II. Бурханы махбод болсон биеийг басамжлах

Өнгөрсөн удаагийн нөхөрлөлөөр бид антихристүүдийн арав дахь илрэлийн хоёр дахь дэд сэдэв болох Бурханы махбод болсон биеийг басамжлах талаар нөхөрлөсөн. Бид нөхөрлөлөө хаана хүрээд зогссон бэ? (Тэдний Христэд хандах хандлага сэтгэл санааны байдлаас нь шалтгаалдаг.) Бид “Тэдний Христэд хандах хандлага сэтгэл санааны байдлаас нь шалтгаалдаг” хэмээх зүйл хүртэл нөхөрлөсөн. Эхлээд ямар талуудын талаар нөхөрлөснөө эргэн харцгаая. “Сэтгэл санааны байдлаас нь шалтгаалах” гэдэгтэй холбоотой хэдэн нөхцөл байдлыг задлан шинжилсэн бэ? (Таван нөхцөл байдал байсан: засалттай тулгарах үеийн тэдний зан авир, мөшгөгдөж, толгой хоргодох газаргүй байх үед нь Христэд хандах тэдний зан авир, Христийн талаар үзэл бий болох үеийн тэдний зан авир, тушаал дэвших, эсвэл чөлөөлөгдөх үеийн тэдний зан авир, мөн чуулганы нөхцөл байдал өөрчлөгдөхөд хандах тэдний зан авир.) Ерөнхийдөө ийм байна. Та нар энэ талуудын агуулгыг сонсохдоо зүгээр л дотор нь гарч буй үйл явдлын талаар сонсдог уу, эсвэл тэдгээрийг өөрсөдтэйгөө харьцуулж, эдгээр үйл явдлаар дамжуулан үнэнийг олж авч, ойлгодог уу? Та нар ямар өнцгөөс сонсдог вэ? (Бурхан эдгээр байдал, илрэлийг ил болгож, задлан шинжлэх үед би тэдгээрийг өөртэйгөө харьцуулж чаддаг. Заримдаа миний зан авир антихристүүдийн илрэлтэй бүрэн адилгүй байж болох ч илэрч буй зан чанар, уг чанар-мөн чанар нь адилхан байдаг.) Ил болгосон байдал, илрэл, мөн чанар нь хүн бүрд харилцан адилгүй хэмжээгээр байдаг. Хүмүүс анх Бурханд итгэж эхлэхдээ өөрсдөд нь байгаа эдгээр завхарсан зан чанарын илрэлийг анзаарахад хэцүү байдаг боловч Бурханд итгэх туршлага нь аажмаар гүнзгийрэхийн хэрээр тэд тодорхой зан чанар, зан авирыг өөрийн эрхгүй ухамсарладаг. Тиймээс, бидний одоо ярилцаж буй агуулгад дурдсан тодорхой илрэлүүд чамд хамаатай эсэхээс, эсвэл чи өнгөрсөнд ийм зан авир гаргаж байсан эсэхээс үл хамааран, эдгээр асуудал чамд хамаагүй гэсэн үг биш; чи ирээдүйд ийм зүйл хийхгүй гэсэн үг биш, мөн чамд ийм зан чанар, зан авир байхгүй гэсэн үг ч биш юм. Бид антихристүүдийн янз бүрийн илрэлийн талаар нөхөрлөж, ил болгосоор жил гаруй болж байна. Нэг сэдвээр жил гаруй хугацаанд нөхөрлөөд дуусаагүй байгааг бодоход, бидний нөхөрлөлийн агуулга тодорхой бөгөөд бүрэн гүйцэд гэж та нар бодож байна уу? (Бүрэн гүйцэд.) Туйлын тодорхой бөгөөд бүрэн гүйцэд! Нөхөрлөл ийм түвшинд хүрсэн хэдий ч олон хүн анхны зан авираа гаргасаар, өчүүхэн төдий ч өөрчлөгдөөгүй байна. Өөрөөр хэлбэл, хэлсэн үг, ил болгосон байдал, зан чанар, мөн чанар нь тэдэнд өчүүхэн төдий ч тус болдоггүй. Энэ хугацаанд цадиггүй, увайгүй авирлаж, дарангуйлан, дур мэдэн үйлдэж, дураараа, зоргоороо авирласаар байгаа зарим хүн байсаар байна. Тэд урьдын адил хэвээр байгаа бөгөөд байр суурьтай болсныхоо дараа бүр ч даварч, өөрсдийгөө улам илүү бүрэн дүүрэн илчилдэг. Түүнчлэн, үүргээсээ чөлөөлөгдөж, цэвэрлэгддэг хүмүүс үргэлж байдаг—энэ нь юу болоод байгаа хэрэг вэ? (Энэ хүмүүс хэзээ ч үнэнийг хүлээн авч байгаагүй; тэд маш олон номлол сонссон ч зүрх сэтгэлдээ хүлээж аваагүйгээс болсон.) Нэг шалтгаан нь, энэ хүмүүс хэзээ ч үнэнийг хүлээн авдаггүй; тэд үнэнийг зэвүүцдэг бөгөөд эерэг зүйлийг хайрладаггүй. Өөр нэг шалтгаан нь, тэд төрөлхийн антихристүүдийн мөн чанартай бөгөөд үнэнийг, эсвэл эерэг зүйлийг хүлээн авах чадваргүй байдаг. Тиймээс, Би антихристүүдийн янз бүрийн мөн чанар, илрэлийг ийм тодорхой нөхөрлөж, ил болгосон ч эдгээр антихрист болон ёрын муу хүн дураараа, айж эмээх зүйлгүйгээр авирлаж, хүссэн бүхнээ хийсээр байдаг. Тэдний мөн чанар үүнийг тодорхойлдог биш гэж үү? Энэ хүмүүс уг чанараа өөрчлөх үнэхээр боломжгүй; тэд хэчнээн олон номлол сонссон ч тэр нь огтхон ч нөлөөлдөггүй, мөн тэд гэмшдэггүй. Өдөр тутмын амьдрал, үүргээ гүйцэтгэх хандлага, үүргээ гүйцэтгэж буй арга барилаас нь харахад тэд үнэнийг огт хүлээн авдаггүй бөгөөд зан чанар нь өчүүхэн төдий ч өөрчлөгдөөгүй байдаг; эдгээр үг нь илжигний чихэнд ус хийсэн мэт—ямар ч үр дүнгүй. Эдгээр үг антихристүүдэд нөлөөлдөггүй ч, та нарт тодорхой хэмжээгээр хазаарлах нөлөө үзүүлсэн үү? Тэдгээр нь тодорхой зан авирыг барьж, та нарын мөс чанар, ёс суртахууны стандартыг дээшлүүлэхэд тус болсон уу? (Бага зэрэг.) Хэрвээ хэн нэгэнд ийм нөлөө үзүүлээгүй бол тэр хүн хэвээрээ гэж үү? Тэр хүн биш; тэр бол диавол. Мэдээж, эдгээр үгийг сонссоны дараа ихэнх хүн антихристүүдийн янз бүрийн зан чанар-мөн чанарыг ялган таних чадвартай болж, зүрх сэтгэлийнхээ угаас антихристүүдийн зан чанарыг үзэн яддаг болохын зэрэгцээ өөрсдийнхөө завхарсан зан чанар-мөн чанарын талаар тодорхой ойлголт, мэдлэгтэй болсон байдаг. Энэ бол сайн шинж тэмдэг, сайн хэрэг. Гэхдээ сонсох тусмаа улам бүр сөрөг болдог хүмүүс байна уу? Эдгээр үгийг сонсмогцоо тэд: “Өнгөрлөө. Антихристүүдийн илрэл, байдал, зан чанарыг ил болгох бүрд надтай бүрэн таарч байна. Надтай хамааралгүй байсан удаа нэг ч алга. Би хэзээ антихристүүдийн зан чанараас өөрийгөө бүрэн салгаж чадах вэ? Би хэзээ Бурханы ардын, Бурханы хайртай хөвгүүдийн зарим илрэлийг харуулж чадах вэ?” гэж боддог. Сонсох тусмаа тэд улам бүр сөрөг болж, дагах замгүй мэт улам их санагддаг. Ийм хариу үйлдэл хэвийн үү? (Үгүй.) Та нар сөрөг болж байна уу? (Үгүй.) Намайг антихристүүдийн эдгээр илрэл, үйл явдлыг ил болгож буйг сонсох бүрдээ та нар эмзэглэж, эвгүйцдэг үү? Та нар ичиж зовдог уу? (Эмзэглэдэг, бид ичиж зовдог.) Та нарт ямар мэдрэмж төрөхөөс үл хамааран, энэ нь сөрөг байдалд хүргэхгүй байгаа нь сайн хэрэг; та нар бат зогссон байна. Гэсэн хэдий ч, сөрөг биш байх нь хангалтгүй; ингэлээ гээд зорилгодоо хүрэхгүй, энэ бол эцсийн зорилго биш. Та нар эдгээр үгээр дамжуулан өөрсдийгөө танин мэддэг болох хэрэгтэй. Энэ нь зан авирын нэг талыг ойлгох тухай биш, харин өөрийн зан чанар, мөн чанарыг мэдэх тухай юм. Энэхүү ойлголт нь амьдрал дээр болон үүргээ гүйцэтгэх явцдаа хэрэгжүүлэх замыг олж, ямар үйлдэл антихристүүдийн зан авиртай нийцдэг, ямар үйлдэл антихристийн зан чанарыг харуулдаг, ямар үйлдэл зарчимд нийцдэг болохыг мэдэх боломжийг та нарт олгох ёстой. Хэрвээ чи үүнд хүрч чадвал эдгээр үгийг дэмий сонсоогүй гэсэн үг; тэдгээр нь чамд нөлөөлжээ. Дараа нь бид, антихристүүд бие махбодтой болсон Бурханд хэрхэн ханддагийн дөрөв дэх илрэл болох Христийн хэлснийг зүгээр л сонсдог ч дуулгавартай дагадаггүй, захирагддаггүй талаар үргэлжлүүлэн нөхөрлөх болно.

Г. Христийн хэлснийг зүгээр л сонсдог ч дуулгавартай дагадаггүй, захирагддаггүй

Антихристүүд Христийн хэлснийг зүгээр л сонсдог ч дуулгавартай дагадаггүй, захирагддаггүй; тэгвэл тэд хэрхэн сонсдог вэ? Энэ хэллэг нь тэдний сонсдог хандлагыг үндсэндээ нэгтгэн дүгнэдэг: Ямар ч дуулгавартай байдал, ямар ч жинхэнэ захирагдах байдал байдаггүй; тэд зүрх сэтгэлээсээ хүлээн авдаггүй, зүгээр л чихээрээ сонсдог болохоос зүрх сэтгэлээрээ сонсож, ухамсарладаггүй. Үгчилсэн утгаас нь харвал, энэ тал дээрх антихристүүдийн зан авир, зан чанарыг эдгээр үндсэн элементээр нэгтгэн дүгнэж болно. Антихристүүдийн зан чанар-мөн чанарын өнцгөөс харвал, ийм хүмүүс Бурханаас ирдэг юунд ч, Бурхан юм уу хүмүүсийн сайн, эерэг гэж үздэг юунд ч, мөн байгалийн хуульд нийцдэг юунд ч буулт хийдэггүй, дуулгавартай дагадаггүй; харин ч тэд ийм зүйлсийг дорд үзэж, өөрсдийн гэсэн харах өнцөг, үзэл бодолтой байдаг. Тэдний харах өнцөг эерэг зүйлсийн дүрэм, хуультай нийцдэг үү? Үгүй. Тэдний харах өнцөг товчхондоо хоёр зүйл байдаг: Нэг нь Сатаны хууль, нөгөө нь Сатаны эрх ашиг болон Сатаны уг чанар-мөн чанартай нийцдэг явдал юм. Тиймээс, Бурханы махбод болсон бие махбодын тухайд антихристүүдийн харах өнцөг, хандлага товчхондоо үндсэн хоёр зүйл байдаг: Нэг нь Сатаны логик болон хууль, нөгөө нь Сатаны зан чанар-мөн чанар юм. Христ бол газар дээр нэг үе шатны ажил гүйцэтгэж буй Бурханы төлөөлөгч, Тэр бол газар дээр нэг үе шатны ажил гүйцэтгэж буй Бурханы илэрхийлэл болон бие махбод юм. Ийм дүрийн хувьд, антихристүүд сониуч зантай, шинжих дур хүсэлтэй байж, мөн Түүнд байр суурьтай хүн мэт хандаж, бялдуучилж, зусардахаас өөрөөр зүрх сэтгэлдээ жинхэнээсээ итгэдэггүй, дагадаггүй бөгөөд жинхэнэ хайр, дуулгавартай байдал бүр ч байдаггүй. Завхарсан хүн төрөлхтний нүдэнд шалихгүй мэт харагддаг Христ гэх хүний хувьд, Түүний харагдах байдал эгэл жирийн бөгөөд хэвийн; Түүний үг яриа, зан авир, биеэ авч явах байдал, түүнчлэн Түүний хүн чанарын бүх тал нь бас эгэл жирийн бөгөөд хэвийн байдаг. Бүр цаашлаад, Түүний хийдэг ажлын хэлбэр, хэв маяг, арга барил нь хүн бүрийн нүдэнд туйлын эгэл жирийн, хэвийн, бодитой харагддаг. Тэдгээр нь ер бусын, хоосон, тодорхойгүй биш, бодит амьдралаас тасраагүй байдаг. Товчхондоо, гаднаас нь харахад Христ өндөр дээд харагддаггүй. Түүний үг яриа, үйлдэл, биеэ авч явах байдал нь гүн гүнзгий, эсвэл хийсвэр биш юм. Хүний нүдээр ажиглахад ямар ч нууц харагддаггүй, ойлгомжгүй зүйл ч харагддаггүй; Тэр ердөө л хэтэрхий бодитой, хэтэрхий хэвийн байдаг. Бие махбодтой болсон Бурханы гүйцэтгэдэг бүх ажлын мөн чанар, уг чанарын талаар ярилцахаасаа өмнө бие махбодтой болсон Бурханы энэ дүрийн талаар хүмүүст гаднаа харагддаг бүхнийг авч үзье: Түүний үг яриа, зан авир, биеэ авч явах байдал, өдөр тутмын хэвшил, зан төлөв, сонирхол, боловсролын түвшин, Түүний санаа тавьж, ярилцдаг асуудлууд, хүмүүстэй харьцах, харилцах арга барил, түүнчлэн Түүний мэддэг зүйлсээ тодорхой илэрхийлдэг байдал гэх мэт. Энэ бүхэн хүний нүдээр бол ер бусын, өндөр дээд, эсвэл хоосон биш, харин онцгой бодитой байдаг. Эдгээр бүх тал нь Христийг дагадаг хүн бүрийн хувьд шалгалт юм; гэхдээ Бурханд чин сэтгэлээсээ итгэдэг, мөс чанар, эрүүл ухаантай хүмүүсийн хувьд, тэд зарим үнэнийг ойлгомогцоо Христийн эдгээр хэвийн, бодитой гадаад илрэлийг бие махбодтой болсон Бурхан гэх ангилалд багтаан ойлгож, ухамсарлаж, дуулгавартай дагадаг. Гэвч зөвхөн антихристүүд л үүнийг хийдэггүй; тэд үүнийг хийж чаддаггүй. Зүрх сэтгэлийнх нь гүнд, Христ шиг ийм туйлын эгэл жирийн хүнд ямар нэгэн зүйл дутуу мэт тэдэнд санагддаг. Яг юу дутуу байна вэ? Сэтгэлийнх нь угт антихристүүдэд ихэвчлэн, ийм эгэл жирийн хүн бурхан арай л биш юм шиг санагддаг. Тэд мөн ийм эгэл жирийн хүн өөрсдийнх нь төсөөллийн христ болох жинхэнэ бурханд тохирохуйц байдлаар ярьж, үйлдэж, авирлах ёстой гэж байнга шаарддаг. Тиймээс, антихристүүдийн зүрх сэтгэлийн гүн рүү өнгийвөл, тэд ийм эгэл жирийн хүнийг өөрсдийн эзэн, өөрсдийн бурхан болгон хүлээн авахыг хүсдэггүй. Христийн нэг тал хэдий чинээ хэвийн, бодитой, эгэл жирийн байна, төдий чинээ антихристүүд түүнийг басамжилж, доромжилж, бүр дайсагнан үздэг. Тиймээс, Христийн зан авирын аль ч талыг, тэр дундаа Түүний үгийг антихристүүд зүрх сэтгэлийнхээ гүнд хүлээн авч чаддаггүй бөгөөд бүр эсэргүүцдэг.

Христийн үг ярианд юу багтдаг вэ? Заримдаа энэ нь ажлын зохицуулалт хийх тухай, заримдаа хэн нэгний дутагдлыг зааж өгөх, заримдаа тодорхой төрлийн хүний завхарсан мөн чанарыг ил болгох, заримдаа асуудлын мөн чанар болон бүх нарийн ширийнийг шинжилж, холбогдох асуудлуудыг задлан шинжлэх, заримдаа хэрэг явдлын зөв бурууг шүүх, заримдаа тодорхой төрлийн хүний төгсгөлийг тодорхойлох, заримдаа зарим хүнийг тушаал дэвшүүлэх, заримдаа зарим хүнийг чөлөөлөх, заримдаа зарим хүнийг засах, мөн заримдаа зарим хүнийг тайтгаруулж, ятгах тухай байдаг. Мэдээж, Христ ажлынхаа үеэр хүмүүсийн амь зан чанартай холбоотой үнэнийг ярихаас гадна бүх төрлийн зүйлс, түүнчлэн хүний мэдлэг, төрөл бүрийн мэргэжлийн салбартай холбоотой зарим сэдвийг байнга хөнддөг. Христ бол хэвийн бөгөөд бодитой хүн; Тэр вакум орчинд амьдардаггүй. Түүнд хүний оршин тогтнол, амьдралтай холбоотой бүх асуудлын талаар бодол санаа, харах өнцөг байдаг бөгөөд Тэр эдгээр асуудалд зарчимтайгаар ханддаг. Хэрвээ эдгээр зарчим нь хүмүүсийн амьд үлдэх, хүмүүсийн амь-оролт, Бурханыг шүтэн мөргөх сэдэвтэй холбоотой бол тэдгээрийг бүгдийг нь үнэн гэж хэлж болох уу? (Болно.) Хүний мэдлэг, гүн ухаантай холбоотой үгс болон Христийн ярьдаг зарим мэргэжлийн асуудлыг шууд үнэн гэж нэрлэж болохгүй ч, тэдгээр нь ийм сэдвээр хүмүүсийн мэддэг зүйлээс үзэл бодол, хандлага, зарчмаараа ялгаатай байдаг. Жишээлбэл, хүмүүс ямар нэг мэдлэгт хүндэтгэлтэй хандаж, түүгээрээ амьдарч магадгүй бол, Христ бүх төрлийн мэдлэгийг задлан шинжилж, ялган таньж, тэдгээрт зөв хандаж чаддаг. Та нарын тодорхой мэргэжлийн ур чадвар, холбогдох мэдлэгийг эзэмшсэн байдлыг жишээ болгон авч үзье. Та нар энэ мэдлэгээ ашигласнаар юунд хүрч чадах вэ? Та нар үүргээ гүйцэтгэх явцдаа энэ мэдлэгийг хэрхэн ашигладаг вэ? Үүнд ямар нэг үнэн-зарчим орсон уу? Хэрвээ чи үнэнийг ойлгодоггүй бол чамд ямар ч зарчим байхгүй, чи үүргээ гүйцэтгэхдээ зөвхөн мэдлэгт л найддаг. Хэдийгээр Би тэр мэргэжлийн мэргэжилтэн биш, эсвэл тэр мэдлэгийн талаар гүнзгий ойлголт байхгүй, ердөө ерөнхий санааг нь л ухаарч, зарим үндэс суурийг нь мэддэг байж болох ч, Би энэ мэдлэгийг Бурханы ажилд үр дүнтэй үйлчлэхүйц байдлаар, зарчимтайгаар хэрхэн ашиглахыг мэддэг. Ялгаа нь энэ юм. Антихристүүд үнэнийг хүлээн авдаггүй учраас үүнийг хэзээ ч ойлгохгүй бөгөөд Христийн мөн чанар үнэндээ юу болохыг хэзээ ч ойлгохгүй. Христ Бурханы мөн чанарыг эзэмшдэг—энэ үг яг хаана хэрэгжиж, харагддаг вэ, хүмүүс үүнд хэрхэн хандах ёстой вэ, үүнээс хүмүүс ямар ашиг тус хүртэж, юу олж авдаг вэ? Антихристүүд энэ талыг хэзээ ч харахгүй. Яагаад тэр вэ? Хамгийн чухал нэг шалтгаан бий: Антихристүүд бие махбодтой болсон Бурханы махбодыг яаж ч харсан, тэд зөвхөн хүнийг л хардаг. Тэд хүний өнцгөөс хэмжиж, хүний мэдлэг, туршлага, оюун ухаан, явуулга, заль мэхийг ашиглан хардаг боловч яаж ч харсан энэ хүнээс ямар ч онцгой зүйл олж харж чаддаггүй, Түүнийг Бурханы мөн чанартай гэдгийг ч ялган таньж чаддаггүй. Надад хэл дээ, тэд үүнийг энгийн нүдээр харж чадах уу? (Үгүй.) Хэрвээ тэд микроскоп юм уу рентген туяа ашиглавал яах вэ? Тэгвэл бүр ч харж чадахгүй. Зарим хүн: “Хэрвээ үүнийг энгийн нүдээр юм уу микроскопоор харж чадахгүй юм бол, сүнсний ертөнцтэй холбогддог хүмүүс харж чадах уу?” гэж асуудаг. (Үгүй.) Сүнсний ертөнцтэй холбогддог хүмүүс тэр ертөнцийг харж, сүнснүүдийг мэдэрч чаддаг байтал яагаад бие махбодтой болсон Бурханыг ялган таньж чаддаггүй вэ? Сатан сүнсний ертөнцөд Бурханыг харж чадна гэж та нар бодож байна уу? (Тийм.) Бурхантай адилаар Сатан сүнсний ертөнцөд оршдог боловч Бурханыг Бурхан гэж хүлээн зөвшөөрдөг үү? (Үгүй.) Бурханыг дагах юм уу, Түүнд итгэдэг үү? (Үгүй.) Сатан Бурханыг өдөр бүр харж чаддаг ч Түүнд итгэдэггүй, Түүнийг дагадаг ч үгүй. Тэгэхээр, сүнсний ертөнцтэй холбогддог хүмүүс Бурханы Сүнсийг харж чаддаг байлаа ч, энэ Сүнсийг Бурхан гэж хүлээн зөвшөөрөх үү? (Үгүй.) Энэ тайлбар асуудлын уг үндсийг шийдвэрлэж байна уу? (Тийм.) Энд байгаа уг үндэс нь юу вэ? (Тэд Бурханыг хүлээн зөвшөөрдөггүй, Түүнээс эмээдэггүй.) Зүрх сэтгэлийнхээ гүнд антихристүүд Бурханыг хүлээн зөвшөөрдөггүй. Тэдний өвөг дээдэс, тэдний уг үндэс нь Бурханыг хүлээн зөвшөөрөөгүй. Бурхан яг нүднийх нь өмнө байсан ч тэд Түүнийг хүлээн зөвшөөрдөггүй, шүтэн мөргөдөг ч үгүй. Тэгвэл тэд тийм эгэл жирийн, шалихгүй харагддаг бие махбодтой болсон Бурханыг яаж шүтэн мөргөж чадах юм бэ? Тэд яавч чадахгүй. Тиймээс, антихристүүд харахын тулд ямар ч арга ашигласан, нэмэргүй. Бурхан ажлаа эхэлсэн цагаас өнөөдрийг хүртэл маш олон үг хэлж, маш агуу ажил хийсэн. Энэ нь хүн төрөлхтний ертөнц дэх хамгийн агуу тэмдэг, гайхамшиг биш гэж үү? Хэрвээ антихристүүд үүнийг хүлээн зөвшөөрч чаддаг байсан бол тэд аль эрт итгэх байсан; өдийг хүртэл хүлээхгүй байсан. Зарим хүн: “Антихристүүд ердөө л Бурханы бодит үйл хэргийг хангалттай хараагүй учраас үнэмшдэггүй; хэрвээ Бурхан зарим нэг тэмдэг, гайхамшиг үзүүлж, сүнсний ертөнц үнэндээ ямар байдгийг тэдэнд харуулж, тэд Бурханы жинхэнэ дүрийг харж, Түүний бүх үг биелэхийг харвал Бурханыг хүлээн зөвшөөрч, дагах байсан” гэж боддог уу? Тийм гэж үү? Антихристүүд сүнсний ертөнцөд олон жилийн турш Бурхантай тэмцэлдээд үнэмшээгүй атлаа хэдхэн жилийн дотор гэнэт дуулгавартай дагах уу? Энэ бол боломжгүй; тэдний уг чанар-мөн чанар өөрчлөгдөшгүй. Бие махбодтой болсон Бурхан маш их ажил хийж, маш олон үг хэлсэн боловч тэдгээрийн аль нь ч тэднийг байлдан дагуулж чадахгүй, мөн тэд Бурханы ялгамж чанар, мөн чанарыг хүлээн зөвшөөрч чадахгүй. Энэ бол тэдний төрөлх уг чанар юм. Энэ уг чанар юуг илтгэж байна вэ? Энэ нь антихристүүд шиг ийм хүмүүс Бурхан, үнэн болон эерэг зүйлсийн эсрэг үүрд дайсагнаж, эцсээ хүртэл тэмцэж, үхэх хүртлээ хэзээ ч зогсохгүй гэсэн үг юм. Тэд устгагдах зүй ёсны бай биш гэж үү? “Үхэх хүртлээ хэзээ ч зогсохгүй” гэдэг нь юу гэсэн үг вэ? Энэ нь тэд Бурханы үгийг үнэн гэж хүлээн зөвшөөрснөөс үхсэн нь дээр, Бурханыг дуулгавартай дагаснаас үхсэн нь дээр гэж үздэг гэсэн үг юм. Энэ нь үхвэл зохих хэрэг.

Антихристүүд энэ эгэл жирийн хүн болох Христийг гаднаас нь төдийгүй дотроос нь ч бас шинждэг. Тиймээс, Христийг ярьж, үйлдэх үед антихристүүд янз бүрийн зан авир гаргадаг. Христийн үг яриа, үйлдэлд хариу үйлдэл үзүүлэхдээ антихристүүдийн гаргадаг янз бүрийн илрэлээр дамжуулан тэдний уг чанар-мөн чанарыг ил болгоцгооё. Жишээлбэл, Христ хүмүүстэй ажил болон үнэн-зарчмын талаар нөхөрлөхдөө зарим тодорхой хэрэгжүүлэлтийг дурддаг. Эдгээр нь хүмүүс үүргээ гүйцэтгэх явцдаа ажлыг хэрхэн тусгайлан хэрэгжүүлж, биелүүлэх ёстой талаар байдаг. Ерөнхийдөө, ямар ч ажил, онол ярьж, уриа лоозон хашхирч, хүн бүрийг зоригжуулаад, дараа нь хүн бүрээр тангараг өргүүлээд дуусчихдаг зүйл биш; үүрэгтэй холбоотой ажил бүр нарийн төвөгтэй бөгөөд тодорхой нарийн ширийнийг агуулдаг. Жишээ нь: Зөв хүнийг хэрхэн сонгох; янз бүрийн хүмүүсийн өөр өөр байдлыг хэрхэн зохицуулж, хэрхэн хандах; үүргээ гүйцэтгэх явцад гарч ирдэг янз бүрийн асуудлыг зарчмын дагуу хэрхэн зохицуулах; дур мэдэн, захирангуй үйлдэхгүйгээр, эсвэл дураараа, зоргоороо авирлахгүйгээр хүмүүсийн дунд хэрхэн эв найртай хамтын ажиллагаанд хүрэх гэх мэт янз бүрийн сэдвийг хамардаг. Хүмүүс Христийн нөхөрлөсөн тодорхой ажлыг хэрэгжүүлж, тодорхой төслүүдийг хариуцан ажиллах шаардлагатай болох үед тэдэнд бэрхшээл тулгарч магадгүй. Уриа лоозон хашхирч, хоосон сургаал номлох амархан боловч бодит хэрэгжилт тийм ч энгийн биш. Хамгийн наад зах нь хүмүүс эдгээр ажлыг бодитоор хийж гүйцэтгэхийн тулд хүчин чармайлт гаргаж, төлөөс төлж, цаг хугацаа зарцуулах хэрэгтэй болдог. Нэг талаар тохиромжтой хүмүүсийг олох, нөгөө талаар холбогдох мэргэжлийн талаар суралцах, янз бүрийн мэргэжлийн талтай холбоотой нийтлэг мэдлэг, онол, түүнчлэн үйл ажиллагааны тодорхой арга барил, хандлагыг судлах явдал үүнд хамаатай. Түүнчлэн тэдэнд зарим нэг хүндрэлтэй асуудал тулгарч магадгүй. Ерөнхийдөө, хэвийн хүмүүс эдгээр бэрхшээлийн талаар сонсоод бага зэрэг зүрхшээж, тодорхой хэмжээний дарамт мэдэрдэг боловч Бурханд үнэнч, дуулгавартай хүмүүс бэрхшээлтэй тулгарч, дарамт мэдрэх үедээ зүрх сэтгэлдээ чимээгүйхэн залбирч, Бурханаас удирдамж эрж, итгэлийг нь нэмэгдүүлж, гэгээрүүлж, туслахыг гуйж, мөн алдаа гаргахаас хамгаалахыг гуйдаг бөгөөд ингэснээр тэд үнэнч байдлаа биелүүлж, бүхий л хүч чадлаа дайчлан, мөс чанараа сэвгүй болгож чаддаг. Гэвч антихристүүд шиг хүмүүс ийм байдаггүй. Хэрэгжүүлэх шаардлагатай ажлын тодорхой зохицуулалтын талаар Христээс сонсох үедээ, мөн тэр ажил нь зарим нэг бэрхшээлтэй байх үед тэд дотроо эсэргүүцэж эхэлдэг бөгөөд цааш үргэлжлүүлэхийг хүсдэггүй. Энэ дургүйцэл нь ямар харагддаг вэ? Тэд: “Яагаад надад сайн зүйл хэзээ ч тохиолддоггүй юм бэ? Яагаад надад үргэлж асуудал, шаардлага тулгадаг юм бэ? Намайг ажилгүй хүн, эсвэл зарц гэж бодоод зараад байгаа юм уу? Би тийм амархан дөнгүүлчих хүн биш шүү! Чи үүнийг маш амархан хэлж байна, чи өөрөө хийгээд үзэхгүй яасан юм бэ!” гэж хэлдэг. Энэ нь дуулгавартай байдал мөн үү? Энэ нь хүлээн авч буй хандлага мөн үү? Тэд юу хийж байна вэ? (Эсэргүүцэж, сөргөлдөж байна.) Энэ эсэргүүцэл, сөргөлдөөн хэрхэн үүсдэг вэ? Жишээлбэл, хэрвээ тэдэнд “Яваад хэдэн килограмм мах худалдаж аваад, бүгдэд нь зориулж шарж жигнэсэн гахайн махан хоол хий” гэж хэлбэл тэд үүнийг эсэргүүцэх үү? (Үгүй.) Гэвч хэрвээ “Өнөөдөр яваад тэр газрыг хагал, хагалахдаа хоолоо идэхээсээ өмнө эхлээд чулууг нь түүж дуусгах хэрэгтэй” гэж хэлбэл тэд дургүйцнэ. Махан биеийн зовлон, бэрхшээл, эсвэл дарамт шахалттай холбоотой байх үед тэдний дургүйцэл ил гарч, тэд цааш үргэлжлүүлэх хүсэлгүй болдог; тэд: “Яагаад надад сайн зүйл тохиолддоггүй юм бэ? Амархан, эсвэл хөнгөн ажил хийх болохоор яагаад намайг алгасдаг юм бэ? Яагаад хүнд, ядаргаатай, эсвэл заваан ажилд намайг сонгодог юм бэ? Би заль мэхгүй, дээрэлхэхэд амархан харагддаг болохоор тэр үү?” хэмээн эсэргүүцэж, гомдоллож эхэлдэг. Эндээс л дотоод эсэргүүцэл эхэлдэг. Тэд яагаад ийм их эсэргүүцдэг вэ? Ямар “заваан, ядаргаатай ажил” гэж? Ямар “бэрхшээл” гэж? Энэ бүхэн тэдний үүргийн нэг хэсэг биш гэж үү? Хэнд даалгасан байна, тэр хүн л хийх ёстой; үүнд шилж, сонгоод байх юу байгаа юм бэ? Тэдэнд зориуд хүндрэл учруулахын тулд тэгдэг үү? (Үгүй.) Гэвч тэд үүнийг өөрсдөд нь зориуд хүндрэл учруулж, эвгүй байдалд оруулж байна гэж итгэдэг тул энэ үүргийг Бурханаас хүлээн авдаггүй бөгөөд хүлээн авахыг ч хүсдэггүй. Энд юу болоод байна вэ? Бэрхшээлтэй тулгарч, махан биеийн зовлон эдэлж, цаашид тав тухтай амьдрах боломжгүй болох үедээ тэд эсэргүүцдэг хэрэг үү? Энэ нь болзолгүй, гомдолгүй дуулгавартай байдал мөн үү? Өчүүхэн төдий бэрхшээл тулгарахад л тэд дургүйцдэг. Хийхийг хүсдэггүй, хэцүү, хүсүүштэй биш, дорд, эсвэл бусдын дорд үздэг ямар ч ажлыг тэд ширүүн эсэргүүцэж, татгалзаж, халгаадаггүй бөгөөд өчүүхэн төдий ч дуулгавартай байдал харуулдаггүй. Христийн үг, тушаал, эсвэл Түүний нөхөрлөсөн зарчимтай тулгарах үеийн антихристүүдийн анхны хариу үйлдэл бол—тэдэнд бэрхшээл учруулж, зовж шаналах юм уу төлөөс төлөхийг шаардмагц—эсэргүүцэж, татгалзан, зүрх сэтгэлдээ зэвүүцэх явдал юм. Гэсэн хэдий ч өөрсдийнх нь хийхийг хүсдэг, эсвэл өөрсдөд нь ашигтай зүйлийн тухайд тэдний хандлага өөр байдаг. Антихристүүд тав тухтай байдалд ташуурч, бусдаас ялгарахыг хүсдэг боловч махан биеийн зовлонтой тулгарч, төлөөс төлөх, тэр ч бүү хэл бусдыг гомдоох эрсдэлтэй тулгарах үедээ тэд баярлаж, дуртайяа хүлээн авдаг уу? Тэр үед тэд үнэмлэхүй дуулгавартай байдалд хүрч чадах уу? Өчүүхэн төдий ч үгүй; тэдний хандлага бүхэлдээ дуулгаваргүй, гөжүүд байдаг. Антихристүүд шиг хүмүүс хийхийг хүсдэггүй зүйлтэйгээ, өөрсдийнх нь хүсэл сонирхол, таашаал, эсвэл хувийн ашиг сонирхолд нийцэхгүй зүйлтэй тулгарах үедээ Христийн үгэнд хандах хандлага нь ямар ч дуулгавартай байдалгүйгээр туйлын татгалзсан, эсэргүүцсэн байдалтай болдог.

Зарим хүн Христийн ярихыг сонсож байхдаа: “Христ яагаад ингэж хэлж байгаа юм бэ? Тэр энэ асуудалд яаж ийм өнцгөөс хандаж чадаж байна аа? Тэр яаж ийм үзэл бодолтой байж, ямар нэг зүйлийг яаж ингэж тодорхойлж чадаж байна аа? Энэ бас үнэн гэж үү? Эдгээр нь бас Бурханы үг гэж үү? Би тэгж бодохгүй байна. Библид Бурханы ярьдаг арга барилыг өөрөөр, тодорхой хэмжээний ухаалаг байдлаар, эдгээр нарийн ширийн, жижиг сажиг асуудал руу орохгүйгээр тэмдэглэсэн байдаг. Христ яагаад ингэж ярьдаг юм бэ? Үргэлж л нарийн ширийн зүйлийн талаар ярьж, нарийн ширийнийг задлан шинжилдэг; Бурхан үнэхээр ингэж ярьж чадна гэж үү?” хэмээн бодож эхэлдэг. Тэд Бурханы үгийг унших бүрдээ үзэл тээдэггүй бөгөөд “Эдгээр нь Бурханы үг; би амь, аврал, ерөөл олж авахын тулд эдгээрт найдах ёстой” гэж боддог. Гэсэн хэдий ч Христтэй бодитоор харилцах үедээ зарим асуудлын талаарх Түүний үзэл бодол, тайлбар, хандлага, түүнчлэн зарим хүнтэй харьцах арга барилынх нь талаар тэдэнд үзэл бодол бүрэлдэж эхэлдэг бөгөөд эдгээр үзэл бодлыг хүний үзэл гэж үзэж болно. Антихристүүд зүрх сэтгэлд нь үзэл төрөх үед үзлийг нь засаж өгөхийг Бурханаас гуйн залбирах уу? Яавч үгүй. Тэд Христийн үгийг өөрсдийн үзлээр тасралтгүй хэмждэг бөгөөд дуулгавартай зүрх сэтгэл өчүүхэн төдий ч байдаггүй. Тиймээс, тэд Христийн талаар үзэлтэй болох үедээ дотроо эсэргүүцэж эхэлдэг бөгөөд аажмаар Христэд дайсагнадаг болдог. Ийм дайсагнал бий болох үед антихристүүд дуулгавартай дагахаар төлөвлөсөн хэвээр байх уу? Тэд хүлээн авахаар төлөвлөсөн хэвээр байх уу? Тэд зүрх сэтгэлдээ эсэргүүцэж эхлэн, “Хмм, одоо би чиний эсрэг ашиглах хөшүүрэг оллоо. Чи бурхан биш билүү? Чиний бүх үг үнэн биш билүү? Чи бас ямар нэг зүйл хийхдээ логикоор сэтгэж, нүдээр харсан зүйлдээ үндэслэн асуудлыг шүүдэг юм байна шүү дээ. Чиний үйлдэл бурханы мөн чанартай нийцэхгүй байна!” гэж боддог. Тэд дотроо дуулгаваргүй байдлыг мэдэрч эхэлдэг. Энэхүү дуулгаваргүй байдал бий болох үед гаднаа харагддаг. Тэд: “Чиний хэлж байгаа зүйл зөв мэт санагдаж байгаа ч, би бурханы үгийг шалгаж бурхан энэ талаар юу гэж хэлснийг харах хэрэгтэй байна. Би бурханд залбирч, тэр намайг хэрхэн залж чиглүүлэхийг харах хэрэгтэй. Бурхан намайг хэрхэн удирдан чиглүүлж, гэгээрүүлэхийг харахын тулд би хүлээж, эрж хайх хэрэгтэй. Чиний хэлсэн зүйлийн хувьд, энэ нь цаашид миний анхаарах зүйл биш бөгөөд миний үйлдлийн үндэс суурь болж чадахгүй” гэж хэлж магадгүй. Энэ нь ямар илрэл вэ? (Христийг үгүйсгэх.) Тэд Христийг үгүйсгэдэг атлаа яагаад Үг нь махбодоор илэрсэн номыг уншсаар байдаг вэ? (Бурхан минь, тэд зөвхөн тэнгэр дэх тодорхойгүй Бурханыг л хүлээн зөвшөөрч, газар дээрх Христийг илэрхий үгүйсгэдэг гэж би бодож байна.) Антихристүүд хоосон бичиг үсэг, хоосон сургаал дотор тууштай амьдарч, өндөр дээд, үл үзэгдэх Бурханыг хүндэлдэг. Тиймээс тэд Христийн хэлсэн үгийн тэмдэглэл болох бичигдмэл үгийг дээд зэргээр хүндэлж, дээдэлдэг атлаа туйлын эгэл жирийн Христ зүрх сэтгэлд нь ямар ч байр суурьгүй гэж үздэг. Энэ нь зөрчилдөөнтэй биш гэж үү? Тэд Христийн талаар үзэл тээх үедээ: “Би залбирч, эрж хайгаад, бурханы үгэнд юу гэж хэлснийг харах хэрэгтэй” гэж хэлдэг. Зөвхөн Бурханы үгийг хүлээн зөвшөөрдөг атлаа Христийг хүлээн зөвшөөрдөггүй тэд хэн бэ? (Антихристүүд.) Христийн үгийн талаарх тэдний үзэл хэчнээн их, эсвэл гүн гүнзгий байсан ч, эдгээр үг хэвлэгдмэгц үзэл нь алга болдог. Үг нь бичвэр болмогц тэд үүнийг Бурхан мэт шүтэн мөргөдөг. Энэ нь фарисайчууд болон шашны хүрээнийхний гаргасан алдаатай адилхан биш гэж үү? Үнэнийг ойлгохгүй байх нь эдгээр илрэл, үзэл бий болох амархан болгодог. Антихристүүд үзэлтэй болсны дараа тэдний зүрх сэтгэл дуулгавартай дагаж чаддаггүй; ямар ч дуулгавартай байдал байдаггүй, зөвхөн эсэргүүцэл л байдаг.

Ямар нөхцөл байдалд эгэл жирийн хүмүүст үзэл бий болдог вэ, эсвэл ямархуу хүмүүст үзэл бий болох хандлагатай байдаг вэ? Нэг төрөл нь Бурханы үгийг ойлгодоггүй хүмүүс, нөгөө нь сүнслэг ойлголтгүй, үнэнийг хүлээн авдаггүй хүмүүс юм; тэдэнд үзэл бий болох хандлагатай байдаг. Үзэл бий болмогц тэд зүрх сэтгэлдээ эсэргүүцэж эхэлдэг. Жишээлбэл, тухайн үеийн нөхцөл байдал, орчин болон хүний хэрэгцээ шаардлагад үндэслэн Би хүмүүст ямар нэг зүйлийг тодорхой аргаар хий гэж хэлж магадгүй. Дараа нь, цаг хугацаа өнгөрч, нөхцөл байдал өөрчлөгдөхийн хэрээр уг асуудлыг зохицуулах арга зам, арга барил нь бас өөрчлөгдөж магадгүй. Гэвч энэ өөрчлөлт нь антихристүүдэд үзэл бий болох боломж олгодог: “Чи өмнө нь ингэж хэлээд, үүнийгээ үнэн гэж тунхаглан, хүмүүст үүнийг ингэж хэрэгжүүл гэж хэлсэн. Бид эцэст нь ойлгож, үүнийг хэрэгжүүлж, мөрдөж чаддаг болж, ерөөл хүртэх найдвартай боллоо гэж бодож байтал одоо чи бидэнд өөрөөр хий гэж хэлж байна—энэ юу гэсэн үг вэ? Чи биднийг зовоож байгаа юм биш үү? Чи бидэнд хүнээс дор хандаж байгаа юм биш үү? Яг яаж хийх нь зөв юм бэ?” Арга зам, арга барил, эсвэл хэлсэн үгэнд гарсан ямар ч өөрчлөлт зарим хүнийг хилэгнүүлж чаддаг—энэ хүмүүс бол үнэнийг огт ойлгодоггүй, ухамсарлаж чаддаггүй хүмүүс юм. Тэд Бурханы хийдэг бүхнийг хуучин үзэл бодол, хуучин онол, хүний зарим нэг ёс суртахууны стандарт, мөс чанарын стандарт, тэр ч бүү хэл зарим нэг логик сэтгэлгээ, хүний мэдлэгээр хэмждэг. Энэ бүхэн Христийн хэлсэнтэй зөрчилдөх, эсвэл дунд нь зөрүү гарах үед тэд үүнийг хэрхэн зохицуулахаа мэддэггүй. Хэрхэн цааш үргэлжлүүлэхээ мэдэхгүй байх үедээ хэвийн хүмүүс тайвширч, эхлээд хүлээн авч, дараа нь аажмаар ойлгохоор эрж хайж чаддаг байх ёстой. Гэвч антихристүүд ийм байдаггүй. Тэд эхлээд эсэргүүцдэг, дараа нь тодорхойгүй Бурханы өмнө залбирч, үнэнийг хэрэгжүүлэн, Бурханыг маш их хайрлаж буй мэт харагддаг. Тэдний залбирлын зорилго юу вэ? Сэтгэл амар байдаг болохын тулд Христийн үгийг үгүйсгэх, Христийн хэлсэн зүйлийг яллаж, шүүмжлэх хангалттай нотлох баримт олох явдал байдаг. Ингэж тэд үзлээ шийдвэрлэдэг. Энэ нь тэдний үзлийг шийдвэрлэж чадах уу? (Үгүй.) Яагаад үгүй вэ? (Учир нь тэд үнэнийг хүлээн авдаггүй. Тэд Бурханы үгээс үнэнийг эрж хайхгүй, харин Бурханыг үгүйсгэхийг оролдож байна.) Яг зөв, тэд үнэнийг хүлээн авах хандлагаар, эсвэл үнэнийг хүлээн авах арга замаар үзлээ шийдвэрлэхгүй байна. Тэдний үзэл арилдаггүй; зүрх сэтгэлд нь оршсоор байдаг. Тиймээс ийм арга барил үзлийг нь хэзээ ч шийдвэрлэхгүй, үзлээ орхих боломжийг тэдэнд хэзээ ч олгохгүй. Харин ч эдгээр үзэл цаг хугацаа өнгөрөхийн хэрээр хуримтлагддаг; цаг хугацаа өнгөрч, Бурханд итгэсэн жил нь нэмэгдэхийн хэрээр тэдний үзэл, төсөөлөл ч бас нэмэгддэг. Үүний үр дүнд, энэ эгэл жирийн хүн болох Христэд хандах тэдний хандлага гарцаагүй улам бүр үзэлд дарагддаг. Үүний зэрэгцээ, зүрх сэтгэлдээ Христээс тусгаарласан хаалт болон Түүнд хорсох сэтгэл нь бас нэмэгддэг. Үүргээ гүйцэтгэж, цуглаанд оролцож, Бурханы үгийг идэж, уухдаа ийм хаалт, үзлийг тээснээр тэд эцэст нь юу олж авч чадах вэ? Ерөөл хүртэх хүсэл нь өдрөөс өдөрт нэмэгдэхийг эс тооцвол тэд юу ч олж авдаггүй.

Та нарт Христийн талаар ямар нэг үзэл байдаг уу? Хүмүүсийн Бурханд тавьдаг шаардлага нь Христийн талаарх үзлийг нь бүрэлдүүлдэг. Эдгээр шаардлага хаанаас гардаг вэ? Тэдгээр нь хүмүүсийн амбиц, хүсэл, үзэл, төсөөллөөс үүдэн гардаг. Тэгвэл хүмүүст ямархуу үзэл бий болдог вэ? Тэд Христийг тэгж, ингэж хэлэх ёстой, Тэр тодорхой хэв маягаар ярьж, үйлдэх ёстой гэж итгэдэг. Жишээлбэл, хэн нэгэн сөрөг, сул дорой болох үедээ: “Бурхан бол хайр биш гэж үү? Бурхан яг л хайр энэрэлтэй эх, энэрэнгүй эцэг шиг; Бурхан хүмүүст тайтарал өгөх ёстой. Тэнгэр дэх Бурханыг март; Түүнд хүрэх боломжгүй. Одоо Бурхан газар дээр ирсэн тул хүмүүст ийм таатай боломж байна. Би сөрөг байгаа тул Бурханы өмнө очиж, зүрх сэтгэлээ уудлах хэрэгтэй” гэж бодож магадгүй. Тэгээд зүрх сэтгэлээ уудалж байхдаа тэд нулимс унагаж, бэрхшээл, сул дорой байдлынхаа талаар ярьж, завхарсан зан чанараа ил тод ярилцдаг. Хүмүүс үнэндээ зүрх сэтгэлдээ юу эрж хайдаг вэ? Тэд тайтгарахыг хүсдэг, чихэнд чимэгтэй үг сонсохыг хүсдэг, уйтгар гунигийг нь нимгэлж, сэтгэлийг нь сэргээж, тав тух өгч, сөрөг байхыг нь болиулах үгийг Бурхан хэлээсэй гэж хүсдэг. Тийм биш гэж үү? Ялангуяа тодорхой төрлийн хүмүүсийн хувьд тэд ийм төсөөлөл тээдэг: “Хүмүүсийн хувьд сул дорой, сөрөг байдал нь ердөө л тийм байдаг, харин Бурханы хувьд ганцхан өгүүлбэр л хүнийг бүхэлд нь сэргээж, зүрх сэтгэл дэх бүх зовлон, уйтгар гунигийг нь тэр даруй алга болгож чадна. Сул дорой, сөрөг байдал нь утаа шиг замхарч, тэд юутай ч тулгарсан хүчтэй байж, сул дорой байхаа, сөрөг байдалд шигдэхээ больж, гэрчлэлдээ бат зогсож чадна. За тэгвэл, Христ яриг!” Надад хэл дээ, ийм нөхцөл байдалтай тулгарах үедээ Би юу хэлэх ёстой вэ? Нэг талаар, энэ хүн яагаад сөрөг байгааг, мөн ямар үүрэг гүйцэтгэж байгааг Би олж мэдэх хэрэгтэй; нөгөө талаар, үүргээ гүйцэтгэх явцдаа хүний баримтлах ёстой зарчмын талаар Би нөхөрлөх ёстой. Энэ нь тодорхой хэлж байгаа хэрэг биш гэж үү? Мунхаг, гөжүүд, үнэнийг хүлээн авдаггүй зарим хүний хувьд тэднийг өдөөж, урамшуулахын тулд сахилгажуулах ямар нэг зүйл хэлэх шаардлагатай байдаг. Үүний зэрэгцээ, үргэлж сөрөг байх нь ямар учиртайг, яагаад байнга сөрөг байдгийг нь тэдэнд ойлгуулахын тулд энэ төрлийн хүний уг чанар-мөн чанарыг ил болгох шаардлагатай. Хэрвээ Би үргэлж сөрөг байдаг хүмүүсийг үнэнийг хүлээн авдаггүй, үнэнийг хайрладаггүй хүмүүс гэж хэлбэл үүнийг сонсоод тэд тайтгарч чадах уу? (Үгүй.) Би ингэж хэллээ гэж бодъё: “Байнга сөрөг байх нь хэвийн зүйл. Энэ бол хүүхэд шиг илрэл; яг л хүүхэд насанд хүрсэн хүний ачааг үүрч, хүнд ачаанаас болоод байнга сөрөг болдогтой адил. Чиний биеийн хэмжээ жижиг, чи залуу, бас их зүйл туулаагүй учраас аажмаар суралцах хэрэгтэй. Түүнчлэн, эцэг эх чинь бас хариуцлага хүлээх ёстой; тэд чамайг сайн сургаагүй учраас энэ чиний буруу биш.” Тэр үед тэд: “Тэгээд миний энэ завхарсан зан чанар юу юм бэ?” гэж асууж магадгүй. “Энэ бол завхарсан зан чанар биш; чи ердөө л хэтэрхий залуу байна, бас сайн гэр бүлийн орчноос гаралтай; чи эрх дураараа, бөөцийлүүлж өссөн. Хэдэн жилийн дараа том болох үед чинь энэ нь дээрдэнэ.” Үүнийг сонсоод тэд тайтгарах уу? Хэрвээ Би нэмээд чанга тэвэрч, эерэг эрч хүч дамжуулбал тэдний дотор дулаахан санагдахгүй гэж үү? Ингэвэл тэд Бурханы хайр, дулаан илчийг мэдэрлээ гэж бодох болно. Гэвч Христ ихэвчлэн ингэж үйлддэггүй. Тэрээр арай томхон хүүхдүүдийг тайтгаруулахын тулд үнэхээр тэгж магадгүй ч насанд хүрсэн хүн бүрийн хувьд Тэр ингэж авирлахгүй; энэ нь тэнэг хүнийг хуурч байгаа хэрэг болно. Үүний оронд, Тэр голыг нь олж ярьж, чамд зам зааж өгч, юу болоод байгааг тодорхой хэлж өгч, чамд чөлөөтэй сонгох боломж олгоно. Чи ямар хүн байх нь явах замыг чинь тодорхойлдог. Христийн хийдэг бүхний мөн чанарыг харвал, Тэр хүмүүсийг хуурч, эсвэл тоглоом тохуу хийдэггүй боловч тэд үүнийг хүлээн авч чаддаггүй. Тэд бодит байдалтай нүүр тулдаггүй, гэхдээ энэ бол Христийн мөн чанар юм; Тэр зөвхөн ингэж л үйлдэж чадна. Хэрвээ хүмүүс үүнийг хүлээн авч чадахгүй бол энэ нь хүмүүс болон Бурханы хооронд зөрчилдөөн үүсгэхгүй гэж үү? Хэрвээ тэд зорилгодоо хүрч чадахгүй, бас үнэнийг хүлээн авахгүй бол энэ нь хаалт үүсгэхгүй гэж үү? (Тийм.) Энэ нь хүмүүсийн зүрх сэтгэлд тээглэж үлддэг. Бурханыг маш их хайр энэрэлтэй, ээж, эмээ шиг зөөлөн гэж хүмүүс анх боддог байсан. Гэвч одоо, байдал тийм биш байгааг харж, өчүүхэн төдий ч дулаан илч мэдрэхгүй байгаа болохоор тэдний урам хугардаг. “Христийн ганцхан өгүүлбэр л намайг сөрөг байдлаас гаргаж чадна” гэх тэдний төсөөлөл биелж чадах уу? “Христ миний асуудлыг шийдвэрлэхээр ирж л байвал, тэр даруй сэтгэл минь дулаацаж, дахиж хэзээ ч сөрөг болохгүй гэдгээ баттай хэлж чадна; бүх зүйл тодорхой болж, зам гарч ирнэ.” Энэ төсөөлөл бодитой юу? Энэ зорилгод хүрч чадах уу? (Үгүй.) Тиймээс, энэ асуудал дээр хүмүүс үргэлж өөрсдийн үзэл, төсөөлөлд найдвал бүтэхгүй; тэд асуудлыг шийдвэрлэхийн тулд үнэнийг эрж хайх ёстой.

Зарим хүн зарим нэг зүйлийг далдуур хийдэг бөгөөд Надтай уулзахдаа тэд Надад: “Би өсвөр насандаа садар самууны нүгэл үйлдсэн” гэж хэлдэг. Би: “Энэ тухайгаа Надад битгий хэл. Ганцаараа байхдаа чин сэтгэлээсээ залбирч, үнэхээр гэмш, тэгвэл асуудал шийдвэрлэгдэж, Бурхан үүнийг санахгүй. Чи Надад нүүр тулан хэлэх шаардлагагүй; Би ийм зүйлсийг ухаж төнхдөггүй” гэж хэлдэг. Намайг тэдний яриаг болиулах үед тэдэнд ийм бодол төрдөг: “Та үнэхээр Бурхан мөн үү? Миний зүрх сэтгэл маш чин үнэнч, дүрэлзэж байтал Та дээрээс нь нэг хувин хүйтэн ус цацаад унтраачихлаа. Би зүгээр л Тантай зүрх сэтгэлээ уудлахыг хүссэн, Та яагаад сонсохгүй байгаа юм бэ? Та сонсвол сайн байхсан; надад ярих өөр олон нарийн ширийн зүйл байна.” Би: “Нүглээ улайхын эцсийн зорилго бол гэмших болохоос биш, олон тооны нарийн ширийн зүйлийг тоочих явдал биш. Хэрвээ чи зүрх сэтгэлийнхээ гүнд үнэхээр гэмшсэн бол хэлбэр нь хамаагүй; энэ үйл явцыг тууллаа гээд ямар ч нэмэргүй. Бүх нарийн ширийнийг болон нөхцөл байдлыг Надад тодорхой болголоо гээд чи гэмшсэн гэсэн үг биш. Хэрвээ чи үнэхээр гэмшсэн бол, юу ч хэлээгүй байсан ч чи гэмшсэн л байна. Мөн хэрвээ чи гэмшээгүй бол, энэ тухайгаа ярилаа ч гэсэн ямар ч нэмэргүй байх болно” гэж хэлдэг. Зарим хүн ойлгодоггүй, Бурханд итгэдэг болохоосоо өмнө садар самуун явдалд орооцолдсон, хулгай хийсэн, эсвэл бусдыг яллаж, хилс хэрэгт гүтгэсэн гэх мэт бүх зүйлийг нь Намайг сонсохыг хүсдэг гэж боддог. Хувийн амьдралын энэ бүх асуудлыг нь Би сонсохыг хүсдэг, хүн бүрийн сэтгэлийн гүн дэх бодол санаа, хийсэн сайн, муу бүх үйлдлийг нь Би мэдэж, ухаж ойлгохыг хүсдэг гэж тэд боддог. Энэ нь хүний үзэл биш гэж үү? Тэд эндүүрч байна. Би зөвхөн хүмүүсийн завхарсан зан чанар, мөн чанар болон тэдний алхаж буй замыг л мэдэх хэрэгтэй; тэдний авралын чухал асуудлыг шийдвэрлэхэд энэ хангалттай. Хүн бүрийн одоогийн амьдрал юм уу дараагийн амьдралын талаар мэдэх шаардлагагүй; ийм нарийн ширийнийг мэдэх шаардлага байхгүй. Хүмүүс ингэж боддог: “Та бас хэвийн бөгөөд бодитой. Таны мэдэхгүй зүйлс байгаа, тиймээс магадгүй Та хүн бүрийн гэр бүлийн байдал, өсөж торнисон орчин, мөн өсөж том болох үеийнх нь эдгээр онцгой туршлагыг ойлгож, ажлын зорилгоор тэдгээрийг нэгд нэгэнгүй мэдэж авч, тэднийг шүүж, ил болгоход ашиглах барьц олж авахыг хүсэж байгаа байх.” Ийм байдаг гэж үү? (Үгүй.) Зарим хүн эдгээр үзэл, төсөөллийг тээсээр, өнгөрсөнд хийсэн зүйлсээ Надтай уулзах үедээ Надад үргэлж хуваалцахыг хүсэж, “Өө, Та мэдэхгүй л дээ, манай гэр бүл өмнө нь ийм байсан...” гэдэг. Би: “Гэр бүлийнхээ асуудлын талаар битгий ярь; Бурханд итгэх талаар зарим нэг туршлагаасаа хуваалц” гэж хэлдэг. Бусад нь: “Өө, Та мэдэхгүй, би өмнө нь маш олон хамтрагчтай байсан” эсвэл “Та намайг өмнө нь хэнийг хилс хэрэгт гүтгэж байсныг мэдэхгүй” гэж хэлдэг. Эдгээр зүйлийг хэлэх хэрэгтэй юу? (Үгүй.) Бие махбодтой болсон Бурхан эдгээр асуудлыг үнэхээр мэдэх хүсэлтэй, хүмүүсийн дунд байдаг бүхий л шившигт зан авир болон хүмүүсийн буруу амьдралын янз бүрийн нарийн ширийн талыг ойлгохын хүслэн болдог гэж тэд боддог. Ийм хүмүүстэй тулгарах үедээ Би тэдэнд: “Хэрвээ чи нүглээ улайж, гэмшихийг хүсэж байвал ганцаараа байхдаа Бурханы өмнө залбир, Надад битгий хэл. Би үүргээ хэрхэн сайн гүйцэтгэх, бодит амьдрал дээр Бурханыг хэрхэн шүтэн мөргөхийг л чамд зааж өгөх, авралд хүрэхэд чинь туслах үүрэгтэй. Бид уулзах үедээ эдгээртэй холбоотой юуны ч талаар ярилцаж болно, гэхдээ хамааралгүй асуудлуудыг дурдахгүй байх нь дээр” гэж хэлдэг. Үүнийг сонсоод зарим хүн: “Бурханд үнэхээр хайр алга, Бурхан хүлээцтэй биш юм” гэж бодож эхэлдэг. Тэднийхээр бол, ямархуу хүн хайр энэрэлтэй байдаг вэ? Бусад хүмүүсийн өдөр тутмын жижиг сажиг асуудлыг тусгайлан зохицуулдаг хорооны дарга шиг хүн. Би тийм зүйлсийг зохицуулах ёстой юу? Би тэдгээр асуудлыг огт тоодоггүй! Чи яаж амьдрах, юу идэж, өмсөх, хэрхэн мөнгө олох, чиний эдийн засгийн байдал, хөршүүдтэйгээ хэрхэн таарамжтай байх зэрэгт Би огтхон ч оролцдоггүй. Энэ бол хүмүүс үзэл тээх үедээ Христэд ханддаг хандлага юм. Ялангуяа Христийн үгийн талаар үзэл бий болох, эсвэл Христийн үг өөрсдийнх нь үзэлтэй бүхэлдээ зөрчилдөх үед антихристүүд үзлээ орхидоггүй, үнэнийг хүлээн авдаггүй, мөн үзлээ задлан шинжилдэггүй, үнэнийг эрж хайдаг ч үгүй; харин ч тэд үзлээсээ зуурч, Христийн хэлсэн зүйлийг зүрх сэтгэлдээ нууцаар ялладаг.

Энэхүү эцсийн үе шатанд Бурхан эцсийн өдрүүдийн шүүлтийн ажлыг хэрэгжүүлж байна. Бурханы хаанчлалын сайн мэдээ түгэхийн хэрээр Бурханы гэрт өөр өөр мэргэжилтэй холбоотой нэлээд хэдэн ажил гарч ирсэн бөгөөд үүнд хөгжимтэй холбоотой ажил, бичвэрт суурилсан ажил, кино продакшны ажил гэх мэт багтдаг. Энэ ажлын явцад Христ мөн эдгээр мэргэжилтэй холбоотой зарим ажилд оролцсон бөгөөд мэдээж голчлон удирдамж өгч, янз бүрийн ажлын чиглэлийг тодорхойлсон; Тэр энэ хүрээнд ажилладаг. Христ эдгээр салбартай холбоотой зарим мэдлэг юм уу ерөнхий мэдээллийг сайн мэдэхгүй байх нь гарцаагүй бөгөөд Түүний ойлгодоггүй зарим зүйл байж магадгүй. Энэ нь маш хэвийн зүйл биш гэж үү? Ихэнх хүний хувьд энэ нь туйлын хэвийн санагддаг бөгөөд сүртэй зүйл биш, учир нь хүн бүр суралцах явцдаа байгаа, Бурханы удирдлага дор бүх төрлийн ажил улам бүр сайжирч, улам олон эцсийн бүтээгдэхүүн, өндөр чанартай үр дүн гарах болно. Гэвч антихристүүдийн хувьд энэ нь жижиг асуудал биш. Тэд: “Чи зарим нэг салбарыг огт мэдэхгүй, тэр ч байтугай юу ч мэдэхгүй. Чи оролцож, биднийг чиглүүлж, удирдах ямар эрхтэй юм бэ? Яагаад чиний үг эцсийнх байх ёстой гэж? Яагаад бид бүгд чамайг сонсох ёстой юм бэ? Чамайг сонсох нь гарцаагүй зөв гэж үү? Чамайг сонсвол бид буруу замаар явахгүй, эсвэл ажилдаа алдаа гаргахгүй гэж үү? Би үүнд тийм ч итгэлтэй биш байна” гэж хэлдэг. Христийг ажилд удирдамж өгөх үед зарим хүн үүнд эргэлзсэн хандлагаар хандаж: “Түүний хэлж байгаа зүйл ойлгомжтой, зохих мэргэжлийн хүрээнд байна уу, мөн бидний өөрсдийн санаанаас илүү байна уу гэдгийг эхлээд харцгаая. Хэрвээ тийм бол бид үүнийг хүлээн авч, Түүний удирдамжийг дагана; үгүй бол бид өөр сонголт хийж, өөр арга зам олно” гэдэг. Гэвч антихристүүд дотроо бүрэн дүүрэн дуулгаваргүй сэтгэлгээтэй байдаг: “Бид бол мэргэжилтнүүд, энэ салбарт олон жил ажилласан. Бид энэ ажлыг нүдээ аниад ч хийж чадна. Чиний удирдамжийг дагалаа гээд зүгээр л хэлбэр төдий хийсэн хэрэг болно биз дээ? Яагаад бид чамайг сонсох ёстой юм бэ? Чиний санал зөвлөмж зүгээр л албаны яриа биш гэж үү? Хэрвээ бид чамайг сонсвол энэ нь биднийг чадваргүй мэт харагдуулахгүй гэж үү? Гэхдээ одоо хүн бүр сонсож байгаа болохоор би босож ирээд, чамайг эсэргүүцэж чадахгүй, учир нь ингэвэл надтай антихрист шиг харьцаж магадгүй. Тиймээс би хэсэгтээ дүр эсгэж, сонсож байгаа мэт царайлж, зүгээр л хэлбэр төдий хийж, дараа нь юунд ч нөлөөлөхгүйгээр ердийнхөөрөө үргэлжлүүлнэ.” Тиймээс Христ үнэн-зарчмыг яаж ч нөхөрлөсөн, хэчнээн тодорхой тайлбарласан ч антихристүүдэд үргэлж өөрсдийн гэсэн тогтсон санаа байдаг бөгөөд тэд өөрсдийгөө мэргэжлээ ойлгодог, тухайн салбартаа мэргэжилтнүүд гэж үргэлж итгэдэг тул Христийн нөхөрлөж буй үнэн-зарчим юу болохыг ойлгож чаддаггүй. Христийг тэдний мэргэжилтэй холбоотой ажилд удирдамж өгөх бүрд антихристүүдийн хувьд энэ нь өөрсдийн чадвар, авьяасыг Христтэй харьцуулах мөч болдог. Бүр дордууштай нь, заримдаа Христ тэдний мэргэжилтэй холбоотой асуудлын талаар ярих үед антихристүүд үүнийг Христ юу ч мэдэхгүй байгаагаа харуулж байна гэж үзээд, Христийг нууцаар шоолж, басамжилдаг бөгөөд Христ ажлыг нь удирдан чиглүүлэхийг өөрийн эрхгүй бүр ч их эсэргүүцэж, зэвүүцдэг. Тэд зүрх сэтгэлдээ огтхон ч үнэмшдэггүй, “Чи бидэнд тэрийг, энийг хий гэж хэлдэг ч чи юу мэддэг юм бэ? Чи эдгээр салбарт хамаарах янз бүрийн үе шатыг ойлгодог ч юм уу? Тэдгээр нь хэрхэн ажилладаг талаар тодорхой нарийн ширийнийг чи мэдэх үү? Чи биднийг кино хийхэд удирдан чиглүүлэхдээ хэрхэн жинхэнэ юм шиг жүжиглэх, эсвэл хэрхэн дуу бичихийг мэддэг гэж үү?” гэж хэлдэг. Эдгээр асуудалтай тулгарах бүрд антихристүүд мэргэжил бүрд хамаарах үнэн-зарчмыг зүрх сэтгэлдээ чин сэтгэлээсээ сонсдоггүй. Харин ч тэд дотроо Христтэй нууцаар тэмцэлдэж, бүр хөндлөнгийн ажиглагч мэт зогсож, Христийг дооглож, шоолдог бөгөөд зүрх сэтгэл нь дуулгаваргүй байдлаар дүүрэн байдаг. Тэд ажлаа хэрэгжүүлэхээр явахдаа өнгөцхөн ёс төдий хийж, эхлээд Бурханы нөхөрлөлийн тэмдэглэлийг эргэн хараад Бурхан юу хэлснийг харчихаад, дараа нь зүгээр л аливааг хуучин аргаараа хийж, ажиллаж эхэлдэг. Зарим хүн: “Бурхан тэгж хэлээгүй шүү дээ, чи яагаад ингэж хийж байгаа юм бэ?” гэж хэлж магадгүй, үүнд нь тэд: “Хэдий бурхан тэгж хэлээгүй ч, бурхан бодит нөхцөл байдлыг мэдэх үү? Үүнийг бодитоор хийж дуусгах ёстой хүмүүс нь бид биш гэж үү? Бурхан юу мэддэг юм бэ? Бурхан ердөө л зарчмыг өгсөн, гэхдээ бид бодит нөхцөл байдлын дагуу зохицуулах ёстой. Хэдий бурхан энд байсан ч гэсэн бид үүнийг ингэж л зохицуулах хэрэгтэй болно. Үнэнтэй холбоотой үед бид бурханы үгийг сонсдог, харин мэргэжлийн ажилтай холбоотой, үнэнд хамааралгүй үед бид өөрсдөө шийддэг” гэж хариулдаг. Тэд Бурханы нөхөрлөсөн үнэн-зарчмыг сонсож, тэмдэглэж авсан бөгөөд хүн бүр ёс төдий хийж, тэмдэглэлээ эргэн харсан боловч аливааг хэрхэн хийх ёстой тухайд хэн эцсийн шийдвэрийг гаргадаг вэ? Тэдний хувьд үнэн эрх барьдаггүй, Христ эрх барихтай бүр ч ямар ч хамаагүй байдаг. Тэгвэл хэн эрх барьж байна вэ? Антихрист эрх барьж байна; хүн л эцсийн шийдвэрийг гаргадаг. Тэдний өнцгөөс бол үнэн бол агаар мэт, ердөө л хааш яаш дурдаад өнгөрдөг хоосон сургаал, уриа лоозон бөгөөд хүмүүс хийх ёстой зүйлээ хүссэнээрээ хийсээр байдаг. Тухайн үедээ тэд маш сайхан зөвшөөрч, хандлага нь онцгой чин сэтгэлийн мэт санагддаг боловч бодит амьдрал дээр бүх зүйл өөрчлөгддөг; харагдаж байсан шигээ байдаггүй.

Антихристүүд бие махбодтой болсон Бурханы талаар үргэлж үзэл тээж, Түүнийг эсэргүүцдэг, дотроо үнэмшдэггүй учраас бие махбодтой болсон Бурханыг зүрх сэтгэлдээ уг үндсээрээ хүлээн зөвшөөрдөггүй; тэд зөвхөн тэнгэр дэх Бурханд л итгэдэг. Тэд яг л Паул шиг: Тэрээр бие махбодтой болсон Есүст чин сэтгэлээсээ үнэмшээгүй, харин ч үзлээр дүүрэн байсан. Тийм ч учраас бичсэн бүх захидалдаа тэрээр Есүсийг хэзээ ч гэрчлээгүй, Есүсийн үгийг үнэн гэж хэзээ ч гэрчлээгүй, мөн Есүсийг хайрлах хайр өөрт нь байгаа эсэх талаар хэзээ ч яриагүй. Эдгээр нь хүмүүсийн харж чадах зүйлс юм; Паул бол жинхэнэ антихрист. Паул бол антихристийн сонгодог жишээ гэдгийг одоо та нар бүгд таньж чадна. Антихристүүдийн төрөлд хамаардаг хүмүүс Бурханы илэрхийлсэн үг үнэн гэдгийг хүлээн зөвшөөрлөө ч үнэнийг хүлээн авч чадах уу? Тэд Христийг дуулгавартай дагаж чадах уу? Тэд Христийг гэрчилж чадах уу? Энэ бол өөр асуудал. Тэд Христийн хийдэг бүхнийг дуулгавартай дагаж чадах уу? Хэрвээ Христ ажил зохицуулж, эсвэл даалгаж, хүмүүст үүнийг хэрхэн хийхийг зааж өгвөл антихристүүд дуулгавартай дагаж чадах уу? Энэ асуудал хүмүүсийг хамгийн сайн илчилдэг. Антихристүүд дуулгавартай дагаж чаддаггүй; тэд Христийн үгийг үл тоомсорлож, үл ойшоодог. Тиймээс Христ ямар ч ажилд ямар ч тодорхой удирдамж, эсвэл даалгавар өгсөн бай, антихристүүд хэзээ ч хэрэгжүүлэхгүй. Антихристүүд Христийг дуулгавартай дагахыг зүгээр л хүсдэггүй. Христ ажлыг хэрхэн зохицуулахаас үл хамааран тэд үүнийг хэрэгжүүлэхийг хүсдэггүй, өөрсдийнх нь санаа илүү ухаалаг гэж үргэлж итгэж, өөрсдийн төлөвлөгөөг дагах нь хамгийн зөв гэж боддог. Хэрвээ чи тэдэнд “Нөхцөл байдалтай тулгарах үедээ та нар гурав юм уу дөрвөн хүнтэй хамтран ажиллаж, хамтдаа зөвлөлдөж, үнэн-зарчмын талаар илүү их нөхөрлөж, тэдгээр зарчмыг зөрчилгүйгээр зарчмын дагуу үйлдэх ёстой” гэж хэлбэл тэд сонсох уу? Тэд огт сонсдоггүй; тэд аль эрт эдгээр үгийг умартсан бөгөөд эцсийн шийдвэрийг өөрсдөө гаргахыг хүсдэг. Чи тэдэнд “Хэрвээ шийдвэрлэх боломжгүй асуудал байвал Дээрхээс эрж хайж болно” гэж хэлдэг, гэвч үнэхээр асуудал гарч, хүн бүр Дээрхээс эрж хайх талаар бодох үед антихристүүд “Ийм ялихгүй зүйлийн талаар асуугаад яах юм бэ? Ингэлээ гээд дээрхэд л түвэг удна. Бид өөрсдөө зохицуулж чадна, асуух шаардлагагүй! Би эцсийн шийдвэрийг гаргана, ямар нэг зүйл буруугаар эргэвэл би үр дагаврыг нь хүлээнэ!” гэж хэлдэг. Эдгээр үг хэчнээн сайхан сонсогддог ч, ямар нэг зүйл үнэхээр буруугаар эргэх үед тэд үнэхээр үр дагаврыг нь хариуцаж чадах уу? Хэрвээ чуулганы ажил хохирол амсвал тэд арыг нь дааж чадах уу? Жишээлбэл, удирдагч, ажилчид цуглаан зохион байгуулахдаа хайнга хандсанаас болж ах эгч нар цуглааны үеэр баривчлагдаж, үүнээс үүдэн зарим нь сөрөг, сул дорой болж, гуйвбал хэн ийм хариуцлагыг үүрч чадах вэ? Антихристүүд хэлсэн үгэндээ хариуцлагатай байдаг уу? Тэд туйлын хариуцлагагүй! Энэ бол антихристүүдийн ажилд ханддаг хандлага юм. Надад хэл дээ, антихристүүд Христийн хэлсэн үгийг үнэхээр хүлээн авч, дуулгавартай дагаж чадах уу? (Үгүй.) Антихристүүд үнэнийг хэрэгжүүлэх, Христийг дуулгавартай дагах талаар зүрх сэтгэлдээ ямар хандлага баримталдаг вэ? Нэг үгээр хэлбэл: эсэргүүцэл. Тэд эсэргүүцсээр байдаг. Энэ эсэргүүцлийн цаана буй зан чанар юу вэ? Энэ нь юунаас бий болдог вэ? Дуулгаваргүй байдлаас үүдэлтэй. Зан чанарын тухайд гэвэл, энэ нь үнэнийг зэвүүцэх, зүрх сэтгэлдээ дуулгаваргүй байх, дуулгавартай дагахыг хүсэхгүй байх явдал юм. Тэгвэл Бурханы гэр удирдагч, ажилчдаас ганцаараа бүх шийдвэрийг гаргахын оронд эв найртай хамтран ажиллаж, бусадтай хэлэлцэж сурахыг шаардах үед антихристүүд зүрх сэтгэлдээ юу гэж боддог вэ? “Юм бүхнийг хүмүүстэй хэлэлцэх нь дэндүү төвөгтэй! Би эдгээр зүйлийн талаар шийдвэр гаргаж чадна. Бусадтай хамт ажиллаж, тэдэнтэй ярилцаж, юмыг зарчмын дагуу хийнэ гэдэг ямар уйтгартай, ичмээр юм бэ!” Антихристүүд өөрсдийгөө үнэнийг ойлгодог, бүх юмыг тодорхой мэддэг, өөрсдийн гэсэн мэдлэг ухаан, аливааг хийх арга замтай гэж боддог учраас бусадтай хамтран ажиллаж чаддаггүй, юуг ч хүмүүстэй ярилцаж хэлэлцдэггүй, юм бүхнийг өөрсдийнхөөрөө хийж, өөр хэнд ч бууж өгдөггүй! Хэдийгээр дуулгавартай дагаж, бусадтай хамтран ажиллахад бэлэн гэж аман дээрээ хэлдэг ч хариулт нь өнгөн дээрээ хэчнээн сайхан харагдаж байлаа ч, үг нь хэчнээн сайхан сонсогдож байлаа ч антихристүүд тэрслүү байдлаа өөрчилж чаддаггүй, сатанлаг зан чанараа өөрчилж чаддаггүй. Харин дотроо тэд ширүүн тэмцэлддэг—хэр хэмжээнд? Хэрвээ мэдлэгийн хэлээр тайлбарлах юм бол энэ нь өөр өөр шинж чанартай хоёр зүйлийг нэгтгэх үед тохиолддог үзэгдэл буюу эсрэгцэх явдал бөгөөд үүнийг бид “эсэргүүцэл” гэж тайлбарлаж болно. Дээрхийг эсэргүүцэх нь чухамдаа антихристүүдийн зан чанар юм. Тэд Дээрхийг эсэргүүцэх дуртай бөгөөд хэнийг ч дуулгавартай дагадаггүй.

Антихристүүд Христийн үгтэй тулгарах үедээ ганцхан хандлагатай байдаг нь дуулгаваргүй байдал юм; мөн тэдний цорын ганц арга барил бол эсэргүүцэл байдаг. Жишээ нь, Би: “Манай хашаа нэлээд том, сүүдэр багатай юм. Өвөл нар бүтэн тусаж, хүмүүс наранд ээж болох ч зундаа бага зэрэг халдаг. Хэдэн мод худалдаж авцгаая, хурдан ургадаг, ирээдүйд хангалттай сүүдэрлэх, мөн харьцангуй цэвэрхэн, үзэмжтэй мод авъя” гэж хэлдэг. Энд хэдэн зарчим байна вэ? (Гурав.) Нэг нь мод хурдан ургадаг байх, нөгөө нь мод цэвэрхэн, харьцангуй үзэмжтэй байх, бас нэг нь ирээдүйд хангалттай сүүдэрлэхээр буюу мөчир, навч нь саглагар байх явдал юм. Хүмүүс ердөө энэ гурван зарчмыг л хэрэгжүүлэх ёстой; хэдийг авах, хаана тарих, ямар төрлийн мод байх тухайд Би бас тэдэнд хэлж өгсөн. Энэ ажлыг хэрэгжүүлэхэд амархан уу? (Тийм.) Үүнийг хэцүү ажил гэж үзэх үү? (Үгүй.) Энэ нь хэцүү ажил биш. Яагаад хэцүү биш вэ? Мод зардаг газрууд байгаа, Бурханы гэр хөрөнгийг нь гаргана, ингээд мод худалдаж авах үндсэн нөхцөлүүд бүгд хангагдсан. Үлдсэн зүйл нь ердөө л хүмүүс үүнийг хэрэгжүүлэх явдал бөгөөд энэ ажилд хэцүү зүйл юу ч байхгүй. Гэвч антихристийн хувьд энд нэг бэрхшээл байдаг: “Юу? Мод худалдаж авна аа? Зүгээр л сүүдэртэй болгож, орчныг илүү үзэмжтэй болгохын тулд мөнгө үрнэ гэж үү? Энэ чинь махан биеийн тав тухад шунаж байгаа хэрэг биш үү? Тэр мөнгө бол бурханд өргөсөн өргөл, тэгж хамаагүй үрж болох уу? Жаахан халахын буруу нь юу байна? Нарыг бурхан бүтээсэн; наранд ээлээ гээд үхчих үү? Үүнийг нарны илчийг авч, борооны усыг хүртэх гэдэг юм. Хэрвээ наранд байхыг хүсэхгүй байвал дотор л байхгүй юу. Тэгээд одоо энэ тав тухын төлөө мөнгө үрэхийг хүсэж байна гэнэ ээ—чи зүүдэлж байгаа байлгүй!” Тэд: “Би ганцаараа энэ асуудалд эцсийн шийдвэр гаргахгүй; хэрвээ би шууд эсэргүүцвэл сайн зүйл болохгүй. Намайг яллаж магадгүй, бусад нь ч зөвшөөрөхгүй байх. Тиймээс, би үүнийг шийдвэр гаргах багт мэдэгдэнэ. Мөн ах эгч нараар ч бас санал бодлыг нь хэлүүлбэл хамгийн сайн. Хэрвээ шийдвэр гаргах баг зөвшөөрвөл бид мод авна; хэрвээ зөвшөөрөхгүй бол ах эгч нар зөвшөөрсөн ч бид авахгүй” гэж тунгаадаг. Тэд бүгдийг цуглуулж, энэ асуудлыг дурдаад, дараа нь хүн бүрээр хэлэлцүүлж, санал бодлыг нь илэрхийлүүлдэг. Хүн бүр: “Мод авах нь сайн хэрэг; хүн бүрд ашиг тустай” гэж хэлдэг. Антихрист үүнийг сонсоод, “Энэ яаж сайн хэрэг байдаг юм бэ? Хүн бүрд ашиг тустай байлаа гээд сайн байж болох уу? Хүн бүр хэний мөнгөөр ашиг тус хүртэж байгаа юм бэ? Тэр чинь бурханы мөнгийг үрж байгаа хэрэг; энэ нь өргөлийг үрэн таран хийж байгаа хэрэг биш үү? Энэ нь зарчимтай нийцэж байна уу?” гэдэг. Хүн бүр: “Хүн бүрийн ашиг тусын тулд, хүмүүсийн эрх ашгийн төлөө өргөлийг үрэн таран хийх нь үнэхээр бага зэрэг зохисгүй мэт санагдаж байна” гэж тунгаан боддог. Ийнхүү нааш цааш хэлэлцсэний эцэст мод худалдаж авахгүй байх эцсийн шийдвэр гардаг. Мөнгийг хэмнэх ёстой; хэн ч тушаалаа гэсэн үүнийг хийж болохгүй. Ийм хэлэлцүүлгийн дараа дүгнэлтэд хүрдэг. Ямар дүгнэлт вэ? “Энэ удаагийн христийн тушаалын тухайд, бидний эцсийн шийдвэр бол үүнийг эсэргүүцэж байна; бид өргөлийг үрэхгүй, бурханы гэрийн мөнгөнөөс нэг ч зоос үрэн таран хийхгүй. Тодорхой хэлбэл, энэ нь бид мод авахгүй, хашааг цэцэрлэгжүүлэхгүй гэсэн үг.” Ийм л шийдвэр гардаг. Хэд хоногийн дараа Би модыг хараахан аваагүй байгааг анзаараад, “Чи яагаад модоо аваагүй юм бэ?” гэж асуухад “Өө, бид удахгүй авна аа” гэдэг. Улирал нь ирж, бусдын мод нахиалж байхад тэд яагаад одоо болтол нэгийг ч аваагүй юм бэ? Лавлаж асуусны эцэст, тэд хэлэлцээд мод худалдаж авахыг зөвшөөрөөгүйг Би олж мэдсэн; Миний үг талаар болжээ. Зөвлөлдөж, хэлэлцэж, задлан шинжилсний дараа бүх хүн хамтдаа Миний тушаалыг няцаахаар шийдсэн нь: “Энд бид л шийднэ. Чи хойшоо бай. Энэ бол бидний гэр, чамд ямар ч хамаагүй” гэсэн утгатай байв. Энэ ямархуу арга барил вэ? Энэ нь эсэргүүцэл биш гэж үү? Тэд ямар хэмжээнд эсэргүүцэж байна вэ? Тэд Бурханы гэрийн мөнгөнөөс нэг ч зоос үрэхгүй, Бурханы өргөлийг зарцуулахгүй гэсэн үндэслэл гаргадаг. Та нар энэ үндэслэлийн талаар юу гэж бодож байна вэ? Эдгээр үг зөв үү? (Үгүй.) Ихэнхдээ, өргөлийг үрэн таран хийж, буруугаар ашигладаг хүмүүс нь яг энэ антихристүүд байдаг. Тэд эцсийн шийдвэрийг гаргахыг хүсдэг тул мунхаг, мэдлэггүй, ялган таних чадваргүй хүмүүсийг төөрөлдүүлэхийн тулд энэ хэдэн онолыг сэдэж олдог. Үнэхээр ч зарим хүн үүнд нь хууртаж, тэдний үгийн дагуу үйлддэг бол, Христийн үгийг антихристүүд үймүүлж, хорлон сүйтгэж, хэрэгжилтийг нь саатуулдаг. Энэ асуудлын уг үндэс нь юу вэ? Гол нь Бурханы сонгосон хүмүүс антихристүүдийн хоёр нүүртэй байдлыг нэвт харж чаддаггүй, үргэлж аливаа зүйлийн өнгөц талд төөрөлдөж, юмсын мөн чанарыг ухаарч чаддаггүйд оршдог. Антихристүүд энэ хүмүүсийн дунд дарангуйлан саад тотгор учруулдгаас болж Бурханы сонгосон хүмүүсийн дундах ялган таних чадваргүй зарим хүн тэдэнд байнга төөрөлдөж, хяналтад нь ордог.

Чуулганд хийдэг Христийн тодорхой ажлын зохицуулалт, тушаал бүрийн хувьд, хэрвээ үймээн дэгдээх антихристүүд байхгүй бол тэдгээрийг хурдан хэрэгжүүлж болно. Гэвч антихрист хөндлөнгөөс оролцмогц ажил хойшилж, хэрэгжүүлэх боломжгүй болдог. Заримдаа хүмүүсээр хэрэгжүүлэхээр зорьсон Христийн зохицуулалт, тушаалыг антихристүүд ямар нэгэн шалтаг тоочин шууд няцаадаг. Ингэхдээ тэд хүн бүрийг хамруулсан шийдвэр гаргах хэлбэрийг ашиглаж, “Үүнийг ах эгч нарын саналаар баталсан; энэ бол зөвхөн миний үг биш, хамтын шийдвэрийн үр дүн” гэж хэлдэг. Энэ нь юуг илтгэж байна вэ? Энэ нь ах эгч нарын шийдвэр үнэнд нийцдэг бөгөөд асуудал гарах үеийн ах эгч нарын хамтын шийдвэр нь үнэн эрх мэдлийг атгаж байгаа хэрэг гэсэн санааг илэрхийлж байна. Гэвч удирдлагыг гартаа авсан антихрист Христийн хэлсэн зүйлийг эсэргүүцэх үед энэ нь үнэн эрх мэдлийг атгаж байгаа хэрэг үү? Энэ нь үнэндээ антихрист эрх мэдлийг атгаж байгаа хэрэг гэдэг нь тодорхой. Антихрист нөхцөл байдлыг бүхэлд нь хянаж байхад үнэн эрх мэдлийг атгаж байна гэж хэлэх нь утгагүй бөгөөд ов мэхтэй хэрэг биш гэж үү? Антихристүүд үнэхээр өнгөлөн далдлахдаа гаргууд! Христ тэднээс ямар нэг зүйл хэрэгжүүлэхийг хүсэх үед, мөн энэ нь Бурханы үйлдэл бөгөөд Тэр хүн бүрийг бодолцсоны үндсэн дээр үйлдэж байгааг, түүнчлэн хүн бүр Бурханы нигүүлсэлд талархаж байгааг бүгд мэдэх үед энэ нь антихристүүдийн дургүйг хүргэж, тавгүй болгодог. Тэгээд тэд үймүүлж, хорлон сүйтгэх арга зам хайн толгойгоо гашилгадаг. Гэвч хэрвээ санаачилга нь тэд нарынх байгаад, эцэст нь хүн бүр тэдэнд гүнээ талархаж, өндрөөр үнэлдэг болбол тэд үүнийг хэнээс ч илүү идэвхтэй хэрэгжүүлж, ямар ч зовлонг тэвчихэд бэлэн байдаг. Антихристүүд шиг ийм хүмүүс ой гутам биш гэж үү? (Тийм.) Энэ нь ямар төрлийн зан чанар вэ? (Хорон муу зан чанар.) Антихристүүд өөрсдийгөө өнгөлөн далдалж, бусдыг төөрөлдүүлж, өөртөө татахын тулд сайн хүн болж жүжиглэж, тэр ч байтугай үнэнийг хэрэгжүүлж байгаа мэт дүр эсгэж чаддаг. Энэ бол хорон муу байдал юм. Чи ямар үнэнийг хэрэгжүүлж байна вэ? Чи Христийн өгсөн үг, тушаалыг няцааж, тэдгээрийг дуулгавартай дагаж, хэрэгжүүлж чаддаггүй. Чиний хэрэгжүүлдэг гэж ярьдаг үнэн хаана байна вэ? Чи Бурханд итгэгч мөн үү? Чи Бурханд Бурхан мэт ханддаг уу? Чиний итгэдэг Бурхан бол чиний хамт ажилладаг хүн биш, чиний хамтран ажиллагч биш, чиний найз биш; Тэр бол Христ, Тэр бол Бурхан! Чи үүнийг ухаардаггүй юм уу? Христийн үгийг үргэлж задлан шинжилж, шинжиж, зөв эсэхийг нь ялган танихыг оролдож, давуу болон сул талыг нь дэнсэлдэг—чи буруу байр суурь эзлээд байгаа юм биш үү? Антихристүүд хүмүүсийн үгийг шинжиж, задлан шинжлэхдээ гаргууд бөгөөд эцэст нь энэ эцэс төгсгөлгүй шинжилтээ Христ дээр хэрэглэдэг. Христийг ингэж шинжиж, Түүнд ингэж ханддаг тэд Бурханы дагагчид мөн үү? Тэд зүгээр л үл итгэгчид биш гэж үү? Тэд үргэлж Христийг шинждэг боловч Христийн бурханлаг мөн чанарыг ойлгож чадах уу? Христийг шинжих тусам тэд улам бүр эргэлздэг болж, эцэст нь Христийг эгэл жирийн хүн гэж тодорхойлдог. Тэдэнд ямар нэгэн жинхэнэ итгэл, эсвэл дуулгавартай байдал үлдсэн үү? Огтхон ч үгүй. Антихристүүд зүрх сэтгэлдээ Христийг ердөө л эгэл жирийн хүн гэж үздэг. Христэд хүн мэт хандах нь тэдэнд байх л ёстой зүйл мэт санагддаг тул Христийн үг, тушаалыг үл ойшоож, зүрх сэтгэлдээ хүлээж авахгүйгээр зүгээр л цуглааны үеэр хэлэлцэж, шинжихээр хөндөн ярьж болно гэж тэд боддог. Эцэст нь, аливааг хэрхэн хийхийг шийддэг хүн нь Бурхан биш, харин антихрист байдаг. Тэд Христийг юу гэж хардаг вэ? Тэд Түүнийг зүгээр л эгэл жирийн удирдагч гэж хардаг, Христэд Бурхан мэт огт ханддаггүй. Энэ нь Бурханд итгэх Паулын итгэлтэй адилхан уг чанартай биш гэж үү? Паул Эзэн Есүст хэзээ ч Бурхан мэт хандаж байгаагүй, Түүний үгийг хэзээ ч идэж ууж байгаагүй, бас Эзэн Есүсийг дуулгавартай дагахаар эрж хайгаагүй. Тэр үргэлж өөрийгөө христ мэт үзэж, Эзэн Есүсийг орлохыг оролдож, үүний үр дүнд Бурханы шийтгэлийг хүртсэн. Чи Христийг бие махбодтой болсон Бурхан гэдгийг хүлээн зөвшөөрсөн учраас Христийг дуулгавартай дагах ёстой. Христ юу ч хэлсэн бай, чи хүлээн авч, дуулгавартай дагах ёстой болохоос Бурханы үг зөв эсэх, эсвэл үнэнд нийцэж байгаа эсэхийг шинжиж, хэлэлцэх ёсгүй. Бурханы үг нь чамаар задлан шинжлүүлж, шинжүүлэхэд биш, харин дуулгавартай дагаж, хэрэгжүүлэхэд зориулагдсан. Аливааг хэрхэн хийх болон хэрэгжүүлэх алхмуудыг хэрхэн тодорхойлох нь—та нарын нөхөрлөж, хэлэлцэх цар хүрээ юм. Антисхристүүд зүрх сэтгэлдээ Христийн бурханлаг мөн чанарт үргэлж эргэлздэг, үргэлж дуулгаваргүй зан чанартай байдаг учраас Христ тэднээс аливааг хийхийг хүсэх үед түүнийг нь үргэлж шинжилж, хэлэлцэж, өөрсдийнх нь зөв, буруу эсэхийг тогтоож өгөхийг хүмүүсээс хүсдэг. Энэ нь ноцтой асуудал уу? (Тийм.) Тэд үнэнд дуулгавартай байх өнцгөөс эдгээр зүйлд ханддаггүй; харин оронд нь Бурханд эсэргүүцэн тэдгээрт ханддаг. Энэ бол антихристүүдийн зан чанар юм. Тэд Христийн тушаал болон ажлын зохицуулалтыг сонсох үедээ хүлээн авч, дуулгавартай дагадаггүй, харин хэлэлцэж эхэлдэг. Тэд юуг хэлэлцдэг юм бэ? Дуулгавартай дагахыг хэрхэн хэрэгжүүлэх талаар хэлэлцдэг үү? (Үгүй.) Тэд Христийн үг болон тушаал зөв, буруу эсэхийг хэлэлцэж, үүнийг хэрэгжүүлэх ёстой эсэхээ шинжилдэг. Тэдний хандлага эдгээр зүйлийг үнэхээр хэрэгжүүлэхийг хүссэн хандлага мөн үү? Биш, тэд илүү олон хүнийг зоригжуулан өөрсөд шигээ болгож, эдгээр зүйлийг хийлгэхгүй байхыг хүсдэг. Энэ нь дуулгавартай байдлын үнэнийг хэрэгжүүлж байгаа хэрэг мөн үү? Мэдээж биш. Тэгвэл тэд юу хийж байгаа юм бэ? (Эсэргүүцэж байна.) Тэд өөрсдөө Бурханыг эсэргүүцээд зогсохгүй, бас хамтдаа эсэргүүцэхээр зорьж байна. Энэ нь тэдний үйлдлийн шинж чанар мөн, тийм биз дээ? Хамтдаа эсэргүүцэх: хүн бүрийг өөрсөд шигээ болгож, өөрсөдтэй нь адилхан бодолтой, адилхан үг яриатай, адилхан шийдвэртэй болгож, хамтдаа Христийн шийдвэр, тушаалыг эсэргүүцэх явдал. Энэ нь антихристүүдийн арга барил юм. Антихристүүдийн итгэл үнэмшил бол “Олон хүн хууль зөрчсөн үед хуулийг хэрэгжүүлэх боломжгүй” гэдэг учраас тэд өөрсөдтэй нь хамт Бурханыг эсэргүүцэхийг бусдад уриалж, ийм байхад Бурханы гэр тэднийг яаж ч чадахгүй гэж боддог. Ингэх нь тэнэг хэрэг биш үү? Антихристүүдийн Бурханы эсэргүүцэх чадвар туйлын хязгаарлагдмал, гав ганцаараа байдаг учраас хамтдаа Бурханыг эсэргүүцэхийн тулд хүмүүсийг элсүүлэхээр оролдон, “Би бүлэг хүнийг төөрөлдүүлж, өөртэйгөө адилхан бодож, үйлддэг болгоно. Бид хамтдаа христийн үгийг голж, бурханы үгэнд саад хийж, үр дүнд хүрэхийг нь болиулна. Хэн нэг хүн миний ажлыг шалгахаар ирвэл би бүх хүн ингэж хийхээр шийдсэн гэж хэлнэ—тэгээд тэрийг хэрхэн зохицуулахыг чинь харна. Би үүнийг чиний төлөө хийхгүй, хэрэгжүүлэхгүй—намайг яахыг чинь харъя л даа!” гэж дотроо боддог. Тэд өөрсдийгөө эрх мэдэлтэй, Бурханы гэр тэдэнд ямар ч арга хэмжээ авч чадахгүй, Христ ч бас чадахгүй гэж боддог. Та нар юу гэж бодож байна, ийм хүнд арга хэмжээ авахад амархан уу? Ийм төрлийн хүнд ямар арга хэмжээ авах ёстой вэ? Хамгийн энгийн арга бол тэднийг чөлөөлж, шалгах явдал юм. Диавол өөрийгөө илчлэх үед түүнийг ганц өшиглөөд л таягдан хая, тэгээд л болоо. Бурханы гэр чамайг удирдагч байхыг зөвшөөрдөг боловч чи дуулгавартай дагадаггүй, тэр ч байтугай Бурханыг эсэргүүцэж зүрхэлдэг; чи диавол биш гэж үү? Бурханы гэр чамайг удирдагчаар томилж, ингэснээр чи бодит ажил хийж, Бурханы гэрийн ажлын зохицуулалтыг дуулгавартай дагаж, үүргээ сайн гүйцэтгэж чадна. Чи Бурханы үгийг хүлээн авч, дуулгавартай дагах ёстой; Бурхан юу ч хэлсэн, чи Түүнийг эсэргүүцэхийн оронд үгийг нь хүлээн авч, хэрэгжүүлэх ёстой. Чи Бурханыг эсэргүүцэхийг үүргээ болгосон—тэгэхээр уучлаарай, чамайг чөлөөлөх нь хамгийн энгийн шийдэл юм. Бурханы гэр чамайг ашиглах эрх мэдэлтэй, мөн чамайг чөлөөлөх эрх мэдэлтэй. Зарим хүн: “Би удирдагчийн хувиар дажгүй л ажиллаж байсан, яагаад намайг чөлөөлсөн юм бэ? Энэ чинь будаагаа тээрэмдэж дуусмагцаа илжгээ алж байгаа хэрэг биш үү?” гэж хэлдэг. Чамайг чөлөөлөх үед чи үнэхээр дажгүй байсан гэж үү? Замбараагүй өшиглөж, хаздаг, яаж ч сургасан зүй ёсны ажилдаа анхаардаггүй илжгийг “будаагаа тээрэмдэж дуусмагц” нь үнэхээр алах шаардлагатай болно. Хэзээ алахын тухайд бол түүний гүйцэтгэлээс шалтгаална. Надад хэл дээ, хүн сайн илжгээ дуртайяа үгүй хийх үү? Тээрэмдэх үед илжиг бол хамгийн чухал бөгөөд гол туслагч. Хамгийн их хэрэгтэй байгаа үед тээрэмдэхээ зогсоож, үр тариагүй үлдэхийг илүүд үзэн илжгээ алах тийм тэнэг хүн байх уу? Тэгдэг хүн байна уу? (Үгүй.) Ийм зүйл тохиолдох ганцхан нөхцөл байдал бий: Илжиг сургагдахгүй, галзуу мэт өшиглөж, хазсаар юу ч тээрэмдэх боломжгүй болгох. Тэр үед л тээрэмдэхээ зогсоож, илжгээ алах хэрэгтэй болно биз дээ? (Тийм.) Энэ асуудлаар ялган таних чадвартай хүмүүс үүнийг тодорхой харж чадна. Тэгвэл дуулгаваргүй, гөжүүд, ямар ч ажлыг хэрэгжүүлж чаддаггүй антихристүүдэд хэрхэн арга хэмжээ авах ёстой вэ? Хамгийн энгийн арга бол эхлээд тэднийг байр сууринаас нь чөлөөлөх явдал юм. Зарим хүн: “Чөлөөлснөөр ингээд дуусаж байгаа юм уу?” гэж асуудаг. Юунд яарна вэ? Тэдний зан авирыг ажигла. Тэд чөлөөлөгдөж, эрх мэдлээ алдсаныхаа дараа Бурханы гэрт хөдөлмөрлөж үйлчилж чадсаар байвал тэднийг хөөхгүй. Гэвч хэрвээ тэд хөдөлмөрлөж үйлчлэхгүй, харин ч үзэл тарааж, мууг үйлдэж, хаа сайгүй үймээн дэгдээж байдлыг улам хурцатгавал зарчмын дагуу тэднийг хөөх ёстой. Үнэндээ бол антихристүүдэд илэрдэг эдгээр зүйл хорсолтой биш үү? (Дэндүү хорсолтой.) Тэд юунаас болоод хорсолтой болдог юм бэ? Энэ антихристүүд Бурханы гэрт эрх мэдлийг гартаа авахыг хүсдэг; Христийн үгийг тэд хэрэгжүүлж чаддаггүй, тэд хэрэгжүүлэхгүй. Мэдээж хүмүүс Христийн үгийг дуулгавартай дагаж чадахгүй байдагт өөр нөхцөл байдал ч бас холбоотой байж болно: Зарим хүн хэв чанар муутай, Бурханы үгийг сонсоод ойлгож чаддаггүй, яаж хэрэгжүүлэхээ мэддэггүй; яаж гэдгийг нь чи зааж өгсөн ч гэсэн чадахгүй хэвээр байдаг. Энэ бол өөр асуудал. Бидний яг одоо нөхөрлөж байгаа сэдэв бол антихристүүдийн мөн чанар бөгөөд хүмүүс юм хийх чадвартай эсэх, эсвэл тэдний хэв чанар ямархуу вэ гэдэгтэй энэ нь хамаагүй; энэ нь антихристүүдийн зан чанар, мөн чанартай холбоотой. Тэд Христ, Бурханы гэрийн ажлын зохицуулалт, үнэн-зарчмыг бүрэн эсэргүүцдэг. Тэдэнд дуулгавартай байдал биш, эсэргүүцэл л байдаг. Антихрист гэж энэ юм.

Дараах нөхцөл байдал нь өмнө дурдсан антихристүүдийн илрэлүүдийн алинд хамаарахыг эргэцүүлж, ялган тань. Өдөр бүр үүрийн гэгээнээс үдшийн бүрий хүртэл ажилладаг, нэлээд хариуцлагатай мэт харагддаг нэг удирдагч байв. Гэвч тэр үзэгдэж харагдах нь ховор, ажилтай маш их завгүй, зүгээр суудаггүй бололтой, үүргээ гүйцэтгэхийн тулд төлөөс төлж байгаа мэт сэтгэгдэл төрүүлдэг байв. Хожим нь тэдний амьдардаг байр болон хашаанд хийх ажил гарах үед тэднийг ажилд нь залж чиглүүлэх хүнийг бид зохицуулсан юм. Биднийг байхгүй үед тэрээр санаачилгыг гартаа авч, ажлыг залж чиглүүлэн, хариуцах ёстой байсан; тэр санаачилга гаргах ёстой байв. Энэ нь зүй ёсны, зохистой хэрэг биш гэж үү? Би эдгээр ахуйн чанартай ажил, даалгаврыг хянахын тулд үргэлж тэнд байх ёстой гэж үү? (Үгүй.) Ихэнхдээ иймэрхүү хар бор ажил нь үнэнтэй нэг их холбогддоггүй. Хүмүүс зөвхөн хичээнгүйлэн ажиллаж, нурааж сүйтгэх үйлдэл хийхгүй, дуулгавартай байж, шаардсан зүйлийг хийх л хэрэгтэй—энэ нь энгийн бөгөөд биелүүлэхэд хялбар юм. Хожим нь тэр хэсгийн ажил үндсэндээ дууссан ч байнгын арчилгаа шаардлагатай байсан тул Би энэ удирдагчид хариуцуулж өгсөн юм. Би түүнд тэр хавийг цэвэр цэмцгэр байлгаж, арчилгаа шаардлагатай бүх зүйлийг сайн арчилж тордоорой гэж хэлсэн. Үндсэндээ хоёр зүйл байв: Нэгдүгээрт, гаднах болон доторх бүх тогтсон талбай, өрөө тасалгааг цэвэр, эмх цэгцтэй байлгах. Хоёрдугаарт, ургамал модыг сайн арчлах; жишээлбэл, шинээр тарьсан ургамлыг үхүүлэхгүйн тулд услах, улирал болон ургалтынх нь дагуу шаардлагатай бол тайрч танах, хэрэгтэй үед нь бордох. Ердөө л энэ хоёр ажил—та нар үүнийг их гэж бодож байна уу? Ядаргаатай байх уу? (Үгүй.) Энэ хоёр ажил их биш; хоолны дараа салхилах зуураа л амжуулчхаж болно. Түүнээс гадна, чи өөрийнхөө амьдрах орчинд бас санаа тавих ёстой биз дээ? Хүн болж амьдрах нь ийм л байдаг; иймэрхүү ажил нь хэвийн хүний амьдралд зайлшгүй шаардлагатай зүйл. Чи өөрийнхөө амьдрах орчныг арчилж тордох хэрэгтэй. Хэрвээ чи тэгэхгүй бол амьтнаас ялгаагүй. Тэр үед чамайг хүн гэж нэрлэж болох уу? Амьтад орчин тойрноо арчилж торддоггүй; тэдэнд бие засах зориулалтын газар байдаггүй, идэж, унтах тогтмол газар ч байдаггүй. Энэ тал дээр хүмүүс амьтдаас илүү; хүмүүс орчноо арчилж торддог, цэвэр цэмцгэр байдалд санаа тавьдаг, орчин тойрондоо тавих стандарттай байдаг. Тиймээс, түүнээс үүнийг шаардсан минь хэтэрсэн хэрэг биш биз дээ? (Тийм.) Эдгээр ажлыг даалгасны дараа Би өөр газар руу явж, тэрхүү удирдагч тодорхой ажлыг хэрэгжүүлэх ёстой байв. Нэг өдөр Би орчны арчилгаа хэр байгааг шалгахаар очсон бөгөөд тэр үеэр зүрх шимширч, бухимдаж, уур хүрсэн! Та нар юу болсон гэж бодож байна вэ? Юу ийм мэдрэмж төрүүлсэн байж таарах вэ? (Тэр Бурханы тушаал, зохицуулалтыг хэрэгжүүлээгүй.) Яг тийм, ингэж л хэлэхээс өөр аргагүй—тэр тэдгээрийг хэрэгжүүлээгүй. Намайг байхгүй байх хугацаанд цаг агаар тийм ч их хуурай биш байсан боловч шинээр тарьсан олон суулгацын навч шарлаж, зарим нь бүр унасан байв. Уур хүрмээр зүйл нь, алдартай хоёр цэцэгт модны навч өтгөн ногооноос хүрэн улаан болж, бараг л шарласан байв. Үүнийг сонсоод та нарын уур хүрч байна уу? Бүр ч уур хүрмээр нь, үүдний цэвэрхэн цементэн тавцан дээр сагс, гялгар уут, хог, дууссан ажлын модны үртэс, хадаас, багаж хэрэгсэл хөглөрч—бүх зүйлийг хаа сайгүй тарааж хаясан, заваан, эмх замбараагүй байдал үүсгэсэн байв! Ийм дүр зургийг хараад хэний уур хүрэхгүй байх билээ? Уурлахгүй ганц л төрлийн хүн бий—амьтдын төрөлд харьяалагддаг, орчин тойрондоо тавих стандарт, мэдрэмжгүй, үнэр, цэвэр цэмцгэр байдал, тав тухыг үл тоодог, юу сайн, юу муу болохыг огт мэддэггүй хүмүүс. Хэвийн хүн чанартай, орчин тойрондоо тавих стандарттай, сэтгэх чадвартай хэн боловч ийм байдлыг хараад уурлах болно. Тэнд маш олон хүн амьдардаг байсан ч тэд энэ жижигхэн ажлыг ч зохицуулж чадсангүй. Тэд ямархуу хүмүүс вэ? Намайг зааварчилгаа өгсний дараа тэд ингэж л хандаж, үүнийг л хийсэн. Эндхийн орчныг арчилж тордож, энэ хэдэн зүйлд санаа тавих нь ядраам биш биз дээ? Энэ нь чиний ямар ч үйл ажиллагаанд саад болохгүй биз дээ? Энэ нь цуглаан, залбиралд чинь, эсвэл Бурханы үгийг уншихад чинь нөлөөлөхгүй биз дээ? Тэгвэл яагаад үүнийг хийж чадахгүй байна вэ? Намайг байж, хянаж, харж байх үед энэ хүмүүс бага зэрэг ажилладаг, гэхдээ Намайг явмагц тэд больдог; хэн ч хариуцлага хүлээдэггүй. Энд юу болоод байгаа хэрэг вэ? Тэд энэ газрыг гэр орноо гэж үздэг үү? (Үгүй.) Тэд Христийн хаанчлал бол дулаахан гэр орон минь гэж хэлсээр байдаг ч тэд үнэхээр тэгж боддог уу? Тэд үнэхээр тэгж үйлддэг үү? Үгүй. Тэд амьдарч буй орчноо ч арчилж торддоггүй. Намайг зааварласан байхад ч хэн ч хариуцлага хүлээдэггүй, хэн ч санаа тавьдаггүй. Ажилла гэж хэлэх үед тэд бага зэрэг хийдэг ч дууссаныхаа дараа багаж хэрэгслээ хааш яаш шидчихээд, “Хэн санаа тавьдаг нь үүнийг зохицуулаг, энэ миний хэрэг биш. Надад хоол, орон байр байхад л болно” гэж боддог. Энэ ямархуу хүн чанар вэ? Энэ ямархуу ёс суртахуун бэ? Ийм хүнд хэвийн хүн чанар өчүүхэн төдий ч гэсэн байдаг уу? Бурханд олон жил итгэсэн хэр нь ямар ч өөрчлөлтгүй байна гэдэг үнэхээр санаанд багтамгүй! Би та нарын төлөө эдгээр зүйлийг хийхийн тулд маш их хүчин чармайлт гаргаж, бүхнийг маш сайн зохицуулсан. Би энд амьдардаггүй, үүний алийг нь ч эдэлдэггүй—энэ бүхэн та нарын төлөө юм. Та нар талархах шаардлагагүй; зүгээр л өөрсдийнхөө амьдрах орчныг арчилж тордоход л болно—яагаад үүнийг хийхэд ийм хэцүү байдаг юм бэ? Хожим нь Би энэ зан авирт шалтгаан байгааг ухаарсан. Хүмүүс гэр бүл, ажил мэргэжлээ орхисон ч бай, эсвэл сурлага, ирээдүйн хэтийн төлөвөө хаясан ч бай, Миний төлөө урт хугацааны ажилчин байх гэж биш, харин үүргээ гүйцэтгэх гэж Бурханы гэрт ирдэг. Яагаад? Тэд сохор зоос ч авдаггүй юм чинь яагаад Намайг сонсох ёстой юм бэ? Яагаад тэд Миний төлөө орчныг арчилж тордох ёстой юм бэ? Яагаад тэд Миний төлөө ийм хүчин чармайлт гаргах ёстой юм бэ? Тэд ингэж л боддог. Тэд өөрсдийнхөө ажлыг сайн хийж, үүргээ биелүүлэхэд л хангалттай, ажлынхаа цар хүрээн дэх асуудалд анхаарал тавьснаар хариуцлагаа биелүүлж дууслаа гэж боддог. Би өөр юу ч шаардсан бай, үүрэг, мэргэжилтэй нь холбоотой л бол тэд бодож үзэж магадгүй, харин бусдыг нь хийлгэх өөр хүн Би олох ёстой гэж боддог. Үүний далд утга нь: “Бид бол хаанчлалын ардууд; бид яаж ийм заваан, ядаргаатай ажил хийж болох юм бэ? Бид бол дээд зэргийн хүмүүс; биднээр үргэлж дорд, гутамшигтай ажил хийлгэх нь бидний нэр нүүрд сэв суулгана! Бид тодорхой ялгамж чанартай хүмүүс байтал чи яагаад бидэнд үргэлж хүндрэл учруулаад байгаа юм бэ?” гэх утгатай. Үүнийг ойлгосныхоо дараа Би, ихэнх хүн яагаад ажилд зэвүүцдэг, эсэргүүцдэг, ажиллах хүсэлгүй байдаг, яагаад тэд өөрсдийгөө бусадтай харьцуулж, ажиллах үедээ үүргээсээ зайлсхийхийн тулд заль мэх ашигладгийг бага зэрэг ухаарсан—яагаад гэвэл ихэнх хүн үнэнийг эрэлхийлдэггүй. Үнэнийг эрэлхийлдэггүй гэдэг нь нийтлэг хэллэг боловч бодит байдал дээр олон хүн угаасаа амар хялбар зүйлд дуртай, ажилд дургүй байх хандлагатай байдаг. Тэд зүгээр л аргацаах сэтгэлгээнд захирагддагийн дээр, үнэнийг эрэлхийлнэ гэдэг нь яг л агуу улаан лууны улсын хүмүүс байнга хуралдаж, сонин уншиж, цай уудагтай адил хамтдаа сууж, ярилцаж, хэлэлцэхийн нэр гэж тэд итгэдэг—үүнийгээ Бурханд итгэж, үүргээ гүйцэтгэж байна гэж тэд боддог. Тариаланчид шиг ажиллаж, хөдөлмөрлөж үйлчлэх тухай сэдэв гарч ирмэгц ингэж амьдрах нь Христэд итгэгч бидэнд ямар ч хамаагүй гэж олон хүн боддог. Христэд итгэгчийн амьдрал бол “дорд таашаалаас” ангид амьдрал юм. Тэд өөрсдийгөө ертөнцийн хар бор ажлаас дээгүүр гэж далдхан итгэдэг—цэвэрлэгээ хийх, хортон шавж устгах, газар тариалан эрхлэх, тайрч танах, цэцэг тарих гэх мэт нь тэдэнд огт хамаагүй; тэд аль хэдийн ийм дорд амьдралын хэв маягаас халин гарсан. Ихэнх хүний байдал энэ биш гэж үү? (Тийм.) Ийм байдлыг засаж залруулахад амархан уу? Машин механизм ажиллуулж сур гэх үед зарим хүн үүнийг нухацтай авч үздэггүй, тэр ч бүү хэл зориуд буруу ашиглаж, хэдхэн өдрийн дотор машиныг эвддэг. Шинээр авсан машинууд эвдэрч, засварын зардал нь хямд биш байдаг. Тэд: “Чи намайг сур гэж хэлээгүй гэж үү? Одоо би машиныг эвдчихсэн, машин байхгүй болсон болохоор надад амрах шалтаг гарлаа, тийм биз дээ? Би цаашид ажиллах шаардлагагүй биз дээ? Чи намайг сур гэж шаардаад байсан, үр дүн нь энэ байна. Чиний харахыг хүссэн зүйл энэ мөн үү?” гэж боддог. Зарим машиныг засах зардал нь шинийг худалдаж авахтай бараг тэнцдэг. Зарим хүн ийм алдаа гаргачхаад огтхон ч харамсдаггүй, гэмшдэггүй. Үүнийг өмнө дурдсан “бурханы гэрийн мөнгөнөөс сохор зоос ч үрэхгүй, учир нь энэ бол бурханд өргөсөн өргөл” гэх үзэлтэй харьцуулах үед аль үгийг нь чин сэтгэлээсээ хэлсэн, аль зан авир нь бодит байдал вэ? Тэд машин механизмыг эвдэж, хэд хэдэн засварын зардал нь шинэ машин хангалттай худалдаж авахаар байдаг. Ийм үрэлгэн зан авир нь бодит байдал, харин өргөлийг үрэн таран хийхгүй гэсэн үг нь худал, ов мэхтэй, төөрөлдүүлсэн үг юм. Өмнө нь хэлэлцсэн жишээг ярихад, хэрвээ бид үүнийг антихристийн зан чанар, эсвэл мөн чанар гэж ангилбал энэ нь өнөөдрийн хэлэлцүүлгийн аль талтай холбогдох вэ? Аль талын дор жагсаах вэ? Тэд: “Би чиний урт хугацааны хөдөлмөрчин байх гэж биш, үүргээ гүйцэтгэх гэж энд ирсэн” гэж хэлдэг. Энэ үг зөв үү? Чи үүргээ гүйцэтгэх гэж энд ирсэн, гэхдээ тэр үүрэгт юу багтах, юу багтахгүйг хэн тодорхойлсон юм бэ? Эдгээр ажил чиний хийх ёстой зүйлийн нэг хэсэг биш гэж үү? Өдөр тутмын амьдралд гэр бүлээ тэжээхийн тулд гадагш гарч мөнгө олох нь чиний үүрэг хариуцлага байдагтай л адил. Хэрвээ чи ногоо идэхийг хүсээд, өөрөө тарихаар шийдвэл тэр нь чиний сонголт, гэхдээ энэ нь гэрийн бусад ажил чиний хариуцах зүйл биш гэсэн үг үү? Чи үүргээ гүйцэтгэх гэж энд ирсэн гэдэг үг зөв боловч урт хугацааны хөдөлмөрчин байх гэж энд ирээгүй гэж хэлэх нь асуудалтай. “Урт хугацааны хөдөлмөрчин” гэж юу гэсэн үг вэ? Хэн чамд тэгж хандаж байгаа юм бэ? Хэн ч чамайг урт хугацааны хөдөлмөрчин гэж үзэхгүй байгаа бөгөөд эдгээр ажлыг хийлээ гээд, эсвэл бага зэрэг хүчин чармайлт гаргалаа гээд чи урт хугацааны хөдөлмөрчин болчихгүй. Би чамайг урт хугацааны хөдөлмөрчин гэж хардаггүй, Бурханы гэр ч чамайг тэгж ашигладаггүй. Чи өөрийнхөө хариуцсан ажлыг л гүйцэтгэдэг; эдгээр нь бүгд чиний үүргийн цар хүрээнд багтдаг. Жижиг дүр зургаараа бол, энэ нь өдөр тутмын амьдралаа авч явах, бие махбодын эрүүл мэнд, физиологийн хэвийн үйл ажиллагаагаа хангах, сайн сайхан амьдрах тухай юм. Том дүр зургаараа бол, ажил бүр Бурханы ажлыг түгээхтэй холбоотой. Тэгвэл чи яагаад эдгээр ажлын заримыг нь хийхэд бэлэн байдаг атлаа заримыг нь хийдэггүй юм бэ? Чи яагаад шилж сонгодог юм бэ? Чи яагаад бага зэрэг хүчин чармайлт гаргаж, цэвэрлэгээ хийж, орчноо арчилж тордохыг урт хугацааны хөдөлмөрчний ажил, хар бор ажил гэж үздэг юм бэ? Үүнд нэг шалтгаан бий: Христийн тушаал болон Түүний бүх шаардлагын тухайд, хүмүүс хийхийг хүссэн ажлаа үүргийнхээ нэг хэсэг гэж үздэг бол хийхийг хүсдэггүй, эсвэл эсэргүүцдэг ажлаа урт хугацааны хөдөлмөрчний ажил гэж үздэг. Энэ нь баримтыг гуйвуулж байгаа хэрэг биш гэж үү? Энэ бол хүмүүсийн ойлголтын гажуудал юм. Энэ гажуудлыг юу үүсгэдэг вэ? Хүмүүсийн хүсэл сонирхол. Тэгвэл эдгээр хүсэл сонирхол юу руу хэлбийдэг вэ? Энэ нь махан бие зовох эсэхээс шалтгаалдаг. Хэрвээ махан бие тав тух эдэлж чадахгүй, хатуу бэрхийг туулж, ядарвал хүмүүс эсэргүүцдэг. Хийхийг хүсдэг, гоё сайхан, нэр хүндтэй ажлуудаа тэд дурамжхан хүлээн авч, үүргээ гүйцэтгэж байна гэж үздэг. Энэ хандлагыг Христийг эсэргүүцэж байна гэж ангилж болох уу? Хүмүүс хийхийг хүсдэггүй ажлаа эрс эсэргүүцэж, хийхээс татгалздаг; чи хэчнээн сайн тайлбарласан ч тэд зүгээр л татгалзаж, эсэргүүцдэг. Хүмүүсийн эдгээр байдал, асуудлыг шийдвэрлэхэд амархан уу? Энэ бүхэн хүн үнэнийг хэр их хайрладгаас шалтгаална. Хэрвээ хэн нэгэн үнэнийг огт хайрладаггүй, үнэнийг зэвүүцдэг бол хэзээ ч өөрчлөгдөхгүй. Гэвч хэрвээ чи зовохоор шийдсэн, махан биеэсээ урваж чаддаг, жинхэнэ дуулгавартай байдал, дуулгавартай хандлагатай бол эдгээр асуудлыг амархан эргүүлж болно, тийм биз? (Тийм.) Хүн амьдралдаа ямар ч ажил хийхгүй байна гэж байдаггүй. Зарим хүн: “Өнгөрсөн үеийн эзэн хаад ямар ч ажил хийдэггүй байсан” гэж хэлдэг. Энэ үнэхээр үнэн гэж үү? Ихэнх эзэн хаан өдөржин ордны амьдралд умбаж цагийг өнгөрөөдөггүй байсан. Зарим нь бага наснаасаа яруу найраг, уран зохиол судалж эхлэн, үүрийн гэгээнээс үдшийн бүрий хүртэл ажилладаг байсан. Хаан ширээнд суусныхаа дараа тэд ард түмний зовлон зүдүүрийг ойлгохын тулд зүсээ хувирган айлчилдаг байсан бөгөөд үндэсний хямралын үед зарим нь бүр тулааны талбар дээр очдог байв. Хэдийгээр ийм эзэн хаад олон байгаагүй ч үнэхээр зарим нь ийм байсан. Зарим хүний хэлдгээр юу ч хийдэггүй, эсвэл маш багыг хийдэг эзэн хаад байсан ч тэд маш цөөхөн байсан. Ямар ч зөв зүйтэй үйл ажиллагаанд оролцдоггүй хэр нь зөвхөн хамгийн сайныг нь эдлэхийг мөрөөддөг хүн зүгээр л хий хоосон мөрөөдөж байгаа хэрэг юм.

Олон хүн биеийн хүчний ажилд хүч хөдөлмөрөө зарахыг нэр хүндгүй зүйл гэж үргэлж боддог. Энэ үзэл бодол зөв үү? Түүнчлэн ийм хүч хөдөлмөрийг хөдөлмөрлөж үйлчлэх явдал гэж үздэг, чуулганы ажил хийж буй удирдагч, ажилчид л үүргээ гүйцэтгэж байна гэж итгэдэг хүмүүс бас байдаг—ийм ойлголт зөв үү? (Үгүй.) Чи энэ асуудлыг дараах байдлаар ойлгох ёстой: Бурханы хүмүүсээс хийхийг шаарддаг бүх зүйл, Бурханы гэр дэх бүх төрлийн ажил бол хүмүүсийн хийх шаардлагатай зүйлс юм—эдгээр нь бүгд хүмүүсийн үүрэгт тооцогддог. Хүмүүс ямар ч ажил хийсэн, энэ нь тэдний гүйцэтгэх ёстой үүрэг юм. Үүрэг нь маш өргөн хүрээг хамарч, олон салбарыг хамаарах боловч чи ямар ч үүрэг гүйцэтгэсэн, энгийнээр хэлбэл, энэ нь чиний үүрэг хариуцлага, чиний хийх ёстой зүйл юм. Чи үүнийг зүрх сэтгэлээсээ сайн гүйцэтгэж л байвал Бурхан чамайг сайшааж, Бурханд чин сэтгэлээсээ итгэдэг хүн гэж хүлээн зөвшөөрнө. Чи хэн ч байсан хамаагүй, үүргээсээ үргэлж зайлсхийх, эсвэл зугтахыг оролддог бол энэ нь асуудалтай. Зөөлнөөр хэлбэл, чи хэтэрхий залхуу, хэтэрхий зальтай, чи хойрго, тав тухтай байдалд дуртай бөгөөд хөдөлмөрлөхийг жигшдэг. Арай нухацтайгаар хэлбэл, чи үүргээ гүйцэтгэх хүсэлгүй, чамд бүхнээ зориулдаг, дуулгавартай байдал огт алга. Хэрвээ чи биеийн хүч шаардсан ажлыг ч үүрч чадахгүй юм бол юу хийж чадах юм бэ? Чи юуг зохих ёсоор хийж чадах вэ? Хэрвээ хүн үүргийнхээ тал дээр үнэхээр бүхнээ зориулдаг, хариуцлагын мэдрэмжтэй бол Бурхан шаардаж байгаа цагт, Бурханы гэрт хэрэгтэй байгаа цагт тэд өөрсдийн сонголтыг хийлгүйгээр шаардсан бүхнийг хийх болно. Өөрийн хийж чадах, хийх ёстой зүйлээ сайн хийж, үүрэх нь үүргээ гүйцэтгэх зарчмуудын нэг биш гэж үү? (Мөн.) Гадаа биеийн хүчний ажил хийдэг зарим хүн үүнтэй санал нийлэхгүй, “Та нар өдөржин нар, салхинаас хамгаалагдсан өрөөндөө үүргээ гүйцэтгэдэг. Үүнд ямар ч хатуу бэрх зүйл байхгүй, та нарын үүрэг биднийхээс хамаагүй хөнгөн. Бидний оронд өөрсдийгөө тавиад үз дээ, та нар гадаа хэдэн цагаар, салхи бороонд ажиллаж тэсэх нь үү, харъя” гэж хэлдэг. Үнэндээ үүрэг бүрд тодорхой хэмжээний хатуу бэрх зүйл байдаг. Биеийн хүчний ажилд махан биеийн хатуу бэрх, оюуны хөдөлмөрт оюуны бэрхшээл хамаарна; тус бүрдээ өөрийн гэсэн бэрхшээлтэй. Бүх зүйлийг хийхээс хэлэх нь амархан байдаг. Хүмүүс үнэхээр ямар нэгэн ажил барьж авах үед нэн чухал зүйл бол нэг талаар тэдний зан араншин, нөгөө талаар тэд үнэнийг хайрладаг эсэх явдал юм. Эхлээд зан араншны талаар ярилцъя. Хэрвээ хүн сайн зан араншинтай бол бүх зүйлийн эерэг талыг хардаг, аливааг эерэг өнцгөөс, үнэнд суурилан хүлээн авч, ухамсарлаж чаддаг; өөрөөр хэлбэл, тэдний зүрх сэтгэл, зан араншин, сүнс нь шулуун шударга байдаг—энэ бол зан араншингийн өнцгөөс харсан хэрэг. Дараа нь өөр нэг талын талаар ярилцъя—хүн үнэнийг хайрладаг эсэх. Үнэнийг хайрлах гэдэг нь үнэнийг хүлээн авч чаддаг байхыг хэлдэг, өөрөөр хэлбэл, чи Бурханы үгийг ухамсарладаг эсэх, Бурханы санаа зорилгыг ойлгодог эсэхээс үл хамааран, тухайн ажил, гүйцэтгэх ёстой үүргийнхээ талаарх үзэл бодол, санал, харах өнцөг чинь үнэнд нийцдэг эсэхээс үл хамааран, чи үүнийг Бурханаас хүлээн авч чаддаг байх явдал юм; хэрвээ чи дуулгавартай, чин сэтгэлээсээ ханддаг бол энэ нь хангалттай, үүргээ гүйцэтгэх шалгуурыг чи хангаж байгаа хэрэг бөгөөд энэ нь хамгийн наад захын шаардлага юм. Хэрвээ чи дуулгавартай, чин сэтгэлээсээ ханддаг бол ажил хийх үедээ хааш яаш хандахгүй, ов мэхтэйгээр назгайрахгүй, харин бүхий л зүрх сэтгэл, хүч чадлаа зориулах болно. Хэрвээ хүний дотоод байдал нь буруу, сөрөг байдалтай болбол тэд эрч хүчээ алдаж, хааш яаш хандахыг хүснэ. Хэрвээ тэд өөрсдийнх нь байдал зөв биш гэдгийг зүрх сэтгэлдээ маш сайн мэддэг хэр нь үнэнийг эрж хайх замаар үүнийг шийдвэрлэхийг оролддоггүй бол ийм төрлийн хүн үнэнийг огт хайрладаггүй—тэд үүргээ гүйцэтгэх өчүүхэн төдий л хүсэлтэй байдаг ч ямар ч хүчин чармайлт гаргахыг, эсвэл хатуу бэрхийг туулахыг хүсдэггүй, үргэлж ов мэхтэйгээр назгайрахыг оролдож байдаг. Үнэндээ Бурхан энэ бүхнийг аль хэдийн шинжсэн—тэгвэл яагаад Тэр энэ хүмүүст анхаарал хандуулдаггүй вэ? Бурхан Өөрийнх нь сонгосон хүмүүс сэрж, тэр хүмүүсийг ялган таньж, ил болгоод, таягдан хаяхыг л хүлээж байдаг. Гэсэн хэдий ч ийм хүмүүс дотроо “Намайг ямар ухаантайг хараач. Бид адилхан хоол иддэг ч, ажилласныхаа дараа та нар бүрмөсөн ядарч туйлддаг, харин би огт ядардаггүй. Би л ухаантай нь. Би тэгж их шаргуу ажилладаггүй; шаргуу ажилладаг хэн боловч тэнэг” гэж бодсоор байдаг. Тэд үнэнч шударга хүмүүсийг ингэж үзэх нь зөв үү? Үгүй. Үнэндээ үүргээ гүйцэтгэхдээ шаргуу ажилладаг хүмүүс үнэнийг хэрэгжүүлж, Бурханыг хангалуун байлгаж байдаг тул тэд хамгийн ухаантай хүмүүс юм. Юу тэднийг ухаантай болгодог вэ? Тэд: “Бурханы надаас шаардаагүй юуг ч би хийдэггүй, харин Түүний шаардсан бүхнийг би хийдэг. Тэр юу ч шаардсан, би зүрх сэтгэл, бүхий л эрч хүчээ зориулдаг бөгөөд огтхон ч аргацаадаггүй. Би үүнийг ямар нэг хүний төлөө хийж байгаа юм биш, Бурханы төлөө хийж байна. Бурхан намайг маш их хайрладаг; би Бурханыг хангалуун байлгахын тулд үүнийг хийх ёстой” гэж хэлдэг. Энэ бол зөв сэтгэлгээ юм. Үүний үр дүнд чуулган хүмүүсийг цэвэрлэх үед үүргээ гүйцэтгэхдээ заль мэх гаргадаг хүмүүсийг бүгдийг нь таягдан хаядаг бол Бурханы шинжилтийг хүлээн авдаг тэрхүү үнэнч шударга хүмүүс нь үлддэг. Тэрхүү үнэнч шударга хүмүүсийн байдал тасралтгүй сайжирч, тэдэнд тохиолдсон бүх зүйлд Бурхан тэднийг хамгаалдаг. Тэгвэл юу тэдэнд энэ хамгаалалтыг авчирдаг вэ? Учир нь тэд зүрх сэтгэлдээ үнэнч шударга байдаг. Тэд үүргээ гүйцэтгэхдээ хатуу бэрхээс, ядрахаас айдаггүй, өөрсдөд нь даалгасан юуг ч шилж сонгодоггүй; тэд яагаад гэж асуудаггүй, зүгээр л хэлсний дагуу хийдэг, тэд юуг ч шинжиж, задлан шинжлэхгүйгээр, мөн ямар ч нэмэлт зүйл бодолцохгүйгээр дуулгавартай дагадаг. Тэдэнд ямар ч тооцоо байдаггүй, бүх зүйлд дуулгавартай байж чаддаг. Тэдний дотоод байдал үргэлж маш хэвийн байдаг. Аюул тулгарах үед Бурхан тэднийг хамгаалдаг, өвчин эмгэг, тахал нүүрлэх үед ч Бурхан тэднийг хамгаалдаг, ирээдүйд тэд зөвхөн ерөөл хүртэнэ. Зарим хүн энэ асуудлыг нэвт харж ердөө ч чаддаггүй. Үнэнч шударга хүмүүс үүргээ гүйцэтгэхдээ хатуу бэрхийг, ядарч туйлдахыг дуртайяа туулж байгааг хараад тэд эдгээр үнэнч шударга хүнийг тэнэг гэж боддог. Надад хэл дээ, энэ тэнэг хэрэг үү? Энэ бол чин сэтгэл, энэ бол жинхэнэ итгэл. Жинхэнэ итгэлгүйгээр хүн хэзээ ч үнэхээр ойлгож, эсвэл тайлбарлаж чадахгүй олон зүйл байдаг. Зөвхөн үнэнийг ойлгодог, Бурханы өмнө үргэлж амьдарч, Түүнтэй хэвийн харилцаатай байдаг, мөн Бурханыг үнэхээр дуулгавартай дагаж, Бурханаас чин сэтгэлээсээ эмээдэг хүмүүс л юу болоод байгааг зүрх сэтгэлдээ хамгийн тодорхой мэддэг. Яагаад бусад нь мэдэхгүй байхад тэд мэддэг вэ? Энэ нь тэд үнэнийг хэрэгжүүлж, үнэнч шударга хүн байх замаар туршлага олж авдгаас үүдэлтэй. Энэ туршлагыг ямар ч хүн өгч чадахгүй, хэн ч хулгайлж, булааж авч чадахгүй. Энэ нь ерөөл биш гэж үү? Ийм ерөөлийг эгэл хүмүүс олж авч чадахгүй. Тэгвэл яагаад ийм байдаг вэ? Учир нь хүмүүс хэтэрхий ов мэхтэй, хорон муу байдаг; тэд үнэнч шударга байдалтай болж чаддаггүй, үнэнч шударга хүн байж чаддаггүй, тэдэнд чин зүрх сэтгэл байдаггүй тул тэдний хүлээн авдаг зүйл хязгаарлагдмал байдаг. Антихристүүдийн хувьд бол тэдгээрийг бүр дурдахын ч хэрэггүй. Төрөл бүрийн асуудалд хандах хандлага, түүнчлэн уг чанар-мөн чанарт нь үндэслэн, ялангуяа Христэд хандах хандлагад нь үндэслэн үзвэл антихристүүд шиг хүмүүс энэ ерөөлийг хэзээ ч хүртэхгүй. Яагаад тэр вэ? Учир нь тэдний зүрх сэтгэл хэтэрхий хорон муу, зальжин! Тэд хүнээс нь шалтгаалж хүмүүст өөр өөрөөр ханддаг, хамелеон шиг өнгөө хувиргадаг, бодол санаа нь үргэлж гүйж, туулайг харахаас нааш шонхроо тавьдаггүй, Бурханд чин сэтгэлээсээ ханддаггүй, Түүнд огт дуулгавартай байдаггүй, Түүнтэй зөвхөн наймаацдаг. Ийм хандлага, мөн чанарын үр дагавар юу вэ? Энэ нь, ямар ч асуудал дээр тэд янз бүрийн хүмүүс, нөхцөл байдлын мөн чанарыг, түүнчлэн эдгээр нөхцөл байдалд хамаарах үнэнийг нэвт харж, эсвэл ойлгож чаддаггүй явдал юм. Бурханы үг тэдний өмнө дэлгээстэй, тэд боловсролтой, уншиж, задлан шинжилж мэддэг, саруул ухаантай, хэрхэн шинжихийг мэддэг байтал яагаад ойлгож чаддаггүй юм бэ? Тэд хэчнээн өндөр насалсан ч, бүр 80 хүрсэн ч ойлгохгүй л байх болно. Яагаад тэд ойлгохгүй вэ? Хамгийн чухал шалтгаан нь тэдний нүд нь боолттой байдаг. Зарим хүн: “Гэхдээ бид тэдний нүд халхлагдсан байхыг хараагүй шүү дээ” гэж хэлдэг. Тэдний зүрх сэтгэл нь халхлагдсан байдаг. Халхлагдсан гэдэг нь юу гэсэн үг вэ? Энэ нь тэдний зүрх сэтгэл гэгээрээгүй; тэд үүрд манантсан байдаг гэсэн үг юм. Өмнө нь “хүмүүсийн зүрх сэтгэл хатуурсан” гэж хэлдэг байсан. Тэгвэл антихристүүдийн зүрх сэтгэлийг хэн хатууруулсан бэ? Үнэндээ Бурхан л тэднийг гэгээрүүлээгүй юм. Тэр тэднийг төгс болгох, эсвэл аврах бодолгүй байдаг. Тэр ердөө л тохиромжтой үед, эгзэгтэй, чухал мөчид хөндлөнгөөс оролцож, тэднийг бага зэрэг тогтоон барьж, Бурханы гэрийн эрх ашгийг хохироохоос сэргийлдэг. Гэвч ихэнхдээ Бурханы үг, үнэн, Түүнийг дуулгавартай дагах, өөрсдийгөө танин мэдэх, Түүнийг танин мэдэх асуудал дээр Тэр тэднийг хэзээ ч гэгээрүүлдэггүй. Зарим хүн: “Энэ чинь буруу. Тэр тэднийг гэгээрүүлдэггүй гэж Та яаж хэлж чадаж байна аа? Антихрист гэж тодорхойлогдсон зарим хүн маш ухаантай. Номлол сонссоныхоо дараа, чи гурван цаг ярьсан бол тэд зургаан цаг ярьж чаддаг. Энэ чинь гэгээрэл биш гэж үү?” хэмээн хэлж магадгүй. Тэд хэчнээн олон цаг ярьж чаддаг байсан ч, бүр 30 цаг байсан ч энэ нь ердөө л баахан бичиг үсэг, хоосон сургаал юм. Фарисайчууд болон хуулийн багш нар энэ хүмүүсээс илүү сайн ярьж чаддаг байсан уу? Хүн нэг бүр нь номлохдоо гаргууд байсан бөгөөд хүн бүр уран яруу ярьдаг байсан ч энэ нь ямар хэрэгтэй байсан бэ? Бурханыг ирэх үед тэд Түүнийг эсэргүүцэж, ялласан хэвээр байв. Энэ нь тэдэнд юу авчирсан бэ? Энэ нь тэдэнд сүйрэл, мөхөл, агуу гамшиг авчирсан. Гаднаас нь харахад Бурханы гэр дэх хүн бүр үүргээ гүйцэтгэж байгаа мэт харагддаг бөгөөд хүн бүр өдөрт гурван удаа хооллож, өдөр нь үүргээ гүйцэтгэж, шөнө нь амардаг. Гэсэн хэдий ч хэдэн жилийн дараа янз бүрийн хүмүүсийн хоорондох ялгаа мэдэгдэхүйц болж, өөр өөр төрлийн хүмүүсийн төгсгөл илчлэгдэж, ялгардаг. Зарим хүн Бурханд итгэдэг гэж амаараа тунхагладаг боловч зөв замаар явдаггүй, харин там руу яардаг. Бусад нь үнэнийг хайрлаж, түүний төлөө тасралтгүй чармайдаг тул аажмаар үнэн-бодит байдалд ордог. Зарим нь үргэлж тав тухтай амьдрахыг хүсэж, үүргээ гүйцэтгэхдээ улам бүр зальжин болж, эцэст нь таягдан хаягддаг. Зарим нь үнэнийг хүлээн авч, зүрх сэтгэлдээ улам бүр үнэнч шударга болж, амь зан чанартаа өөрчлөлтийг мэдэрч, Бурхан болон хүмүүсийн аль алинд нь хайрлагддаг болдог. Зарим нь үргэлж бичиг үсэг, хоосон сургаал номлоход анхаардаг бөгөөд тэр бүх номлолынхоо дараа Бурханд жигшин гологдож, улмаар сүйрдэг. Зарим нь сүнслэг ойлголтгүй байдаг бөгөөд номлол сонсох тусмаа улам бүр төөрөлдөж, үнэнийг сонирхох нь багасаж, дуулгавартай байх нь багасаж, дураараа, зоргоороо авирлахыг хүсэж, үргэлж өөрсдийн хүслийг хангахаар эрэлхийлж, нэр хүнд, ашиг хонжоо, байр суурийн төлөө зүтгэдэг—энэ нь аюултай. Зарим хүн Бурханыг хэдэн жил дагаж, Бурханы үгийг идэж ууж, олон зүйлийг туулсныхаа дараа олон үнэнийг ойлгож, Бурханд итгэх итгэл нь улам бүр нэмэгдэж, Түүний сайшаалыг олж авдаг. Энэ хүмүүс бүгд Бурханд итгэж, чуулганы амьдралаар амьдарч, үүргээ гүйцэтгэдэг байтал найм юм уу арван жилийн дараа яагаад үр дүн нь өөр өөр байж, хүн нэг бүр өөрийн төрлийн дагуу байдаг вэ? Энэ нь юуг харуулж байна вэ? Хүмүүсийн уг чанар-мөн чанарт ялгаа байдаг бус уу? (Тийм.)

Та нар өөр нэг хэрэг явдлыг сонсоод, бидний ярилцсан антихристүүдийн илрэлийн аль ангилалд хамаарахыг бодож үзээрэй. Зарим чуулганд дарангуйлж, эрүүл ухаангүй авирладаг илэрхий ёрын муу хүмүүс байдаг. Тэд ямар ч бодитой ажил хийж чаддаггүй атлаа эрх мэдлийг гартаа авахыг үргэлж хүсдэг. Тэд ямар ч ажил хариуцсан үймээн дэгдээж, сүйтгэдэг, зарчмыг баримталдаггүй, мөн ямар ч зүйл хийсэн хэзээ ч төлөөс төлөхийг хүсдэггүй атлаа бусдыг өөрийнхөө үгэнд оруулахыг үргэлж хүсдэг. Товчхондоо, ийм хүн чуулганд байсан цагт өөр олон хүн тэднээс болоод үймэрч, Бурханы гэрийн ажил болон чуулганы дэг журамд нөлөөлж, хохирол учруулна. Хэдийгээр ийм хүмүүс асар их муу үйлийг ил тодоор хийгээгүй, эсвэл ах эгч нарыг хорлоогүй ч, тэдний хүн чанар, мөн чанар, янз бүрийн асуудлын талаарх үзэл бодол, түүнчлэн ах эгч нар, Бурханы гэрийн ажил болон үүрэгтээ хандах хандлагыг нь харвал тэд цэвэр ёрын муу хүмүүсийн эгнээнд багтдаг. Ах эгч нарыг анзаарахаас өмнө Би ийм хүнтэй таарвал хэрхэн зохицуулах ёстой вэ? Би тэднийг ноцтой алдаа гаргах юм уу асар их гамшиг тарих хүртэл нь хүлээгээд, дараа нь цэвэрлэж, “шуугиан дэгдээх” үед нь явуулах ёстой юу? Тэгэх шаардлагатай юу? (Үгүй.) Тэгвэл Би яах ёстой вэ? Хамгийн наад зах нь, Би тэднийг үүргээс нь чөлөөлөх ёстой. Дараа нь, бусдад нөлөөлөхөөс сэргийлэхийн тулд үүрэг гүйцэтгэхийг нь болиулж, тэднийг тусгаарлах юм уу зайлуулах ёстой. Бурханы гэрийн амин чухал ажилд ийм ёрын муу хүмүүс байхыг зөвшөөрдөггүй—энэ зарчим зөв үү? Хэрвээ тэд илчлэгдээгүй бол яах ч аргагүй, харин тэд илчлэгдэж, илэрхий харагдаж, ёрын муу хүмүүс гэж тодорхойлогдмогц тэднийг цэвэрлэх нь зөв үү? (Тийм.) Зарим хүн: “Тэгж болохгүй. Чи тэднийг нэвт харсан ч бусад нь хараагүй байна. Тэднийг цэвэрлэх нь бусад хүнд нөлөөлнө. Хэрвээ чи тэднийг нэвт харсан болохоороо л цэвэрлэчихвэл, чи ганцаараа шийдвэр гаргаж байна гэсэн үг биш үү? Энэ нь үнэхээр үнэн эрх барьж байгаа хэрэг үү? Бид ах эгч нартай цугларч, нөхөрлөн, тэдэнтэй хамт задлан шинжилж, тэдэн дээр үзэл санааны ажил хийж, материал бүрдүүлээд, хүн бүрийн зөвшөөрлийг авсныхаа дараа л үргэлжлүүлэх ёстой. Чи дүрэм журмыг дагах хэрэгтэй, хэрвээ тэгэхгүй бол чи чуулганы ажлын зохицуулалтыг зөрчиж байгаа хэрэг биш үү? Тэгвэл буруу болох биш үү? Чи өөрөө эхлээд чуулганы ажлын зохицуулалтыг дагаж мөрдөх ёстой; чи тэдгээрийг бусниулж болохгүй. Түүнээс гадна, юу ч байсан хамаагүй, бүх зүйлийг ах эгч нарыг бодолцсоны үндсэн дээр хийдэг биш гэж үү? Нэгэнт тийм болохоор, чи бүх ах эгч нарт үүнийг бүрэн ухамсарлуулж, үнэний энэ талын талаар тодорхой ойлгуулах хэрэгтэй. Чи тэднийг будилсан чигээр нь орхиж болохгүй; бүх ах эгч нарыг ялган таних чадвартай болгох хэрэгтэй” гэж хэлж магадгүй. Хэрвээ эдгээр дүрэм журмыг дагахгүйгээр хэн нэгнийг цэвэрлэ гэж Намайг хэлбэл та нар яах байсан бэ? Та нар алмайрах байсан биз дээ? Та нар гацаанд орно гэдэг нь та нарын дунд ийм үзэл бодол байдгийг баталж байна. Миний ярьж байгаа зүйл үнэхээр болж байсан. Амин чухал ажлын орчинд, хүн чанар муутай нэг диавол байсан, тэрээр үүргээ гүйцэтгэхдээ ов мэх гарган назгайрч, хатуу бэрхээс, ядрахаас зайлсхийхийг оролддог байв. Тэр алхам тутамдаа чуулганы ажилд саад болж, үймүүлдэг байсан бөгөөд засуулах үедээ дураараа авирлаж, үнэнийг бүрмөсөн няцаадаг байлаа. Тэр үргэлж албан тушаал хашиж, эрх мэдэлтэй байхын зэрэгцээ бусдад тушаахыг хүсдэг, чуулганы эрх ашгийг хэзээ ч бодолцдоггүй, зарчмыг баримталдаггүй, зөвхөн өөрийн хүсэл сонирхолд тулгуурлан үйлддэг байв. Ажил хариуцаж байх хугацаандаа тэр Миний даалгасан хэд хэдэн зүйлийг үл тоомсорлож, Миний үгийг чихнийхээ хажуугаар өнгөрөөсөн. Тэр даалгавраа биелүүлэхгүй байгаад зогсохгүй үймээн дэгдээсэн. Чуулган бол үүргээ гүйцэтгэх ажлын чухал газар—хэрвээ тэр үүргээ гүйцэтгэхээр биш, харин ханхүү шиг тав тухтай амьдрах, эсвэл эрт тэтгэвэрт гарах гэж ирсэн гэж бодсон бол эндүүрчээ. Бурханы гэр бол халамжийн байгууллага биш, хоргодох газар ч биш. Энэ хүн шиг ийм адгийн шаарнууд хаашаа ч явсан ямар ч нэмэргүй; тэд аль ч үүрэгтээ хэзээ ч үнэнч байдаггүй, үргэлж хааш яаш хандаж, зүгээр л урсгалаараа хөвж явдаг. Тиймээс Би түүнийг даруй зайлуул гэж хэлсэн. Үүнийг хэрэгжүүлэхэд амархан байх байсан уу? (Тийм.) Гэсэн хэдий ч, тодорхой төрлийн хүний хувьд ийм энгийн зүйлийг ч хэрэгжүүлэхэд хэцүү байдаг. Намайг дуугарснаас хойш гурван сарын дараа л энэ ёрын муу хүнийг эцэст нь хүчээр явуулсан. Үүний шалтгаан нь юу байсан бэ? Намайг энэ хүнийг зайлуулах тушаал гаргасны дараа, тухайн чуулганы удирдагч уг даалгаврыг “хэрэгжүүлж” эхэлсэн. Тэр үүнийг хэрхэн хэрэгжүүлсэн бэ? Тэр тухайн шийдвэрийн талаар хүн бүрээс санал авахаар цуглаан зарласан. Ихээхэн хэлэлцсэний эцэст олонх нь түүнийг зайлуулахыг зөвшөөрсөн боловч нэг хүн эсрэг санал өгсөн тул уг асуудлыг хойшлуулсан. Энэ удирдагч, санал нийлээгүй тэр хүн дээр ажиллаж, түүнтэй ярилцан, зөвшөөрлийг нь авах хэрэгтэй гэж хэлсэн. Тэр хооронд Би тэр хүнийг явуулсан эсэхийг хоёр ч удаа асуухад, удирдагч үгүй гэж хариулаад, материал цуглуулж, нэгтгэн дүгнэсээр байгаа гэсэн. Миний ар хударгаар тэр бас: “Ганцхан хүн санал нийлэхгүй л байвал бид түүнийг зайлуулж болохгүй” гэж хэлсэн. Тэр ингэж хэлсэн нь тэр хүнийг зайлуулахыг хүсээгүй тул ийм утгагүй шалтгаан олсон хэрэг байв. Үнэн хэрэгтээ тэр бусдыг мэхэлж байсан; энэ хүнийг гомдоох вий гэхээс айж, түүнийг зайлуулж зүрхлээгүй. Эцэст нь Дээрхээс ийм тулган шаардалт ирсэн: “Энэ хүнийг явуулах ёстой. Хэрвээ тэр явахгүй бол чи явах ёстой. Та хоёрын нэг нь явах ёстой; чи сонго!” Үүнийг сонсоод тэр: “Би явж чадахгүй; би байр сууриа хангалттай удаан эдлээгүй байна!” гэж бодсон. Тэр үед л энэхүү диаволыг тэр явуулсан. Надад хэл дээ, энэ удирдагч яагаад диаволыг хамгаалсан бэ? Энэ нь антихристийн арга барил биш гэж үү? Энэ бол яг л антихристийн зан авир юм.

Зарим хүн Бурханд итгэдэг гэдгээ байнга тунхагладаг боловч өөрт нь ямар нэг зүйл тохиолдох үед тэд ах эгч бүрийн санал бодлыг эрж хайдаг атлаа Христийн санал бодлыг хэзээ ч эрж хайдаггүй. Христ юу гэж хэлдгийг, Түүний дүгнэлт юу болохыг, Тэр яагаад энэ зүйлийг хийхийг хүсэж байгааг, эсвэл хүмүүс хэрхэн дуулгавартай дагах ёстойг тэд асууж сурагладаггүй. Тэд ах эгч бүрийн санал бодлыг эрж хайж, тэдний бүх санал бодол, бодол санааг хүндэтгэж чаддаг боловч Христийн хэлсэн ганц ч өгүүлбэрийг хүлээн авдаггүй, дуулгавартай дагах ямар ч санаа зорилго харуулдаггүй. Үүний уг чанар юу вэ? Тэд антихристүүд биш гэж үү? (Тийм.) Энэ нөхцөл байдалд юу болоод байна вэ? Яагаад тэд энэ хэргийг хэрэгжүүлдэггүй вэ? Яагаад тэдэнд үүнийг хэрэгжүүлэх ийм хэцүү байдаг вэ? Үүнд шалтгаан бий. Тэд: “Христэд үнэн болон бурханы мөн чанар байдаг, гэхдээ тэр бүхэн зүгээр л албан ёсны яриа, ердөө хоосон сургаал, уриа лоозон. Жинхэнэ бодит асуудал дээр чи хэнийг ч нэвт харж огт чаддаггүй. Чиний үг зүгээр л бидэнд сонсгох гэж хэлдэг, номд хэвлэгдсэн зүйл, чиний бодит чадавхтай огт хамаагүй. Тиймээс, хэрвээ чи хэн нэгнийг ёрын муу хүн, эсвэл антихрист гэж тодорхойлбол энэ нь үнэн зөв биш байж болно. Яагаад би түүнийг ёрын муу хүн, эсвэл антихрист гэдгийг анзаараагүй юм бэ? Яагаад би энэ хэргийг ойлгохгүй байна вэ?” гэж боддог. Тэд ингэж боддог биш гэж үү? Тэд: “Чи энэ хүнтэй ердөө хоёр л удаа уулзаж, түүнийг хэдэн үг хэлж, ганц зүйл хийхийг нь харчхаад түүнийг ёрын муу гэж хэлж байна. Түүнийг тийм гэж ах эгч нар бодохгүй байна; чи яаж тэгж чадаж байна аа? Яагаад чиний үг тийм их жинтэй байх ёстой юм бэ? Би энэ хүнээс ямар ч муу үйл хараагүй, түүний ямар муу зүйл хийснийг ч мэдэхгүй, тиймээс би чиний хэлсэн зүйлд ‘Амен’ гэж хэлж чадахгүй. Чиний хийж байгаа зүйлийн талаар надад үзэл, эргэлзээ байна. Гэхдээ, үзэлтэй байсан ч би тэдгээрийг шууд илэрхийлж чадахгүй, тиймээс би шууд бус арга хэрэглэх хэрэгтэй болж байна: Би энэ хэргийг ах эгч нараар санал өгүүлж шийдүүлнэ. Хэрвээ ах эгч нар санал нийлэхгүй бол яах ч аргагүй—чи үнэхээр тэднийг бүгдийг нь бас засаж чадах юм уу? Түүнээс гадна, чи энэ хүнтэй хэдхэн удаа харилцчихаад түүнийг ёрын муу гэж тодорхойлж байна. Чи яагаад түүнд жаахан боломж олгож болохгүй гэж? Ах эгч нар хэчнээн хүлээцтэй, хайр энэрэлтэй байгааг хар л даа. Би муу хүн байж чадахгүй; би ч бас хайр энэрэлтэй байж, хүмүүст боломж олгох ёстой—хүмүүст тэгж яаран дүгнэлт хийдэг чам шиг биш. Хэн нэгнийг зайлуулах тийм ч хялбар биш—тэр хүн дараа нь сул дорой болчихвол яах вэ? Асуудалтай тулгарах үед христ ах эгч нарыг хамгаалах ёстой. Тэр ах эгч нарын аливаа мунхаг, тэрслүү байдал, эсвэл мэдлэггүй байдлыг тэвчих ёстой, тийм шийдэмгий, хайр энэрэлгүй байж болохгүй. Бурхан асар өршөөнгүй байх ёстой биш билүү? Тэр өршөөл хаашаа алга болчихсон юм бэ? Дургүй хүнээ ёрын муу гэж тодорхойлоод, явуулахыг хүсэх нь дүрэм журамд огт нийцэхгүй байна!” гэж боддог. Эдгээр нь үзэл мөн биз дээ? (Тийм.) Христ ямар нэг зүйл хийх юм уу шийдвэр гаргах үед тэд санал нийлэхгүй бол үүнийг хэрэгжүүлэхэд хэцүү болдог. Тэд хойш сууж, янз бүрийн шалтаг, арга хэрэглэн эсэргүүцдэг; тэд зүгээр л үүнийг хэрэгжүүлэхээс, эсвэл дуулгавартай дагахаас татгалздаг. Тэдний санаа зорилго бол: “Хэрвээ би үүнийг хэрэгжүүлэхгүй бол чиний даалгавар биелэхгүй!” гэдэг. Би та нарт хэлье, хэрвээ чи үүнийг хэрэгжүүлэхгүй бол Би хэрэгжүүлж чадах хэн нэгнийг олоод удирдагч болгоно, тэгээд чи ирсэн газар руугаа буцаж болно! Энэ хэргийг ингэж зохицуулах ёстой биш гэж үү? (Тийм.) Би тэднийг яг л тэгж, шууд бөгөөд үр дүнтэйгээр явуулсан—хэнтэй ч зөвлөлдөх шаардлага байгаагүй.

Зарим хүн үнэнийг хэзээ ч ойлгодоггүй, Бурханы үгэнд үргэлж эргэлздэг. Тэд: “Үнэн эрх барина гэдэг нь христ эрх барихтай адилхан уу? Христэд хүний тал байдаг учраас түүний үг үргэлж зөв байх албагүй” гэж хэлдэг. Тэд Христ эрх барихыг хүлээн авч чаддаггүй. Бурханы Сүнс эрх барьж байсан бол тэдэнд ямар ч үзэл байхгүй байх байсан. Энд ямар асуудал байна вэ? Ийм хүмүүс тэнгэр дэх Бурханд өчүүхэн төдий ч эргэлздэггүй боловч бие махбодтой болсон Бурханд үргэлж эргэлздэг. Христ маш их үнэнийг илэрхийлсэн байтал тэд Түүнийг бие махбодтой болсон Бурхан гэж хүлээн зөвшөөрдөггүй. Тэгвэл тэд Христийг үнэн, зам, амь мөн гэдгийг хүлээн зөвшөөрч чадах уу? Үүнийг хэлэхэд хэцүү. Ийм хүмүүс Христийг дагалаа ч гэсэн Түүнийг гэрчилж чадах уу? Тэд Христтэй нийцтэй байдаг уу? Эдгээр асуултад ямар нэгэн тодорхой хариулт алга. Ийм хүмүүс замын төгсгөл хүртэл явж чадах эсэх нь бас тодорхойгүй. Зарим хүн Бурханы гэрт үнэн эрх барьдаг гэдгийг зүрх сэтгэлдээ бүрэн хүлээн зөвшөөрдөг. Гэхдээ тэд үнэн эрх барьж буйг хэрхэн ойлгодог вэ? Ямар ч ажил хийсэн бай, Бурханы гэртэй холбоотой л бол хүн бүр хамтдаа хэлэлцэж, шийдвэр гаргах ёстой гэж тэд боддог. Зөвшилцөлд хүрсэн цагт, үр дүн нь ямар ч байсан хэрэгжүүлэх ёстой. Үнэн эрх барина гэж үүнийг хэлнэ гэж тэд итгэдэг. Энэ үзэл бодол зөв үү? Энэ бол ноцтой төөрөгдөл; энэ бол хамгийн утгагүй, ор үндэсгүй үг юм. Үнэн хаанаас ирдэг вэ? Үүнийг Христ илэрхийлдэг. Зөвхөн Христ л үнэн бөгөөд завхарсан хүн төрөлхтөнд ямар ч үнэн огт байдаггүй байтал хүмүүс хэлэлцээд үнэнийг гаргаж ирж яаж чадах юм бэ? Хэрвээ хүмүүс хэлэлцээд үнэнийг гаргаж ирж чаддаг байсан бол завхарсан хүн төрөлхтөн үнэнийг эзэмшдэг гэсэн үг болно. Энэ бол хамгийн утгагүй зүйл биш гэж үү? Тиймээс, үнэн эрх барина гэдэг нь Христ эрх барихыг, Бурханы үг эрх барихыг хэлж байгаа болохоос хүн бүр эрх мэдэлтэй байх, эсвэл үг хэлэх эрхтэй байхыг хэлдэггүй. Хамтдаа цугларч үнэн болон Бурханы үгийн талаар нөхөрлөх нь зөв; энэ бол чуулганы амьдрал юм. Гэхдээ ийм маягаар хэрэгжүүлэхийн үр дүн нь юу вэ? Энэ нь хүн бүрд үнэнийг ойлгуулж, Бурханы үгийг мэдүүлж, хүн бүрийг Бурханы үгийг дуулгавартай дагаж, түүний дагуу ажиллаж чаддаг болгохын тулд юм. Хүмүүс үнэнийг ойлгодоггүй учраас л үнэний талаар нөхөрлөхөөр цуглардаг. Хэрвээ тэд үнэнийг ойлгодог байсан бол Христийг болон Бурханы үгийг шууд дуулгавартай дагаж чадах байсан; тэр нь жинхэнэ дуулгавартай байдал байх байсан. Хэзээ нэгэн цагт Бурханы сонгосон хүмүүс бүгд үнэнийг ойлгож, бүгд Христийг шууд дуулгавартай дагаж, Түүнийг өргөмжилж, гэрчилж чаддаг болбол энэ нь Бурханы сонгосон хүмүүс бүрэн төгс болгуулсныг илтгэнэ. Бүр цаашлаад, энэ нь Бурханы гэрт үнэн, Христ ноёрхдогийг гэрчлэх болно. Зөвхөн ийм баримт, гэрчлэл л Бурхан газар дээр хаанчилсныг, Христийн хаанчлал илэрснийг батлах болно. Гэвч зарим антихрист болон хуурамч удирдагч үнэн эрх барихыг хэрхэн ойлгодог вэ? Тэдний хэрэгжүүлэлтээр бол үнэн эрх барина гэдэг нь ах эгч нар эрх барихыг хэлдэг. Тэд ямар ч ажил хийсэн бай, түүнийгээ бүрэн ойлгож чадвал өөрсдийн дураар хийдэг; хэрвээ чадахгүй бол хэдэн хүнтэй нөхөрлөөд, бүлгээрээ шийдвэрлэдэг. Энэ нь үнэнийг хэрэгжүүлж байгааг баталж чадах уу? Бүлгийн шийдвэр Бурханы санаа зорилгод заавал нийцдэг гэж үү? Ийм хэрэгжүүлэлт нь үнэн эрх барихад хүргэж чадах уу? Энэ нь Бурханы гэрт Христ эрх барьдгийг гэрчилж чадах уу? Тэд ах эгч нарт санал бодлоо илэрхийлэх, үзэл бодлоо хэлэлцэх боломж олгож, эцэст нь зөвшилцөлд хүрч, шийдвэр гаргахыг үнэн эрх барьж буй явдал гэж үздэг бөгөөд энэ нь ах эгч нарыг үнэний төлөөлөгч, үнэнтэй адил гэж битүүхэн хэлж байгаа хэрэг юм. Үүнийг ингэж ойлгох нь зөв үү? Мэдээж үгүй, гэхдээ зарим антихрист, хуурамч удирдагч үнэхээр ингэж авирлаж, ингэж хэрэгжүүлдэг. Тэд ингэснээрээ ардчиллыг хэрэгжүүлж байна, ардчилсан шийдвэр гаргаж байна, үнэнд нийцэх эсэхээс үл хамааран ингэж л хийх ёстой гэж боддог. Ингэж үйлдэхийн мөн чанар юу вэ? Ардчилсан байдлаар шийдсэн асуудал автоматаар үнэнд нийцдэг үү? Автоматаар Бурханыг төлөөлдөг үү? Хэрвээ ардчилал үнэн байсан бол Бурхан үнэнийг илэрхийлэх шаардлагагүй байх байсан; зүгээр л ардчиллаар эрх бариулахад хангалттай биш гэж үү? Завхарсан хүн төрөлхтөн ардчиллыг яаж ч хэрэгжүүллээ гэсэн, ардчиллыг хэрэгжүүлснээрээ үнэнийг гаргаж ирж чадахгүй. Үнэн Бурханаас, Христийн илэрхийллээс ирдэг. Хүний арга барил хүний санаа, эсвэл таашаалд хэчнээн нийцэж байлаа ч үнэнийг төлөөлж чадахгүй. Энэ бол баримт. Хуурамч удирдагчид болон антихристүүдийн арга барилын мөн чанар нь үнэн эрх барих нэрийдлээр Христийг бүрмөсөн хойш тавьж, Христийг ардчиллаар орлуулж, Христийн ноёрхлыг хамтын нөхөрлөл, ардчилал ноёрхдог арга барилаар орлуулах явдал юм. Үүний уг чанар, үр дагаврыг ялган танихад амархан уу? Гярхай хүмүүс үүнийг харж чадах ёстой. Хуурамч удирдагчид, антихристүүд бол Христийг дуулгавартай дагадаг хүмүүс биш, харин Түүнийг үгүйсгэж, эсэргүүцдэг хүмүүс юм. Христ чуулганд юу ч нөхөрлөлөө гэсэн, хүмүүс сонсож, ойлголоо ч үүнийг чихнийхээ хажуугаар өнгөрөх салхи мэт үзэж, хэрэгжүүлэхийг хүсдэггүй. Харин ч тэд хуурамч удирдагчид, антихристүүдийн хэлсэн зүйлд анхаарал хандуулдаг; эцэст нь тэдний үг л хүчинтэй байдаг. Хүмүүс Христийн үгийн дагуу хэрэгжүүлж чадах эсэх нь эдгээр хуурамч удирдагч, антихристийн шийдвэрээс шалтгаалдаг бөгөөд ихэнх хүн тэднийг дагах хандлагатай байдаг. Антихристүүд чуулганы ажилд хатуу хяналт тавьж, зөвхөн өөрсдөө шийдвэр гаргахыг зөвшөөрдөг, Бурханд үг хэлэх, эсвэл эрх барих боломж олгодоггүй. Тэд: “Христ зөвхөн ажил шалгах гэж л энд байгаа. Чи үгээ хэлж, ажлыг зохицуулж болно, харин үүнийг хэрхэн хэрэгжүүлэх нь бидний хэрэг. Бидний ажилд битгий хөндлөнгөөс оролц” гэж боддог. Антихристүүд ингэдэг биш гэж үү? Антихристүүд үргэлж “бүх ах эгч нөхөрлөсөн”, эсвэл “бүх ах эгч зөвшилцөлд хүрсэн” гэж хэлдэг—ийм зүйл хэлдэг хүмүүс үнэндээ үнэнийг ойлгодог уу? Ах эгч нар гэж хэн бэ? Тэд ердөө л Сатаны гүнзгий завхруулсан бүлэг хүн биш гэж үү? Тэд хэр их үнэнийг ойлгодог вэ, тэдэнд үнэн-бодит байдал хэр их байдаг вэ? Тэд Христийг төлөөлж чадах уу? Тэд үнэний биелэл мөн үү? Тэд үнэний төлөөлөгч байж чадах уу? Тэдэнд үнэнтэй ямар нэг хамаарал бий юу? (Үгүй.) Нэгэнт ямар ч хамааралгүй юм бол, ийм зүйл хэлдэг хүмүүс яагаад үргэлж ах эгч нарыг дээд зэргээр үздэг юм бэ? Яагаад тэд Бурханыг өргөмжилж, гэрчилдэггүй юм бэ? Яагаад тэд үнэний дагуу ярьж, үйлддэггүй юм бэ? Ингэж ярьдаг хүмүүс утгагүй хүмүүс биш гэж үү? Бурханы үгийг уншиж, номлол сонсоод олон жил болсон ч тэд ямар ч үнэнийг ойлгодоггүй, жинхэнэ ах эгч нар гэж хэн болохыг харж чаддаггүй. Тэд харалган биш гэж үү? Одоо бүгд төрөл төрлөөрөө ангилагдсан; олон хүн жинхэнэ дүр төрхөө харуулсан, тэд бүгд Сатаны төрлийнхөн—тэд бол цэвэр араатнууд. Та нар үүнийг тодорхой харж чадахгүй байна уу? Та нарт үнэн огт алга! Зарим хүн антихристүүдийг задлан шинжлэхийг минь сонсохыг хүсдэггүй. Тэд: “Өө, антихристүүд гэх мэт ийм ялихгүй зүйлийн талаар үргэлж битгий ярь л даа; ичмээр юм. Та яагаад үргэлж антихристүүдийг задлан шинжилж байдаг юм бэ?” гэж хэлдэг. Тэднийг задлан шинжлэхгүй байх нь зүгээр гэж үү? Хүмүүст ялган танихыг заахын тулд тэднийг ингэж задлан шинжлэх ёстой. Эс бөгөөс, антихристүүд гарч ирмэгцээ олон тэрс үзэл, төөрөгдөл гаргаж, олон хүнийг төөрөлдүүлж, тэр ч бүү хэл чуулганыг хяналтдаа оруулж, өөрсдийн бие даасан хаанчлалыг байгуулна. Энэ хэргийн үр дагавар хэчнээн ноцтой болохыг та нар тодорхой харж байна уу? Дөнгөж сая бид үнэн эрх барина гэж юу болох талаар нөхөрлөлөө. Нөхөрлөлөөр дамжуулан хүмүүс антихристүүдийн утгагүй арга барил, хөгийн үзэл бодлыг харсан. Антихристүүд үргэлж өөрсдөө эрх мэдлийг гартаа авахыг хүсдэг, Христ эрх бариасай гэж хүсдэггүй, тиймээс тэд үнэний ноёрхлыг ардчилсан хэлбэрт оруулж, бүх хүн асуудлыг хамтдаа зөвшилцөх нь үнэн эрх барьж байгаа хэрэг гэж сурталчилдаг. Үүнд Сатаны заль мэх байгаа биш гэж үү? Үнэн гэдэг нь хүн бүр хэлэлцээд хүрч чаддаг зүйл үү? Үнэнийг Бурхан илэрхийлдэг, Бурханаас эх сурвалжтай. Та нар яагаад Бурханы үгийг шууд хэрэгжүүлж, Бурханыг шууд дуулгавартай дагаж, Бурханы зохицуулалтыг шууд дуулгавартай дагаж чадахгүй байна вэ? Яагаад Христийн тушаалыг бүх хүнээр хэлэлцүүлж шийдвэрлэх ёстой гэж? Энэ нь Сатаны явуулга биш гэж үү? Антихристүүд хүмүүсийг төөрөлдүүлэхийн тулд ихэвчлэн хэдэн онол гаргадаг бөгөөд ямар ч ажлын даалгавар хэрэгжүүлсэн тэд эцсийн шийдвэрийг гаргаж, үнэн-зарчмыг бүхэлд нь зөрчдөг. Антихристүүдийн илрэлээс харвал тэдний зан чанар яг ямар вэ? Тэд эерэг зүйлийг хайрлаж, үнэнийг хайрладаг хүмүүс үү? Тэд Бурханд жинхэнээсээ дуулгавартай байдаг уу? (Үгүй.) Тэдний мөн чанар бол үнэнийг зэвүүцэж, үнэнийг үзэн яддаг мөн чанар юм. Түүнчлэн, тэд эрүүл ухаанаа алдталаа биеэ тоосон байдаг, хүмүүст байх ёстой наад захын мөс чанар, эрүүл ухаан ч тэдэнд байдаггүй. Ийм хүмүүсийг хүн гэж нэрлэхэд зохихгүй. Тэднийг зөвхөн Сатаны төрлийнхөн гэж л хэлж болно; тэд бол диаволууд. Үнэнийг өчүүхэн төдий ч хүлээн авдаггүй хэн боловч диавол—энэ бол ямар ч эргэлзээгүй зүйл.

Христийн үгэнд даруу ч биш, биеэ тоосон ч биш хандлагаар ханддаг зарим хүн бас байдаг. Тэд бүрэн дүүрэн хүлээн авч байгаагаа илэрхийлдэггүй, эсэргүүцдэг ч үгүй. Христийг ярьж, үнэнийг нөхөрлөж, хэн нэгнийг ялган таньж, эсвэл ажлын даалгавар өгөх үед өнгөн дээрээ тэд сонсож, тэмдэглэл хөтөлж байгаа мэт харагддаг бөгөөд нухацтай, хамтран ажиллаж байгаагаа харуулдаг. Тэд бүх зүйлийн талаар нямбай тэмдэглэл хөтөлж, янз бүрийн тэмдэглэгээ хийдэг бөгөөд үнэнийг ихэд сонирхож, Христийн хэлснийг өндрөөр үнэлж байгаа мэт, яг л үнэнийг онцгойлон хайрлаж, Христэд гуйвшгүй үнэнч мэт харагддаг. Гэвч ийм хүмүүсийн үнэнд хандах хандлага, зан чанар, мөн чанарыг ийм өнгөц үзэгдлээс харж болох уу? Болохгүй. Ийм хүмүүс гаднаа тэмдэглэл хөтөлж, сонсож байгаа мэт харагддаг ч зүрх сэтгэлдээ үнэндээ юу бодож байдаг вэ? Тэд тэмдэглэсэн зүйлээ хараад: “Энэ одоо юу вэ? Нэг ч хэрэгтэй өгүүлбэр алга, өндөр дээд, эсвэл үнэнтэй нийцсэн харагдах юу ч алга, надад логиктой санагдах зүйл ч алга. Зүгээр л урж хаясан нь дээр юм байна!” гэж боддог. Энэ нь нэг төрлийн хандлага биш гэж үү? Номлол сонсох зуураа толгой дохиж, нүүрэндээ янз бүрийн хувирал гаргаж, мөн тэмдэглэл хөтөлдөг олон хүнийг Би харж байсан боловч дараа нь тэд үүнийг огтхон ч нухацтай авч үздэггүй. Юу хэрэгжүүлэх ёстойгоо тэд санадаггүй, зүрх сэтгэлдээ хадгалдаггүй, үүний дагуу үйлддэг ч үгүй. Хэрэгжүүлэх ёстой зүйлээ хэрэгжүүлэх тухайд бол бүр ч бүтэхгүй. Тэдний хэрэгжүүлэх ёстой зүйл нь Бурханы гэрийн ажил болон үүрэгтэй нь холбоотой байдаг бөгөөд орох ёстой зүйл нь хувийнх нь оролттой хамаатай байдаг. Тэд хэрэгжүүлэх ёстой зүйлээ хэрэгжүүлдэггүй, хувийн оролтоо бүр ч нухацтай авч үздэггүй. Тэд: “Христийн хэлж, илэрхийлсэн өгүүлбэр бүр нь үнэн, энэ бол хүмүүсийн орох ёстой зүйл, энэ бүхэн нь үнэн, зам, амь гэж ярьдаг—гэхдээ удаа дараа миний тэмдэглэж авсан зүйлээс ямар ч үнэн, зам харагдахгүй байна, амь гэж мэдрэгдэх ч үгүй байна. Тэгэхээр христэд бурханы мөн чанар байдаг гэх үг яаж биелэх юм бэ? Энэ нь яаж хэрэгжих юм бэ? Миний харж байгаа зүйлтэй энэ нь яаж нийцэх юм бэ? Амархан нийцэхгүй л байна даа” гэж хэлдэг. Зарим хүн: “Хэрвээ сонссоны дараах хандлага нь ийм байдаг юм бол тэд яах гэж тэмдэглэл хөтөлсөн юм бэ? Тэд зөв зүйтэй, нухацтай, хариуцлагатай хандлагатай мэт харагдсан; юу болоод байна аа?” гэж хэлдэг. Ганцхан л шалтгаан бий. Хэрвээ үнэнийг хайрладаггүй, үнэнээс туйлын их зэвүүцдэг хүн Христийг ярих үед онцгойлон хичээнгүй, анхааралтай харагдаж байвал тэдний цорын ганц санаархал нь ердөө л хааш яаш аргацаах төдий болохоос жинхэнээсээ хүлээн авах биш юм. Тэд Бурханы үгийг унших, эсвэл Христтэй тааралдаж, Түүнтэй ярилцах бүрдээ Бурханы өндөр дээд, ойлгохын аргагүй, эсвэл гайхамшигтай гэгддэг байдлыг биш, харин Түүний бодит, хэвийн, шалихгүй байдлыг л мэдэрдэг. Тиймээс өөрсдийнх нь өнцөг, байр сууринаас үзвэл, энэ эгэл жирийн хүний үгийг үнэн, зам, амьтай холбох нь тэдний хувьд боломжгүй юм. Тэд энэ хүнийг яаж ч харсан зүгээр л хүн гэж хардаг; Түүнийг Бурхан, эсвэл Христ гэж үзэж чаддаггүй. Иймээс тэд эдгээр туйлын эгэл жирийн үгийг дагаж мөрдөх, хэрэгжүүлэх, амьдралын удирдамж, оршин тогтнох зорилго гэх мэтээр ашиглах үнэн гэж яавч үзэж чаддаггүй—энэ нь тэдний сэтгэлийг түгшээдэг. Тэд: “Яагаад надад эдгээр эгэл жирийн үгнээс ямар ч үнэн харагдахгүй байна вэ? Та нар яаж үүнийг харж чадаж байна аа? Эдгээр нь зүгээр л эгэл жирийн үг биш гэж үү? Эдгээр нь хүний хэл, хүний бичвэр, хүний хэл зүй, тэр ч байтугай хүний зарим хэллэг, үгсийн санг ашигласан, хүний зарим зүйр цэцэн үг, соёлын талыг задлан шинжилсэн байдаг. Эдгээр үг яаж үнэнийг агуулж чадах юм бэ? Яагаад надад харагдахгүй байна вэ? Та нар бүгдээрээ үүнийг үнэн гэж байгаа болохоор би зүгээр л даган дуурайж, бусдыг тоть шиг давтъя; бусад бүх хүн тэгж байгаа болохоор би тэмдэглэл хөтөлье, гэхдээ та нар бүгд түүнийг үнэн гэж үздэг байж болох ч би лавтай тэгэхгүй. ‘Үнэн’ гэдэг бол маш ариун үг, энэ нь туйлын өндөр дээд зүйл байх ёстой! Үнэний тухайд энэ нь бурхантай холбоотой, тэгээд бурхантай холбоотой үед энэ нь тийм эгэл жирийн, тийм шалихгүй, тийм жирийн байж таарахгүй. Тиймээс би яаж ч шинжиж, задлан шинжиллээ гэсэн түүнээс бурханы ямар ч ул мөр олж харахгүй байна. Хэрвээ түүнд бурханы ямар ч ул мөр байхгүй байгаа бол тэр биднийг яаж аврах юм бэ? Энэ бол боломжгүй. Хэрвээ түүний үг биднийг аварч, эсвэл бидэнд ашиг тусаа өгч чадахгүй юм бол бид яагаад түүнийг дагах ёстой гэж? Бид яагаад түүний үгийг хэрэгжүүлэх ёстой юм бэ? Бид яагаад түүний үгээр амьдрах ёстой гэж?” гэж хэлдэг. Одоо тэд антихристүүд гэдэг жинхэнэ дүр төрхөө харууллаа, тийм биш гэж үү? Тэд эхнээсээ дуустал, Бурханы махбод болсон биед шинжсэн хандлагаар хандсан. Бурханы үгэнд хандахдаа тэд хүлээн авдаггүй, бас дуулгавартай дагадаггүй, тэдгээрийг хэрэгжүүлж, туулдаг нь бүр ч үгүй. Харин ч тэд Бурханы үгэнд эсэргүүцсэн, сөргөлдсөн, татгалзсан хандлагаар ханддаг. Христ хүмүүстэй ярилцах үед тэд дурамжханаар хэдэн тэмдэглэл хөтөлдөг боловч зүрх сэтгэлийнхээ гүнд өчүүхэн төдий ч хүлээн авдаггүй. Христтэй харилцсаныхаа дараа зарим хүн: “Бурхантай нүүр тулан ярилцаж, нөхөрлөх нь үнэхээр тааламжтай байлаа” гэж хэлдэг. Харин антихрист: “Би бас туршаад үзье. Би христтэй нүүр тулан ярилцаж, хүмүүстэй ярих үед христийн нүүрний хувирал, үйлдэл, үг яриа нь яг ямар байдгийг харъя. Үүнээс юу олж авч, эсвэл олж илрүүлж болохыг, жинхэнэ бурхан хэмээн түүнд итгэх итгэлээ баталгаажуулж, суурь тавихад хүмүүст ашиг тустай эсэхийг би харъя” гэж хэлдэг. Христэд болон Түүний үгэнд ийм хандлагаар ханддаг байж тэд бодитоор хэрэгжүүлж, эсвэл биелүүлж чадах уу? Үгүй, чадахгүй. Тэд ердөө л сонирхож харахаар ирсэн үзэгчдээс өөр юу ч биш, энд огтхон ч үнэнийг эрж хайхаар ирээгүй. Энэ хүмүүсийн Христэд ханддаг, Түүнтэй ярилцдаг хандлага нь яг л хөршийн хэдэн авгайчууд хамтдаа довжоон дээрээ чалчиж, хэнтэй ч ярьсан чин сэтгэлээсээ хандах шаардлагагүйгээр хүн бүр хүссэнээ ярьж байгаатай бага зэрэг төстэй байна гэж та нар бодохгүй байна уу? Энэ хүмүүс Христэд яг л тийм байдлаар ханддаг: “Чи үзэл бодлоо илэрхийл, би өөрийнхийгөө баримталъя. Санал нийлэхгүй байгаатайгаа эвлэрцгээе; чи намайг ятгана гэж найдах хэрэггүй, би ч бас чиний хэлснийг лавтай хүлээн авахгүй.” Энэ нь тийм хандлага биш гэж үү? Энэ ямар хандлага вэ? (Басамжилсан, хүндэтгэлгүй хандлага.) Энэ хүмүүс хачин юм. Чи Христийг Бурханы махбод болсон бие гэж хүлээн зөвшөөрдөггүй юм бол яагаад Түүнд итгэж, Түүнийг дагадаг юм бэ? Хэрвээ чи итгэдэггүй юм бол яагаад зүгээр л яваад өгч болдоггүй юм бэ? Хэн чамайг итгэ гэж албадаад байгаа юм бэ? Бурханд итгэ гэж хэн ч чамайг албадаагүй; энэ бол чиний л сонголт.

Зарим хүн ямар нэг асуудлын талаарх Миний нөхөрлөлийг сонсох үед тэр даруй өөр үзэл бодол төрдөг: “Чи тэгж боддог байж болно, гэхдээ би ингэж бодож байна. Чамд асуудал бүрийн талаар өөрийн гэсэн санаа байдаг, харин надад миний санаа байдаг; хүн бүрд өөрийн гэсэн санаа бий.” Ямар гээчийн амьтан ингэж хэлдэг вэ? Бурхан хүмүүсийг үнэнээр хангах үед энэ нь нэг төрлийн үзэл баримтлал байдаг уу? Бурханы үг академик онол гэж үү? (Үгүй.) Тэгвэл эдгээр нь юу вэ? (Эдгээр нь үнэн.) Илүү тодорхой хэл дээ. (Эдгээр нь хүний биеэ авч явах зарчим болон чиг баримжаа, хүмүүсийн амийн зайлшгүй хэрэгцээ юм.) Бурхан хүмүүсийг үнэнээр хангадаг гэж бид яагаад хэлдэг вэ? Тэр мэдлэгээр хангадаг гэж хэлж байсан удаа бий юу? (Үгүй.) Бурханы үг бол хүмүүсийн идэж, уух зүйл гэж бид яагаад хэлдэг вэ? Бурханы үг яг л хүмүүсийн хоол хүнстэй адил; эдгээр нь чиний махан биеийг тэтгэж, чамайг амьд байлгаж чадна, цаашлаад чамайг сайн сайхан амьдруулж, хүний төрхтэй амьдрах боломжийг чамд олгодог. Эдгээр нь хүний хувьд амь юм! Бурханы үг бол нэг төрлийн мэдлэг, үзэл баримтлал, эсвэл үг хэллэг биш. Мэдлэг, үзэл баримтлал болон хүний уламжлалт соёл нь хүмүүсийг зөвхөн завхруулж л чадна. Хүмүүс эдгээр зүйл байсан байгаагүй амьдарч чадна, гэхдээ хэрвээ хүн амьдарч, шалгуур хангасан, стандартад нийцсэн бүтээгдсэн зүйл болохыг хүсвэл үнэнгүйгээр тэгж чадахгүй. Тэгвэл үнэн гэж яг юу вэ? (Энэ бол биеэ авч явах, үйлдэх, Бурханыг шүтэн мөргөх хэмжүүр юм.) Зөв, энэ нь илүү тодорхой байна. Антихристүүд үүнийг ингэж хардаг уу? Тэд энэ баримтыг хүлээн авдаггүй. Тэд энэ баримтыг няцааж, эсэргүүцэж, ялладаг тул үнэнийг олж авч чаддаггүй. Тэд бодол, үзэл санаандаа: “Чи бол зүгээр л эгэл жирийн хүн. Чи нэг зүйл хэлэхэд бусад хүн үгийн чинь дагуу хэрэгжүүлдэг, тэгэхээр би яагаад зөв зүйл хэлж, тэрийг нь бас хүмүүс хэрэгжүүлж болдоггүй юм бэ? Яагаад чиний хэлсэн зүйл үргэлж зөв, миний хэлсэн зүйл үргэлж буруу байдаг юм бэ? Яагаад чиний үгийг үнэн гэж үздэг атлаа минийхийг мэдлэг, хоосон сургаал гэж үздэг юм бэ?” хэмээн боддог. Энэ нь юун дээр ч үндэслээгүй—энэ бол баримт бөгөөд мөн чанараар тодорхойлогддог зүйл юм. Христ бол Бурханы махбод болсон бие, Түүний мөн чанар бол Бурхан юм. Хэн ч үүнийг үгүйсгэж чадахгүй; антихристүүд үүнийг хүлээн зөвшөөрөхөөс, эсвэл хүлээж авахаас татгалзлаа ч гэсэн тэд үүнийг үгүйсгэж чадахгүй. Хүн Христээс нүүр буруулж, Түүнийг голох тэр мөч бол хүний сүйрлийн мөч юм. Христ болон Түүний үггүйгээр хэн ч аврагдаж чадахгүй. Энэ бол баримт биш гэж үү? (Мөн.) Антихристүүдийн тэдгээр үг, онол хүмүүст ямар босгон байгуулалт авчирч чадах вэ? Хүмүүс тэдгээрийг хүлээн авахгүй бол ямар нэгэн хохирол амсах уу? Үгүй, ямар ч хохирол гарахгүй. Антихристүүдийн үг хэнд ч эерэг нөлөө үзүүлдэггүй, харин ч олон сөрөг нөлөөтэй байдаг. Хэрвээ Христ ганц ч өгүүлбэр хэлэлгүй, зүгээр л ирээд хэдэн жил хэвийн амьдралаар амьдарч байгаад явсан бол хүн төрөлхтөн юу олж авах байсан бэ? Загалмай үүрэхээс өөрөөр хүн төрөлхтөн юу олж авч чадах байсан бэ? Тэд нүглээ улайж, гэмшин, нүгэл дотор амьдарсаар, нүгэлд эргэлт буцалтгүй хүлэгдэж, улам бүр доройтсоор, эцэстээ Бурханы ажил дуусах үед бүгд сүйрэх байсан. Хүн төрөлхтний төгсгөл тийм л байх байсан. Гэвч Христ ирж, Бурханы хүнд хэлэхийг зорьсон бүх үгийг илэрхийлж, шаардлагатай бүх үнэнээр хүнийг хангаж, Бурханд юу байгаа болон Тэр юу болохыг хүнд илчилсэн. Энэ нь эргэлтийн цэгийг хүнд авчирсан биш гэж үү? Өөрөөр хэлбэл, Христийн үг хүнд эргэлтийн цэгийг бий болгосон биш гэж үү? (Тийм.) Энэхүү эргэлтийн цэг нь юу вэ? Үндсэндээ, энэ нь хүмүүс яллагдаж, сүйрэхтэй нүүр тулж байснаа аврагдах боломж, найдвар тээдэг болон өөрчлөгдсөн явдал юм. Энэ бол эргэлтийн цэг биш гэж үү? Хүмүүст найдвар ирсэн; тэд гэгээ орохыг харж, аврагдаж, амьд үлдэх найдвар төрсөн. Бурхан хүн төрөлхтнийг устгаж, шийтгэх үед тэд сүйрэл, шийтгэлээс зайлсхийж чадна. Тэгвэл, амьд үлдэж чадах ийм хүн төрөлхтний хувьд Христ болон Түүний үг сайн зүйл үү, муу зүйл үү? (Сайн зүйл.) Эдгээр нь сайн зүйл. Антихристүүд ийм Христэд, ийм эгэл жирийн хүнд ингэтлээ дайсагнаж, жигшин зэвүүцдэг нь тэдний мөн чанарыг тодорхойлдог.

Бие махбодтой болсон Бурханд хандах антихристүүдийн хандлагад бас нэг илрэл байдаг: Тэд: “Би христийг эгэл жирийн хүн гэдгийг хармагцаа л оюун санаанд минь үзэл бий болсон. "Үг нь махбодоор илэрсэн" бол бурханы илэрхийлэл; энэ бол үнэн, би үүнийг хүлээн зөвшөөрнө. Надад "Үг нь махбодоор илэрсэн" байхад л хангалттай. Би христтэй харилцах шаардлагагүй. Хэрвээ надад үзэл, сөрөг байдал, эсвэл сул дорой байдал байвал би бурханы үгийг уншаад л шийдвэрлэж чадна. Бие махбодтой болсон бурхантай харилцвал үзэлтэй болох амархан, энэ нь намайг хэтэрхий гүнзгий завхарсан гэдгийг харуулна. Хэрвээ бурхан намайг яллачихвал надад аврагдах ямар ч найдвар байхгүй болно. Тиймээс би зүгээр л өөрөө бурханы үгийг уншсан нь дээр. Тэнгэр дэх бурхан л хүмүүсийг аварч чадна” гэж хэлдэг. Бурханы өнөөгийн үг, нөхөрлөл, ялангуяа антихристүүдийн зан чанар, мөн чанарыг ил болгодог тэр үгс л антихристүүдийн зүрх сэтгэлийг хамгийн их өвтгөж, тэднийг хамгийн их шаналгадаг. Эдгээр нь антихристүүдийн уншихыг хамгийн их хүсдэггүй үгс юм. Тиймээс Бурхан хурдхан газраас яваасай гэж антихристүүд зүрх сэтгэлдээ хүсдэг, ингэснээр тэд газар дээр өөрсдийн хүч чадлаар ноёрхож чадна. Бурханы махбод болсон бие болох энэ эгэл жирийн хүн өөрсдөд нь илүүц гэж тэд итгэдэг. Тэд үргэлж: “Би христийн номлолыг сонсохоосоо өмнө бүх зүйлийг ойлгодог юм шиг санагдаж, бүх талаараа сайн байсан, гэхдээ христийн номлолыг сонссоны дараа өөр болчихлоо. Одоо надад юу ч байхгүй мэт, би тун шалихгүй, хөөрхийлөлтэй мэт санагдаж байна” хэмээн тунгаан боддог. Тиймээс тэд Христийн үг өөрсдийг нь биш, харин бусдыг ил болгож байна гэж тогтоодог бөгөөд Христийн номлолыг сонсох шаардлагагүй, "Үг нь махбодоор илэрсэн"-ийг уншихад хангалттай гэж боддог. Антихристүүдийн зүрх сэтгэл дэх гол санаархал нь Бурхан махбод болсон баримтыг үгүйсгэх, Христ үнэнийг илэрхийлдэг гэх баримтыг үгүйсгэх явдал бөгөөд ингэснээр Бурханд итгэх итгэлээрээ дамжуулан аврагдах найдвар тэдэнд бий болж, тэд чуулганд хаанчлан, улмаар Бурханд итгэх анхны санаархлаа биелүүлж чадна гэж боддог. Антихристүүд Бурханыг эсэргүүцэх төрөлхийн уг чанартай; тэд бие махбодтой болсон Бурхантай гал, ус мэт харш, мөнхийн үл зохицолтой байдаг. Христ оршин байгаа өдөр бүр тэдний хувьд гялалзахад хэцүү өдөр бөгөөд өөрсдийгөө яллагдаж, таягдан хаягдаж, сүйрч, шийтгүүлэх аюулд орж байна гэж тэд боддог. Христ ярихгүй, ажиллахгүй л байвал, мөн Бурханы сонгосон хүмүүс Христийг дээдлэхгүй л байвал антихристүүдэд боломж нь ирлээ гэсэн үг. Тэдэнд чадвараа харуулах боломж олддог. Гараа нэг дохиход л бөөн хүн тэдний талд урван орж, антихристүүд хаанчилж чадна. Антихристүүдийн уг чанар-мөн чанар бол үнэнийг зэвүүцэж, Христийг үзэн ядах явдал юм. Тэд хэн нь илүү авьяастай, эсвэл хэн нь илүү чадвартай вэ гэдэг дээр Христтэй өрсөлддөг; хэнийх нь үг илүү хүчтэй, хэний чадвар илүү вэ гэдэг дээр тэд Христтэй өрсөлддөг. Тэд Христтэй ижил зүйл хийж байгаа учраас, Христ тэр хоёр хоёулаа адилхан хүн хэдий ч Христийн чадвар, мэдлэг боловсрол эгэл жирийн хүнээс дээрдэх зүйлгүй гэдгийг бусдад харуулахыг зорьдог. Антихристүүд Христтэй бүх талаар өрсөлдөж, хэн нь илүү вэ гэдгээр тэмцэлдэн, Христ бол Бурхан, Тэр бол Бурханы Сүнсний биелэл, Тэр бол үнэний биелэл гэх баримтыг бүх өнцгөөс нь үгүйсгэхийг оролддог. Тэд мөн Христ Бурханы сонгосон хүмүүсийн дунд эрх мэдлийг атгахаас сэргийлэх, Христийн үгийг Бурханы сонгосон хүмүүсийн дунд түгээж, хэрэгжүүлэхээс сэргийлэх, тэр ч бүү хэл Христийн хийдэг зүйлс болон хүмүүст тавьдаг шаардлага, хүмүүст тавьдаг найдварыг Бурханы сонгосон хүмүүсийн дунд биелэгдэхээс сэргийлэх янз бүрийн арга зам, арга хэрэгслийг бүх салбарт сүвэгчилдэг. Христийг байх үед тэд үл тоогдож, чуулганд яллагдаж, гологдсон мэт—харанхуй буланд зогсоосон бүлэг хүн мэт байдаг. Янз бүрийн илрэлээс нь бид антихристүүд бол мөн чанар болон зан чанараараа Христтэй эвлэршгүй—тэд Түүнтэй нэг тэнгэр дор байж чадахгүй гэдгийг харж болно! Антихристүүд төрсөн цагаасаа л Бурханд дайсагнаж ирсэн; тэд тусгайлан Христийг эсэргүүцэхээр гарч ирсэн, Христийг ялан, дийлэхийг хүсдэг. Христийн хийдэг бүх ажил дэмий хоосон, талаар болоосой гэж тэд хүсдэг, ингэснээр эцэстээ Христ олон хүнийг олж авахгүй, хаана ч ажилласан ямар ч үр дүнд хүрэхгүй. Тэгсэн цагт л антихристүүд баярлана. Хэрвээ Христ үнэнийг илэрхийлж, хүмүүс үнэнээр цангаж, үнэнийг эрж хайж, баяртайгаар хүлээн авч, Христийн төлөө өөрсдийгөө зарлагадаж, бүхнийг орхиж, Христийн сайн мэдээг түгээхэд бэлэн байвал антихристүүд сэтгэлээр унаж, маргааш гэх найдваргүй болсон мэт, өөрсдөд нь гялалзах боломж хэзээ ч гарахгүй, яг л там руу хаягдсан мэт санагддаг. Антихристүүдийн эдгээр илрэлийг харахад, Бурхантай тэмцэлдэж, Түүнд дайсагнадаг тэдний энэ мөн чанарыг хэн нэгэн тэдэнд суулгаж өгсөн үү? Яавч үгүй; тэд төрөлхийн ийм. Тиймээс антихристүүд бол төрсөн цагаасаа л диаволын хойд дүр, газар дээр ирсэн диавол болох нэг төрлийн хүн юм. Тэд үнэнийг хүлээн авах ямар ч боломжгүй, Христийг хэзээ ч хүлээн авахгүй, Христийг өргөмжлөхгүй, Христийг гэрчлэхгүй. Хэдийгээр өнгөн дээрээ тэд Христийг ил тодоор шүүж, яллаж харагдахгүй, дуулгавартайгаар тодорхой хэмжээний хүчин чармайлт гаргаж, төлөөс төлж чаддаг ч, боломж гармагц, цаг нь бүрдмэгц антихристүүдийн Бурхантай эвлэршгүй байдал нь ил гарна. Антихристүүд Бурхантай тэмцэлдэж, бие даасан хаанчлал байгуулдаг баримт ил тод болно. Энэ бүх зүйл антихристүүд байгаа газар өмнө нь тохиолдож байсан, Бурхан эцсийн өдрүүдийн шүүлтийн ажлаа хийж буй энэ жилүүдэд онцгойлон түгээмэл байгаа; олон хүн үүнийг туулж, ажигласан.

2020 оны 6 дугаар сарын 27