Бүх үнэнийг эрэлхийлэгчдийг бидэнтэй холбогдохыг урьж байна.

Үг нь махбодоор илэрсэн

Цулгуй өнгө

Загвар

Үсгийн хэв

Үсгийн хэмжээ

Мөр хоорондын зай

Хуудасны өргөн

Хайлтын үр дүн 0

Ямар ч үр дүн олдсонгүй.

`

Бодит байдалд илүү анхаар

Хүн бүхэнд Бурханаар төгс болгуулах боломж байдаг, иймээс Бурханд үйлчлэх ямар үйлчлэл Бурханы санаанд хамгийн их нийцэхийг хүн бүр ойлгох ёстой. Бурханд итгэх нь юу гэсэн үг болохыг ихэнх хүмүүс мэддэггүй ба тэд яагаад Бурханд итгэх ёстойгоо огт ойлгодоггүй. Өөрөөр хэлбэл, ихэнх хүмүүс Бурханы ажлын талаар эсвэл Бурханы удирдлагын төлөвлөгөөний зорилгын талаар ямар ч ойлголтгүй байдаг. Одоог хүртэл ихэнх хүмүүс, Бурханд итгэх нь тэнгэр лүү явж, өөрсдийн сүнсээ аврах явдал гэж итгэсээр байгаа. Бурханд итгэхийн ач холбогдлыг тэд ерөөсөө мэддэггүй, цаашлаад тэдэнд Бурханы удирдлагын төлөвлөгөөн дэх хамгийн чухал ажлын талаар ч гэсэн ямар нэгэн ойлголт байдаггүй. Өөрсдийн бүх төрлийн учир шалтгааны улмаас хүмүүс Бурханы ажлыг ердөө сонирхдоггүй, мөн Бурханы санаа эсвэл Бурханы удирдлагын төлөвлөгөөний талаар огт бодож үздэггүй. Энэ урсгал дахь хувь хүн болохын хувьд хүн бүхэн Бурханы бүхий л удирдлагын төлөвлөгөөний зорилго юу болохыг, Бурханы аль хэдийн биелүүлсэн баримтуудыг, Бурхан яагаад энэ бүлэг хүмүүсийг сонгосныг, үүний зорилго болон ач холбогдол нь юу болохыг болон Бурхан энэ бүлэг хүмүүст юу хийж гүйцэтгэхийг хүсэж байгааг мэдэх ёстой. Агуу улаан луугийн газар нутагт Бурхан, анхаарал татахааргүй ийм бүлэг хүмүүсийг өсгөж чадсан бөгөөд Тэр одоог хүртэл үргэлжлүүлэн ажиллаж, бүх төрлийн арга замаар оролдож, төгс болгож, тоо томшгүй олон үг хэлж, ихээхэн ажил хэрэгжүүлж, маш олон хүчин зүтгэгчдийг илгээсэн. Бурхан ийм хэмжээлшгүй их ажил хэрэгжүүлж байгаагаас, Бурханы ажлын ач холбогдол нь маш агуу гэдгийг харж болно. Та нар үүнийг бүхлээр нь хараахан ойлгоогүй байгаа. Тиймээс та нар дээр Бурханы хийсэн ажилд энгийн хэрэг мэт бүү ханд; энэ нь жаахан зүйл биш. Өнөөдөр Бурханы та нарт харуулсан зүйл л та нарын хувьд тунгаан бодож, ойлгоход хангалттай юм. Зөвхөн нэгд нэггүй ойлгосон үедээ та нар илүү гүнзгий мэдэрч, өөрийн амьдралд ахиц гаргаж чадна. Хүмүүсийн ойлгодог зүйл болон яг одоо хийж байгаа зүйл нь үнэхээр хэтэрхий жаахан бөгөөд Бурханы санаанд бүрэн нийцэж чадахгүй. Энэ бол хүний хангалтгүй байдал бөгөөд өөрсдийн үүргээ биелүүлэхдээ бүтэлгүйтсэн байдал юм. Ийм учраас хүрэх ёстой байсан үр дүндээ хүрээгүй. Олон хүмүүс Бурханы ажлын талаар тийм өнгөцхөн ойлголттой байдаг бөгөөд Бурханы гэрийн ажлыг үнэ цэнэтэй зүйл гэж авч үзэх дургүй байдаг учраас Ариун Сүнсний хувьд тэдэн дээр ажиллах ямар ч аргагүй байдаг. Тэд үргэлж, арай ядан амь зуухын тулд л хийсэн дүр үзүүлж эсвэл ихэнх хүмүүсийн хийж байгаа зүйлийг дуурайж эсвэл зүгээр л хүмүүст “ажиллаж” байгаа гэдгээ харуулж байдаг. Өнөөдөр энэ урсгал дахь хүн бүхэн, хийсэн бүхэн чинь та нарын хийх ёстой бүхэн байсан эсэхээ болон өөрсдийн бүх хичээл чармайлтаа зориулсан эсэхээ дурсан санах болно. Хүмүүс өөрсдийн үүргийг огтхон ч биелүүлээгүй. Ариун Сүнс Өөрийн ажлаа хийгээгүй юм биш харин хүмүүс өөрсдийн ажлаа хийгээгүй бөгөөд Ариун Сүнсийг Өөрийн ажлаа хийх боломжгүй болгосон. Бурхан Өөрийн үгийг илэрхийлж дууссан боловч тэд огтхон ч эн зэрэгцээгүй, хамаагүй хол хоцорсон бөгөөд алхам бүртэй ойрхон байж чадахгүй, Хурганы хөлийн мөрийг ойрхон дагах чадваргүй байсан. Өөрсдийн баримтлах ёстой зүйлээ тэд баримтлаагүй; хэрэгжүүлэх ёстой зүйлээ тэд хэрэгжүүлээгүй; залбирах ёстой зүйлийнхээ талаар тэд залбираагүй; мөн хаях ёстой зүйлээ тэд хаяагүй. Тэд эдгээр зүйлийн алийг ч хийгээгүй. Тиймээс цайллага руу явах тухай энэхүү яриа нь хий хоосон бөгөөд ямар ч бодит утга учиргүй. Энэ нь хүмүүсийн өөрсдийн төсөөлөлд байдаг. Одоогийн байдлаар хүмүүс өөрсдийн үүргээ огтхон ч биелүүлээгүй гэж хэлж болно. Бурхан аливааг Өөрөө хийж, хэлж байдагт бүх зүйл түшиглэдэг, харин хүмүүсийн чиг үүрэг үнэхээр хэтэрхий бага байсаар ирсэн. Тэд бүгдээрээ Бурхантай хэрхэн зохицохоо мэддэггүй хэрэггүй хог новш юм. Бурхан хэдэн зуун мянган үг хэлсэн боловч махан биеэ орхих, үзлээ хаях, бүх зүйл дээр дуулгавартай байдлыг хэрэгжүүлэх, үүний зэрэгцээ ялган таних чадвараа хөгжүүлж, мэдлэг ухааныг олж авахаас эхлээд өөрсдийнх нь зүрх сэтгэлд байгаа байр суурийг тавьж явуулж, өөрсдийнх нь зүрх сэтгэлийг эзэлж байгаа шүтээнүүдийг таягдах, зөв бус хувийн санаа зорилгын эсрэг тэрслэх, сэтгэл хөдлөл дээрээ тулгуурлан үйлдэхгүй байх, аливааг өрөөсгөлөөр биш шударгаар хийх, Бурханы ашиг сонирхлын талаар болон ярих үедээ бусдад үзүүлэх өөрсдийн нөлөөллийн талаар илүү их бодох, Бурханы ажилд тустай зүйлийг илүү их хийх, хийж байгаа бүхнээрээ Бурханы гэрт ашиг тусаа өгөхийг сэтгэлдээ санах, сэтгэл хөдлөлөөрөө зан авираа тодорхойлохгүй байх, махан биедээ таалагддаг зүйлсийг хаях, хувиа хичээсэн хуучин үзлээ таягдах гэх мэт хүртэл, хүмүүс эдгээрийг огтхон ч хэрэгжүүлээгүй. Хүмүүс үнэндээ энэ бүх үгнээс Бурханы өөрсдөөс нь шаарддаг зүйлийн талаар зарим нэг зүйлийг ойлгодог боловч тэд зүгээр л тэдгээрийг хэрэгжүүлэх дургүй байдаг. Бурхан өөрөөр яаж ажиллаж, тэдний сэтгэлийг хөдөлгөх юм бэ? Бурханы нүдэн дэх босогчид, гайхан бишрэхийн тулд Бурханы үгийг барьж авах зориг зүрхтэй байж яаж чадаж байна вэ? Тэд яаж Бурханы үгийг идэх зориг зүрхтэй байж чадаж байна вэ? Хүний мөс чанар хаана байна? Тэд өөрсдийн биелүүлэх ёстой үүргийн өчүүхэн жаахныг ч биелүүлээгүй, иймээс чадах бүхнээ хийх талаар ярих нь утгагүй. Тэд мөрөөдөгчид биш гэж үү? Хэрэгжүүлэлтгүйгээр бодит байдлын тухай ямар ч яриа байж таарахгүй. Тэр бол ойлгомжтой баримт!

Та нар одоо илүү бодитой хичээлүүдийг судалж байх учиртай. Хүмүүсийн гайхан биширдэг тод яруу, хоосон яриа хэрэггүй. Мэдлэгийн тухайд ярих юм бол хүн бүрийн мэдлэг өмнөхөөсөө илүү өндөр байдаг, гэхдээ тэдэнд мөн л хэрэгжүүлэлтийн зам байдаггүй. Хэр олон хүн ямар нэгэн зүйлийг хэрэгжүүлсэн бэ? Хэр олон хүн бодитой сургамж авсан бэ? Хэн бодит байдлын талаар нөхөрлөж чадах вэ? Бурханы үгийн талаарх мэдлэгээ ярих чадвартай байх нь чиний жинхэнэ биеийн өндөртэй адилхан байхгүй. Энэ нь зөвхөн чамайг ухаалаг агаад авьяастай гэдгийг л харуулдаг. Хэрвээ чи замыг заан үзүүлж чадахгүй бол энэ нь хий дэмий хэрэг бөгөөд чи бол ердөө хэрэггүй хог! Чи хэрэгжүүлэлтийн бодит замын талаар ямар нэгэн зүйл хэлж чадахгүй байх үедээ дүр үзүүлэхгүй байна гэж үү? Бусдад өөрийнхөө бодит туршлагаас хуваалцаж чадахгүй байх үедээ чи тэдний сурч болох хичээл эсвэл хэрэгжүүлэлтийн замыг тэдэнд өгч хуурдаггүй гэж үү? Чи ердөө хуурамч амьтан биш гэж үү? Чамд ямар үнэ цэнэ байгаа юм бэ? Ийм хүн “социализмыг авчрахад хувь нэмрээ оруулагч” биш харин зөвхөн “социализмын онолыг үндэслэгчдийн” үүрэг гүйцэтгэж л чадна. Бодит байдалгүй байна гэдэг нь үнэнгүй байх явдал юм. Бодит байдалгүй байх нь ямар ч хэрэггүй. Бодит байдалгүй байх нь алхаж буй үхдэлтэй адилхан. Бодит байдалгүй байх нь лавлах материал болгох үнэ цэнэгүйгээр “Марксист Ленинист сэтгэгч” байх явдал юм. Онолын талаар амаа хамхиж, ямар нэгэн бодитой, ямар нэгэн жинхэнэ, биет зүйлийн талаар ярьж, “орчин үеийн урлагийг” судалж, бодитой байгаа зүйлийн тухай ярьж, бодит байдалд хувь нэмрээ оруулж, зориулалтын сэтгэлтэй байхыг Би хүн нэг бүрээс шаардаж байна. Ярих үедээ бодит байдалтай нүүр тул, харин хүмүүсийг баярлуулж, тэгснээрээ өөрийгөө тэдэнд өөрөөр бодогдуулах бодит бус, хэтрүүлэгтэй яриагаар бүү хөөцөлд. Тэгэх нь ямар үнэ цэнэтэй юм бэ? Хүмүүсийн урам зоригийг өөрийнхөө төлөө өдөөх нь ямар хэрэгтэй юм бэ? Өөрийн хэлж буй үгэндээ “урлагтай” бай, биеэ авч явах байдалдаа шударга бай, ажилдаа ухаалаг бай, хүмүүст хандахдаа бодитой бай, бүх үйлээрээ Бурханы гэрт тус нэмэр болохыг сэтгэлдээ санаж, сэтгэл хөдлөлөө мөс чанараараа удирдуул, сайхан сэтгэлийг үзэн ядалтаар бүү хариул эсвэл сайхан сэтгэлд ач санадаггүй бүү бай, мөн хоёр нүүртэн бүү бай, чи муу нөлөө болуузай. Бурханы үгийг идэж, уух үедээ чи тэдгээрийг бодит байдалтай илүү их холбо, хэлэлцэх үедээ чи бодитой байгаа зүйлсийн талаар илүү их ярь, харин хүлцэнгүй бүү бай-Бурхан тэгэхийг эсэргүүцдэг. Илүү их тэвчээртэй, хүлээцтэй бай, эвлэрлийг илүү их хэрэгжүүл, хүмүүст өгөөмөр агаад нээлттэй бай, “ерөнхий сайдын сэтгэлээс”[a] суралц. Чамд сайн биш бодлууд байх үед махан биеэ хаях явдлыг илүү их хэрэгжүүл. Ажиллаж байх үедээ чи бодитой замуудын талаар илүү их ярь, хэтэрхий сүртэй бүү бай, эс бөгөөс энэ нь хүмүүсийн хувьд хүршгүй байх болно. Зугаа цэнгэлээ бага, хувь нэмрээ их байлга-өөрийн амь бие хайргүй зориулалтын сэтгэлийг харуул. Бурханы санаа зорилгын төлөө илүү анхааралтай бай, мөс чанараа илүү их сонс, та нарын төлөө анхаарал тавьсандаа Бурхан та нарыг өдөр бүр хэрхэн зэмлэж, сануулж буйг сэтгэлдээ санаж, бүү март. “Эртний он дарааллын бичгийг” илүү олон дахин унш. Илүү их залбирч, илүү олон удаа нөхөрлөл хий. Маш будилуу байхаа боль, харин илүү их мэдрэмжийг харуулж, зарим нэг мэдлэг ухааныг олж ав. Чиний нүглийн гар сунах үед, үүнийг буцаан татаж аваад хэтэрхий хол бүү сунга. Энэ нь нэмэргүй! Бурханаас та нарын авах зүйл зөвхөн хараал л байх болно; болгоомжтой бай. Зүрх сэтгэлээрээ бусдыг өрөвд, гар дахь зэвсгээрээ үргэлж бүү цохь. Илүү ихийг өргөл болгож, амийн талаар илүү их ярьж, бусдад туслах сэтгэлтэй бай. Их хийж, бага ярь. Хэрэгжүүлэхэд илүү ихийг, судалгаа, шинжилгээнд багыг зориул. Ариун Сүнсээр илүү их хөдөлгүүлж, та нарыг төгс болгох боломжийг Бурханд илүү их олго. Хүний элементүүдийг илүү их таягдан хая-аливааг хийх хүний арга зам хэтэрхий олон байсаар байгаа. Өнгөц харьцаа, зан авир бол мөн л жигшүүртэй. Тэдгээрийн ихэнхийг таягдан хая. Та нарын сэтгэл санааны байдал мөн л хэтэрхий зэвүүн муухай. Тэдгээрийг илүү их зас. Та нарын зүрх сэтгэлд хүмүүсийн эзэлдэг байр суурь мөн л хэтэрхий их. Бурханд илүү их байр суурийг өг, хэт үндэслэлгүй бүү бай. “Сүм” анхнаасаа Бурханых байсан бөгөөд хүмүүсээр эзлэгдэх ёсгүй. Дүгнэж хэлэхэд зөвт байдлыг их анхаарч, сэтгэл хөдлөлийг бага анхаар, махан биеийг таягдан хаях нь хамгийн сайн; бодит байдлын талаар их ярьж, мэдлэгийн талаар бага ярь, дуугүй байх нь хамгийн сайн; хэрэгжүүлэлтийн замын талаар их ярьж, үнэ цэнэгүй хөөргөдсөн яриа бага ярь, одооноос эхлэн хэрэгжүүлж эхлэх нь хамгийн сайн.

Хүмүүст тавих Бурханы шаардлага их өндөр биш. Хэрвээ хүмүүс бага зэрэг хичээл чармайлт гаргах юм бол тэд “тэнцсэн дүн” авах болно. Үнэндээ, үнэнийг ойлгож, мэдэж, хүлээн зөвшөөрөх нь үнэнийг хэрэгжүүлэхээс илүү түвэгтэй; үнэнийг мэдэж, хүлээн зөвшөөрөх нь эхлээд үнэнийг хэрэгжүүлсний дараа болдог. Энэ нь Аиун Сүнсний ажлын алхам, арга зам юм. Чи үүнийг дуулгавартай дагахгүй байж яаж чадаж байна вэ? Чи өөрийнхөө арга замаар аливааг хийснээр Ариун Сүнсний ажилтай байж чадах уу? Бурханы ажил чиний хүсэл дээр тулгуурладаг уу эсвэл чамайг Бурханы үгтэй харьцуулж үзсэний дараа болдог уу? Хэрвээ чи үүнийг тодорхой харж чадахгүй бол энэ нь утгагүй. Яагаад ихэнх хүмүүс Бурханы үгийг уншихад ихээхэн хичээл чармайлтаа зарцуулдаг боловч зөвхөн мэдлэгтэй болж дараа нь бодитой замын талаар юу ч хэлж чаддаггүй юм бэ? Мэдлэгтэй байх нь үнэнтэй байхтай адилхан гэж чи боддог уу? Энэ нь төөрөлдсөн үзэл бодол биш гэж үү? Чи далайн эрэг дээрх элс мэт их мэдлэгийг ярьж чаддаг ч үүний юу нь ч ямар нэгэн бодитой замыг агуулдаггүй. Үүгээрээ чи хүмүүсийг хуурахгүй байна гэж үү? Чи хоосон дүр эсгэхээс цаашгүй биш гэж үү? Ийм байдлаар үйлдэх нь хүмүүст хортой! Онол хэдий чинээ өндөр дээд байна, бодит байдлаас төдий чинээ хол байдаг ба хүмүүсийг төдий чинээ бодит байдалд аваачих чадваргүй байдаг; онол хэдий чинээ өндөр байна, энэ нь төдий чинээ их Бурханыг эс ойшоож, эсэргүүцэхэд чамайг хүргэдэг. Хамгийн өндөр дээд онолыг үнэт эрдэнэс мэт бүү үз; тэдгээр нь хор хөнөөлтэй агаад ямар ч хэрэггүй! Зарим хүмүүс хамгийн өндөр дээд онолыг ярих чадвартай байж магадгүй-гэхдээ тийм онолууд нь бодит байдлын юуг ч агуулдаггүй, учир нь энэ хүмүүс тэдгээрийг биечлэн мэдрээгүй ба тиймээс тэдэнд хэрэгжүүлэх зам байдаггүй. Тийм хүмүүс хүнийг зөв замд аваачих чадваргүй бөгөөд зөвхөн хүмүүсийг замаа алдахад хүргэдэг. Энэ нь хүмүүст хортой биш гэж үү? Хамгийн наад зах нь чи өнөөгийн бэрхшээлүүдийг шийдвэрлэж, хүмүүст оролтонд хүрэх боломжийг олгох чадвартай байх ёстой; зөвхөн үүнийг л зориулалт гэж үзэх бөгөөд зөвхөн тэгснээр л чи Бурханы төлөө ажиллахад тохирох болно. Сүржин, гоёмсог үгийг үргэлж бүү ярь, хүмүүсийг хүлж, өөрийн олон зохимжгүй хэрэгжүүлэлтийг дуулгавартай дагахад хүмүүсийг бүү хүргэ. Ингэж хийх нь ямар ч үр нөлөөгүй бөгөөд зөвхөн хүмүүсийн төөрөгдлийг л ихэсгэх болно. Хүмүүсийг ийм байдлаар удирдах нь олон зохицуулалтыг бий болгох ба энэ нь хүмүүсийн дургүйцлийг хүргэх болно. Энэ нь хүний дутагдал бөгөөд энэ нь үнэхээр тэсвэрлэшгүй. Тиймээс одоо оршин байгаа асуудлуудын талаар илүү их ярь. Бусад хүмүүсийн туршлагад хувийн өмч мэт бүү ханд, бусад хүмүүст ойлгуулж үнэлүүлэхийн тулд үүнийг гаргаж ярь. Чи өөрөө арга сүв хайх ёстой. Энэ бол хүн нэг бүрийн хэрэгжүүлэх ётсой зүйл юм.

Хэрвээ чиний хэлдэг зүйл хүмүүст алхах замыг өгч чаддаг бол тэр нь чи бодит байдалтай байгаа гэсэн үг. Чи юу ч хэлсэн хамаагүй, хүмүүсийг хэрэгжүүлэлт рүү аваачиж, тэдний дагаж болох бүх замыг тэдэнд өгч байх ёстой. Энэ нь хүмүүсийг зөвхөн мэдлэгтэй байлгахын төлөө байдаггүй харин үүнээс ч илүүтэйгээр энэ нь алхах замтай байх явдал юм. Бурханд итгэхийн тулд хүмүүс Бурханы ажлын хөтөлж байгаа замын дагуу алхах ёстой. Өөрөөр хэлбэл, Бурханд итгэх үйл явц нь Ариун Сүнсний чамайг хөтөлж байгаа замаар алхах үйл явц юм. Иймд чи юу ч болж байсан алхах замтай байх ёстой ба чи Бурханаар төгс болгуулах зам руу алхах ёстой. Үүнийг хэтэрхий бүү удаашруул мөн үүнд хэтэрхий их бүү оролц. Чи Бурханы саадгүйгээр хөтөлж байгаа замаар алхаж л байх юм бол Ариун Сүнсний ажлыг хүлээн авч, орох замтай байх болно. Зөвхөн үүнийг Бурханы санаанд нийцэж, хүний үүргээ биелүүлж байна гэж тооцдог. Энэ урсгал дахь хүн болохын хувьд хүн нэг бүр өөрийн үүргээ зүй зохистойгоор биелүүлж, хүмүүсийн хийх ёстой зүйлийг илүү их хийх ёстой бөгөөд дур зоргоороо бүү үйлд. Ажил гүйцэтгэж байгаа хүмүүс өөрсдийн үгийг тодорхой болгох ёстой ба дагаж байгаа хүмүүс зовлон бэрхшээлийг тэвчиж, дуулгавартай байхад илүү анхаарах ёстой, хүн нэг бүр өөрсдийн байр сууриа хадгалж, хэрээс хэтрэхгүй байх ёстой. Тэд хэрхэн хэрэгжүүлэх ёстой болон ямар чиг үүргийг биелүүлэх ёстой вэ гэдэг нь хүн нэг бүрийн зүрх сэтгэлд тодорхой байх учиртай. Ариун Сүнсний хөтөлж буй замаар яв; замаа бүү алд эсвэл эндүү ташаа бүү бай. Та нар өнөөдрийн ажлыг илүү тодорхой харах ёстой. Өнөөдрийн ажлын арга барилд орох нь та нарын хэрэгжүүлэх ёстой зүйл юм. Энэ нь та нарын орох ёстой эхний зүйл. Бусад зүйл дээр өөр олон үгийг бүү гарзад. Өнөөдөр Бурханы гэрийн ажлыг хийх нь та нарын хариуцлага, өнөөдрийн ажлын арга барилд орох нь та нарын үүрэг бөгөөд өнөөдрийн үнэнийг хэрэгжүүлэх нь та нарын ачаа юм.

Тайлбар:

a. Ерөнхий сайдын сэтгэл: Уужуу сэтгэлтэй агаад өгөөмөр хүнийг дүрслэхдээ ашигладаг Хятадын сонгодог хэллэг.

Өмнөх:Чи Бурхантай ямар харилцаатай байгаа вэ

Дараах:Тушаалуудыг сахиж, үнэнийг хэрэгжүүлэх нь

Танд таалагдаж магадгүй