ТА НАР АЖЛЫГ ОЙЛГОХ ЁСТОЙ—ТӨӨРӨЛДСӨН БАЙДЛААР БҮҮ ДАГА!

Одоо үед төөрөлдсөн байдлаар итгэдэг олон хүн бий. Та нарын сониуч зан хэтэрхий их, ерөөлийг эгээрэх хүсэл хэтэрхий их, мөн амийг эрэлхийлэх тэмүүлэл чинь хэтэрхий жаахан. Өнөө үеийн хүмүүс Есүст итгэх итгэлдээ урам зоригоор дүүрэн байдаг. Есүс тэднийг тэнгэрлэг гэрт буцаан авах болохоор яахан итгэхгүй байж чадах билээ? Зарим хүн бүхий л амьдралынхаа туршид итгэгч байдаг; дөч, тавин жил итгэснийхээ дараа ч тэд Библийг уншихаас хэзээ ч залхдаггүй. Учир нь, юу ч тохиолдсон бай хамаагүй, итгэж байгаа цагт тэнгэр лүү очно гэж тэд боддогa. Та нар энэ замаар Бурханыг хэдхэн жил л дагасан атал аль хэдийн гуйвжээ; та нарын ерөөл олж авах хүсэл хэтэрхий хүчтэй учир хатуужлаа алджээ. Энэ үнэн замаар алхаж байгаа чинь та нарын ерөөл олж авах хүсэл болон сониуч занд захирагддаг. Ажлын энэ үе шатны талаар та нарт өчүүхэн ч ойлголт байхгүй. Миний өнөөдөр хэлж байгаа зүйлийн ихэнх нь Есүст итгэдэг хүмүүст хандаагүй, ердөө л тэдний үзлийг сөрөх гэж ч Би үүнийг хэлж байгаа юм биш. Үнэндээ, ил болж байгаа эдгээр үзэл нь та нарын дотор оршдог яг тэр үзлүүд юм, учир нь яагаад Библийг хойш тавьж ирснийг, яагаад Би Еховагийн ажил хуучирсан, Есүсийн ажил хуучирсан гэж хэлдгийг та нар ойлгодоггүй. Үнэндээ та нар ил гаргаж хэлээгүй олон үзлээ тээхээс гадна олон олон бодол санаа зүрх сэтгэлийн чинь гүнд хадгалагддаг бөгөөд та нар зүгээр л олныг дагадаг. Та нарын үзэл цөөхөн гэж бодож байна уу? Та нар зүгээр л тэдгээрийн талаар ярихгүй байгаа төдий! Үнэндээ та нар Бурханыг зөвхөн нэр төдий дагаж, үнэн замыг огтхон ч эрж хайж яваагүй бөгөөд амь олж авах бодолтой ирээгүй. Зөвхөн юу тохиолдохыг харахыг хүссэн хандлага л та нарт бий. Та нар олон хуучин үзлээ орхиогүй учраас өөрийгөө бүрэн өргөж чадсан хүн та нарын дунд нэг ч байхгүй. Энэ мөчид ирчхээд та нар одоо ч гэсэн хувь заяаныхаа талаар санаа зовж, өдөр шөнөгүй боддог ба хэзээ ч үүнийгээ больж чаддаггүй. Би фарисайчуудын талаар ярихдаа шашны “ахмадууд”-ын талаар ярьдаг гэж чи бодож байна уу? Та нар өнөө үеийн хамгийн дэвшилтэт фарисайчуудын төлөөлөгчид биш гэж үү? Намайг Библитэй харьцуулдаг хүмүүсийг Би дурдахдаа зөвхөн шашны хүрээний Библийн мэргэжилтнүүдийг хэлж байна гэж чи бодож байна уу? Бурханыг дахин нэгэнтээ загалмайд хадаж буй хүмүүсийн тухай ярихдаа Би шашны хүрээний удирдагчдын тухай ярьж байна гэж чи бодож байна уу? Та нар энэ дүрд тоглох хамгийн сайн жүжигчид биш гэж үү? Хүмүүсийн үзлийн эсрэг тэмцэхийн тулд Миний хэлдэг бүх үг шашны пасторууд болон ахлагчдыг ердөө л дооглож байгаа гэж чи бодож байна уу? Та нар бас энэ бүх зүйлд оролцоогүй гэж үү? Та нар хэдхэн үзэл тээдэг гэж чи бодож байна уу? Ердөө л та нар бүгд одоо маш ухаалаг байж сурсан. Та нар ойлгодоггүй зүйлсийнхээ талаар ярьдаггүй, тэр талаарх мэдрэмжээ харуулдаггүй ч дотор чинь хүндлэл, дуулгавартай байх сэтгэл ердөө ч байдаггүй. Та нарын харж байгаагаар судлах, ажиглах болон хүлээх нь та нарын өнөөдрийн хамгийн шилдэг хэрэгжүүлэлтийн арга зам юм. Та нар хэтэрхий ухаалаг байж сурсан. Гэвч энэ бол нэг төрлийн сэтгэл зүйн заль мэх гэдгийг та нар ухаарч байна уу? Та нарын нэг хормын ухаалаг байдал мөнхийн гэсгээлтээс зугтахад чинь тусална гэж та нар бодож байна уу? Та нар үнэхээр “ухаалаг” байж сурсан! Түүнчлэн, зарим хүн Надаас: “Хэзээ нэг өдөр шашны хүрээний хүмүүс надаас “Яагаад та нарын Бурхан ганц ч гайхамшиг үзүүлээгүй юм бэ?” гэж асуувал би юу гэж тайлбарлах ёстой вэ?” гэх мэтийн зүйл асуудаг. Одоо зөвхөн шашны хүмүүс тиймэрхүү зүйл асуухгүй. Харин ч чи өнөөдрийн ажлыг ойлгодоггүй бөгөөд хэтэрхий олон үзэлтэй байдаг. Шашны албан тушаалтнуудыг дурдахдаа Би хэнийг хэлдгийг чи одоо ч мэдэхгүй гэж үү? Би хэнд Библийг тайлбарлаж байгааг чи мэдэхгүй гэж үү? Бурханы ажлын гурван үе шатыг тайлбарлахдаа Би хэнд зориулж ярьж байгааг чи мэдэхгүй гэж үү? Би эдгээр зүйлийг хэлээгүй байсан бол та нар тийм амархан үнэмших байсан уу? Та нар тийм амархан толгой бөхийх байсан уу? Та нарын хувьд хуучин үзлээ тийм амархан хойш нь тавих байсан уу? Ялангуяа хэзээ ч хэнд ч захирагдаж байгаагүй тэр “жинхэнэ эрчүүд” тийм амархан захирагдах байсан уу? Та нар доод зэргийн хүн чанартай, маш дорд хэв чанартай, хөгжил дорой уураг тархитай, удаан хугацаанд Бурханд итгэсэн замналтай биш, та нарт үнэндээ нэлээд их үзэл байдаг бөгөөд төрөлхийн уг чанар чинь хэнд ч амархан захирагддаггүй гэдгийг Би мэднэ. Өнөөдөр гэхдээ та нар хүчинд автаж, аргагүй болсон учраас захирагдах чадвартай байдаг; та нар бол ур чадвараа чөлөөтэй ашиглах чадваргүй байгаа төмөр торон дахь барс. Та нар далавчтай байсан ч нисэхэд хэцүү байх болно. Хэдийгээр ерөөл хүртээгүй боловч та нар дагахад бэлэн байсаар байдаг. Гэхдээ энэ нь та нарын “эрдүү хүний” зан биш, харин ч та нар бүрэн сүйрч, аргаа барж байна гэсэн үг юм. Энэ бүх ажил та нарыг цохисон. Хэрвээ та нарын хүрч чадах ямар нэгэн зүйл байсан бол та нар өнөөдрийнх шигээ дуулгавартай байхгүй байсан, учир нь өмнө нь та нар бүгдээрээ цөл дэх зэрлэг хулан байсан. Тиймээс өнөөдөр хэлж байгаа зүйл нь зөвхөн янз бүрийн шашин, урсгалын хүмүүс рүү чиглээд зогсохгүй, тэдний үзлийн эсрэг тэмцэхийн төлөө байдаггүй; харин ч та нарын үзлийн эсрэг тэмцэхийн төлөө байдаг.

Зөвт байдлын шүүлт эхэллээ. Бурхан хүмүүсийн төлөөх нүглийн тахил болон үйлчилсээр байх болов уу? Тэр тэдний төлөө дахин нэгэнтээ агуу эмчийн дүрд тоглох болов уу? Бурханд үүнээс илүү их эрх мэдэл байхгүй гэж үү? Бүлэг хүмүүсийг аль хэдийн бүрэн төгс болгож сэнтийн өмнө аваачсан; гэсэн ч Тэр чөтгөрүүдийг хөөн зайлуулж, өвчтэйг эдгээх болов уу? Энэ чинь хэтэрхий хуучинсаг биш гэж үү? Энэ байдлаар үргэлжилбэл гэрчлэл боломжтой байх болов уу? Бурхан нэгэнтээ загалмайд хадагдсанаараа Бурхан үүрд цовдлогдсон болох уу? Тэр чөтгөрүүдийг нэг удаа хөөн зайлуулчхаад үүрд хөөн зайлуулсаар байж болох уу? Үүнийг доромжлол гэж тооцохгүй гэж үү ? Зөвхөн ажлын энэ үе шат өмнөхөөсөө сүрлэг байх үед л эрин үе урагшлан хөгжих бөгөөд тэр цагт эцсийн өдрүүд ирж, энэ эрин үе дуусах цаг ирэх болно. Тиймээс, үнэнийг эрэлхийлдэг хүмүүс үзэгдлүүдийг ойлгож мэдэхэд анхаарлаа хандуулах ёстой; энэ бол суурь нь. Би үзэгдлийн талаар та нартай нөхөрлөх болгондоо зарим хүмүүсийн зовхи нь унжиж, сонсох хүсэлгүйгээр зүүрмэглэхийг дандаа хардаг. Бусад нь: “Чи яагаад сонсохгүй байгаа юм бэ?” гэж асуух үед тэд: “Энэ миний аминд, эсвэл бодит байдал руу ороход минь туслахгүй. Бидний хүсдэг зүйл бол хэрэгжүүлэлтийн зам” гэж хэлдэг. Би хэрэгжүүлэлтийн замаас илүү ажлын тухай ярих болгонд тэд: “Таныг ажлын тухай ярингуут би унтаж эхэлдэг” гэдэг. Намайг хэрэгжүүлэлтийн тухай ярьж эхлэнгүүт тэд тэмдэглэж эхэлдэг бөгөөд Намайг ажлын талаар эргээд тайлбарлахад тэд буцаад сонсохоо больдог. Та нар одоо юугаар зэвсэглэх ёстойгоо мэдэх үү? Үүний нэг талд нь ажлын тухай үзэгдэл, нөгөө талд нь чиний хэрэгжүүлэлт багтана. Чи хоёр талыг хоёуланг нь ойлгож авах ёстой. Хэрвээ аминд дэвшил гаргах эрэл хайгуулд чинь үзэгдэл байхгүй бол чамд суурь байхгүй байна. Хэрвээ чамд өчүүхэн ч үзэгдэл байхгүй, зөвхөн хэрэгжүүлэлтийн зам байгаа бөгөөд удирдлагын төлөвлөгөөний ерөнхий ажлын талаар ямар ойлголт чамд байдаггүй бол чи ямар ч хэрэггүй. Үзэгдэлтэй холбоотой үнэнийг чи ойлгох ёстой бөгөөд хэрэгжүүлэлттэй холбоотой үнэний тухайд гэвэл тэдгээрийг ойлгомогцоо хэрэгжүүлэлтийн зохистой замыг олох хэрэгтэй; чи үгийн дагуу хэрэгжүүлж, өөрийнхөө нөхцөл байдлын дагуу орох хэрэгтэй. Үзэгдлүүд бол үндэс суурь бөгөөд хэрэв чи энэхүү бодит үнэнд ямар ч анхаарал хандуулдаггүй бол эцсийг нь хүртэл дагаж чадахгүй; ийм маягаар туршлагажих нь чамайг нэг бол замаа алдахад, эс бөгөөс унаж бүтэлгүйтэхэд хүргэнэ. Чи яагаад ч амжилтад хүрэхгүй! Агуу үзэгдлийг үндэс сууриа болгоогүй хүмүүс зөвхөн бүтэлгүйтэж, амжилтад хүрч чадахгүй. Чи бат зогсож чадахгүй! Бурханд итгэх нь юу болохыг чи мэдэх үү? Бурханыг дагах нь юу гэсэн үг болохыг мэдэх үү? Үзэгдэлгүйгээр чи ямар замаар алхах вэ? Өнөөдрийн ажилд хэрвээ чамд үзэгдэл байхгүй бол чи огтхон ч бүрэн төгс болгуулж чадахгүй. Чи хэнд итгэдэг вэ? Чи яагаад Түүнд итгэдэг вэ? Яагаад Түүнийг дагадаг вэ? Чи өөрийнхөө итгэлийг нэг төрлийн тоглоом гэж хардаг уу? Чи өөрийнхөө аминд нэг төрлийн тоглоом мэт ханддаг уу? Өнөөдрийн Бурхан бол хамгийн агуу үзэгдэл юм. Түүний хэр ихийг чи мэддэг вэ? Түүнээс хэр ихийг харсан бэ? Өнөөдрийн Бурханыг харсан болохоор Бурханд итгэх итгэлийн чинь суурь бат бөх үү? Ийм будилсан байдлаар дагаж байгаа цагт аврал хүртэнэ гэж чи бодож байна уу? Чи булингартай уснаас загас барьж чадна гэж бодож байна уу? Энэ тийм энгийн гэж үү? Өнөөдрийн Бурханы айлддаг үгийн талаарх хэр олон үзлийг чи хаясан бэ? Чамд өнөөдрийн Бурханы талаарх үзэгдэл байгаа юу? Өнөөдрийн Бурханы талаарх ойлголт чинь хаана оршдог вэ? Зүгээр л дагаснаараа, эсвэл зүгээр л харснаараа Түүнийгb олж авч чадна, хэн ч чамайг хаяж чадахгүй гэж чи үргэлж итгэдэг. Бурханыг дагах тийм амархан гэж бүү бод. Гол нь чи Түүнийг мэдэж, Түүний ажлыг мэдэх ёстой бөгөөд Түүний төлөө зовлон бэрхшээл туулж, өөрийнхөө амийг золиосолж, Түүгээр төгс болгуулах хүсэлтэй байх ёстой. Энэ бол чамд байх ёстой үзэгдэл юм. Нигүүлсэл эдлэх тухай үргэлж боддог байж болохгүй. Бурхан зүгээр л хүмүүсийг баясгаж, тэдэнд нигүүлсэл хайрлахын төлөө энд байгаа гэж бүү бод. Чи эндүүрч байна! Хүн Бурханыг дагахын тулд амьдралаараа дэнчин тавьж чадахгүй, мөн энэ ертөнцийн өмч хөрөнгөө орхиж чадахгүй бол эцсээ хүртэл Түүнийг дагасаар байж чадахгүй нь лавтай! Чи өөрийн суурь болох үзэгдэлтэй байх ёстой. Хэрвээ нэг өдөр гай гамшиг чамд тохиолдвол чи юу хийх ёстой вэ? Чи дагах чадвартай хэвээр байх уу? Эцсээ хүртэл дагаж чадах эсэхээ хөнгөмсгөөр бүү хэл. Чи эхлээд нүдээ том нээгээд гагцхүү одоо хэзээ болохыг харсан нь дээр байсан юм. Хэдий та нар одоо сүмийн багана шиг байж болох боловч энэ баганууд өт хорхойд идэгдэж, сүмийг нурж унахад хүргэх цаг ирэх болно, учир нь одоогоор та нарт маш олон үзэгдэл дутагддаг. Та нар зөвхөн өөрсдийнхөө бяцхан ертөнцөд анхаарал хандуулж эрж хайх хамгийн найдвартай бөгөөд зүй зохистой арга зам юу болохыг мэддэггүй. Та нар өнөөдрийн ажлын үзэгдлийг анхаардаггүй бөгөөд эдгээр зүйлийг зүрх сэтгэлдээ хадгалдаггүй. Нэгэн өдөр та нарын Бурхан өөрсдийг чинь хамгийн дасаагүй газарт аваачих болно гэж та нар бодож үзсэн үү? Би та нараас бүх зүйлийг чинь нэг өдөр булааж авахад та нарт юу болохыг төсөөлж чадах уу? Тэр өдөр та нарын эрч хүч одоогийнх шиг байх уу? Та нарын итгэл дахин гарч ирэх үү? Бурханыг дагахдаа “Бурхан” хэмээх энэхүү хамгийн агуу үзэгдлийг мэдэх ёстой. Энэ бол хамгийн чухал асуудал. Бас ариун болохын тулд энэ хорвоогийн хүмүүсээс харьцаагаа таслаад гарцаагүй Бурханы гэр бүл болно гэж бүү бод. Өнөө үед бүтээлийн дунд Бурхан Өөрөө ажиллаж байгаа; Бурхан кампанит ажил хийхээр биш, Өөрийн ажлыг хийхээр хүмүүсийн дунд ирсэн. Өнөөдрийн ажил бол тэнгэр дэх махбод болсон Бурханы ажил гэдгийг мэдэж чадах цөөхөн хүн ч та нарын дунд байдаггүй. Энэ бол та нарыг гайхалтай авьяастай хүмүүс болгосон тухай биш; энэ бол хүний амьдралын утга учрыг мэдэж, хүмүүний хүрэх газрыг мэдэн, Бурханыг болон Түүний бүрэн дүүрэн байдлыг мэдэхэд та нарт туслахын төлөө юм. Чи бол Бүтээгчийн гар дахь бүтээл гэдгээ мэдэх ёстой. Чи юуг ойлгох ёстой, юуг хийх ёстой, Бурханыг хэрхэн дагах ёстой зэрэг нь чиний ухаж ойлгох ёстой үнэн биш гэж үү? Энэ чиний харах ёстой үзэгдлүүд биш гэж үү?

Хүмүүс үзэгдэлтэй байсан цагт суурьтай байдаг. Энэхүү суурин дээр үндэслэн хэрэгжүүлэх үед, ороход хамаагүй илүү амархан байх болно. Тийм болохоор орох суурьтай болох үед чиний болгоомжлол байхгүй болж, чиний хувьд ороход маш амархан байх болно. Үзэгдлийг ойлгох, Бурханы ажлыг мэдэхийн энэ тал нь чухал юм; үүнийг та нар нөөцдөө байлгах ёстой. Хэрвээ чи үнэний энэ талаар зэвсэглээгүй, харин зөвхөн хэрэгжүүлэлтийн замын талаар л ярьж мэддэг бол энэ нь асар том дутагдал болно. Та нарын олонх нь үнэний энэ талыг чухалчилдаггүйг Би олж мэдсэн бөгөөд үүнийг сонсох үедээ зөвхөн үг болон хоосон сургаалыг сонсож байгаа мэт байдаг. Нэг л өдөр чи алдах болно. Өнөө үед чиний сайн ойлгодоггүй, хүлээж авдаггүй зарим нэг айлдвар байдаг; энэ тохиолдолд чи тэвчээртэйгээр эрж хайх ёстой, бөгөөд ойлгох өдөр чамд ирнэ. Өөрийгөө улам их үзэгдлээр аажмаар зэвсэглэ. Чи ердөө цөөхөн сүнслэг сургаалыг ойлгодог байсан ч гэсэн энэ нь үзэгдэлд анхаарал хандуулахгүй байснаас, мөн юу ч ойлгохгүй байснаас бас л дээр. Энэ бүхэн нь чиний оролтод нэмэртэй бөгөөд эргэлзээг чинь арилгана. Үзлээр дүүрсэн байснаас энэ нь дээр. Эдгээр үзэгдлийг суурь болговол чи хавгүй дээр байх болно. Чамд ямар ч болгоомжлол байхгүй болж, зоригтой бөгөөд итгэлтэй орж чадна. Үргэлж төөрөлдөж, эргэлзсэн байдлаар Бурханыг дагах ямар хэрэгтэй юм бэ? Энэ чинь чихээ бөглөөд хонх хулгайлж байгаатай адил биш гэж үү? Хаанчлалд омог бардам алхаж орвол хэчнээн сайхан! Яагаад болгоомжлолоор дүүрэн байна гэж? Энэ бол гагцхүү өөрийгөө жинхэнэ тамд оруулж байгаа хэрэг биш гэж үү? Еховагийн ажлын тухай, Есүсийн ажлын тухай, ажлын энэ үе шатны тухай ойлголттой болоод чи суурьтай болох болно. Одоохондоо чи үүнийг тун энгийн гэж төсөөлж магадгүй. Зарим хүн “Цаг нь ирж, Ариун Сүнс агуу ажлыг эхлүүлэх үед би энэ бүх зүйлсийн талаар ярьж чаддаг болно. Яг одоо би үнэхээр ойлгохгүй байгаа нь үнэндээ Ариун Сүнс намайг сайн гэгээрүүлээгүйгээс болж байгаа юм” гэдэг. Энэ тийм ч амархан биш. Чи үнэнийгc одоо хүлээн зөвшөөрөхөд бэлэн байгаа бол цаг нь ирэхэд үүнийг чадварлагаар ашиглана гэсэн үг биш. Энэ нь тийм байх албагүй! Чи одоо маш сайн зэвсэглэсэн бөгөөд тэр шашны хүмүүс болон шилдэг онолчдод хариу үзүүлж, бүр тэднийг няцаахад чамд асуудал байхгүй гэж итгэдэг. Чи үнэхээр тэгж чадах уу? Ердөө л тийм өнгөцхөн туршлагатайгаар чи ямар ойлголтын тухай ярьж чадах юм бэ? Үнэнээр зэвсэглэх, үнэний тулаанд тулалдах, Бурханы нэрээр гэрчлэл хийх гэдэг нь —Бурхан ажиллаж байгаа цагт бүх зүйл биелэх болно хэмээн чиний боддог шиг биш юм. Тэр үед магадгүй зарим асуулт чамайг мухардуулж, тэгээд чи цочирдон мэгдэнэ. Чи ажлын энэ үе шатны талаар тодорхой ойлголттой эсэх, мөн чи үнэндээ хэр ихийг мэддэг вэ гэдэг нь гол юм. Хэрвээ дайсны хүчийг ялан дийлж, шашны хүчнүүдийг ялж чадахгүй бол чи ямар ч хэрэггүй хүн болохгүй гэж үү? Хэрвээ чи өнөөдрийн ажлыг мэдэрч, нүдээрээ харж, чихээрээ сонссон боловч эцэстээ гэрчлэл хийж чадахгүй бол чамд үргэлжлүүлэн амьдрах нүүр байсаар байх уу? Чи хэнтэй нүүр тулгарч чадах байсан бэ? Тийм хялбар байна гэж одоо бүү бод. Хожмын ажил чиний төсөөлж байгаа шиг хялбар байхгүй; Үнэний дайнд тулалдана гэдэг тийм амархан, тийм энгийн биш. Яг одоо чи зэвсэглэх хэрэгтэй; хэрвээ одоо үнэнээр зэвсэглэхгүй бол цаг нь ирж, Ариун Сүнс ер бусын байдлаар ажиллахгүй байх үед чи юу хийхээ мэдэхгүй.

Тайлбар:

a. Эх бичвэрт “тэд боддог” гэсэн үг байдаггүй.

b. Эх бичвэрт “Түүнийг” гэдэг үг байдаггүй.

c. Эх бичвэрт “үнэнийг” гэдэг үг байдаггүй.

Өмнөх: ПЕТРИЙН ТУРШЛАГА: ГЭСГЭЭЛТ, ШҮҮЛТИЙН ТАЛААРХ ТҮҮНИЙ МЭДЛЭГ

Дараах: ЧИ ЗАМЫН СҮҮЛЧИЙН ХЭСЭГТ ЯАЖ АЛХАХ ЁСТОЙ ВЭ?

Одоо үед гай гамшиг ойр ойрхон тохиолдож, Эзэн эргэн ирэх тухай зөгнөлүүд үндсэндээ биелсэн. Бид Эзэнийг хэрхэн угтан авч болох вэ?
Холбоо барих
Messenger дээр бидэнтэй холбоо барих

Холбогдох контент

ХУУЛИЙН ЭРИН ҮЕ ДЭХ АЖИЛ

Израильчууд дээр хийсэн Еховагийн ажил нь газар дээрх Бурханы эх нутаг буюу Түүний байдаг ариун газрыг хүн төрөлхтний дунд байгуулжээ....

АЖИЛ БА ОРОЛТ (9)

Угсаатны хатуу уламжлал, сэтгэлгээ нь хүний цэвэр ариун, цайлган сэтгэлд эртнээс таагүй нөлөө үзүүлж ирсэн бөгөөд сэтгэл хөдлөлгүй,...

Тохиргоо

  • Текст
  • Загвар

Цулгуй өнгө

Загвар

Үсгийн хэв

Үсгийн хэмжээ

Мөр хоорондын зай

Мөр хоорондын зай

Хуудасны өргөн

Гарчиг

Хайх

  • Энэ текстийг хайх
  • Энэ номоос хайх