн нь хагалан бутаргах явдал болж хувирдаг. Тэд хэн нэгнийг үүргээ урам зоригтой, эрч хүчтэйгээр гүйцэтгэж, үүргээ гүйцэтгэх явцдаа юу ч хийсэн гэрэл олж авч байгааг хараад атаархаж, тэр хүнийг хэрхэн унагах, хэрхэн урам зоригийг нь мохоож, сөрөг болгох талаар тунгаан боддог. Эдгээр бодол нь үйлдэл болсон ч бай, үгүй ч бай, сөрөг бодол юм. Мөн: “Шинээр сонгогдсон удирдагч намайг хэрхэн хардаг бол? Би энэ удирдагчтай ойртож дотносох хэрэгтэй. Бидний харилцаа тийм ч сайн биш, бид тийм ч дотно биш, тэгвэл би яаж тэдэнд тал засаж болох вэ? Надад жаахан мөнгө байгаа, тиймээс би тэдэнд юу хэрэгтэй байгааг олж мэдээд, түүнийг нь худалдаж авч өгнө өө. Гэхдээ хэрвээ тэдэнд компьютер хэрэгтэй бол би тийм их мөнгө үрэхийг хүсэхгүй байна; хэрвээ тэд ирээдүйд удирдагч байхаа боливол тэр мөнгө үрэгдсэн хэрэг болохгүй гэж үү? Хэрвээ тэдэнд бээлий эсвэл хувцас гэх мэт зүйл хэрэгтэй бол би худалдаж авч дийлнэ, зарцуулсан мөнгөндөө харамсах зүйлгүй. Мөнгийг дэмий үрэх биш, зөв зүйлд зарцуулах ёстой. Би бас удирдагчийг зөвхөн хоосон үгээр биш, бодит үйлдлээр бялдуучилж, баярлуулах ёстой—энэ удирдагч юунд дуртайг би ажиглах хэрэгтэй. Түүнчлэн, өдөр бүр хоол идэх цаг болоход би удирдагчийн хоолыг аягалж өгөхөд тусалж, хоолоо идэж дууссаных нь дараа аяга тавгийг нь угаана. Хэрвээ удирдагч хэн нэгнийг шүүмжилбэл би дагаж, түүнийг дэмжинэ; хэрвээ удирдагч хэн нэгнийг магтвал би тэр хүнийг хурдан санал болгож, сайн чанаруудыг нь магтана” гэж боддог хүмүүс ч байдаг. Энэ хүмүүс юуны талаар бодож байна вэ? (Удирдагчийг баярлуулж, тэдэнд бялдуучлах талаар.) Мөн Бурханы гэрт ажиллаж байхдаа: “Бусад хүн шаргуу, чин сэтгэлээсээ ажилладаг; би ухаантай байх ёстой, мунхаг байж болохгүй, мөн өөрийгөө хэтэрхий их ядрааж болохгүй. Хэрвээ ирээдүйд бурхны гэрт би хэрэггүй болбол энэ хүчин чармайлт талаар болохгүй гэж үү? Би дэмий л шаргуу ажиллаж байгаа хэрэг болохгүй гэж үү? Гэхдээ би огт ажиллахгүй бол бурхны гэрээс хөөгдөнө. Би яах ёстой вэ? Удирдагчийг байх үед би хамаг чадлаараа ажиллаж, хөлсөө дуслуулж, удирдагчид харуулна; тэднийг байхгүй үед би ариун цэврийн өрөө орж, ус ууж, гадуур зугаалж, эсвэл амарч суух булан олно. Хэрвээ бусад хүн гурван хүрз шороо ухвал би хагас хүрзийг ухна; хэрвээ бусад хүн гурав эсвэл таван удаа нааш цааш явж юм зөөвөл би ганцхан удаа л хийнэ. Би боломж гармагц л амарч, цалгардана. Би тийм чин сэтгэлээсээ байх ёсгүй; хэрвээ би хэт шаргуу ажилласнаас болж өвдөж эсвэл ядарвал хэн намайг өрөвдөх юм бэ? Хэн миний өвчнийг эмчлэх юм бэ? Удирдагч анхаарах уу? Бурхан анхаарах уу? Бурхан эдгээр зүйлийг хариуцах уу? Тиймээс, ажиллаж байхдаа би хаана хамгийн нүдэнд тусахаар ажиллаж болохоо олох хэрэгтэй. Цалгардахыг хүсэх үедээ би хаана хамгийн бага баригдах магадлалтай, хаана хамгийн бага анхаарал татах магадлалтайгаа олох хэрэгтэй” гэж боддог хүмүүс байдаг. Энэ хүмүүс юуны талаар бодож байна вэ? (Цалгардаж, зальжин авирлах талаар.)

1. Антихристүүд хүмүүст юу хийдэг вэ

Өдөржингөө хорон муу бодол тээдэг хүмүүсийн зан араншин ямар байдаг вэ? Зан араншин нь дорд ёс жудагтай, дотуур тамиртай байдаг. Тэдний зан чанараас харахад энэ нь юу вэ? (Хорон муу байдал.) Тэдний боддог эдгээр зүйлийн уг чанарт ямар нэг чигч зүйл байна уу? Эрхэмсэг, нээлттэй, шударга сонсогдох ямар нэгэн зүйл байна уу? Ямар нэгэн сайн зүйл байна уу? (Үгүй, юу ч байхгүй.) Тиймээс товчхондоо, антихристийн мөн чанартай хүмүүсийн хорон муу зан чанарт илэрдэг эхний зүйл бол тэдний өдөржингөө боддог зүйл нь зөвхөн муу муухай байдаг явдал юм. Том эсвэл жижиг асуудалтай тулгарсан эсэхээс үл хамааран тэдний бодол муу муухайгаар дүүрэн байдаг. Тодруулбал, тэд хүмүүст зарим нэг зүйл хийдэг бөгөөд Бурханд хандахдаа ч бас өөр өөр илрэл, хэрэгжүүлэлттэй байдаг. Тэгвэл тэд хүмүүст ямар зүйл хийдэг вэ? Тэд бодолдоо ямар төрлийн хэрэгжүүлэлтийг хөгжүүлдэг вэ? Саяхан дурдсан хэд хэдэн жишээнээс ийм төрлийн хүн бусдын эсрэг хэрхэн байнга явуулга хийдгийг та нар харж чадаж байна уу? Тэд тасралтгүй явуулга хийдэг бөгөөд тэдэнтэй харилцсан, эсвэл холбоотой байсан хэн боловч тэдний явуулгын бай болдог. Хоёрдугаарт, хэдийгээр заримдаа тэд аливааг хийх үедээ ярьдаггүй ч тэдний үйлдлийн арга зам, арга барил, эх сурвалж нь жинхэнэ биш бөгөөд тэд үнэнийг хэрэгжүүлдэггүй—энэ нь ердөө л хуурмаг дүр төрх юм. Үүний уг чанар нь юу вэ, энэ хэрэгжүүлэлт юу вэ? Энэ бол заль мэх, дүр эсгэлт бөгөөд тэд бас бусдыг уруу татдаг. Тэд дүр эсгэж, хүмүүсийг мэхэлж чаддаг тул хүмүүсийг урхидаж, төөрөлдүүлж чадах уу? (Тийм, тэд чадна.) Түүнчлэн, ийм төрлийн хүн байр суурь, нэр хүнд, нэр нүүр болон өөрийн ашиг сонирхлын төлөө бусадтай байнга тэмцэлддэг. Тэд алдар нэрийн төлөө, хэн эцсийн үгийг хэлэхийн төлөө, хэнд илүү их санаа байгаагийн төлөө, хэний үзэл бодол илүү мэргэн, үндэслэлтэй гэдгийн төлөө, хэнийг хүн бүр илүү дэмжихийн төлөө, хэн илүү их ашиг тус хүртэхийн төлөө тэмцдэг—энэ бол тэдний өрсөлддөг зүйл юм. Байр суурьгүй байхдаа ч тэд хүмүүсийн эсрэг ингэж явуулга хийдэг, тэгвэл байр суурьтай болох үедээ яах вэ? Тэгвэл тэдний ноёрхол дор байгаа хүмүүс байнга тарчилдаг; тэд үнэнийг хайрладаггүй хүмүүсийг татаж, өөртөө урвуулдаг бөгөөд үнэнийг хүлээн авч чаддаг хүмүүс рүү дайрч, гадуурхдаг, үүний зорилго нь хүн бүрийг өөрсдийнх нь үгийг сонсдог, өөрсдийг нь дуулгавартай дагадаг болгох явдал юм; тэд бүлэг дотор үргэлж бүлэглэл үүсгэж, хагалан бутаргадаг бөгөөд эцэст нь хүн бүрийг өөрсдийнхөө харьяанд оруулдаг. Эдгээр зүйл нь бүгд тэдний тарчлаах хүрээнд багтдаг. Антихристүүд өдөржингөө муу муухай зүйл боддог бөгөөд харуулдаг зан чанар бүр нь муу байдаг. Тэгвэл ийм хүмүүсийн зан чанарыг хорон муу гэж хэлэх нь зөв үү? (Тийм, зөв.) Хүн бүр байраа мэддэг, өөрийн ажилдаа үнэнч байж, хийх ёстойгоо хийдэг бүлэгт антихрист гарч ирмэгцээ дотроос нь хагалан бутаргаж, А-гийн өмнө Б-г, Б-гийн өмнө А-г муулж, тэр хоёрыг хооронд нь сөргөлдүүлдэг. Энэ нь хагалан бутаргасны үр дүн биш гэж үү? Тэгвэл антихристийн явуулгын зарим илрэл юу вэ? Жишээлбэл, чуулганд сонгууль болох үед амбицгүй жирийн хүмүүс: “Хэн ч сонгогдсон би дуулгавартай дагана; Бурхан хэнийг удирдагч байхыг зөвшөөрнө, тэр хүнийг би дэмжиж, төвөг удахгүй, эсвэл асуудал үүсгэхгүй” гэж бодож магадгүй. Гэвч муу санаа зорилготой хүмүүс ингэж боддоггүй. Хэрвээ тэд энэ сонгуульд ялах ямар ч найдваргүйгээ харвал зүрх сэтгэлдээ тооцоолж эхэлдэг: “Би хүн бүрд ямар нэгэн сайн зүйл худалдаж авч өгөх хэрэгтэй. Сүүлийн үед чуулганд юу дутагдаж байна вэ? Би агаар цэвэршүүлэгч худалдаж аваад цуглааны байранд тавина, ингэснээр хүн бүр цэвэр агаараар амьсгалах үедээ намайг бодох болно. Ингэвэл сонгууль болох үед тэдний бодох хамгийн эхний нэр дэвшигч нь би байх биш үү? Тиймээс би дэмий үйлдэл хийж, мөнгөө дэмий үрэхгүй.” Ингэж бодоод тэд хамгийн хямдхан бөгөөд нүдэнд хамгийн аятайхан харагдах агаар цэвэршүүлэгчийг хурдан худалдаж авдаг. Түүнчлэн, тэд: “Энэ хугацаанд би болгоомжтой байх хэрэгтэй. Би буруу зүйл хэлж болохгүй, мөн сөрөг, хүмүүсийг босгон байгуулдаггүй зүйл хэлж болохгүй; хүмүүстэй уулзах болгондоо би үргэлж зусардсан үг хэлж, бусдыг байнга магтаж: ‘Чи үнэхээр сайхан харагдаж байна! Чи үнэхээр үнэнийг эрэлхийлж байна! Хэдийгээр чи над шиг удаан Бурханд итгээгүй ч надаас илүү үнэнийг эрэлхийлсэн. Чиний хүн чанар сайн бөгөөд чам шиг сайн хүн чанартай хүмүүс аврагдаж чадна—надтай адилгүй’ гэх мэт зүйл хэлэх ёстой. Би даруу харагдаж, бусдыг бүх талаараа надаас илүү гэж магтаж, өөрсдийг нь хангалттай хүндлэл хүлээсэн хүмүүс гэдэг мэдрэмжийг бусдад төрүүлэх ёстой” гэж боддог. Энэ нь явуулга хийж байгаа хэрэг биш гэж үү? Антихристүүд ийм зүйлийг ямар ч хүчин чармайлтгүйгээр хийдэг; жирийн хүмүүс тэднээс илүү явуулга хийж чадахгүй. Үл итгэгчдийн дунд ямар үг байдаг вэ? (Хүн чамайг худалдчихаад байхад чи тэдэнд мөнгөө тоолоход нь тусалсаар байна.) Антихристүүд ийм зүйл үйлддэг бөгөөд ихэнх хүн тэдний урвалт болон явуулгын бай болдог.

Надад хэлдээ, антихристүүд засуулахыг хүлээн авдаг уу? Тэд өөрсдөд нь завхарсан зан чанар байгааг хүлээн зөвшөөрдөг үү? (Үгүй, тэд хүлээн зөвшөөрдөггүй.) Тэд завхарсан зан чанартай гэдгээ хүлээн зөвшөөрдөггүй ч засуулсныхаа дараа өөрсдийгөө мэддэг мэт дүр эсгэсээр байдаг. Тэд өөрсдийгөө хүн чанаргүй, хэв чанар муутай диавол, Сатан гэж хэлдэг, мөн аливааг сайтар бодож чаддаггүй, чуулганаас зохицуулсан даалгаварт тэнцэхгүй, үүргээ зохих ёсоор гүйцэтгээгүй гэдэг. Тэгээд олонхын өмнө завхарсан зан чанараа хүлээн зөвшөөрч, өөрсдийгөө диавол гэдгээ хүлээн зөвшөөрч, эцэст нь энэ бол Бурхан тэднийг цэвэршүүлж, аварч байгаа хэрэг гэж хэлэн, засалт хүлээн авах ямар чадвартай, үнэнд ямар дуулгавартай гэдгээ хүмүүст харуулдаг. Тэд яагаад засуулж байгаагаа, эсвэл тэдний үйлдэл чуулганы ажилд ямар хор хөнөөл, хохирол учруулсныг дурддаггүй. Тэд эдгээр асуудлаас зайлсхийж, өөрсдийгөө Бурханы гэрээс хүртэж буй засалтыг хүртэх ёсгүй, шударга бус байсан мэтээр, яг л ямар нэгэн агуу шударга бус зүйл амссан мэтээр хүмүүст буруугаар ойлгуулахын тулд хоосон үг, хоосон сургаал, үгийн заль, тайлбарласан үг хэлдэг. Засуулсныхаа дараа тэд зүрх сэтгэлдээ буулт хийдэггүй бөгөөд янз бүрийн муу үйлээ өчүүхэн төдий ч хүлээн зөвшөөрдөггүй. Тэгвэл завхарсан зан чанараа хүлээн зөвшөөрч, үнэнийг хүлээн авахад бэлэн байж, засалтыг дуулгавартай дагаж чадна хэмээн тэдний нөхөрлөсөн эдгээр үг бүгд юу вэ? Эдгээр нь тэдний жинхэнэ мэдрэмж үү? Яавч үгүй. Тэдгээр нь бүгд хүмүүсийг төөрөлдүүлж, урхидах зорилготой худал үг, дүр эсгэлт, диаволын үг юм. Хүмүүсийг төөрөлдүүлэх тэдний зорилго юу вэ? (Хүмүүсээр өөрсдийгөө шүтэн мөргүүлж, дагуулах.) Яг тийм, энэ бол хүмүүсийг төөрөлдүүлж, урхидан өөрсдийг нь дагадаг, сонсдог болгож, хүн бүрд өөрсдийгөө зөв, сайн гэж бодуулах явдал юм. Ингэснээр хэн ч тэднийг нэвт хардаггүй, эсвэл тэднийг эсэргүүцдэггүй. Эсрэгээрээ, хүмүүс тэднийг үнэнийг хүлээн авдаг, засалт хүлээн авдаг, гэмшдэг хүн гэж итгэдэг. Тэгвэл тэд яагаад муу үйлээ хүлээн зөвшөөрдөггүй, эсвэл Бурханы гэрийн ажилд учруулсан хохирлоо хүлээн зөвшөөрдөггүй вэ? Тэд яагаад эдгээр асуудлыг ил гаргаж нөхөрлөдөггүй вэ? (Хэрвээ тэд эдгээр зүйлийг хэлбэл хүмүүс тэднийг ялган танина.) Хэрвээ хүмүүс тэднийг ялган таньж, нэвт харж, хүн чанар болон зан чанар-мөн чанарыг нь нэвт харсан бол тэднийг хаях болно. Хүмүүс тэдний заль мэхэнд унаж, тэдэнд төөрөлдсөөр байх уу? Хүмүүс тэднийг өндрөөр үнэлсээр байх уу? Хүмүүс тэднийг тэнгэрт тултал магтсаар байх уу? Хүмүүс тэднийг шүтэн мөргөсөөр байх уу? Хүмүүс эдгээрийн алийг ч хийхгүй. Антихристүүд өөрсдийгөө мэддэг мэт дүр эсгэдэг боловч үнэн хэрэгтээ энэ бүхэн нь хүмүүсийг төөрөлдүүлж, өөрсдийгөө өмгөөлүүлэхийн тулд хийдэг үгийн заль, өөрийгөө тайлбарласан үг бөгөөд энэ нь тэдний далд сэдэл юм. Тэд хүмүүсийг төөрөлдүүлж, урхидахын тулд, хүмүүсээр өөрсдийгөө хүндлүүлж, шүтэн мөргүүлэхийн тулд чухал асуудлаас зайлсхийж, өөрсдийгөө танин мэдэх болон засалт хүлээн авах талаар хөнгөн ярьдаг. Энэ арга барил нэлээд хорон муу биш гэж үү? Зарим хүн үнэхээр үүнд нь автдаг бөгөөд антихристүүдэд төөрөлдсөнийхөө дараа: “Тэр хүн үнэхээр сайхан ярьдаг—би маш их урам зориг авсан. Би хэд хэдэн удаа уйлсан!” гэж хэлдэг. Тэр үед энэ хүмүүс тэднийг маш их шүтэн мөргөж, хүндэлдэг боловч эцэст нь тэд антихристүүд болж таардаг; энэ бол антихристүүд бусдыг төөрөлдүүлж, урхидсаны үр дагавар юм. Антихристүүд хүмүүсийг ингэж төөрөлдүүлж чаддаг бөгөөд үүнд нь автаж, мэхлэгддэг хүн мэдээж мундахгүй олон байдаг. Хэрвээ хүн энэ асуудал дээр антихристүүдийг ялган таньж чадвал тэр үнэнийг ойлгодог, ялган таних чадвартай хүн юм.

Антихристүүд хүмүүсийг байнга тарчлаадаг. Тэдэнд нэг алдартай үг байдаг, тэр нь: “Хонгор минь, чи надад буулт хийхгүй байгаа учраас би чамайг ганц хоёрхон нүүдлээр өвдөг сөгдүүлж, өөрийгөө шүтэн мөргөдөг болгоно—хэрвээ чи буулт хийхгүй бол би чамд цаазын ял онооно!” гэдэг. Антихристүүд юу хийхийг хүсдэг вэ? Тэд хүмүүсийг тарчлаахыг хүсдэг. Тэд ямар төрлийн хүнийг тарчлаахыг хүсдэг вэ? Хэрвээ чи тэднийг дуулгавартай дагаж, тэдэнд бялдуучилж, тэднийг шүтэн мөргөвөл тэд чамайг тарчлаах уу? Хэрвээ чи тэдэнд номхон, дуулгавартай байвал, хэрвээ тэд чамайг заналхийлэх юмгүй, зүгээр л ялихгүй амьтан эсвэл боол гэж харвал чамайг тарчлаах гэж хичээхгүй. Хэрвээ тэд ямар нэгэн муу зүйл хийж, эсвэл муу үйл үйлдвэл, өөрсдийг нь ялган таньдаг, өөрсдийг нь ил болгож, илчлэх, өөрсдийг нь байр сууринаас нь буулгах, нэр хүндийг нь унагаж, үйлдлийг нь тасалдуулах хэн нэгнийг олбол тэд тэр хүнийг хэрхэн тарчлаах талаар боддог. Антихристүүд хүмүүсийг гэнэтхэн шийдээд л тарчлаадаггүй; харин тэд хүмүүсийг байнга ажиглаж, сорьж, хэн ар хударгаар өөрсдийг нь муулж байгааг, хэн өөрсдөд нь буулт хийхгүй байгааг, хэн өөрсдийнх нь үйлдлийг ялган таньж байгааг, хэн өөрсдөд нь анхаарал хандуулахгүй байгааг, хэн өөрсдөд нь тал засахаас татгалзаж байгааг хардаг. Хэсэг хугацаанд ажиглаж, ийм хоёр гурван хүнийг олсныхоо дараа тэд цуглааны үеэр энэ хүмүүсийн асуудлын талаар нөхөрлөж эхэлдэг. Хэдийгээр тэдний хэлж байгаа зүйл өнгөн дээрээ зөв мэт санагдах ч үнэн хэрэгтээ энэ нь шалтгаан, зорилготой, хэн нэгэн рүү чиглэсэн байдаг. Шалтгаан нь юу вэ? Тэд хэдийнээ сайтар судалсан байдаг; энэ хүмүүс өөрсдөд нь буулт хийхгүй байгаа бөгөөд өөрсдийг нь ялган таньж, үргэлж өөрсдийг нь ил болгож, илчлэхийг, өөрсдийг нь албан тушаалаас нь буулгахыг оролддог. Тэд тэр хүмүүст анхааруулахын тулд, тэдэнд сануулга өгөхийн тулд эдгээр зүйлийг хэлдэг. Хэрвээ энэ хүмүүс ухарч, цааш үргэлжлүүлэхээс зүрхшээж, бүх зүйл антихристүүдийн хүслийн дагуу болбол антихристүүд тэднийг үл тоодог. Гэвч хэрвээ энэ хүмүүс өмнөх шигээ үргэлжлүүлж, тэдэнд тал засахаас татгалзаж, тэднийг илчлэх, Дээрхэд мэдээлэх, албан тушаалаас нь буулгах бодолтой хэвээр байвал тэд антихристүүдийн тарчлаах дараагийн бай болдог. Тэд өөр арга барил бодож олж, илүү хүчтэй, хатуу арга хэмжээ авч, тэдний эсрэг дөрөөлөх зүйлтэй болох арга сүвэгчилж, тэднийг тарчлаах боломж хайж, тэднийг чуулганаас хөөлгөх хүртлээ зогсдоггүй. Санал зөрөгсөдтэй антихристүүд ийн тарчлааж харьцдаг бөгөөд зорилгодоо хүрэх хүртлээ тэд амрахгүй. Хүмүүсийг тарчлаахдаа ашигладаг антихристүүдийн арга барил нь харгис хэрцгий байдаг. Тэд шалтаг олж, хүмүүст нэр хоч өгөхөөс эхэлдэг бөгөөд дараа нь тэднийг тарчлааж эхэлдэг, хүмүүс тэднийг бүрэн дуулгавартай дагаж, буулт хийх хүртэл зогсдоггүй—эс бөгөөс энэ нь дуусахгүй. Чуулганд антихристүүд байнга хагалан бутаргаж, бүлэглэл үүсгэдэг нь фракц үүсгэж, чуулганыг хяналтдаа авах зорилготой юм. Энэ нь нийтлэг үзэгдэл биш гэж үү? Антихристүүд бүлэглэл үүсгэж, хагалан бутаргаж, хүчнүүдийг өөрсдөдөө татаж, өөрсдөд нь ашигтай, өөрсдийнх нь өмнөөс дуугарч, муу үйлийг нь нуун дарагдуулж, эгзэгтэй мөчид өөрсдийг нь өмгөөлж чадах хүмүүстэй хуйвалддаг. Тэд энэ хүмүүсээр өөрсдийнхөө төлөө юм хийлгэж, бүр бусдын талаар мэдээлүүлж, өөрсдийнхөө элчийн үүрэг гүйцэтгүүлдэг. Хэрвээ тэд байр суурьтай бол энэ бүлэг нь тэдний бие даасан хаанчлал болдог. Хэрвээ тэдэнд байр суурь байхгүй бол тэд болон тэдний бүлэг чуулган дотор хүчин байгуулж, чуулганы хэвийн дэг журмыг үймүүлж, хөндлөнгөөс оролцож, чуулганы хэвийн амьдрал, ажлыг үймүүлдэг.

Антихристүүдийн хорон муу мөн чанарын хамгийн түгээмэл илрэл бол тэд дүр эсгэх, хоёр нүүр гаргахдаа онцгой сайн байдаг явдал юм. Тэд онцгой харгис, дотуур тамиртай, харгис хэрцгий, биеэ тоосон зан чанартай хэр нь, гаднаа өөрсдийгөө туйлын даруу, эелдэг мэт харуулдаг. Энэ нь дүр эсгэлт биш гэж үү? Энэ хүмүүс өдөр бүр зүрх сэтгэлдээ тунгаан: “Би Христэд итгэгч шиг, илүү чигч, илүү сүнслэг, илүү ачаатай, илүү удирдагч шиг харагдахын тулд ямар хувцас өмсөх ёстой вэ? Хүмүүст өөрийгөө эелдэг боловсон, намбалаг, буурь суурьтай, хангалттай эрхэмсэг гэж мэдрүүлэхийн тулд би хоолоо хэрхэн идэх ёстой вэ? Удирдагчийн шинж чанар, сэтгэл татам байдлыг илтгэж, жирийн биш, онцгой хүн шиг харагдахын тулд би ямар алхаатай байх ёстой вэ? Би бусадтай ярилцахдаа ямар өнгө аяс, үгсийн сан, харц, нүүрний хувирал гаргавал хүмүүст өөрийгөө нийгмийн элит эсвэл өндөр зэрэглэлийн сэхээтэн шиг дээд зиндааны хүн мэт сэтгэгдэл төрүүлж чадах вэ? Хувцаслалт, хэв маяг, хэл яриа, зан авираараа хүмүүст өөрийгөө хэрхэн өндрөөр үнэлүүлж, тэдэнд арилшгүй сэтгэгдэл үлдээж, зүрх сэтгэлд нь баттай үүрд үлдэж чадах вэ? Хүмүүсийн зүрх сэтгэлийг татаж, дулаацуулахын тулд, мөн мартагдашгүй сэтгэгдэл үлдээхийн тулд би юу хэлэх ёстой вэ? Би бусдад тусалж, тэдний талаар сайнаар ярьж, хүмүүсийн өмнө бурхны үгийн талаар байнга ярьж, зарим нэг сүнслэг нэр томьёо ашиглаж, бусдад бурхны үгийг илүү их уншиж өгч, тэдний төлөө илүү их залбирч, хүмүүсээр чих тавиулан өөрийгөө сонсгохын тулд намуухан дуугаар ярьж, тэдэнд өөрийгөө эелдэг, халамжтай, хайр энэрэлтэй, өгөөмөр, уужуу сэтгэлтэй гэж мэдрүүлэхийн тулд илүү ихийг хийх ёстой” гэж боддог. Энэ нь дүр эсгэлт биш гэж үү? Эдгээр нь антихристүүдийн зүрх сэтгэлийг эзэмддэг бодлууд юм. Тэдний бодлыг дүүргэдэг зүйлс нь үл итгэгч ертөнцийн чиг хандлагаас өөр юу ч биш бөгөөд энэ нь тэдний бодол санаа, үзэл бодол ертөнцийнх болон Сатаных гэдгийг бүрэн илтэгдэг. Зарим хүн нууцаар янхан эсвэл бүр завхай эм шиг хувцасладаг байж магадгүй; тэдний хувцаслалт нь ялангуяа хорон муу чиг хандлагад нийцдэг бөгөөд онцгой загварлаг байдаг. Гэвч чуулганд, ах эгч нарын дунд ирэх үедээ тэд тэс өөр хувцас өмсөж, өөр зан аяг гаргадаг. Тэд дүр эсгэхдээ туйлын гаргууд биш гэж үү? (Тийм.) Антихристүүдийн зүрх сэтгэлдээ тунгаан боддог зүйл, тэдний хийдэг зүйл, тэдний янз бүрийн илрэл, тэдний харуулдаг зан чанар нь бүгд тэдний зан чанар-мөн чанар хорон муу гэдгийг харуулдаг. Антихристүүд үнэн, эерэг зүйл, зөв зам, эсвэл Бурханы шаардлагыг тунгаан боддоггүй. Тэдний бодол болон тэдний сонгодог арга барил, арга зам, зорилго нь бүгд хорон муу байдаг—тэдгээр нь бүгд зөв замаас хазайж, үнэнтэй нийцдэггүй. Тэдгээр нь бүр үнэний эсрэг явдаг бөгөөд ерөнхийд нь тэдгээрийг муу гэж дүгнэж болно; ердөө л энэхүү муугийн уг чанар нь хорон муу байдаг—тиймээс үүнийг нийтэд нь хорон муу байдал гэж нэрлэдэг. Тэд үнэнч шударга хүн байх, цэвэр ариун, нээлттэй байх, эсвэл чин сэтгэлтэй, үнэнч байх талаар тунгаан боддоггүй; харин ч хорон муу арга барилын талаар боддог. Жишээлбэл, өөрийнхөө талаар цэвэр ариун байдлаар нээлттэй байж чаддаг хүнийг авч үзье, энэ нь эерэг зүйл бөгөөд үнэнийг хэрэгжүүлж байгаа хэрэг юм. Антихристүүд үүнийг хийдэг үү? (Үгүй.) Тэд юу хийдэг вэ? Тэд байнга дүр эсгэдэг бөгөөд ямар нэгэн муу зүйл хийж, өөрсдийгөө илчилж эхэлмэгцээ үүнийгээ улайран нууж, өөрсдийгөө зөвтгөж, өмгөөлж, баримтыг нуун дарагдуулдаг—тэгээд эцэст нь шалтгаанаа хэлдэг. Эдгээр хэрэгжүүлэлтийн аль нэг нь үнэнийг хэрэгжүүлэхтэй дүйцэх үү? (Үгүй.) Тэдгээрийн аль нэг нь үнэн-зарчимтай нийцдэг үү? Бүр ч үгүй.

Сая бид антихристүүдийн зан чанар-мөн чанарын эхний тал болох хорон муу байдлын талаар нөхөрлөж, задлан шинжиллээ. Бид антихристүүд өдөржингөө юуны талаар боддогийг задлан шинжлэхээс эхэлж, антихристүүдийн хорон муу зан чанарыг задлан шинжлэхийн тулд тэдний бодол, үзэл бодол, янз бүрийн асуудалд хариу үйлдэл үзүүлэх арга зам, арга барилыг ашигласан. Мөн бид антихристүүдийн бодолд оршин байдаг зүйлд үндэслэн тэдний хийдэг янз бүрийн зүйлийн уг чанарыг задлан шинжилсэн. Түүнчлэн, эдгээр тохиолдлоор дамжуулан илчлэгдсэн тэдний зан чанар-мөн чанарыг задлан шинжлэхийн тулд зарим нэг жишээ дурдсан. Эдгээр жишээний тухайд, эдгээр зан авирыг гаргаж, эдгээр зан чанарыг харуулдаг хүмүүсийн дунд харьцангуй сайн хүн чанартай хэн нэгнийг та нар харсан уу? Ийм илчлэлт, илрэлтэй хүний тухайд тэдний зан араншинд үнэнч шударга байдал, сайхан сэтгэл, эгэл байдал, чин сэтгэл, чигч байдал гэх мэт зүйл байдаг уу? (Байдаггүй.) Тэдэнд мэдээж эдгээр чанар байдаггүй. Эсрэгээрээ тэдний зан араншин нь дотуур тамиртай, харгис хэрцгий, худал хэлдэг зуршилтай, аминч, олиггүй, нэр төрийн мэдрэмжгүй байдаг. Тэдний зан араншны эдгээр онцлог нэлээд тодорхой байдаг. Өдөржингөө хорон муу бодол боддог, янз бүрийн хорон муу зүйл хийж чаддаг хүмүүс бүгд зан араншин маш тааруутай гэж хэлэх нь оновчтой юм. Хэр зэрэг тааруу вэ? Зан аашинд нь мөс чанар, ёс жудаг, ялангуяа хэвийн эрүүл ухаан байдаггүй. Эдгээр зүйлгүй хүмүүсийг хүн гэж үзэж болох уу? Эдгээр зүйлгүй хүмүүсийг хүн биш; тэд ердөө л хүний гаднах хальсыг өмссөн байдаг гэж баттай хэлж болно. Зарим хүн: “Энэ нь хонины арьс нөмөрсөн чонотой адилхан биш гэж үү?” хэмээн асууж магадгүй. Энэ бол ердөө л зүйрлэл юм. Хонины арьс нөмөрсөн чоно гэж юу вэ? Тэд мөн чанартаа чоно юм. Чоно болон диаволууд эсвэл антихристүүдийн хооронд мөн чанарын ялгаа бий юу? Чоно шунасандаа биш, харин Бурханы тогтоосон уг чанарынх нь нэг хэсгийн улмаас ан хийж, үхэр, хонь иддэг. Гэвч чононд байдаг, антихристүүдэд байдаггүй нэг зүйл бий. Хэрвээ хэн нэгэн чоно үрчилж авч өсгөх, эсвэл амийг нь аварсан бол чоно тэр хүнд хэзээ гэм хийхгүй бөгөөд талархал илэрхийлнэ. Эсрэгээрээ антихристүүд Бурханы нигүүлсэл, удирдамж, Бурханы үгийн хангалт эдэлдэг боловч бүх зүйлд Бурханы эсрэг явуулга хийж, үргэлж Түүнийг эсэргүүцэж, Түүнд дайсагнадаг. Тэд Бурханы хийдэг юуг ч дуулгавартай дагаж чаддаггүй; тэд үүнд амен гэж хэлж чаддаггүй—тэд сөрөн зогсохыг хүсдэг. Антихристүүдийг хонины арьс нөмөрсөн чоно гэж хэлэх нь зохистой юу? Энэ зүйрлэл оновчтой юу? (Үгүй, оновчтой биш.) Өнгөрсөнд, шашинд антихрист эсвэл ёрын муу хүн гэж нэрлэгдсэн хэнийг ч хонины арьс нөмөрсөн чоно гэж үздэг байсан. Энэ нь хүмүүс үнэнийг болон янз бүрийн хүмүүсийн хүн чанар-мөн чанар, зан чанарыг ойлгодоггүй байх үедээ ашигладаг байсан ердөө нэг зүйрлэл байв. Гэвч үнэнийг энэ түвшинд нөхөрлөх үед энэ зүйрлэлийг ашиглах нь төдийлөн тохиромжгүй болдог. Диаволууд бол диаволууд, антихристүүд бол диаволуудтай тэнцүү бөгөөд тэд Бурханы бүтээсэн бүх амьд зүйлтэй харьцуулагдах үнэ цэнгүй юм. Бурханы бүтээсэн зүйлсийн аль нэг нь, жишээлбэл, чоно эсвэл бусад махчин амьтан Бурханыг эсэргүүцэж, эсвэл Түүнд тэрсэлж байсан уу? Тэд Бурханы эсрэг бархирч, эсвэл Түүнийг эсэргүүцэх үү? Тэд Бурханы хэлсэн юуг ч шүүж, яллаж, эсвэл дайрах уу? Тэд тийм зүйл хийдэггүй; тэд зөвхөн Бурханы тэдэнд тогтоосон зөн совин, амьдрах орчны дагуу л амьдардаг. Бурхан тэднийг юу байхаар бүтээсэн, тэд яг л тийм байдаг—ямар ч дүр эсгэлтгүйгээр. Гэвч антихристүүд өөр: Тэдэнд Сатаны уг чанар байдаг бөгөөд тэд эерэг зүйл болон үнэний эсрэг үйлдэхдээ гаргууд байдаг. Тэд яг л агуу улаан луутай адил: Тэд Бурханыг эсэргүүцэх үйлдэл хийхдээ гаргууд байдаг.

2. Антихристүүд Бурханд юу хийдэг вэ

Антихристүүд хүмүүст харуулдаг янз бүрийн хорон муу илрэлийн талаар нөхөрлөсний дараа, антихристүүд өдөржин зөвхөн хорон муу зүйл боддогтой холбоотойгоор Бурханд ямар илрэл харуулдаг талаар нөхөрлөцгөөе. Энэ сэдвээр бид өмнө нь их ярьсан тул нэгтгэн дүгнэцгээе. Бид харьцангуй хөнгөнөөс нь эхлээд, дараа нь аажмаар илүү ноцтой руу нь шилжих болно. Эхлээд эргэлзээ, түүний дараа Бурханыг шинжих явдал, мөн сэжиг, сэрэмжлэл, шаардлага тавих, наймаалцах зэрэг орно. Өөр зүйл бий юу? (Бурханыг сорих.) Энэ зан авирын шинж чанар нэлээд ноцтой. Цаашлах тусам зан авир бүрийн уг чанар улам бүр ноцтой болдог—үгүйсгэл, яллалт, шүүлт, доромжлол, хараал, дайралт, хашхираан, эсэргүүцэл. Эдгээр үгийн зарим нь өнгөн дээрээ бага зэрэг төстэй утгатай мэт санагдаж болох ч нарийвчлан үзвэл тэдгээрийн гүн гүнзгий байдал эсвэл онцлох зүйл нь өөр байдаг. Янз бүрийн өнцгөөс харж, эсвэл антихристүүдийн өөр өөр арга барилыг авч үзсэнээр бид эдгээр үгийн уг чанарын ялгааг гаргаж чадна.

а. Эргэлзээ

Эргэлзээ, шинжилт болон сэжиг нь харьцангуй анхан шатны илрэлүүд юм. Зарим хүн зүрх сэтгэлдээ ердөө л эргэлзээ тээж: “Бие махбодтой болсон махбод үнэхээр Бурхан мөн үү? Тэр надад зүгээр л хүн шиг санагддаг. Түүний үг бүгд үнэн гэж үү? Аль нь үнэн шиг сонсогдож байна вэ? Түүний хэлдэг зарим зүйл хүн хэлж, мэдэж чадахааргүй зүйл байж магадгүй. Хүмүүс нууц болон зөгнөлийг тодорхой тайлбарлаж чадахгүй байж болох ч эш үзүүлэгчид ч бас ийм зүйл хэлж чаддаг биш үү? Бурханыг зөвт гэдэг, гэхдээ Бурхан яаж зөвт байгаа юм бэ? Бурхан бүх зүйлийг захирдаг гэдэг, тэгвэл Сатан яагаад үргэлж муу зүйл хийгээд байгаа юм бэ? Сатан биднийг баривчилж, хавчиж, тамлан зовоох үед Бурхан яагаад хөндлөнгөөс оролцдоггүй юм бэ? Бурхан хаана байна вэ? Бурхан үнэхээр оршин байдаг юм уу?” гэж боддог. Хүмүүст жинхэнэ итгэл дутагдаж, Бурханы дээд эрхийг хүлээн зөвшөөрөхгүй, Бурханы зан чанар юм уу Бурханы мөн чанарыг мэдэхгүй, мөн үнэнийг ойлгохгүй үед зүрх сэтгэлд нь ийм эргэлзээ төрдөг. Гэвч хүмүүс Бурханы ажлыг аажмаар туулж, үнэнийг ухаарч, Бурханы дээд эрхийг хүлээн зөвшөөрөхийн хэрээр эдгээр эргэлзээ бага багаар шийдвэрлэгдэж, жинхэнэ итгэл болон хувирдаг. Энэ бол Бурханыг дагадаг хүн бүрийн зайлшгүй туулах зам юм. Гэвч хорон муу мөн чанартай антихристүүдийн хувьд тэдний эргэлзээ өөрчлөгдөж чадах уу? (Үгүй, өөрчлөгдөж чадахгүй.) Яагаад өөрчлөгдөж чадахгүй гэж? (Антихристүүд бол үл итгэгчид—тэд Бурханыг хүлээн зөвшөөрдөггүй.) Онолын хувьд тэд үл итгэгчид учраас Бурханд байнга эргэлздэг. Бодит шалтгаан нь гэвэл, ийм хүмүүс үнэн болон эерэг зүйлийг хүлээн авахаас төрөлхөөсөө татгалздаг. Гэвч Бурханы хийдэг бүхэн эерэг зүйл бөгөөд үнэн байдаг. Антихристүүд үнэнд зэвүүцэж, дайсагнадаг учраас Бурханы хийдэг бүх зүйл бодит баримт, тэр бүхэн Бурханы дээд эрх дор байдаг бөгөөд Бурханы дээд эрх нь Бурхантай адилаар гарцаагүй оршин байдаг гэдгийг хүн бүр хүлээн зөвшөөрлөө ч антихристүүд эдгээрийг бодит баримт гэж хүлээн зөвшөөрдөггүй, хүлээж авдаггүй. Тэдний зүрх сэтгэлд Бурханы талаарх эргэлзээ үүрд хадгалагддаг. Мэдээж, эдгээр нь баримт бөгөөд хүн бүр үүнийг нүдээр харсан, тэр ч байтугай ихэвчлэн хамгийн өчүүхэн итгэлтэй байдаг хүмүүс хүртэл олон жилийн турш Бурханы ажлыг туулсныхаа дараа Бурханы талаарх эргэлзээгээ арилгаж, Бурханд жинхэнэ итгэлтэй болдог. Гагцхүү антихристүүд л Бурханы талаарх эргэлзээгээ өөрчилж чаддаггүй. Бодит баримт дээр үндэслэн хэлбэл, онолын хувьд эдгээр хүн бол үнэнийг хүлээн авдаггүй үл итгэгчид боловч үнэн хэрэгтээ энэ нь антихристүүд үнэнд зэвүүцдэг бөгөөд хорон муу мөн чанартай байдгаас үүдэлтэй—энэ бол үндсэн шалтгаан нь юм. Бурханы хийсэн зүйлийг хэчнээн олон хүн баталж, гэрчилсэн ч, эсвэл антихристүүдийн нүдний өмнө хэчнээн хөдөлшгүй нотлох баримт тавьсан ч тэд Бурханы мөн чанарт, эсвэл Бурхан бүх зүйлийг захирдаг гэдэгт итгэхээс татгалзсаар байдаг—энэ бол хэтэрхий хорон муу юм. Үүнийг нэг зүйлээр тайлбарлаж болно: Бурхан бүх зүйлийг захирдаг гэх хөдөлшгүй, илэрхий бодит баримтыг антихристүүд харах үедээ тэд үүнд итгэдэггүй, хүлээн зөвшөөрдөггүй бөгөөд бүр Бурханд эргэлздэг. Гэвч шүтлэггүй хүмүүс, диаволууд болон муу ёрын сүнснүүдийн ярьдаг Будда юм уу үхэшгүй мөнхийнхөн гэгчийн үйл хэргийн тухайд—антихристүүдийн нүдээрээ хараагүй, ямар ч бодитой нотлох баримтгүй үйл хэрэгт—тэд шууд л итгэдэг. Энэ бол хорон муугийн туйлын илрэл юм. Бурханы үйл хэрэг хэчнээн агуу, эсвэл асар чухал байлаа ч антихристүүд эргэлзэж, үл тоомсорлодог бөгөөд зүрх сэтгэлдээ байнга эргэлзээ тээдэг. Гэсэн ч диаволууд юм уу Сатан ямар нэгэн хачин жигтэй зүйл хийх үед тэд автаж, бишрэн мөргөдөг. Бурхан хэчнээн агуу зүйл хийсэн ч тэд Бурханаас эмээж, Бурханд жинхэнэ итгэлтэй болж чаддаггүй. Эсрэгээрээ, тэд Сатаны зохиосон бүхэнд шууд итгэж, эдгээрийг бүх зүрх сэтгэлээрээ шүтэн биширдэг. Энэ бол хорон муугийн илрэл юм. Антихристүүд Бурханд эргэлздэг гэх баримт үргэлж оршин байдаг. Тэд Бурхан бүх зүйлийг захирдаг гэдэгт хэзээ ч итгэдэггүй бөгөөд Бурхан бол үнэн гэдгийг хэзээ ч хүлээн зөвшөөрдөггүй; эдгээр зүйлийг хэчнээн олон хүн гэрчилж, хэчнээн их нотлох баримт дэлгэлээ ч тэд үүнийг хүлээн зөвшөөрч, бас итгэж чаддаггүй. Нэг талаар, энэ нь антихристүүдийн хорон муу зан чанар-мөн чанартай холбоотой бөгөөд нөгөө талаар, ийм хүмүүс хэвийн хүн чанарын сэтгэн бодох үйл явцгүй учраас үнэн хэрэгтээ хүн биш гэдгийг энэ нь харуулдаг. Тэд хэвийн хүн чанарын сэтгэн бодох үйл явцгүй гэдэг нь юу гэсэн үг вэ? Энэ нь тэдэнд эерэг зүйл, үнэн болон бүх зүйлийн ар дахь мөн чанар, уг сурвалжийн талаарх зөв үзэл бодол, ойлголт дутагддаг гэсэн үг юм. Бурханы үгийг уншиж, номлол сонсож, Бурханы үгийг туулсан ч тэд баталж, эсвэл итгэж чаддаггүй, харин эргэлзсэн хэвээр байдаг. Ийм хүмүүст хэвийн хүн чанарын сэтгэн бодох үйл явц байдаггүй нь тодорхой. Хэвийн сэтгэн бодох үйл явцгүй, үнэн, Бурханы үг болон эерэг зүйл, баримтыг ухаарч чаддаггүй хүмүүс хүн хэвээрээ юу? (Үгүй, тэд хүн биш.) Тэд хүн биш, гэхдээ тэднийг амьтан гэж хэлж болохгүй, учир нь амьтанд хорон муу зан чанар байдаггүй; харин энэ хүмүүст хорон муу зан чанар байдаг тул дараах мэдэгдэл үнэн юм: Энэ хүмүүс үнэхээр чөтгөрийн уг чанартай, жинхэнэ антихристүүд мөн. Эргэлзээ бол антихристүүд Бурханд харуулдаг бодол санаан дахь байдал бөгөөд энэ нь мөн тэдний зан авирт илэрдэг нэг төрлийн зан чанар-мөн чанар юм, энэ бол хамгийн өнгөц, үндсэн, гадаад бөгөөд нийтлэг илрэл билээ.

б. Шинжилт

Антихристүүд зүрх сэтгэлдээ Бурханы талаарх эргэлзээгээр дүүрэн байдаг, тэгвэл тэд Бурханы үг, Түүний зан чанар, Түүний ажлыг жинхэнээсээ хүлээн авдаг уу? Тэд энэ бүхнийг үнэхээр дуулгавартай дагадаг уу? Тэд Бурханыг үнэхээр дагадаг уу? Хариулт нь үгүй гэдэг нь тодорхой. Үүний дараа юу болдог вэ? Энэ хүмүүс Бурханы гэрт ирэх үедээ: “Бурхан хаана байна вэ? Би түүнийг харж чадахгүй байна, зөвхөн дуу хоолойг нь л сонсож байна. Дуу хоолойноос нь дүгнэвэл эмэгтэй хүн бололтой; үгнээс нь дүгнэвэл тэр бичиг үсэг тайлагдаагүй биш, боловсролтой бололтой; гэхдээ ярих хэв маяг, үгийнх нь агуулгаас дүгнэвэл тэр юу яриад байна аа? Яагаад ойлгомжгүй сонсогдоод байна вэ? Сонссоныхоо дараа олон хүн үүнийг үнэн гэдэг, гэхдээ яагаад надад тэгж сонсогдохгүй байна вэ? Энэ бүхэн хүн чанарын асуудал, хүний зан чанар, хүмүүсийн үйлдэлдээ харуулдаг янз бүрийн байдлын тухай л байна—үүнд амь болон зам байна гэж үү? Би сайн ойлгохгүй байна. Сонссоныхоо дараа хүн бүр үүргээ үнэнчээр гүйцэтгэж, бурхныг сэтгэл хангалуун байлгаж, авралыг эрэлхийлэх ёстой гэж ярьдаг. Олон хүн бүр туршлагын гэрчлэлийн нийтлэл бичиж, гэрчлэл хийдэг. Энэ хүн бурхан мөн үү? Тэр бурхантай төстэй байна уу? Би түүний царайг хараагүй; хэрвээ харсан бол магадгүй царайг нь шинжээд тодорхой хариулттай болох байсан байх. Одоохондоо зөвхөн дуу хоолойг нь сонсож, юу хэлж байгааг нь сонсоод надад бага зэрэг эргэлзээтэй хэвээр байна” гэж боддог. Тэд юу хийж байна вэ? Тэд энэ үнэхээр Бурхан мөн эсэхийг харахын тулд бодит байдлыг ухамсарлах гэж шинжиж, сорьж байгаа бөгөөд дараа нь Түүнийг дагах эсэхээ, Түүнийг хэрхэн дагахаа шийдэж, мөн олж авахыг хүсдэг ерөөл, хүрэх газар, түүнчлэн өөрсдийнх нь хүсэлд өгөх хариултыг энэ хүнээс олж чадах эсэхээ, мөн энэ хүнээр дамжуулан тэнгэр дэх Бурхан ямархуу болох, Тэр үнэхээр оршин байдаг эсэх, Түүний зан чанар юу болох, хүмүүст хандах Түүний хандлага, арга барил ямар байж болох, Түүнд ямархуу чадвар, ур чадвар, эрх мэдэл байдгийг үнэн зөвөөр мэдэж чадах эсэхээ магадлан тогтоохыг оролддог. Энэ нь Бурханыг шинжиж байгаа хэрэг биш гэж үү? Мэдээж тэгж байгаа хэрэг юм.

Бурханыг шинжих зуураа антихристүүд Бурханы үгийг амь болгон хүлээн авч, тэдгээрийг өдөр тутмын амьдрал болон зан авирынхаа удирдлага, зорилго болгож чадах уу? (Үгүй.) Жирийн завхарсан хүн Бурханыг хэсэг хугацаанд шинжиж магадгүй бөгөөд: “Энэ зам буруу, миний зүрх сэтгэл тавгүй байна; Бурханыг ингэж шинжсэнээр би хариулт олж чадахгүй. Бурханд итгэгч хүн яаж Түүнийг шинжиж болох юм бэ? Бурханыг шинжсэнээр юу олж авч чадах юм бэ? Итгэгчид Бурханыг шинжих үед Бурхан тэднээс нүүрээ нуудаг бөгөөд тэд үнэнийг олж авч чаддаггүй. Бурханы үг бол үнэн бөгөөд хүмүүс Түүний үгэн дотроос замыг олж, амийг олж авч чадна гэдэг. Ингэж авирлах нь надад ямар ч сайн зүйл авчрахгүй—би Түүнийг үргэлжлүүлэн шинжиж болохгүй” гэж боддог. Тэд номлол сонсож, Бурханы үгийг уншихын хэрээр хүмүүст завхарсан зан чанар байдгийг аажмаар олж мэддэг бөгөөд эдгээр завхарсан зан чанарыг шийдвэрлэхгүй л бол Бурхантай нийцэж, үүргээ зохих ёсоор гүйцэтгэж, эсвэл юуг ч сайн хийж чадахгүй гэдгээ бага багаар ухаардаг. Хүмүүс үүргээ сайн гүйцэтгэж чаддаггүйн шалтгаан нь завхарсан зан чанар болон тэрслүү байдал нь тэдэнд саад болж байгаагаас, мөн тэд завхарсан зан чанарынхаа дагуу үйлдэж, үнэн-зарчмын дагуу асуудлыг зохицуулж чаддаггүйгээс болдог гэдгийг тэд аажмаар олж мэддэг. Дараа нь тэд “Би хэрхэн үнэн-зарчимтай нийцүүлэн үйлдэж чадах вэ? Завхарсан зан чанар минь илрэх үед би тэдгээрийг хэрхэн шийдвэрлэх вэ?” гэж бодож эхэлдэг. Хүмүүсийн завхарсан зан чанарт хамгийн сайн шийдэл бол үнэн болон Бурханы үг юм. Хүмүүс үнэн рүү орох хамгийн шууд арга бол үнэн-зарчмыг эрж хайж, хийдэг бүх зүйлийнхээ зарчмыг олох явдал юм. Энэ нь зорилго, чиглэл, зам болон хэрэгжүүлэх аргыг тогтоож өгдөг. Эдгээрийг тогтоомогц хүмүүст дагах зам бий болдог бөгөөд үйлдэл хийхдээ тэд захиргааны зарлигийг зөрчих, завхарсан зан чанараа харуулах, эсвэл саад, үймээн учруулах магадлал багасдаг, мөн Бурханыг эсэргүүцэх магадлал бүр ч багасдаг. Ийм туршлага туулсныхаа дараа тэд Бурханд итгэх итгэлдээ тохирох замыг олсон гэж мэдэрдэг бөгөөд энэ нь тэдэнд хэрэгтэй зам, тэдний орох ёстой зам, Бурханд итгэх итгэл болон амьдралын зөв зам бөгөөд Түүнийг шинжиж, Түүнд үргэлж харзнасан хандлагаар Түүнд хандахаас хамаагүй дээр гэдгийг мэдэрдэг. Бурханыг шинжих нь үр дүнгүй бөгөөд хүн Түүнийг хэчнээн их шинжлээ ч энэ нь тэдний харуулдаг янз бүрийн завхарсан зан чанарыг, эсвэл үүргээ гүйцэтгэх үед нь гарч ирдэг асуудлуудыг шийдвэрлэхгүй гэдгийг тэд ухаардаг. Тиймээс тэд Бурханыг шинжихээс үнэн-зарчмыг эрж хайх зам руу аажмаар шилждэг. Энэ бол жирийн завхарсан хүмүүсийн хувьд оролтын хэвийн арга зам болон туршлагын үйл явц юм. Гэвч антихристүүдийн хувьд энэ нь өөр байдаг. Бурханы гэрт орж, босгыг нь алхсан эхний өдрөөсөө л тэд “Бурханы гэр дэх бүх зүйл маш сонирхолтой, бүх зүйл маш шинэлэг байна—энэ нь үл итгэгч ертөнцөөс өөр юм. Бурханы гэрт хүн бүр үнэнч шударга байх ёстой; яг л том гэр бүл шиг, маш хөгжилтэй юм!” гэж боддог. Ах эгч нараа шинжиж, танилцаж, тэднийг сайтар ойлгосныхоо дараа тэдний хувьд Бурханыг шинжих цаг ирдэг. Тэд дотроо “Бурхан хаана байна вэ? Бурхан юу хийж байна вэ? Тэр үүнийг яаж хийж байна вэ? Тэнгэр дэх бурхныг шинжих хэцүү; түүнийг ойлгохын аргагүй бөгөөд бид үүнд хүрэхгүй. Гэхдээ одоо тохиромжтой дөт зам байна—бурхан дэлхий дээр ирсэн нь түүнийг шинжихэд амархан болгож байна” гэж боддог. Тэдний зарим нь газар дээрх Бурхантай холбогдох азтай байдаг бөгөөд энэ хүнийг өөрийн нүдээр хардаг нь Түүнийг шинжихэд бүр ч тохиромжтой болгодог. Тэд үүнийг яаж хийдэг вэ? Тэд газар дээрх Бурханы хөгжилтэй яриаг, ямар асуудал дээр Тэр нэг төрлийн ярианы хэв маяг ашиглаж, ямар асуудал дээр өөрийг ашигладгийг, Түүний инээж, баярладаг нөхцөл байдлыг, мөн тэр үед Тэр юуны талаар ярьж байдгийг, түүнчлэн Тэр баярлаагүй, эсвэл ууртай байх үедээ юуны талаар ярьдгийг шинждэг. Тэд ямар нөхцөл байдалд Тэр хүмүүсийг үл тоомсорлож, эсвэл тэдэнтэй нэлээд найрсаг байдгийг, хэзээ Тэр хүмүүсийг засдаг, хэзээ засдаггүйг, ямар асуудалд Тэр анхаарал хандуулж, юуг тоодоггүйг, түүнчлэн хүмүүс ар хударгаар нь Түүнийг шинжиж, мэхэлж, эсвэл гомдоох үед Тэр мэддэг эсэхийг шинждэг. Илүү өргөн хүрээний талуудыг шинжсэнийхээ дараа антихристүүд газар дээрх Бурхан юу иддэг, юу өмсдөг, Түүний өдөр тутмын хэвшил ямар байдаг зэрэг нарийн ширийн зүйлсийг ухаж төнхдөг. Тэд Тэр юунд дуртай, хаашаа явах дуртайг, тэр ч бүү хэл ямар өнгөнд дуртай, эсвэл дургүйг, нартай эсвэл үүлтэй цаг агаарын алийг нь илүүд үздэгийг, мөн муу цаг агаартай үед гадагш гардаг эсэх гээд энэ бүх нарийн ширийн зүйлийг шинждэг. Эхнээсээ дуустал антихристүүд үргэлж шинждэг бөгөөд Бурханы ялгамж чанарыг тээдэг энэ хүн юу хийхээр ирснийг үл тоомсорлодог. Тэд “Чи энд юу хийхээр ирсэн нь надад хамаагүй; чамайг харах болгонд чи миний шинжилтийн судлагдахуун болно” гэж хэлдэг. Тэдний шинжилтийн зорилго юу вэ? Тэд “Хэрвээ би чамайг үнэхээр бурхан мөн гэдгийг баталж чадвал бүх зүйлийг орхиж, чамайг тууштай, бүх зүрх сэтгэлээрээ дагаж чадна. Учир нь бурханд итгэх нь мөрий тавихтай адил бөгөөд чи өөрийгөө бурхан, бурхны бие махбодтой болсон махбод гэж хэлдэг тул чамд итгэх нь чам дээр мөрий тавьж байгаатай адил юм. Би яаж чамайг шинжихгүй байж чадах юм бэ? Хэрвээ би чамайг шинжихгүй бол энэ нь надад шударга бус байх болно. Хэрвээ би чамайг шинжихгүй бол өөрийнхөө хүрэх газар, ирээдүй, хувь заяаны төлөө хариуцлага хүлээхгүй байна гэсэн үг. Би чамайг эцсийг нь хүртэл шинжих ёстой” гэж боддог. Өнөөдөр ч гэсэн энэ бүх шинжилтийнхээ дараа тэд итгэлтэй бус байсаар байдаг: “Энэ хүн үнэхээр христ мөн үү? Тэр үнэхээр бие махбодтой болсон бурхан мөн үү? Энэ нь тийм ч тодорхой биш байна. Ямартай ч, олон хүн түүнийг дагаж байгаа бөгөөд сайн мэдээ түгээх нөхцөл байдал харьцангуй ирээдүйтэй байна. Цаашид ч улам түгэх төлөвтэй байгаа тул би хоцорч үлдэж болохгүй. Гэхдээ би түүнийг үргэлжлүүлэн шинжих хэрэгтэй” гэдэг. Тэд бол засаршгүй.

Антихристүүд хорон муу зан чанар-мөн чанартай тул шинжилтээ хэзээ ч зогсоодоггүй. Шүтлэггүй хүмүүсийн байгууллага юм уу нийгэмлэгт тэд бүх төрлийн хүнийг шинжиж, мөлждөг бөгөөд дарга нар нь юунд дуртайг олж мэдэж, сул талыг нь илрүүлээд, дараа нь тал засахын тулд үйлдлээ тааруулж, дарга нарынхаа сонирхолд нийцүүлдэг. Бурханы гэрт орж ирснийхээ дараа ч тэдний уг чанар өөрчлөгддөггүй—тэд шинжилтээ үргэлжлүүлсээр байдаг. Бурханыг шинжих нь итгэгчдийн дагах ёстой зам биш гэдгийг тэд ойлгодоггүй. Бурханыг шинжээд тэд Бурханы үйл хэргийг хэзээ ч ухаарч, Бурханы илэрхийлдэг бүхэн үнэн гэдгийг харж, эсвэл Бурханы энэ бүх үнэн болон үйл хэрэг нь хүн төрөлхтний авралын төлөө байдаг гэдгийг хэзээ ч ойлгохгүй. Антихристүүд энэ зүйлийг хэзээ ч ойлгохгүй. Тэдний хардаг ганц зүйл нь Бурханы сонгосон хүмүүс Сатаны хавчлага, мөрдлөг мөшгөлтөд байнга өртдөг явдал юм. Тэд зөвхөн ёрын муу хүмүүс муу үйл хийж, чуулган дотор үймээн дэгдээж байгааг, мөн шашны ертөнц дэх антихристүүдийн хүч Бурханыг тасралтгүй гүтгэж, яллаж байгааг л ажигладаг бөгөөд Бурхан энэ бүхнийг хэзээ ч шийдвэрлэдэггүй гэж хардаг. Иймээс антихристүүд өөрсдийн үзэл, төсөөлөлтэйгөө зууралдсаар байдаг бөгөөд Бурханы илэрхийлсэн ямар ч үнэнийг хүлээн авахаас эрс татгалздаг. Үр дүн нь юу вэ? Тэдний үзэл, төсөөлөл нь Бурханыг эсэргүүцэх нотлох баримт нь болдог. Антихристүүдийн нүдээр бол эдгээр нотлох баримт гэгч нь тэд Бурханы ялгамж чанар болон мөн чанарт итгэдэггүй, эсвэл хүлээн зөвшөөрдөггүйн шалтгаан юм. Тэд үнэнийг хүлээн авахаас татгалздаг учраас л эдгээр бодит баримтын цаана агуулагдаж буй үнэнийг, хүмүүсийн ойлгож ухаарах ёстой үнэнийг, мөн Бурханы санаа зорилгыг хэзээ ч, бүр хэзээ ч харахгүй. Энэ бол тэдний шинжилтийн үр дүн юм. Эдгээр баримттай тулгарах үедээ үнэнийг эрэлхийлдэг, үнэнийг хайрладаг, Бурханд жинхэнэ итгэлтэй хүмүүс Бурханы гэрт юу ч тохиолдсон Бурханаас хүлээн авч, зөвөөр хариу үйлдэл үзүүлж чаддаг бөгөөд тэд Бурханыг хүлээж, Бурханы өмнө зүрх сэтгэлээ намжаан Түүнд залбирч, Бурханы санаа зорилгыг ухамсарлахыг эрж хайж чаддаг, түүнчлэн энэ бүх зүйл тохиолдохын ард Бурханы сайн санаа зорилго байгаа гэдгийг ойлгож, ухаарч чаддаг. Ёрын муу хүмүүсийг илчилж, таслан хаяхын тулд Бурхан хүмүүсийн санаанд ч оромгүй олон зүйлийг хийдэг. Үүний зэрэгцээ, Бурханы сонгосон хүмүүсийг төгс болгохын тулд, мөн тэдэнд ялган таних чадвартай болох, сургамж авах боломж олгохын тулд Тэрээр ёрын муу хүмүүс болон тэдний муу үйлийг ашиглан үйлчлэл үзүүлүүлдэг. Нэг талаар, Бурхан тэднийг илчилж, таслан хаядаг; нөгөө талаар, Тэрээр Өөрийн сонгосон хүмүүст юу нь эерэг, юу нь сөрөг болохыг, Бурхан хэнийг сайшааж, хэнийг жигшдэгийг, хэн Бурханаар таягдан хаягдаж, хэнийг Тэр ерөөдгийг харах боломж олгодог. Эдгээр нь бүгд Бурханы сонгосон хүмүүсийн авах хэрэгтэй сургамж, үнэнийг эрэлхийлдэг хүмүүсийн хүрэх ёстой эерэг үр дүн, мөн хүмүүсийн ойлгох ёстой үнэн юм. Гэвч хорон муу зан чанар-мөн чанараасаа болоод антихристүүд эдгээр хамгийн үнэтэй зүйлд хэзээ ч хүрэхгүй. Тиймээс тэдэнд ганцхан байдал байдаг—тэд Бурханы өмнө байхдаа Түүнд эргэлзэхийн зэрэгцээ Түүнийг байнга шинжиж байдаг. Тэд үүнийг бүрэн дүүрэн ойлгож чадахгүй байсан ч Түүнийг шинжсээр л байдаг. Хэрвээ чи тэднээс ядарч байна уу гэж асуувал тэд “Огтхон ч үгүй. Бурхныг шинжих нь хөгжилтэй, гайхалтай, сонирхолтой, бас анхаарал татсан зүйл!” гэж хэлдэг. Эдгээр нь диаволын үг биш гэж үү? Тэд Сатаны дүр төрхтэй, тэдэнд антихристүүдийн уг чанар-мөн чанар байдаг. Тэдэнд үнэнийг юм уу Бурханы авралыг хүлээн авах ямар ч санаа зорилго байдаггүй; тэд зөвхөн Бурханыг шинжихийн тулд л энд байдаг.

в. Сэжиг

Одоо бид антихристүүд Бурханыг сэжиглэдэг талаар нөхөрлөх болно. Сэжиг гэдэг нь шууд утгаараа юу гэсэн үг вэ? Бурханыг шинжихэд зарим нэг тодорхой илрэл, бодол санаа, зан авир байдаг бөгөөд сэжиглэхэд ч бас яг адилхан байдаг гэж хэлэх нь туйлын зөв юм. Бурханыг шинжсэнийхээ дараа зарим хүн Бурханы зан чанар үнэндээ юу болохыг, эсвэл Бурханд ямар сэтгэл хөдлөл байдгийг мэддэггүй хэвээр байдаг бөгөөд Бурхан үнэхээр оршин байдаг эсэхэд итгэлтэй байдаггүй. Тэд энэ жирийн хүн Христ мөн эсэхийг, эсвэл Түүнд Бурханы мөн чанар байгаа эсэхийг бүр ч тодорхойлж чаддаггүй. Тэд эдгээр зүйлийг ойлгодоггүй бөгөөд тэдэнд тодорхой бус байдаг. Дараа нь Бурхантай харилцах боломж гарах үед тэд “Христ надтай хүмүүс үүргээ хааш яаш гүйцэтгэдэг талаар нөхөрлөсөн; хэн нэгэн намайг үүргээ хааш яаш гүйцэтгэдэг талаар ярьж, тэгээд христ олж мэдсэн юм болов уу? Тийм учраас тэр биднийг уулзах үед энэ талаар сөхөж ярьсан юм болов уу? Хэн нэгэн намайг матсан учраас ингэсэн нь гарцаагүй, тэгээд олж мэдсэнийхээ дараа христ намайг ил болгохоор онилсон. Намайг ямархуу хүн болохыг мэдсээр байж христ надад дуртай хэвээр байгаа болов уу? Тэр надад зэвүүцэж байгаа болов уу, эсвэл намайг дорд үзэж байгаа болов уу? Тэр намайг чөлөөлөхөөр бэлдэж байгаа юм болов уу?” гэж боддог. Хэсэг хугацаанд хүлээж, өөрсдийгөө чөлөөлөгдөөгүйг хараад тэд “Пөөх, би ямар их айв аа. Би христийг өчүүхэн зантай байж магадгүй гэж бодож байсан ч тэр тэгсэнгүй. Одоо би тайвширч болно” гэж боддог. Зарим хүн: “Христтэй хамгийн сүүлд уулзах үедээ би боловсролгүй хүн шиг утга авцалдаагүй ярьж, миний яриа бага зэрэг гаж байсан. Би үнэн төрхөө ил болгочихлоо. Христэд миний талаар муу сэтгэгдэл төрөх болов уу? Тэр дараа нь намайг таягдан хаях болов уу? Түүнтэй уулзахгүй байхад бүх зүйл зүгээр байдаг—түүнтэй уулзах үед л миний асуудлууд гарч ирдэг. Би түүнтэй дахиж уулзаж болохгүй, түүнийг харах үедээ зайлсхийж, аль болох хол байх ёстой, мөн би христтэй яавч харилцаж, холбогдож, ойр дотно байж болохгүй. Эс бөгөөс тэр намайг дорд үзэж магадгүй” гэж хэлж магадгүй. Эдгээр нь ямархуу бодол санаа, арга барил вэ? (Сэжиг.) Эдгээр нь сэжиг юм. Мөн “Сүүлийн цуглаан дээр бурхан энгийн асуулт асуусан ч би сайн хариулж чадаагүй нь миний дутагдлыг илчилсэн. бурхан намайг сайн хэв чанаргүй гэж бодоод, ирээдүйд намайг хөгжүүлэхгүй байх болов уу? Өнгөрсөн удаа хэн нэгэн миний хийсэн зүйлийг ил болгож, намайг мунхаг, бодлогогүй авирласан гэж хэлсэн. Хэрвээ бурхан үүнийг олж мэдвэл ирээдүйд намайг төгс болгох болов уу? Бурханы бодолд миний байр суурь ямар байгаа бол—өндөр үү, нам уу, давуу юу, дорд уу? Би аль ангилалд багтаж байгаа бол? Ирээдүйд би бурхантай ярих үедээ хэлэх үгээ ноороглох хэрэгтэй. Би хамаагүй ярьж, эсвэл юу бодож байгаагаа шууд хэлж болохгүй. Би илүү их тунгаан бодож, аливааг эргэцүүлж, илүү их бодолцож, үгээ сайн цэгцлээд, өөрийнхөө хамгийн шилдэг, чадварлаг талыг христэд харуулах ёстой. Энэ нь ямар гайхалтай, төгс байх бол оо!” гэдэг хүмүүс ч бас бий. Энэ нь ч бас сэжиг юм.

Сэжиг бол антихристүүдийн хорон муу зан чанарын өөр нэг онцлог юм. Антихристүүд эргэлзэж, шинжихийн зэрэгцээ сэжиг тээдэг. Товчхондоо, тэдний бодол санаанд аль тал нь давамгайлж байхаас үл хамааран, тэдгээрийн аль нь ч үнэнийг хэрэгжүүлж, эрэлхийлэхтэй ямар ч хамаагүй байдаг. Тэгвэл эдгээр арга барил, бодол санаа, эсвэл арга зам нь антихристүүдийн зан чанар-мөн чанар хорон муу гэдгийг баталж чадах уу? (Чадна.) Антихристүүд Бурханд эргэлзэж, Бурханыг шинжиж, эсвэл Бурханыг сэжиглэж байгаа эсэхээс үл хамааран, ямар ч тохиолдолд тэд үргэлж үнэн дээр төвлөрч чаддаггүй, хэзээ ч эргэж буцдаггүй бөгөөд үнэнийг огт эрэлхийлэлгүйгээр Бурхантай холбоотой асуудлыг тунгаан бодож, Бурханд хандахдаа эдгээр аргыг тууштай ашигладаг. Эдгээр үйлдэл нь хэчнээн ядаргаатай, хэцүү байсан ч тэд цуцалтгүйгээр үргэлжлүүлэн хийж, давтдаг. Тэд Бурханыг хэр удаан шинжиж, эсвэл сэжиглэснээс, мөн ямар нэгэн үр дүнд хүрсэн эсэхээс үл хамааран, урьдын адил энэ замаа дагаж, ийм маягаар үйлдэж, үйлдлээ давтсаар байдаг. Тэд хэзээ ч өөрсдийгөө шинжилж, “Энэ бол бүтээгдсэн зүйл Бурханд хандах ёстой арга барил, хандлага мөн үү? Миний Бурханд хандаж байгаа байдлын уг чанар юу вэ? Би ямар төрлийн зан чанар харуулж байна вэ? Түүнд ингэж хандах нь үнэнд нийцэх үү? Бурхан үүнийг жигшдэг үү? Хэрвээ би Бурханы жигшдэг зүйлийг хийсээр байвал эцсийн үр дүн нь юу байх вэ? Бурхан намайг орхиж, таягдан хаях болов уу? Сөрөг үр дагавар гарах юм чинь би яагаад Бурханы үг болон шаардлагын дагуу үйлдэж, хэрэгжүүлж болохгүй гэж?” хэмээн боддоггүй. Тэд эдгээр асуудлын талаар эргэцүүлдэг үү? (Үгүй.) Тэд яагаад эргэцүүлдэггүй вэ? Учир нь тэдний зан араншинд мөс чанар, эрүүл ухаан байдаггүй. Тэдэнд мөс чанар байдаггүй учраас ийм эрүүл ухаангүй, утгагүй үйлдэл хийж байгаагаа мэддэггүй. Эрүүл ухаан байдаггүй нь тэднийг өөрсдөө хэн болох, эсвэл ямар байр, үзэл бодол, байр суурьтай байх ёстойгоо хэзээ ч ойлгохгүй байхад хүргэдэг. Тэд өөрсдийгөө жирийн хүн, завхарсан хүн, эсвэл Бурханы жигшдэг Сатаны төрөл, үр удам гэж хэзээ ч мэдэрдэггүй. Хүмүүсийн хүлээн авах ёстой зүйлс бол Бурханы үг, Бурханы шаардлага, мөн Бурханы тэдэнд хангадаг үнэн юм; тэд Бурхантай эн тэнцүү мэт Түүнийг шинжиж, өөр хүнтэй харилцаж байгаа мэт Бурхантай инээлдэж, ярилцах ёсгүй—эдгээр нь хүн биш нэгний хийх зүйл биш гэж үү? Энэ мөчид антихристүүдийн зан араншин илчлэгдэж, антихристүүдийн хорон муу зан чанар-мөн чанар тэднийг ноёрхож, бусдад хор хөнөөлтэй, өөрсдөд нь ямар ч ашиг тусгүй эдгээр үнэ цэнгүй, утга учиргүй үйлдлийг цуцалтгүй хийхэд хүргэдэг. Гэсэн ч тэд үүнийг орхиж чаддаггүй; тэд энэ замын алдааг болон эдгээр үйлдлийн ард орших уг чанарыг ухамсарладаггүй хэвээр байдаг. Энэ хэрэгт оролцсон хүчин чармайлт, зовлон шаналал, бүтэлгүйтлийг үл харгалзан тэдэнд өөрийгөө буруутгах, зэмлэх, өртэй мэт мэдрэх мэдрэмж төрдөггүй. Тэд Бурхантай эн тэнцүү байх гэж зүтгэдэг, бүр Бурханыг шинжиж, үл тоомсорлон, Түүнд ахин дахин эргэлзэж, Түүнийг сэжиглэдэг. Тэд Бурханд хэчнээн олон жил итгэсэн байх нь хамаагүй, Бурханд хандах хандлага болон Түүнд хэрхэн ханддаг нь хэзээ ч өөрчлөгддөггүй. Хэрвээ тэд Түүнд эргэлзэхгүй байвал шинжиж байдаг, хэрвээ шинжихгүй байвал сэжиглэж байдаг. Тэд яг л чөтгөрт эзэмдүүлсэн юм уу илбэдүүлсэн мэт байдаг—эдгээр нь антихристүүдийн хорон муу мөн чанарын хэд хэдэн илрэл юм. Антихристүүд төрөлхөөсөө хорон муу байдаг; антихристүүдийн мөн чанарыг нэвт харж чаддаггүй зарим хүн: “Чи Бурханыг шинжихээс татгалзаж чадахгүй гэж үү? Чи Түүнд эргэлзэхээ больж чадахгүй гэж үү? Чи Түүнийг сэжиглэхээ больж чадахгүй гэж үү? Хэрвээ чи эдгээр зүйлийг хийхээ боливол үнэнийг ойлгож, Бурханд Бурхан мэт хандаж, Бурханд жинхэнэ итгэлтэй болж, зүй ёсоор Бурханы хүмүүсийн нэг болж чадна; чамд стандартад нийцсэн бүтээгдсэн зүйл болох боломж олдоно, тэгвэл чи Бурханы сонгосон хүмүүсийн нэг гэх нэрд зохих биш үү? Энэ нь ямар гайхалтай байх бол оо!” гэж хэлж магадгүй. Гэвч антихристүүд: “Би тийм мунхаг биш. Стандартад нийцсэн бүтээгдсэн зүйл байхын ашиг тус юу юм бэ? Тэр чинь уйтгартай. Би бурханд эргэлзэж, шинжиж, сэжиглэх үед л сонирхолтой байдаг!” гэж сөргөдөг. Антихристүүдийн энэ илрэл нь агуу улаан луугийн: “Бусад хүнтэй болон тэнгэртэй тэмцэх нь дуусашгүй зугааны эх сурвалж юм” гэж хэлдэгтэй адил. Энэ бол антихристүүдийн хорон муу уг чанар-мөн чанарын үнэн зөв тодорхойлолт бөгөөд жинхэнэ тусгал юм. Дүгнэж хэлэхэд, антихристүүд туйлын хорон муу, тэд эцсийн цэгтээ тултал хорон муу байдаг. Бурханд итгэдэг ч үнэнийг хүлээн авахаас эрс татгалздаг хүмүүс бол хорон муу хүмүүс юм. Олон хүн антихристүүд нэг л өдөр гэмшинэ гэж бодоод, тэдэнд гэмших боломж олгохыг үргэлж хүсдэг—энэ санаа зөв үү? “Баас хатавч өмхийгөө тавихгүй” болон “Тэнгэрийн муухай арилдаг, хүний муухай арилдаггүй” гэдэг үг байдаг. Тиймээс чи антихристүүдтэй харилцах, эсвэл тэднээс шаардахдаа хүмүүстэй харилцах стандарт, арга барилыг ашиглаж болохгүй. Тэд бол тэд. Хэрвээ тэд Бурханыг шинжихгүй, эсвэл Түүнд эргэлзэхгүй, эсвэл Түүнийг сэжиглэхгүй бол тэдэнд эвгүй санагддаг, учир нь тэд хорон муу уг чанартаа захирагддаг.

г. Сэрэмжлэл

Одоо бид сэрэмжлэлийн талаар нөхөрлөх болно. Антихристүүдэд хамгийн давамгай, хамгийн тодорхой нэг бодол, үзэл бодол байдаг. Тэд “Хүмүүс хувь заяагаа бурхнаар удирдуулж, захируулж болохгүй; хэрвээ бурхан хүний хувь заяаг удирддаг бол тэр хүний хувьд бүх зүйл дуусна. Хүмүүс аз жаргалд хүрэхийн тулд, мөн санаа зовох зүйлгүйгээр идэж, ууж, зугаацахын тулд өөрөө өөрсдийгөө удирддаг байх ёстой. Бурхан хүмүүсийг идэж, ууж, зугаацахыг зөвшөөрдөггүй, тэр тэднийг сайн сайхан амьдруулдаггүй; тэр хүмүүсээр зөвхөн хатуу бэрхийг туулуулдаг. Тиймээс бид өөрсдийн аз жаргалыг гартаа авах ёстой; бид хувь заяагаа бурханд даатгаж, эсвэл бүх зүйлийг идэвхгүйгээр хүлээж, эсвэл бурхнаар бэлтгүүлж, гэгээрүүлүүлж, залж чиглүүлүүлж болохгүй—бид тийм төрлийн хүн байж болохгүй. Бидэнд хүний эрх, бие даан үйлдэх эрх, мөн чөлөөт хүсэл зориг бий. Бид бүх зүйлийг бурханд тайлагнаж, бүх зүйл дээр бурхнаас эрж хайх шаардлагагүй—энэ нь биднийг маш чадваргүй харагдуулна; зөвхөн тэнэгүүд л тэгдэг!” гэж хэлдэг. Тэд юу хийж байна вэ? (Бурханаас сэрэмжилж байна.) Зарим хүн “Бурханы өмнө тангараг өргөхдөө болгоомжтой байгаарай; хэлэх үгээ сайн бод. Хүнийг үйлдэх үед тэнгэр харж байдаг!” гэж хэлдэг. Зарим нь “Өө бурхан минь, би бүх амьдрал, залуу насаа чамд зориулъя; би хань ижил хайхгүй, гэрлэхгүй” гэж залбирдаг. Гэвч үүнийгээ хэлснийхээ дараа тэд харамсаж, “Бурхан миний үгийг биелүүлэх болов уу? Хэрвээ надад үнэхээр хань ижил хэрэгтэй болж, эсвэл би гэрлэхийг хүсвэл яах вэ? Бурхан намайг шийтгэх болов уу? Энэ ч муу юм боллоо доо!” гэж боддог. Тэр цагаас хойш тэд сэтгэлээр унаж, баяр баясгалангүй болж, эсрэг хүйстнээсээ зайлсхийж, шийтгэлээс айдаг. Тэд юу хийж байна вэ? (Бурханаас сэрэмжилж байна.) Өөр нэг төрлийн хүн “Бурханы төлөө өөрийгөө зарлагадах нь амархан ч биш, энгийн ч биш. Чамд нөөц төлөвлөгөө байх хэрэгтэй; бурхны төлөө өөрийгөө зарлагадахаас өмнө чи өөртөө гарах гарц бэлдэх хэрэгтэй. Эс бөгөөс, чиний нөөц бололцоо дуусах үед бурхан чамд санаа тавихгүй! Бурхны төлөө өөрийгөө зарлагадах нь чиний хэрэг; бурхан бүх зүйлийг захирдаг гэдэг нь өөр хэрэг. Бурхан бүх зүйлийг захирдаг—тэр чам шиг жижигхэн хүнд санаа тавих уу? Бурхан зөвхөн том асуудалд л санаа тавьдаг; тэр эдгээр жижиг зүйлд санаа зовдоггүй. Тиймээс чи гарах гарцаа төлөвлөж, бэлдэх ёстой; хэрвээ хожим нь бурхан чамайг хүсэхээ больж, явуулбал тэр чамд ямар ч өршөөл үзүүлэхгүй” гэж хэлдэг. Энэ ямархуу бодол вэ? (Бурханаас сэрэмжлэх сэрэмжлэл.) Хүмүүс маш тооцоотой байдаг. Зарим нь удирдагч болсныхоо дараа цөөн хэдэн төлөөс төлж, өөрсдийгөө үнэхээр бага зэрэг зарлагаддаг боловч муу хүн чанар, зэвүүцмээр зан чанар, мөн өөрсдөд нь байдаг антихристүүдийн зан чанараасаа болоод Бурханы гэрт нэлээд их хохирол учруулдаг. Үр дүнд нь тэднийг явуулдаг. Үүний дараа тэд биеэ зөв авч явж, даруу байж сурдаг бөгөөд хэнд ч сэтгэлээ нээхгүйгээр “Би үргэлж хүмүүст сэтгэлээ нээдэг байсан болохоор хүн бүр надтай юу тохиолдож байгааг мэддэг байсан, гэвч тэгтэл хэн нэгэн намайг бурхны гэрт мэдээлж, намайг явуулсан. Тиймээс одоо би өөрийгөө хааж, өөрийгөө нууж, өөрийгөө өмгөөлж, хамгаалж сурах хэрэгтэй. Би хүмүүст сэтгэлээ нээхдээ болгоомжтой байх ёстой бөгөөд бурханд ч сэтгэлээ нээх ёсгүй. Бурхан бол үнэн, тэр үнэнч гэдэгт би цаашид итгэхгүй. Би ах эгч нарт бүр ч бага итгэдэг. Хэн ч миний итгэлийг хүлээх эрхгүй, гэр бүлийн гишүүд, хамаатан садан маань ч эрхгүй, үнэнийг эрэлхийлдэг хүмүүсийн тухайд бол бүр ярих ч хэрэггүй” гэж хэлдэг. Тэд юу хийж байна вэ? (Тэд сэрэмжилж байна.) Антихристүүд засалт, бүтэлгүйтэл, уналт, илчлэгдэх явдлыг туулах үедээ үүнийг дүгнэж, “Бусдад хор хөнөөл учруулахыг хэзээ ч бүү санаарх, гэхдээ тэдний чамд учруулж болзошгүй хор хөнөөлөөс үргэлж сэрэмжил” гэх үг гаргаж ирдэг. Үнэн хэрэгтээ тэд бусдад нэлээд их хор хөнөөл учруулсан байдаг бөгөөд эцэст нь тэд өөрсдийгөө өнгөлөн далдалж, энэхүү төөрөгдлийг гаргаж ирдэг. Бурханд олон жил итгэж, олон бүтэлгүйтэл, саатал, түүнчлэн Бурханы илчлэлт, Түүний засалтыг туулсныхаа дараа хэвийн нөхцөлд хүмүүс эдгээр бүтэлгүйтлийн сургамжаар дамжуулан эргэцүүлж, өөрсдийгөө мэдэх ёстой бөгөөд асуудлыг шийдвэрлэхийн тулд үнэнийг эрэлхийлж, бүтэлгүйтэл, алдааныхаа шалтгааныг, түүнчлэн алхах ёстой хэрэгжүүлэлтийн замаа Бурханы үгнээс олох ёстой. Гэвч антихристүүд ингэдэггүй. Олон удаагийн алдаа, бүтэлгүйтлийн дараа тэд зан авираа хурцатгаж, Бурханы талаарх эргэлзээ нь олширч, улам ноцтой болж, Бурханыг шинжих шинжилт нь улам хүчтэй болж, Бурханыг сэжиглэх сэжиг нь улам гүнзгийрч, үүнтэй адилаар тэдний зүрх сэтгэл Бурханаас сэрэмжлэх сэрэмжлэлээр дүүрдэг. Тэдний сэрэмжлэл нь гомдол, уур хилэн, эсэргүү байдал, ялалтаар дүүрэн байдаг бөгөөд тэд Бурханы эсрэг үгүйсгэл, шүүлт, яллалтыг хүртэл аажмаар бий болгодог. Тэд улам бүр аюултай болж байгаа биш гэж үү? (Тийм.)

Антихристүүдийн Бурханд хандах, Бурханы бүрдүүлсэн орчин болон хүмүүс, үйл явдал, зүйлст хандах, Бурхан тэднийг илчилж, сахилгажуулахад хандах хандлага гэх мэтээс дүгнэвэл тэдэнд үнэнийг эрэлхийлэх өчүүхэн төдий ч санаа зорилго байна уу? Тэдэнд Бурханыг дуулгавартай дагах өчүүхэн төдий ч санаа зорилго байна уу? Энэ бүхэн санамсаргүй зүйл биш, харин Бурханы дээд эрх дор байдаг гэх өчүүхэн төдий ч итгэл тэдэнд байна уу? Тэдэнд ийм ойлголт, ухамсар байна уу? Мэдээж байхгүй. Тэдний сэрэмжлэлийн үндэс нь Бурханы талаарх эргэлзээнээс нь үүдэлтэй гэж хэлж болно. Бурханыг сэжиглэх тэдний сэжгийн үндсийг ч бас Бурханы талаарх эргэлзээнээс нь үүдэлтэй гэж хэлж болно. Бурханыг шинжсэн шинжилтийнх нь үр дүн тэднийг Бурханыг улам их сэжиглэхэд хүргэдэг бөгөөд үүний зэрэгцээ Бурханаас улам их сэрэмжлэхэд хүргэдэг. Антихристүүдийн сэтгэлгээнээс бий болсон янз бүрийн бодол санаа, үзэл бодлоос, түүнчлэн эдгээр бодол санаа, үзэл бодлын ноёрхол дор бий болсон янз бүрийн арга барил, зан авираас дүгнэвэл энэ хүмүүс ердөө л эрүүл ухаангүй юм; тэд үнэнийг ойлгож чадахгүй, Бурханд жинхэнэ итгэлтэй болж чадахгүй, Бурхан оршин байдаг гэдэгт бүрэн дүүрэн итгэж, хүлээн зөвшөөрч чадахгүй, мөн Бурхан бүх бүтээлийг захирдаг, Тэр бүх зүйлийг захирдаг гэдэгт итгэж, хүлээн зөвшөөрч чадахгүй. Энэ бүхэн нь тэдний хорон муу зан чанар-мөн чанараас үүдэлтэй.

2020 оны 12 дугаар сарын 19